Te Tino Ahuru Ma Piti Peresideni Boyd K. Packer Peresideni no te Pŭpŭ no te Tino Ahuru Ma Piti Aposetolo No te riroraa te Ekalesia ei Ekalesia Na’na, e mea ti‘a ia vai te hoê Pŭpŭ no te Tino Ahuru Ma Piti tei mau i te mau taviri. I muri noa iho i te poheraa te Peresideni Gordon B. Hinckley, 14 taata, e mau Aposetolo, tei horo’ahia te mau taviri o te basileia ia ratou, ua putuputu ratou i roto i te piha teitei o te hiero no te faati’a faahou i te Peresideniraa Matamua o te Ekalesia. Aita hoê uiraa no ni’a i te iteraa e, eaha te ohipa e rave, aita hoê a’e otiatiaraa. Ua ite matou e, te Aposetolo tahito roa a’e, o’na ïa te Peresideni o te Ekalesia. E i roto i taua putuputuraa mo’a ra, ua paturu te Pŭpŭ no te Tino Ahuru Ma Piti Aposetolo ia Thomas S. Monson ei Peresideni no te Ekalesia. Ua ma’iti oia i to’na na tauturu. E ua paturu-atoa-hia raua, e ua faatoro‘ahia ratou tata’itahi e ua horo’ahia ia ratou te mana. Ua horo’a-taa’e-hia i te Peresideni Monson i te mana no te faaohipa i te mau taviri autahu‘araa atoa o te mana. I teie nei, mai tei faaitehia i roto i te mau papa’iraa mo’a, oia te taata hoê roa i ni‘a i te fenua nei tei mau i te ti’araa no te faaohipa i te mau taviri atoa. Tera râ, o matou te mau Aposetolo, te mau nei matou paatoa i te reira. Hoê taata i rotopu ia matou tei piihia e tei faatoro‘ahia, e ua riro mai oia ei Peresideni no te Ekalesia a Iesu Mesia i te Feia Mo’a i te mau Mahana Hopea nei. Ua oti a‘e na oia i te paturuhia e rave rahi matahiti ei peropheta, ei hi’o ; e ei heheu parau. Na roto i te piiraahia te Peresideni Uchtdorf i roto i te Peresideniraa Matamua, ua vata ïa te hoê ti’araa i roto i te Tino Ahuru e Ma Piti, e no reira, i nanahi nei, ua paturu tatou ia Elder D. Todd Christofferson ei melo apî no te Pŭpŭ no te Tino Ahuru Ma Piti. E amui oia i teie nei i roto i te reira autaea’eraa mo’a i roto i taua haamenemeneraa mo’a ra, e i teie nei, ua î taua haamenemeneraa ra. No te anotau o te Fatu o Iesu Mesia te piiraa Aposetolo. Ua paturu atoa tatou i te tahi mau Hitu Ahuru. Ua parahi ratou i ni‘a i to ratou parahiraa i teie nei. Te faaite ra te mau papa’iraa mo’a e, e hopoi’a na te Pŭpŭ Tino Ahuru Ma Piti ia faatere i te mau ohipa atoa o te Ekalesia, e mai te mea e, e hinaaro ratou i te tauturu, e « titau i te Hitu Ahuru… eiaha hoi i te tahi ê atu ra. »1 E i teie nei, te vai nei ta tatou e va’u Pŭpŭ Hitu Ahuru, tei purarahaere na te ao nei, hau atu i te 300 Hitu Ahuru, tei mau paatoa ana‘e i te mana i titauhia no te rave i te mau ohipa atoa ta te Pŭpŭ Tino Ahuru Ma Piti e ani ia ratou ia rave. Na te Fatu iho i haamau i teie faanahoraa no te faatereraa: « I te reira mahana to’na haapairaa i ni‘a i te hoê mou‘a e pure, e ao noa ihora te rui ia’na i te pureraa’tu i te Atua. « E ao a‘era, ua parau atura oia i ta’na mau pĭpĭ e haere mai ia’na ra, ua ma‘iti ihora oia i e tino ahuru e ma piti, o ta’na ïa i ma‘iri i te i‘oa, e aposetolo ».2 I faaroo hoi Anederea i te parau a Ioane