Kau Palōfita, Kau Tangata Kikite mo e Kau Tangata Maʻu Fakahā

ʻELETĀ JEFFREY R. HOLLAND
ʻO e Kōlomu ʻo e Kau ʻAposetolo ʻe Toko Hongofulu Mā Uá

Kuo fakamafaiʻi mai ʻe he ʻOtuá ʻa e Kau Palesitenisī ʻUluakí mo e Kōlomu ʻo e Toko Hongofulu Mā Uá pea poupouʻi . . . ko e “kau palōfita, kau tangata kikite mo e kau tangata maʻu fakahā.”

ʻELETĀ JEFFREY R. HOLLAND ʻOku ou fakafofongaʻi atu hoku ngaahi tokoua ʻi he Kōlomu ʻo e Kau ʻAposetolo ʻe Toko Hongofulu Mā Uá, pea tuku muʻa ke u hoko ko e fuofua tokotaha ke fai hano talitali lelei ʻa ʻEletā Tieta ʻUkitofa mo ʻEletā Tēvita Petinā ki hona lakanga foʻoú mo e feohi fakafiefia foʻou ʻoku hanga mei muʻa kiate kinauá. ʻI hono ui ʻo e ʻuluaki Toko Hongofulu Mā Uá ʻi he kuonga ko ʻení, naʻe fakahā ai kiate kinautolu naʻe “fakataumuʻa homou uí ke mou maʻu ha feʻofaʻaki ʻoku mālohi ange ʻi he maté.”¹ Kuo mau ʻosi maʻu ha ʻofa pehē kiate kimoua, mo homo malí mo e fāmilí. ʻOku mau pehē atu ʻi he loto mo e leʻo pē ʻe taha, “ʻOku mau talitali lelei kimoua.”

ʻOku ou fie fakahā atu foki ʻi he loto tatau mo e lea ʻa Palesiteni Hingikelií, tuku muʻa ke u fakahā atu ʻa e “ongo ʻofa . . . ʻoku mālohi hake ʻi he maté” mo e ongo fakamamahi moʻoni kiate kitautolu kotoa ʻa e mole homau ongo tokoua ʻofeina ko Tēvita B. Heiti mo Niila A. Mekisuelé. ʻOku mau pehē ki he ongo tangata ko iá mo hona uaifi ʻofeina ko Lupi mo Kōliní, ʻoku mau ʻofa ʻiate kimoutolu, pea mau fakaʻapaʻapaʻi hoʻomou ngāué pea mau fakalāngilangiʻi ʻa hoʻomou moʻui faʻifaʻitakiʻangá. ʻOku mau lau kotoa ko ha faingamālie makehe ʻemau ʻiloʻi kimoutolú pea ngāue fakataha mo kimoutolu. Te mou mahuʻinga kiate kimautolu ʻo aʻu ki he taʻengatá.

ʻI heʻeku fakakaukau atu ki he ngaahi liliu mahuʻinga pehē ʻi he laka ki muʻa ʻa e ngāué ni, ʻoku ou fie lea ai he pongipongí ni ʻo kau ki he lakanga fakaʻaposetoló mo e mahuʻinga ʻo hono tauhi mai ia ʻi he Siasi moʻoni ʻo Sīsū Kalaisí. ʻI heʻeku lea ki aí, ʻoku ʻikai te u lea ai ʻo kau ki he kau tangata ʻoku nau maʻu pe naʻa nau maʻu ʻa e lakanga ko iá, ka te u lea pē ʻo kau ki he lakangá, ʻa ia ko ha ui ʻi he Lakanga Taulaʻeiki Faka-Melekisētekí, ʻa ia naʻe folofola tonu ʻa e Fakamoʻuí ʻo pehē, ko hono taumuʻá ke tokangaʻi ʻa Hono kakaí mo fakamoʻoni ki Hono huafá.

Pea koeʻuhí ke fokotuʻu ha siasi ʻa ia te Ne kei tataki pē hili hono ʻave Ia mei he māmaní, naʻe hāʻele hake ai ʻa Sīsū . . . “ki ha moʻunga ke lotu, pea lotu ai pē ia ki he ʻOtua ʻi he poó ʻo ʻaho.

“Pea kuo ʻaho hake, peá ne ui kiate ia ʻa ʻene kau ākongá; pea naʻá ne fili ʻiate kinautolu ʻa e toko hongofulu mā toko ua, ʻa ia foki naʻá ne fakahingoa ko e kau ʻaposetolo.”²

Naʻe akoʻi ki mui ʻe Paula ʻo pehē, ʻi he ʻafioʻi ʻe he Fakamoʻuí kuo pau ke Ne pekiá, ko ia naʻá Ne fai ai ʻeni ke fokotuʻu ki he Siasí, ha “tuʻunga . . . ʻa e kau ʻaposetolo mo e kau palōfita.”³Naʻe pau ai ke ngāue ʻa e kau tangata ko ʻení mo e kau ʻōfisa kehe ʻo e Siasí ʻo fakatatau ki he finangalo ʻo Kalaisi kuo toetuʻú.

