Te fanahonahoraa no te faoraraa Elder L. Tom Perry No te Pŭpŭ no te Tino Ahuru Ma Piti Aposetolo Aita tatou i vaiiho otare-noa-hia ia overe haere noa na te tahuti nei ma te ite ore i te faanahoraa a te Fatu Ta’na i faataa no Ta’na mau tamarii. Tei roto vau i te hoê pureraa oro‘a i te mau ava‘e no te pu‘e tau mahanahana, ua fana‘o vau i te faarooraa i te mau parau poro‘i no roto mai e toru piahi tei hoi mai i te fare. Ua anaanatae taa ê au i te hoê o te mau a‘oraa. Ua rave oia i te ohipa i roto i te hoê fare tamaaraa haere-roa-hia e te mau taata faahoro pereoo uta tauhaa. Te vai ra hoê faahoro pereoo e tere tamau mai na reira i taua mahana nei â i te mau hepetoma atoa. Ua tape‘a maira oia i reira no te tamaa. Ua ani oia i taua tamahine ra i hea oia e faaea ai. Ua parau atu oia e, ua hoi mai oia i te fare no te tau faafaaearaa, no te rave i te ohipa ia roaa te moni no te hoi faahou i te haapiiraa i te pu‘e tau i muri iho. Te uiraa i muri iho, teie ïa, i hea oe e haere ai i te haapiiraa ? Ta’na pahonoraa ma te haapeu : « BYU–Idaho ». Ua hinaaro a‘era oia ia hau atu to’na ite no ni‘a i te haapiiraa, e na te reira i arata‘i i te aparauraa i ni‘a i te aparauraa evanelia. Ta’na tamataraa matamua o te haapiiraa ïa ia’na i te parau no te Parau Paari. Ua manuia roa taua paraparauraa ra. Ua farii taua taata ra ia faaru‘e i te avaava. I muri iho ua tauihia ta’na hora ohipa, e aita i ti‘a faahou ia’na ia tuati faahou i taua taata ra, no reira, ua papa’i oia i te hoê rata ia’na e ua tuu atu i roto te hoê buka iti misionare no ni‘a i te faanahonahoraa no te faaoraraa. E rave rahi mahana i muri mai, ua farii oia i te hoê rata na taua taata faahoro pereoo ra. Mea poto roa te parau, « Ua hamani oe i te hoê tupapa‘u ». Mauruuru roa i teie tamahine, ua itehia ia’na te haamaramaramaraa tei turai ia’na ia feruri i te tauiraa e ti‘a ia’na ia rave i roto i to’na oraraa. Aita vau i ite i te taatoaraa o te ohipa i tupu na roto i teie farereiraa i rotopu i te hoê tuati e te hoê faahoro pereoo, te mea papû, ua tupu te hoê mea i roto i to’na oraraa. I muri iho ua faaite mai oia e, e mea ohie mau ia faaite ia vetahi ê i te nehenehe o te evanelia. Tei mua noa ia tatou te mau rave‘a atoa i te mau mahana atoa, no te hamama i to tatou vaha no te faaite i te taata i te mau parau mau o te evanelia o te haamaitai ia ratou i ô nei e i teie nei, e i roto i te ora mure. E rave rahi te taata e uiui nei e, « Nohea mai tatou ? No te aha tei ô nei tatou ? Te haere nei tatou i hea ? » Aita to tatou Metua Mure ore i tono mai ia tatou i te fenua nei i roto i te hoê tere avei‘a ore, e te opuaraa ore. Ua horo‘a mai oia ia tatou i te hoê faanahoraa ta tatou e pee. Oia te fatu no taua faanahoraa ra. Ua faataahia te reira no to te taata haereraa i mua, to’na faaoraraa hopea e te faateiteiraa. Teie te faahitiraa paru no roto i te buka arata‘i misionare Ia Poro Haere i Ta‘u nei Evanelia : « Te Atua te Metua o to tatou mau varua. E tamarii mau tatou Na’na, e te here nei Oia ia tatou. Te ora nei tatou ei mau tamarii varua na to tatou Metua i te Ao ra hou a fanauhia mai ai tatou i ni‘a i teie fenua. Tera râ, aita tatou i riro mai to tatou Metua i te Ao ra, e eita tatou e riro mai Ia’na te huru e ia fana‘o i te mau haamaitairaa atoa Ta’na e fana‘o nei mai te mea e, aita tatou e ora i roto i te tahuti nei ma te farii i te hoê tino tahuti. « Te opuaraa taatoa a te Atua – Ta’na ohipa e To’na hanahana – te faati‘araa ïa ia tatou tata’itahi ia fana‘o i te taatoaraa o Ta’na mau haamaitairaa. Ua horo‘a mai oia i te hoê faanahoraa maitai roa no te faatupu i Ta’na opuaraa. Ua taa tatou e ua farii tatou i te reira