ra, horo atura e farerei i to’na ra taea‘e o Simona na ô atura, « ua itea ia maua te Mesia… « … E ua arata‘i maira oia ia’na ia Iesu. E ia hi‘o a‘era Iesu ia’na ra, na ô atura, O Simona oe, te tamaiti a Iona, e ma‘irihia oe ia Kepha, to’na auraa ra, te papa ».3 Te taora ana‘e ra o Simona raua o to’na taea‘e o Anederea i te upea i roto i te miti ; O Iakobo raua o Ioane, na tamaiti na Zebedaio, te tata‘i ra ïa i ta raua upea ; O Philipa raua o Baretolomea ; o Mataio, e publican e aore ra, e taata ohi tute ; o Toma ; o Iakobo te tamaiti a Alephaia, Simona e ati Tanaana, o Iuda te taea‘e o Iakobo, e o Iuda Isakariota – o ratou to roto i te Pŭpŭ no te Tino Ahuru Ma Piti.4 Ua parau atura oia ia ratou paatoa, « a pee mai ia‘u ».5 Na ô atura Oia ia Petero, « e horo‘a’tu hoi au i te mau taviri o te basileia o te ao ra ia oe e ta oe e haamau i raro nei, e haamau-atoa-hia ïa i te ao ».6 E na ô atura oia i to te Pŭpŭ no te Tino Ahuru Ma Piti, « o te faaroo mai ia‘u ra e rave atoa oia i teie nei mau ohipa ta‘u e rave nei, e e rahi atu â ta’na e rave i teie, no te mea te haere nei au i tau Metua ra ».7 Ua horo‘a’tu Oia i Ta’na mau Aposetolo ra « i te puai e te mana no ratou ia rave i te mau demoni atoa, e ia faaora i te mau ma‘i. « Ua tono atura oia ia ratou e poro haere i te basileia o te Atua, e e faaora hoi i te feia ma‘i… aore e vahi toe ».8 E ua parau atura Oia: « Na te reira Tino Ahuru Ma Piti ra e mau i te mau taviri no te iriti mai i te mana no to‘u nei basileia i ni‘a i na poro e maha no te ao nei, e i muri iho i te reira ia hapono atu i ta‘u parau i te mau taata atoa ra ».9 Ua ui atu Iesu i Ta’na ra mau pĭpĭ, « o vai au te Tamaiti a te taata nei i ta te taata nei parauraa ?… « Ua parau maira Simona Petero, na ô maira, o te Mesia oe, te Tamaiti a te Atua ora ra ».10 I to Iesu haapiiraa i roto i te Zunago ra, parau maira te mau pĭpĭ e rave rahi, « e parau riaria teie ; e itea ia vai ?… « Faaru‘e maira te hoê pae rahi pĭpĭ a’na i reira ra, aita maira i pee faahou ia’na. « Ua parau maira Iesu i te Ahuru Ma Piti ra, e haere atoa anei outou ? « … Ua parau atura Simona Petero ia’na, e te Fatu, e haere ti‘a matou ia vai ra ? tei ia oe hoi te parau o te ora mure ore ra ».11 I muri a‘e i te Faasatauro, te haamana’o ra te mau Aposetolo Ia’na i te parauraa e, e parahi noa ratou i Ierusalema.12 Tae a‘e ra i te mahana Penetetote ra, e oro‘a rahi i roaa a‘e ra te Varua Maitai ia ratou ra.13 Ua farii ratou i «te parau a te mau peropheta ti‘a rahi roa’tura »14 e ua parau ratou « i ta te Varua Maitai i tuu mai ia ratou ra ».15 E no reira, ua ti‘a hope roa a‘e ra ratou. E mea iti roa to tatou ite no ni‘a i to ratou mau ratereraa e ua ite rii noa tatou i hea e e mea nahea te tahi pae o ratou i pohe ai. Ua taparahi-pohe-hia o Iakobo i Ierusalema e Herota. Ua pohe o Petero e Paulo i Roma. Te parau ra te aamu e, ua haere o Philipa i te pae hitia o te râ. Tirara’tu ai ta tatou i ite. Ua purara ratou: ua haapii, ua faaite