Hugot nga Pagtuo sa Buhat sa Kaluwasan


Sa dili pa ko magsugod sa akong pakigpulong, magpasalamat ko ninyo sa inyong pagkamabination niining malisud nga panahon sa pagkawala sa akong pinalanggang asawa, si Frances. Nalig-on ug nabuligan ako samtang akong gibati ang inyong gugma ug ang inyong mga pag-ampo alang nako.

Alang kang Sister Monson ug nako, ang misyonaryong buhat kanunay nga kabahin sa among kasingkasing ug sa among kinabuhi. Bag-o pa lamang kaming minyo sa dihang gitawag ako isip bishop sa karaang Sixth-Seventh Ward sa Salt Lake City—usa ka ward nga usa ka libo ug otsenta ang mga miyembro. Dihay ubay-ubay nga dili kaayo aktibo, ug si Sister Monson nagsuporta ug nag-awhag kanunay samtang ang akong mga tigtambag ug ako mobisita niining minahal nga mga miyembro ug naningkamot sa pagpabalik nila sa pagsimba.

Pila ka tuig ang milabay gitawag ako sa pag-alagad isip presidente Canadian Mission. Wala pay bulan pag-abut sa call, si Sister Monson ug ako mibiya sa among bag-ong gitukod nga balay ug uban sa among duha ka gagmayng mga anak ug usa nga gimabdos, mibiyahe ngadto sa Toronto, Ontario, Canada, diin ang misyonaryo nga buhat nahimong among kinabuhi sulod sa tulo ka tuig.

Mahimo bang i-indorso ko ang tanan nga nasulti karon dinhi. Akong ipamatuod ninyo nga kamo mapanalanginan kon kamo mosunod sa tambag nga inyong nadawat.

Ang balaang kasulatan wala maglangkob og pamahayag nga mas angay, walay responsibilidad nga mas gikinahanglan nga tumanon, walay panudlo nga mas klaro kay sa sugo nga gihatag sa nabanhaw nga Ginoo sa Iyang pagpakita sa Galilea ngadto sa napulog usa ka mga disipulo. Miingon Siya: “Busa panglakaw kamo ug himoa ninyong mga tinun-an ang tanang kanasuran, sa pagpamautismo kanila sa ngalan sa Amahan, ug sa Anak, ug sa Espiritu Santo” (Mateo 28:18–19). Si Propeta Joseph Smith mipahayag: “Human ang tanan masulti, ang pinakadako ug pinakaimportante nga katungdanan mao ang pagsangyaw sa Ebanghaelyo.” Ang pipila ninyo karon dinhi nahinumdom pa sa mga pulong ni President David O. McKay, kinsa mipahayag niining pamilyar nga pulong “Kada miyembro misyonaryo!” Si President Gordon B. Hinckley misulti nato: “Daghan kaayo nato ang nagtuo nga ang misyonaryo nga buhat mao ang pag-tracting. Ang tanan kinsa sinati niini nga buhat nasayud nga adunay mas maayong paagi. Kana nga paagi mao ang pinaagi sa mga miyembro sa Simbahan.”

Sa ilang mga pulong akong idugang ang akong pulong: Karon ang panahon sa mga miyembro ug sa mga misyonaryo nga maghiusa, sa pagtinabangay, sa paghago sa ubasan sa Ginoo sa pagdala og mga kalag ngadto Kaniya. Siya nag-andam og paagi nato aron ipakigbahin ang ebanghelyo sa daghan kaayong mga paagi, ug Siya motabang sa atong trabaho kon kita molihok pinaagi sa hugot nga pagtuo sa pagtuman sa Iyang buhat.

Sa panahon nga si Sister Monson ug ako mialagad sa Canadian Mission, kami mga saksi ug nalig-on pinaagi sa hugot nga pagtuo sa mga Santos sa Canada. Kini nga mga video clips nagpasiugda sa hugot nga pagtuo ug sa mga buhat sa mga miyembro ug mga misyonaryo sa among misyon kinsa nagpuyo ug naghago sa St. Thomas.

Ebidensya sa pagtuo nahitabo sa una nakong pagbisita sa St. Thomas Branch sa misyon, nahimutang sa mga 120 ka milya gikan sa Toronto. Ang akong asawa ug ako gidapit sa pagtambong sa sakrament miting sa branch ug sa pagpamulong ngadto sa mga miyembro. Samtang nagdrayb subay sa nindot nga dalan, nakita namo ang daghang nindot nga mga building sa simbahan ug naghunahuna hain niini ang ato. Wala niana. Among natultulan ang address nga hinatag ug nakit-an kini nga usa ka karaang gamay nga balay. Ang among branch nagpundok sa basement sa gamayng balay ug dunay gidaghanon nga baynte singko ka mga miyembro, ug 12 ang nanambong. Mao ra ang mga tawo ang mipahigayon sa miting, mipanalangin ug mipaambit sa sakrament, mihalad sa mga pag-ampo, ug mikanta sa mga himno.

Sa katapusan sa tulumanon, ang presidente sa branch, si Irving Wilson, mihangyo kon mahimo ba siyang makigsulti nako. Niini nga panagsultihay, mitunol siya kanako og kopya sa Improvement Era,, nga karon mao ang Ensign nga magasin. Nagtudlo sa hulagway sa usa sa atong bag-o nga mga chapel sa Australia, mipadayag si Presidente Wilson, “ Kini mao ang building nga among gikinahanglan dinhi sa St. Thomas.”