faanahoraa hou a haere mai ai tatou i te fenua nei » ([2004], 48). Noa’tu râ i te reira, e rave rahi taata i roto i te ao nei e tamau noa nei â i te rohi no te imi i te mau pahonoraa i te mau uiraa tumu o te oraraa nei. Tera mau tuoraa e « Teie inaha » e « Teie inaha » te tupu noa’tura i te rahi e te rahi noa’tura te anoinoi. Na te mau rave‘a aravihi i faaaano roa’tu i te reira anoinoiraa na roto i te haaparareraa i te reira mau parau poro‘i na roto i te reva e na roto i te mau reni teata tei î roa hoi te fenua nei. Ua rau te mau rave‘a i teie tau no te haapuroro e rave rahi parau poro‘i, e no reira, eita tatou e maere ia poirihia te feruriraa o te taata. E rave rahi tenetere i ma‘iri a‘e nei, ua tohu o Paulo e : « Te vai atura hoi te tau e ore ai ratou e farii ai i te parau mau, no te anoenoe ra o to ratou tari‘a, e haaputu ïa ratou i te orometua i au i to ratou iho hinaaro ; « e fariu ê hoi to ratou tari‘a i te parau mau, a opai tia’tu ai i te fabula ». (2 Timoteo 4:3-4). Eiaha tatou e maheaitu. Te mau pahonoraa i te mau uiraa fifi no ni‘a i te tumu o te oraraa nei, ua horo‘ahia mai ïa te reira i te taata nei ei arata‘i ia tatou. Ua faaroo tatou i te parau no te faanahonahoraa no te faaoraraa no te taime matamua hou a fanauhia mai ai tatou, i roto i te vahi ta te mau papa’iraa mo‘a e parau nei e, to tatou ai‘a matamua (a hi‘o Aberahama 3:26). Te ohipa tei tupu i roto i te reira ai‘a matamua, e mea iti roa ïa to tatou iteraa, tera râ, ua ite tatou e, i ora na tatou i reira ei mau varua, e tamarii na to tatou Metua i te Ao ra, e ua rave tatou i te tahi mau mea no te haere i mua no te faaineine ia tatou no te taime e ahu ai to tatou varua mure ore i te hoê tino tahuti. Ua ite atoa tatou e, ua faatupu to tatou Metua i te hoê apooraa rahi no te haamaramarama ia tatou i te tumu no te oraraa i te fenua nei. Ua ti‘a ia tatou ia pato‘i e aore ra ia farii i te faanahonahoraa no te faaoraraa. Aita tatou i faahepohia no te reira. Te faufaa tumu o te reira faanahoraa maori râ, ia horo‘a i te rave‘a i te taata ia haa no to’na iho faaoraraa i ni‘a i te fenua nei, na roto i te tautururaa a te Atua. Ua ma‘itihia te hoê arata‘i no te haapii ia tatou nahea ia pee i te reira faanahoraa, e no te faaora ia tatou i te hara e te pohe. Mai ta te Fatu i faataa’tu oa Mose: « Inaha râ, ua parau maira ta‘u Tamaiti Here, ta‘u i Here e i Maiti mai te matamua mai â, na ô maira – E te Metua, ia haapa‘ohia to oe hinaaro, e no oe te hanahana e a muri noa’tu » (Mose 4:2). Riro atura o Iesu Mesia, to tatou taea‘e matahiapo ei arata‘i no te faatupu i te faanahoraa i faataahia e te Metua, e ua farii tatou i te faanahoraa e to’na mau titauraa. Na roto i taua ma‘itiraa ra, ua roaa ia tatou te ti‘araa ia haere mai i te fenua nei e ia tomo i roto i to tatou ai‘a piti. Ua rahu ihora te Atua ia Adamu raua o Eva ia au i to’na iho ra hoho‘a, ma te tino i‘o e te ivi, e ua tuu atura ia raua i roto i te O i Edene ra. Ua horo‘ahia te ma‘itiraa ia raua ia faaea noa i roto i te ô e aore ra ia amu i te hotu o te raau no te ite i te maitai e te ino, e ia roaa te ite i te mau mea o te tahuti nei. Ua farii raua i te titauraa, ua amu i te hotu, e riro mai nei ei taata tahuti e ua farii i te pohe tino. Na roto i ta raua ma‘itiraa, e farii raua i te mau tamataraa e te mau ati o te tahuti nei. E piti tumu to te oraraa i te tahuti nei. Te tumu matamua maori râ, ia roaa te ite ia tatou o te ore e roaa na roto i te tahi rave‘a ê atu. Te piti o te fariiraa ïa i te tino i‘o e te ivi. E mea faufaa teie na tumu e piti no te oraraa o te taata nei. I teie nei te tamatahia nei tatou no te hi‘o e e rave anei tatou