papû, ua faati‘a i te Ekalesia. E ua pohe ratou i roto i to ratou ti‘aturiraa, e i muri a‘e i to ratou poheraa, teie mai nei te mau tenetere poiri o te taivaraa. Te ohipa faufaa rahi roa tei mo‘e ê i roto i te Taivaraa ra, o te mana ïa i mauhia e te Tino Ahuru Ma Piti – te mau taviri no te autahu‘araa. No te riroraa te Ekalesia ei Ekalesia Na’na, e mea ti‘a ia vai te hoê Pŭpŭ no te Tino Ahuru Ma Piti tei mau i te mau taviri e ia horo‘a’tu i te reira ia vetahi ê ra. I te pae hopea, ua tae maira te Orama Matamua e te faaho‘i-faahou-raa mai o te Autahu‘araa a Melehizedeka na roto ia Petero, Iakobo e o Ioane.16 Ua parau te Peresideniraa Matamua e te Pŭpŭ no te Tino Ahuru Ma Piti Aposetolo i muri iho e: « Oia mau ta‘u e parau atu nei ia outou na, o te mau taviri no te tau tuuraa ta outou i farii ra, ua hee mai ïa mai te mau metua maira, e i te hopea ra, ua haponohia mai mai te ra‘i maira ia outou na. « … Inaha eaha ïa te rahi o to outou parauraa. A tamâ na outou i to outou mau aau e i to outou mau ahu, ia ore ia titauhia mai te toto o teie nei u‘i i to outou mau rima na ».17 E mea apî roa Te Ekalesia a Iesu Mesia i te Feia Mo‘a i te mau Mahana Hopea nei i faaho‘ihia mai, i te taime a faati‘ahia ai te Peresideniraa Matamua, i muri iho te Pŭpŭ no te Tino Ahuru Ma Piti Aposetolo, e mau taata matarohia e e te Pŭpŭ no te Hitu Ahuru. To ratou faito matahiti no te Pŭpŭ no te Tino Ahuru Ma Piti Aposetolo e 28 ïa. Ua vai tamau noa te hoê reni mana mutumutu ore. Te mau taviri no te autahu‘araa tei horo‘ahia i te mau Aposetolo ra, ua mau-noa-hia ïa te reira e te mau melo o te Peresideniraa Matamua e te Pŭpŭ no te Tino Ahuru Ma Piti. I nanahi ra, ua riro o Elder D. Todd Christofferson te 96raa o te Aposetolo i roto i te Tino Ahuru Ma Piti i roto i teie tau tuuraa. E faatoro‘ahia oia ei Aposetolo e e horo‘ahia ia’na te mau taviri atoa o te autahu‘araa tei fariihia e te tahi atu na 14 peropheta, e hi‘o, e e heheu parau – e mau Aposetolo na te Fatu ra o Iesu Mesia. I te matahiti 1976 ua faatupuhia te hoê amuiraa rahi i Copenhague, Dannemark. I muri a‘e i te tuhaa pureraa hopea, ua hinaaro te Peresideni Spencer W. Kimball e haere e mataitai i te Fare pureraa Vor Frue tei reira te vairaa te tii o te Mesia e o na Aposetolo Hoê Ahuru Ma Piti hamanihia e Thorvaldsen. Ua haere a‘e na oia i reira te tahi tau matahiti i mua a‘e nei, e ua hinaaro ia matou paatoa ia ite, ia haere i reira. I mua i te fare pureraa, i muri i te fata, tei reira te ti‘araa taua tii matarohia no te Christus [Mesia] e To’na rima i hohorahia i mua, ma te itehia te tapa’o o te puta naero, e te mutu ite-maitai-hia i To’na aoao. I To’na na pae e piti, te ti‘a ra ïa na tii o te Aposetolo Petero i mua rii, e i te tahi a‘e pae te tahi ïa tii. Te rahiraa o to matou pŭpŭ tei piha’i iho ratou i te muriraa o te fare pure i piha’i iho i te taata haapa’o. Ua ti‘a’tu vau i mua i piha’i iho i te Peresideni Kimball i mua i te tii o Petero e tae noa’tu ia Elder