Mipahiyom ako ug mitubag, “Kon kita dunay igong mga miyhembro dinhi aron kita makatukod sa maong building, makasiguro ako nga kita makabaton og usa.” Niana nga panahon, ang lokal nga mga miyembro gitahasan sa paghatag og 30 porsyento sa bili sa yuta ug sa building, dugang pa sa pagbayad og ikapulo ug ubang mga halad.

Misumbalik siya, “Ang among mga kabataan nagkahingkod. Gikinahanglan namo kana nga building, ug gikinahanglan namo kini karon!”

Giawhag nako sila nga dugangan ang gidaghananon pinaagi sa ilang personal nga mga paningkamot sa pagpakigdait ug pagtudlo. Ang resulta,mga kaigsoonan, usa ka kasagarang ehemplo sa hugot nga pagtuo, inubanan sa paningkamot ug hingpit nga pagpamatuod.

Mihangyo si Presidente Wilson og dugang nga unom ka misyonaryo nga ibutang sa St. Thomas. Sa dihang natuman kini, gitawag niya ang mga misyonaryo sa usa ka miting didto sa luyo nga kwarto sa iyang gamay nga tindahan sa alahas, diin miluhod sila aron mag-ampo. Dayon mihangyo siya sa usa ka elder sa pagtunol kaniya sa yellow nga pahina sa direktory sa telepono, nga diha sa duol nga lamesa. Si Presidente Wilson migunit sa libro ug miingon, “Kon kita gusto nga magtukod og building sa St. Thomas, nagkinahanglan kita og Santos sa Ulahing Adlaw sa pagdesenyo niini. Tungod kay kita walay miyembro nga arkitekto, kinahanglan lang natong mokabig og usa. Iyang giganid sa iyang tudlo ang listahan sa mga arkitekto, mihunong siya og kadiyot sa usa ka pangalan ug miingon, “Kini mao ang tawo nga atong dapiton ngadto sa akong balay sa pagpaminaw sa mensahe sa Pagpahiuli.”

Gisunod ang samang paagi ni Presidente Wilson sa mga tubero, elektrisyan, ug sa tanang hanas nga mamumuo sa kada deskripsyon. Wala niya gibaliwala ang ubang mga propesyon, mibati og tinguha sa usa ka maayong pagkabalanse nga branch. Ang mga tawo gidapit ngadto sa iyang balay aron sa pakighimamat sa mga misyonaryo, ang kamatuoran gitudlo, mga pagpamatuod gihatag, ug miresulta ang pagkakabig. Kadtong bag-ong gibunyagan dayon misunod sa pamaagi mismo sa ilang mga kaugalingon, nagdapit sa uban sa pagpaminaw, sinemana, ug binuwan. Paglabay sa semana ug bulan nagpadayon ang maong paagi.

Ang St. Thomas Branch nakasinati og kahibulongang pagtubo. Sulod sa duha ug tunga ka tuig, usa ka luna napalit, usa ka matahum nga building natukod, ug ang usa ka dinasig nga damgo nahimong buhi nga kamatuoran. Kana nga branch karon usa ka nagtubo nga ward sa stake sa Zion.

Sa akong paghunahuna sa lungsod sa St. Thomas, dili nako hunahunaon ang gatusan ka mga miyembro ug ang dinosena nga mga pamilya; hinoon, mobalik ako niadtong gamay kaayong sakrament miting didto sa basement sa gamay nga balay, 12 ka mga tawo, ug ang saad sa Ginoo, “Kay diin gani ang duha kon tulo magakatigum sa akong ngalan, anaa ako sa ilang taliwala.” (Mateo 18:20)

Daghang katuigan ang nanglabay sukad narekord kana nga video. Ang tingog nga inyong nabati mas batan-on, apan ang baruganan sa hugot nga pagtuo sa misyonaryo nga buhat nagpabiling tinuod karon sama milalabayng tunga ka dekada sa St. Thomas Branch.

Ako magpamatuod nga kon kita naglihok pinaagi sa hugot nga pagtuo ang Ginoo mopakita nato kon unsaon paglig-on sa Iyang Simbahan sa mga ward ug mga branch diin kita nagpuyo. Siya magauban nato ug mahimong aktibo nga kauban sa atong misyonaryo nga mga paghago.

Samtang magkadaghan ang mga misyonaryo sa mga ward ug stake sa kalibutan, mohangyo ko sa pagbaton og pagtuo, sama ni Presidente Wilson sa St. Thomas, samtang kamo mag-ampo kinsa sa inyong pamilya, mga higala, mga silingan ug kaila ang inyong imbitaron sa inyong balay aron makighimamat sa mga misyonaryo, aron sila makapaminaw sa ebanghelyo sa Pagpahiuli. Sama sa gibuhat sa Ginoo sa St. Thomas, Siya mobalaan sa inyong paningkamot, ug kamo makaangkon og kapasidad nga lapas sa inyong kaugalingon sa pagbayaw ug pagpanalangin sa kinabuhi sa uban.

Hinaut nga motubo ang atong pagtuo ug pagkamatinud-anon sa pagtuman sa atong sagradong katungdanan sa pagluwas sa mga anak sa atong Langitnong Amahan—ang atong mga kaigsoonan. Sa pangalan sa atong Ginoong ug Manluluwas bisan si Jesukristo, amen.