Ko e hā nai hono ʻuhingá? ʻOku kau ki he ngaahi ʻuhingá “koeʻuhí ke ʻoua naʻa tau kei fakatamaiki, ʻo felīlīʻaki, mo feʻaveʻaki fano ʻe he matangi ʻo e akonaki kotoa pē, ʻi he poto kākā ʻo e tangatá, mo e poto ʻi he fiemuʻa, ʻa ia ʻoku nau toka tataʻo ai ke kākaaʻi. . . .”⁴

Ko ia ko e taumuʻa ʻo hono fakavaʻe fakaʻaposetolo mo fakapalōfita ʻo e Siasí, ke fai tāpuekina ʻi he taimi kotoa pē, kae tautautefito ki he taimi ʻo e faingataʻá pe fakatuʻutāmakí, taimi te tau ongoʻi ai ʻo hangē ha fānau, ʻo puputuʻu pe veiveiua, pea kiʻi manavahē, pe ko e taimi ʻe feinga ai ʻa e ngaahi ngāue kovi pe fakaloto-kovi ʻa e kau tangatá pe tēvoló ke uesia pe kākaaʻi pe takihalaʻi kitautolú. Ko ia ʻi he teuteu ki ha ngaahi taimi pehē ʻe hoko mai ʻi hotau kuongá ni, kuo fakamafaiʻi ai ʻe he ʻOtuá ʻa e Kau Palesitenisī ʻUluakí mo e Kōlomu ʻo e Toko Hongofulu Mā Uá pea poupouʻi ʻe kimoutolu ko e “kau palōfita, kau tangata kikite mo e kau tangata maʻu fakahā,” pea fokotuʻu ʻa e Palesiteni ʻo e Siasí ko e Palōfita, Tangata Kikite mo e Tangata Maʻu Fakahā, ʻa ia ko e ʻAposetolo fika ʻuluakí, ʻo ne hoko ai ko e tangata pē ʻe toko taha kuo fakamafaiʻi ke ne ngāueʻaki ʻa e ngaahi kī kotoa pē ki he maʻu fakahaá mo hono puleʻi ʻo e Siasí. Naʻe hoko ʻa e kau ʻōfisa ko ʻení ʻi he kuonga ʻo e Fuakava Foʻoú, mo onopōní, ko e fakavaʻe ia ʻo e Siasi moʻoní, pea kuo fokotuʻu takai ʻa kinautolu pe maʻu honau iví mei he fungani maka-tulikí, ʻa ia ko e “maka ʻo hotau Huhuʻí, ʻa ia ko [Sīsū] Kalaisi, ko e ʻAlo ʻo e ʻOtuá,”⁵ ʻa ia naʻe pehē ʻe Paula ko e “ʻaposetolo mo e fungani taulaʻeiki ʻo ʻetau lotú.”⁶ Naʻe hoko pea ʻe hoko maʻu pē ha makatuʻunga pehē ʻia Kalaisi, ko ha maluʻi ʻi he ngaahi ʻaho “ka tuku atu ai ʻe he tēvoló ʻene ngaahi matangi mālohí, ʻio, ʻa ʻene ngaahi ngahaú ʻi he ʻahiohio, ʻio, ka faʻaki kiate [kimoutolu] ʻa hono kotoa ʻo ʻene ʻuha maká mo ʻene fuʻu afā lahí.” Pea ʻi he ngaahi ʻaho hangē ko ia ʻoku tau lolotonga ʻi aí—pea te tau ʻi ai maʻu pē—ʻe ʻikai lava ʻe he ngaahi afā ʻo e moʻuí ke “fusi hifo ʻa [kimoutolu] . . . koeʻuhí ko e maka kuo langa ai ʻa [kimoutolú], ʻa ia ko e tuʻunga mālohi, ʻa ia ko e tuʻunga ʻe ʻikai lava ke hinga ʻa e kakaí ʻo kapau te nau langa aí.”⁷

ʻI he uike ʻe tolu kuo hilí, naʻá ku ʻi ha konifelenisi fakasiteiki ai ʻi he kiʻi kolo moʻunga fakaʻofoʻofa ko Pelesikoti, ʻi ʻAlesoná. Hili ʻa e ngaahi meʻa fakafiefia naʻe hoko he fakaʻosinga ʻo e uike ko iá, naʻe mono mai ʻe ha fefine ha kiʻi tohi kiate au i heʻene haʻu mo ha niʻihi kehe ke mau lulululu mo feʻiloaki fakamāvae. ʻOku ou ongoʻi momou ʻi heʻeku vahevahe atu kiate kimoutolu he pongipongí ni ha konga ʻo e tohi ko iá. Mou kātaki ʻo tokanga pē ki he tokāteline naʻe akoʻi ʻe he fefine ko ʻení, kae ʻikai ko e kakai ʻoku kau ki aí.