Rex D. Pinegar e o Johan Helge Benthin, peresideni no te tĭtĭ no Copenhague. I roto i te rima o Petero, te vai ra hoê ruru taviri teiaha hamanihia i te marbre. Ua faatoro a‘e ra te Peresideni Kimball i ni‘a i taua mau taviri e ua faataa maira i to te reira faahoho‘araa. I muri iho, i roto i te tahi ohipa e ore roa e mo‘ehia ia‘u, ua fariu atura oia i ni‘a i te Peresideni Benthin e ma te etaeta rahi, faatoro a‘era i to’na rima i ni‘a ia’na e na ô maira, « Te hinaaro nei au ia parau oe i te mau taata atoa i Dannemark nei e, te mau nei au i te mau taviri ! Te mau nei tatou i te mau taviri mau, e te faaohipa nei tatou i te reira i te mau mahana atoa ». Eita roa e mo‘ehia ia‘u taua parau ra, taua iteraa papû no roto mai i te peropheta. E mea puai mau te faaûruraa i te pae varua: ua ite-mata-hia te reira. Ua haere atura matou i muri i te fare pure tei reira te ti‘araa te toe‘a o te pŭpŭ. Ma te faatoro i ni‘a i te mau tii, ua parau atura te Peresideni Kimball i te taata haapa‘o, « E mau aposetolo pohe teie. » Ma te faatoro mai ia‘u, na ô atura oia e, « Teie ta matou mau Aposetolo ora. E Aposetolo o Elder Packer. E Aposetolo o Elder Thomas S. Monson e o Elder L. Tom Perry, e e Aposetolo vau. E mau Aposetolo ora matou. « Te tai‘o ra oe i te parau no te Hitu Ahuru i roto i te Faufaa Apî, e teie e piti o te mau Hitu Ahuru, o Elder Rex D. Pinegar e o Elder Robert D. Hales ». Tae roa mai i taua taime ra, aita roa te taata haapa’o i ahihi noa a‘e, tera râ, i reira iho, tahe ihora to’na pape mata. Ua feruri au e iteraa taa‘e roa teie i roto i to‘u oraraa taatoa. « Te ti‘aturi nei matou i te tuuraa o te mau toro‘a i roto i te Ekalesia nei, mai tei tuuhia mai i roto i te Ekalesia i mutaa ihora ; oia hoi, te mau aposetolo, te mau peropheta, te mau tiai, te mau haapii, te mau haapii evanelia, e te tahi atu â mau toro‘a ».18 A faatoro‘ahia te Hitu Ahuru, noa’tu e, aita ratou e faatoro‘ahia ei mau Aposetolo, e aita atoa hoi e mau i te mau taviri, e mana to ratou, e e ohipa na te Tino Ahuru Ma Piti « ia titau i te Hitu Ahuru, i te taime ratou e hinaaro ai i te tautururaa, no te haapa’oraa i te mau titauraa no te a’oraa e te haapa’oraa i te evanelia, eiaha hoi i te tahi ê atu ra ».19 I teie mahana te vai nei e 308 Hitu Ahuru i roto e 8 pŭpŭ. No roto mai ratou e 44 fenua e te parau nei e 30 reo. Aita tatou e faaroo nei e, te faaohipa-atoa-hia ra te mau taviri o te autahu‘araa i roto te tahi atu huru Ekalesia keretetiano. Mai te mea ra e, te parau nei te tahi mau taata e, e ere tatou i te faaroo keretetiano, inaha râ, o tatou ana‘e o te mau nei i te mana e i te faanahonahoraa o Ta’na i haamau na. Teie Tino Ahuru Ma Piti e mau taata matarohia ïa. E ere ratou i te mau taata taa‘e, e ere atoa te Tino Ahuru Ma Piti i tahito ra, tera râ, ia amuihia ratou, e pŭpŭ mana rahi ïa. Ua rau te huru o ta matou mau ohipa. E ite ihi matou, e auvaha ture, orometua haapii. E taote tapu mafatu pionie o Elder Nelson. Ua rave oia e rave