A Demad er a Babeluades me a Osobeled, el Jesus Kristo, a medengelkid e betik a rengrir er kid. … Ng sebeched el mo melchesuar a beltikelreng me a chubechub er tir er a chelsel a taem el de ngara ringel.

10491_881_63reeves

Me chelechal techelled el kebetech el odos el meliuekl er a beluulechad, eng mechas a rengmam er a olchotel a klaumerang er kemiu. Betok er kemiu a kot malechub e kom ongeru el telcheroll el chedal a Ikelesia. Aki mesterir a betok el odos el ngara omesiou er a kakerous el okedong, ngara kemangel omerael el mora ikelesia, e chuarm el meruul e oltirakl a chedaol telbiil er a templo. Aki chemat er kemiu. Kemiu a uchelel a rechedal a Rubak er chelechal sils!

Ngak me a bechik, er a Mel, a dirk mlo medengelii a Mollie Lenthal er a ki moldingel er a basio er a ngesechel a cherchar er a Australia. Aki mlo metik el kmo a Mollie, el klebokel el ngara okeuid ma euid a rekil, a dimlak a ngelekel e dirkak a ta el bechiil. Ngka di ngii el ta el ngalek, ea rechad er a blil a meketeket el rak er a le mad. Te di terung a kot el kmeed el chedal el kuk kiei er a ta er a basio. Ak mle mereched, el mo omelchesiu er a Chedaol Reng louchais er ngak, el di ngii me a longedecheduch er ngak a Chedam er a Babeluades: “A Mollie adiakel cheloit! A Mollie a ngelekek! Ngak a Demal! Ngii a klou a belkul ngalek el redil er a telungalek er ngak, e ngii a diak el cheloit!”

A ta er a kot el soak el cheldecheduch el kirel a klengar er a Osobel a cheldechedechal a Lazarus. A chedaol llechukl a kmo a “Jesus a ulebeltikelreng el mora Martha, … me a merrengel er a [Maria], me a [ochederir] er a Lazarus.”¹ A tekoi a mlora Jesus el kmo a Lazarus a kmal smecher, eng di a Jesus a dimlak el mereched el mong; Ngii a kiliei el muut el eru el klebesei, e melekoi el kmo “tial secher … a kirel a klebkellel a Dios, me luchul ea Ngelekel a Dios bo el nguu a klebkall.”²

A bocha lodengei el kmo a Jesus a meremang, ea Martha “mlo omes er ngii,”³ e ulechais er Ngii a mla duubech. A Lazarus a mla “mo tela el klebesei el le ngara debull.”⁴ Ngelmangel, e rurta Martha el mo remei el mo mesubed er a Maria el kmo a Rubak a mla mei.⁵ Meng ngara klengit el reng, a Maria e rurta el mora Jesus, e milchoit, er iou er ochil, e longelang.⁶

Kede medengei el kmo “a Jesus er a lesa [Maria] el lemangel,… eng mlo mekngit a rengul, e bekikl,” e uleker el kmo ng delakl er ker.

“Te dula er ngii el kmo, Rubak, mei e mesang.”⁷

E sola kede chemuiu a ikel kot el chubechub, e ungil tekoi er a chelsel chedaol llechukl: “A Jesus a lilangel.”⁸

A Apostol James E. Talmage a milluches: “Tial ues er tirkal teru el redil el kmal ngara klengit el reng … a rirellii a Jesus el mo ngara klengit el reng [lobengterir], meng mlo lmangel a rengul e kmal mlo bekikl.”⁹Tial teletael ochotii a chubechub, klemedengei, me a beltikelreng er a Osobeled me a Demad er a Babeluades el kired er a bek el taem el desiseb er a klengitelreng, klengit, ongarm, me a ringel er a klengar.