i te mau mea atoa ta te Fatu i faaue mai ia tatou ia rave. Taua mau faaueraa ra, o te mau ture ïa e te mau oro‘a o te evanelia, e o te reira ïa te evanelia a Iesu Mesia. E tuatiraa to mau parau tumu atoa e te mau oro‘a i ni‘a i te tumu rahi o to tatou tamataraahia, oia hoi, no te faaineine ia tatou ia hoi faahou i piha’i iho i to tatou Metua i te Ao ra e ia riro mai Ia’na te huru. Teie te parau a Elder Bruce R. McConkie no ni‘a i te haereraa na ni‘a i te e‘a apiapi e te pirihao : « Te feruri nei au e, te ohipa ta tatou paatoa e ti‘a ia rave o te faaotiraa ïa e, tei hea tatou i te vairaa i roto i te mau tuhaa atoa o te ohipa i te tahuti nei. I muri iho, ia au i te mau ture atoa tei maramarama maitai, e faaoti tatou e, e nahea tatou i te ora i roto i tera tuhaa e tera tuhaa, ia ti‘a ia tatou ia manuia i te tamataraa no te upootia i te tamataraa o te tahuti nei. Mai te mea e, e rave tatou i te ma‘itiraa ti‘a, e haere ïa tatou e tae roa’tu i te haamaitairaa mure ore, aita ana‘e ra, e roaa ïa ia tatou te tahi mau parahiraa haihai iho i roto i te mau basileia tei faaineinehia. « …Te mau taata atoa i roto i te Ekalesia nei tei ni‘a i te e‘a apiapi e te pirihao, o te tamata nei e te aro nei e te hinaaro nei ia rave i te mea maitai, noa’tu e, e mea atea roa oia i te huru maitai roa i roto i teie oraraa ; mai te mea e, e mo‘e ê oia i teie nei oraraa a haere ai oia na ni‘a i te e‘a apiapi e te pirihao, e tamau noa oia i te haere i mua no te farii i te haamaitairaa mure ore i roto i te basileia o te Metua ra » (The Probationary Test of Mortality, devotional address, Salt Lake Institute of Religion, Tenuare 10, 1982, 8-9). Ua tupu teie mau mea atoa na roto ia Iesu Mesia. Oia te tumu o te faanahonahoraa mure ore a te Metua, te Faaora tei horo‘ahia mai ei hoo no te taata nei. Ua tono mai te Atua i Ta’na tamaiti here ia upootia i ni‘a i te hi‘araa o Adamu e o Eva. Ua haere mai Oia i te fenua nei ei Faaora e ei Taraehara no tatou. Ua upootia Oia i ni‘a i te pohe tino na roto i te horo‘araa i To’na iho ora. A pohe ai Oia i ni‘a i te satauro, ua faataa-ê-hia To’na varua i To’na tino. I te toru o te mahana, ua tahoê-faahou-hia To’na varua e To’na tino e a muri noa’tu, e ore roa e taa ê faahou. E mea poto roa te oraraa i ni‘a i te fenua nei. Te vai ra te tau no tatou paatoa i reira te varua e te tino e taa ê ai i roto i te pohe. Aua‘e râ te ti‘a-faahou-raa o Iesu Mesia, e ti‘afaahou tatou paatoa, ma te hi‘o ore e, e ohipa maitai anei e aore ra e ohipa ino ta tatou i rave i roto i teie oraraa. Te tahuti ore, o te hoê ïa horo‘a i horo‘ahia i te mau tamarii tahuti atoa a to tatou Metua i te Ao ra. E faariro i te pohe mai te hoê uputa no te tomo atu i roto i te hoê oraraa apî e te maitai a‘e. Na roto i te ti‘a-faahou-raa hanahana, e tahoê–faahou-hia te tino e te varua. E roaa ia tatou te hoê tino maitai roa e te tahuti ore ma te i‘o e te ivi o te ore roa e farii faahou i te mauiui e te pohe. Tera râ, te hanahana e roaa ia tatou i roto i te oraraa a muri a‘e, tei te huru ïa o te ohipa ta tatou i rave i roto i teie oraraa. Na roto ana‘e i te horo‘a o te Taraehara e na roto i to tatou haapa‘o i te evanelia e ti‘a ai ia tatou ia hoi faahou e ora i piha’i iho i te Atua. I muri a‘e i te Ti‘a-faahou-raa o te Faaora, ua haere Ta’na mau aposetolo e poro i teie parau poro‘i hanahana i to te mau nunaa atoa o te fenua nei. E ratereraa atea ta ratou no te haapii i te misioni a to tatou Faaora. Ua haamata a‘era te hoê ohipa keritetiano rahi i roto i te mau fenua e rave rahi. Tera râ, ua topa mărû noa te Ekalesia i roto i te hoê taivaraa rahi i reira te monoraa o te autahu‘araa i