rahi tauatini tapuraa. Ua parau mai oia ia‘u e, e horo‘a oia i te mau taata atoa e tapuhia i te hoê haapapûraa e, e tere noa to’na mafatu e hope noa’tu to’na oraraa i ni‘a i ta’na ohipa. E rave rahi o ratou i roto i teie Pŭpŭ ua rave na i te ohipa i roto i te nuu – e ihitai, e ‘marines’ [faehau no te moana], e faaoro manu reva. Ua mau na ratou i te mau ti‘araa rau i roto i te Ekalesia: orometua hahaere, orometua haapii, misionare, peresideni pŭpŭ autahu‘araa, episekopo, peresideni tĭtĭ, peresideni misioni, e te mea faufaa roa’tu, e tane faaipoipo e e metua tane. Ratou paatoa ua riro na ratou ei mau piahi e ei mau orometua haapii i te evanelia a Iesu Mesia. Te mea e tahoê nei ia tatou maori râ to tatou ïa here i te Faaora e i te mau tamarii a To’na Metua, e to tatou iteraa papû e, te ti‘a nei Oia i te upoo o te Ekalesia. Ua haamata mai fatata te taatoaraa o te Pŭpŭ no te Tino Ahuru Ma Piti na roto i te haehaa roa, mai tei te tau a vai Oia i ô nei. Ua taamu-hoê-hia te Pŭpŭ Tino Ahuru Ma Piti ora i roto i te faatereraa o te evanelia a Iesu Mesia. Ia tae mai ra te piiraa, ua tuu a‘e ra ratou tata’itahi i ta ratou mau upea i raro, e auraa parau teie, e ua pee atura i te Fatu. Eita e moehia te parau a te Peresideni Kimball: « E au to‘u oraraa mai to‘u tiaa te huru – o te tahito roa i roto i te ohipa ».20 E au te reira i te mau melo paatoa o te Tino Ahuru Ma Piti. E tahito roa’toa tatou i roto i te ohipa taviniraa i te Fatu e te rave nei tatou i te reira ma to tatou hinaaro mau. E ere i te hoê oraraa ohie no tatou e aore ra, no to tatou mau utuafare. Aita e mau parau no te faahoho‘a i te tauturu, te taviniraa, te faatusiaraa tei horo‘ahia e te mau vahine a te feia faatere o te autahu‘araa no te ao atoa nei. Tau taime i ma‘iri a‘e nei, i teie atoa ihoa area taime, ua tapuhia te tua o ta‘u vahine e o te tuahine Ballard atoa. E mea maitai roa raua toopiti ; aita raua e amuamu nei. Te amuamu ta ta‘u vahine i amuamu maori râ ïa, « e mea arearea roa ! » « O te ohipa atoa ïa no te Tino Ahuru Ma Piti » – i raro a‘e i te arata‘iraa a te Peresideniraa Matamua – « ia faatoro‘a e ia faaau i te mau taata toro‘a ê atu atoa no te Ekalesia, mai te au i te heheuraa ».21 E rave‘a tauira ta tatou i teie nei no te haapii e no te faaite papû i te feia faatere e i te mau melo ati a‘e te ao nei. Tera râ, no te horo‘a i te mau taviri o te mana i roto i taua reni mutu ore ra i ni‘a i te feia faatere o te autahu‘araa, « na roto i te tuuraa rima »,22 noa’tu te vahi i te ao atoa nei tei reira ratou, e titauhia i te hoê o matou ia ti‘a i reira i te mau taime atoa. Ua parau te Fatu e, « e teie faahou â, te parau atu nei au ia oe e, o ratou ta oe e tono atu i to‘u i‘oa nei, na roto i te reo o to oe mau taea‘e, te Tino Ahuru e ma Piti ra, i faaauhia e i haamanahia hoi e oe na, e noaa ïa te mana no te iriti mai i te uputa no to‘u basileia nei i te mau nunaa atoa ta oe e tono atu ia ratou ra ».23 No ni‘a i te Tino Ahuru e Ma Piti, te