Rodos, a Demad er a Babeluades me a Osobeled, el Jesus Kristo, a medengelkid e betik a rengrir er kid. Te medengei sel de ngara ringel malechub a ngii dil ongarm. Te diak el dechor el dul kmo, “Ng di ungil el mngara ringel er chelechang leng di telkib el taem e a rokui el tekoi a mo ungil besul. Ke mo ungil, malechub a bechim a mo metik er a urerel, malechub a mla oberius el ngelekem a lmuut el mei.” Te kmal melchesuar a delchel ongarm er sel taem, e kid a sebeched el melchesuar a beltkil a Rengrir me a chubechub er tir er a taem el de ngara ongarm.

A Alma ulechais:

“E ngii a mo merael, el soiseb er a bek el bedengel a ongarm me a ringel me a ongetikaik; me luchul e bol motaut sel tekoi el kmo ngii a mo ngmai a ringel me a secher er a rechedal.

“ E ngii a mo otekau … a ringel er tir, me bol mui a chelsel a rengul er a chubechub, el oltirakl er a tech, me bo lodengelii … el kmo ng mekera lolngeseu er a rechedal, … lultuil er a ringel el ngar tir.”¹⁰

Sel bo dolbedebek el kmo a Osobel me a Demad er a Babeluades te locha medengelkid malechub ngua ngera klaodengei er Tir el kirel a dersta er kid, e kede locha mo dobedebek a tekingel Osobel el mora Oliver Cowdery:

“A mosiik er a lmuut el olchotel, e bo molbedebek er a uldesuem er sel kesusel mlilangel er a rengum el mei er ngak, el soam el mo medengei a klemerang er a ikal tekoi.”¹¹

A uchei ea Osobel a dilu el kmo “Ng diak a ngodech el chad ng di tal Dios a medengei a ngara uldesuem me a soal a rengum.”¹²

A Osobel a ulemeklatk er a Oliver el kmo Ngii a mle medengei a rokui el teletelel sel nglunguuch er a ongit—e mle medengelii sel taem, me sel kesus.

Betok el rak er a memong ea bechik a mlo smecher er a ngodech el rakt. Cherengel a taem el di lorael socherang, eak mlo oumerang el kmo ng mochu er a kodall. Ng dimlak sbedii a ngii dil chad er a dektek. Ng mle klou, a telungalek er kemam e ngara ungil chebechiil, me a uldasu el kmo ng mo dibus a bechik e di mo ngak el omekeroul er a rengelekek a mlo uchul a klesabisi, klengitelreng, me a dirrek el ngasechereng. Ng dimlak kudengei el kmo ak mekerang. Ak merur el ouchais el kmo ak mlo cheroid er a Demak er a Babeluades. Meng tela el klebesei el diak kululuuch; mlo diak kungederoder a urerek; e di lmangel. Uriur eng mocha mesubed a renguk el kmo ng diak el sebechek el di ngak el tang.

Meng ketengel er a chelsel a betok el klebesei, e ak mocha outubaruach e odersii a renguk el mora Demak er a Babeluades, lolengit a klausubes el mlo cheroid er Ngii, el ouchais er Ngii aikel kmal kumelchesiu, e mocha lmangel e kmo ak mo meruul aikel Ngii a soak a bo kuruul, eak mo meruul. Ak mle medengei el kmo ngarngii a uldesuel kirel a klengar kemam.

Tia er a kulemolem el ngara nglunguuch, ea kot el klebokel, e kmal mesisiich el budech, er a beltikelreng a mlei er ngak. Ng di ngii me a rengud a blangket er a beltikelreng a merema melkedek er ngak. Ng kmal di ngii me a kumelchesiu er a Chedam er a Babeluades el kmo, “Ng di mle tiaikid a kuusbech el mo medengelii.” Ak kildmeklii er a renguk el diak luut el mo cheroid er Ngii. Ng mechas a renguk le ng di mle telkib, ea bechik a merola el mo ungil el mol muut er a le sal kmal mesisichang.