mutu ai. Ua mou te mana no te faatere i te mau oro‘a varua i te fenua nei. Ua haamata te tahi mau taata faauruhia i te faatupu mărû noa i te tauiraa. Ua faaau te peresideni Gordon B. Hinckley i te reira mai te poipoi o te hoê mahana maramarama a‘e. Ua parau oia e : « I roto i te roaraa o taua pu‘e tau poiri ra, ua tutu‘ihia te hoê lamepa. Ua hopoi mai te pu‘e tau no te Fanau-faahou-raa i te niniiraa o te ite, te ite ihi, te rima î. Ua tupu ihora te ohipa a te mau tane e te mau vahine itoito e te taia ore tei hi‘o i te ra’i no te faaite i te Atua e i Ta’na Tamaiti hanahana. Te parau nei tatou i te reira, te fanau-faahou-raa. « E i muri iho, i muri a‘e e rave rahi u‘i tei haere mai i te fenua nei – e rave rahi o ratou i roto i te tama‘i , te inoino, te poiri, e te ino – teie mai nei te mahana rahi apî o te Faati‘a-faahou-raa. Ua tuuhia mai teie evanelia hanahana na roto i te faraa mai te Metua e te Tamaiti i te tamaiti iti ra o Iosepha. Ua ti‘a maira te poipoi o te tau tuuraa no te iraa o te mau tau i ni‘a i te fenua nei. Te mau mea maitai atoa e te nehenehe, e te hanahana o te mau tau tuuraa na mua’tu, ua faaho‘i-faahou-hia mai ïa i roto i teie pu‘e tau faahiahia rahi » (« The Dawning of a Brighter Day », Liahona, May 2004, 82-83). I muri iho i te ohipa hanahana o te Orama Matamua, ua horo‘ahia maira te papaa parau mo‘a o te Buka a Moromona i te Peropheta Iosepha Semita ra. Na teie i hopoi faahou mai i te faaiteraa i to tatou Fatu e te Faaora e i Ta’na misioni i rotopu i te mau taata o te ao nei. No reira, te ite nei tatou i roto i te faanahoraa mure ore a to tatou Metua e, aita e otia no To’na here. Tei roto te taatoaraa o Ta’na mau tamarii. Hoê â tumu to te mau taata atoa, e te ti‘araa no te titau i to ratou haerea mure ore. Teie te parau a te peropheta Amuleka no te Buka a Moromona ei faaiteraa e, e horo‘a mai te parau a te Mesia ia tatou i to tatou faaoraraa : « E teie nei, e au mau taeae, ua hinaaro au ia haere mai outou, e tuu mai i te parau e au i te tatarahapa, no te mea, ua tae mai ia outou te mau faaite e rave rahi, e te faaite maira hoi te parau i papaihia i teie nei mau mea. « Oia ïa, ua hinaaro vau ia haere mai outou, e ia ore outou ia faaetaeta â i to outou aau; inaha hoi, o te taime teie, e te mahana o to outou ora; e no reira ia tatarahapa outou, e ia ore ia faaetaeta i to outou aau, e faatupu- vave-hia te ravea rahi o te ora no outou. « Inaha hoi, tei teie nei oraraa te taime ia faaineine te taata ia farerei i te Atua; oia ïa, o te mahana ïa, te mahana o teie nei oraraa, ia rave te taata i ta ratou ohipa » (Alama 34:30-32). E mata na tatou i te ara ia ore tatou ia aueue noa i te mata‘i e i te parau a te taata nei (a hi‘o Ephesia 4:14). Te faaite nei matou i to te ao atoa nei e, ua vetea te mau ra’i, e ua faaite-faahou-hia mai te parau mau no te faanahonahoraa mure ore a te Atua i te taata nei. Te ora nei tatou i te tau o te iraa o te mau tau. Te ora nei tatou i te hoê tau a faaite mai ai te mau papa’iraa mo‘a i te faanahonahoraa rahi ta te Fatu i horo‘a mai i ta’na ra mau tamarii mai te omuaraa mai o te tau e tae roa mai i teie tau tuuraa hopea. Ua faaite papûhia mai te reira ; aita tatou i vaiiho otare-noa-hia ia overe haere noa na te tahuti nei ma te ite ore i te faanahoraa a te Fatu Ta’na i faataa no Ta’na mau tamarii. Ua ruuruu oia ia’na iho na roto i te fafauraa ia horo‘a mai i te haamaitairaa o te ra’i ia tatou ia au i to tatou haapa‘o i Ta’na ture. A haamana‘o na, a haamana‘o e, e parau mau teie mau mea, no te mea ua heheu mai te Fatu te Atua i teie mau parau mau mure ore i roto ia tatou nei. I te i‘oa o Iesu Mesia ra, amene.