parau nei te papa‘iraa e, « e mau faaa’o hahaere ».24 Aita vau i taa‘e i te mau taea‘e o te Tino Ahuru Ma Piti e te Hitu Ahuru, e te Episekoporaa, i tavini hoi au e o ratou e 47 matahiti te maoro, ia parau atu vau ia outou e, te faaite ra te mau parau e, ua ratere au i Mexico e i Amerika Ropu e i Tooa o te râ hau atu e 75 taime, i Europa hau atu e 50 taime, i Canada e 25 taime, i te mau motu no Patifita 10 taime, i Asia 10 taime e i Afirita e 4 taime ; i te fenua tinito atoa e piti taime, Iseraela, Saudi Arabia, Bahrain, te Repupirita Dominicaine, India, Pakistan, Aiphiti, i Inidonesia, e i ua rau ana‘e atu â te mau fenua i te ao nei. Ua tere na vetahi hau atu i teie. Tei te mau Aposetolo te taatoaraa o te mau taviri o te autahu‘araa, area te feia faatere e te mau melo paatoa, e farii ratou i te heheuraa. Ua titauhia ia ratou ia imi i te reira na roto i te pure e te faaroo. « No’na hoi tatou… e ô atu ai i te Varua hoê i te Metua ra. « E teie nei, e ere atura outou i te taata ê ê e te purutia, hoê atoa râ to outou oire e te feia mo‘a, e no te fetii o te Atua ; « I patuhia i ni‘a iho i te niu a te mau aposetolo e te mau peropheta, e o Iesu Mesia iho te tihi rahi ».25 I teie nei e maere paha o Elder Christofferson mai ia‘u hoi i maere ra, no te aha te hoê taata mai ia‘u nei e faatoro‘ahia ai i roto i te aposetoloraa. E rave rahi te mau ite aita e vai nei i roto ia‘u. E rave rahi te mau mea e erehia nei e au i roto i ta‘u taviniraa. Te vai ra hoê noa iho mea, hoê ite o te nehenehe e tatara i te reira. Mai ia Petero ra e te feia atoa i faatoro‘ahia mai taua taime maira, te vai nei taua iteraa ra i roto ia‘u. Ua ite au e, te Atua to tatou Metua. Ua faaite mai Oia i Ta’na Tamaiti o Iesu Mesia ia Iosepha Semita ra. Te parau atu nei au ia outou e, ua ite au e, o Iesu te Mesia. Ua ite au e, te ora nei Oia. Ua fanauhia oia i te afa ti‘a o te tau. Ua haapii Oia i Ta’na evanelia e ua tamatahia oia. Ua mauiui Oia e ua faasataurohia e ua tiafaahou i te toru o te mahana. Mai To’na Metua, e tino i‘o e te ivi To’na. Ua rave Oia i te Taraehara. E faaite papû vau No’na. E ite au No’na. Te faaite papû nei au i te reira, na roto i te i‘oa o Iesu Mesia ra amene. TE MAU NOTA 1. PH&PF 107:38. 2. Luka 6:12-13. 3. Ioane 1:41-42. 4. Hi‘o Luka 6:12-16. 5. Hi‘o Mataio 4:19 ; 16:24 ; Mareko 6:1 ; Luka 9:23 ; hi‘o atoa Ioane 21:19 ; PH&PF 112:14. 6. Mataio 16:19. 7. Ioane 14:12. 8. Luka 9:1-2, 6. 9. PH&PF 124:128. 10. Mataio 16:13, 16. 11. Ioane 6:60, 66-68. 12. A hi‘o Te Ohipa 1:4. 13. A hi‘o Te Ohipa 2:1-4. 14. 2 Petero 1:19. 15. 2 Petero 1:21. 16. A hi‘o PH&PF 27:12 ; Aamu o Iosepha Semita 1:72. 17. PH&PF 112:32-33. 18. Te mau hiro‘a faaroo 1:6. 19. PH&PF 107:38. 20. I roto i te buka a Gordon B. Hinckley, « The Gift of Self », Tambuli, Titema 1986, 4 ; « He Is at Peace », Ensign, Dec. 1985, 41. 21. PH&PF 107:58 ; hi‘o atoa PH&PF 107:33. 22. Te mau hiro‘a faaroo 1:5. 23. PH&PF 112:21. 24. PH&PF 107:23. 25. Ephesia 2:18-20.