Tela el rak e ruriul ea bechik me a ngak a mlo outubuach er bita er a teruich me a euid a rekil ngelekam el redil e meluluuch el kirel a klengar ngii. Tiaikid ea nger a mle diak, eng di a ki ulemelchesiu er ngii el beltikelreng me a budech el Osobel a mle yaksok a mle mesisiich, ea ki mle medengei el kmo a Chedam er a Babeluades a melai er ngii el mo remei, ea rokui el tekoi a di moungil besul. Aki mla mo medengei el kmo ngua ngera sel dechoit a berraod el mora Rubak, el mo medengei el kmo Ngii a betik a rengul er kid e chubechub el kired er a taem er a klengitelreng me a ringel.

A ta er a klebokel el taem er a delongelel a chedam me a ngelekel sechal el ngara Babier er a Mormon a chisel a klaumerang er a Kekerei el Alma el mora ngelekel sechal er a Helaman. A Alma milsaod er sel “diak a smodii el dakt” el blo lomelchesiu er ngii er a lorael soiseba er a rengedel a Dios el mo mukerkeriil el kirel a betok el telmellel. Uriur er a bla lomelchesiu a berredel a kngtil el edei el llomes me a klebesei, eng mlo ouchel a rengul e ulelengit er a Osobel me lebsa chubechub. E silodii el mora Helaman sel “ngarbab el klebokel” el deureng el “mlo diak” lolchesuar a ringel. Meng dikea lomelchesiu er sel “diak a smodii el dakt” er a uldesuel el merema er a rengedel a Dios, ea Alma bai milsa ues el “Dios a dengchokl er a kingellel” e kmu el kmo, “A renguk oureng el mo risei.”¹³

Tiang diak el ngii a dolchesuar, e rodos er ngak, sel douchel a rengud e dolbedebek er a beltikelreng, chubechub, me a omereng el saul el mora Demad er a Babeluades me a Osobel—el dirrek el kid “oureng el mo risei,” el muut el mo mochull er a ikel Chimorir?

Meng di uaia Rubak er a louchais er ngak el kmo Ngii a dirkak lobes er a mekreos el Ngelekel redil er a Mollie Lenthal, ea kuuchais el kmo Ngii a dirkak el lobes er kau! Ngii dil klengit malechub a chelitechut malechub a ringel el ngar kau, Ngii a kmal ungil medengei a ikaikid el taem. Ngii a betik a rengul er kau! E Ngii a mo sobecheklau er a ikaikid el taem, el di uaia ikel Ngii a riruul el mora Maria me a Martha. Ngii a mla nguubet a blals me bo lodengei el kmo ng mekera lolngeseu er kau. Mngai a berraod el molab el Msang. Mouchais er a Demam er a Babeluades aikel momelchesiu. Mouchais er Ngii a ringel me a ongarm el mngarngii e mngai el Msang. Mosuub chedaol llechukl er a bek el sils. Seikid e kau a mo metik a mesisiich el ongelaod me a ngeso.

A Osobeled oker:

“Ng sebechel a redil el obes er a dirk ke tmut el ngelekel, el sebechel mo diak a chubechub er ngii el mora ngalek el lulchellii? Oi, te locha obes, eng di ngak a diak kubes. …

“…Ak mla metkau er a chereuel chimak.”¹⁴

“Ea Tekingel mei er kid a kmo: “E kemiu tia el omes el kmo ak mla melekoi el kmo ng diak er kemiu a mo er cheroid, ak bai mla melekoi el kmo mei er ngak, me bo morutech e momes; meng kiriu el mo uaisei el mora beluulechad.”¹⁵

Tiaikid a ngercheled. Ng kired el mo omelchesiu e omes meng uchul eng sebeched el ngosuterir a rokui el ngelekel a Demad er a Babeluades el mo omelchesiu e omes e medengei el kmo a Osobeled a ngilai el mo er Ngii a diak el dil rokui el kngtid ng dirrek el ringel me a ongarm me a kerior me luchul e Ngii bo lodengei el kmo ngera kede omelchesiu e mekera longelaod er kid. A kuuchais el Kirel el ngara ngklel a Jesus Kristo, amen.

  ¿Tiene comentarios?