“Siʻi ʻEletā Hōlani, ʻoku ou fakamālō atu koeʻuhí ko e fakamoʻoni naʻá ke fai ʻi he konifelenisi ko ʻení ʻo kau ki he Fakamoʻuí mo ʻEne ʻofá. Naʻá ku lotu fakamātoato ki he ʻEikí ʻi he taʻu ʻe fāngofulu mā taha kuo hilí, ʻo fakahā kiate Ia, ʻeku fakaʻamu ke pehē ange mai ne u moʻui ʻi he māmaní he taimi naʻe kei ʻaʻeva ai ʻa e kau ʻAposetoló ʻi māmaní, ʻi he taimi naʻe ʻi heni ai ʻa e Siasi moʻoní pea kei ongona ai ʻa e leʻo ʻo Kalaisí. Naʻe teʻeki ʻosi ha taʻu ʻe taha mei heʻeku lotu ko iá, ne fekauʻi mai ʻe he Tamai Hēvaní ha ongo faifekau ʻa e Siasí kiate au, pea naʻá ku ʻiloʻi ai ʻe lava ke fakahoko ʻeku ngaahi ʻamanaki ko iá. Mahalo ka ʻi ai ha taimi ʻokú ke ongosia ai pe faingataʻaʻia, ʻe tokoni atu ai ʻa e kiʻi tohí ni ke ke manatuʻi, ʻa e ʻuhinga naʻe mahuʻinga ai kiate au mo ha laui miliona kehe hangē ko aú, ʻa ʻeku fanongo ki ho leʻó pea lulululu mo koe. Ko ho tuofefine ʻi he ʻofa mo e loto-fakafetaʻi, Kolōlia Kelemeni.”

ʻE Sisitā Kelemeni, ʻoku hanga ʻe hoʻo kiʻi tohi fakaʻofoʻofá ʻo fakamanatu mai kiate au ha ʻamanaki tatau mo e fakalea tatau ne ngāueʻaki ʻe hoku fāmili ʻoʻokú. Lolotonga ʻa e ngaahi taʻu moveuveu ʻo hono ʻuluaki nofoʻi ʻo e puleʻangá ni, naʻe hola ʻeku kui hongofulu, loto feliliuaki mo loto-fakapapau ko Lousa Uiliamisí (Roger Williams), mei he Kolonia Matāfanga Masasūsetí (Masssachusetts Bay) ʻo nofo ʻi he feituʻu ʻoku ui he taimí ni ko Louti ʻAilani (Rhode Island). Naʻá ne ui hono hetikuotá ko Poloviteni (Providence), pea ʻoku hā mei he hingoa ko iá ʻa e meʻa naʻá ne feinga ki ai ʻi heʻene moʻuí kotoa, ke maʻu ha fakalelei mo ha ngaahi fakahā fakalangi. Ka naʻe ʻikai te ne maʻu ʻa e meʻa naʻá ne ongoʻi ko e siasi moʻoni ʻo e Fuakava Foʻou he kuonga muʻá. Ko e lea ʻeni ne fai fekauʻaki mo e tangata fokotuʻu lotu loto mamahi ko ʻení, ʻe he faifekau mo e tangata faʻu tohi ongoongoa ko Kōtoni Mateá (Cotton Mather), “Naʻe [fāifai] . . . pea pehē ʻe Misa Uiliamisi [ki hono kau muimuí], kuo takihalaʻi ia, pea kuó ne takihalaʻi ai mo [kinautolu], pea ʻokú ne tui ʻoku ʻikai ke ʻi ai ha taha ʻi māmani te ne lava ʻo fakahoko ʻa e papitaisó [pe ko ha faʻahinga ouau pē ʻo e ongoongoleleí] . . . [ko ia] naʻá ne faleʻi kinautolu, ke nau taʻofi ʻa e meʻa kotoa pē . . . pea tatali ki ha taimi ʻe toki haʻu ai ha kau ʻaposetolo foʻou.”⁸ Naʻe ʻikai moʻui ʻa Lousa Uiliamisi ke mamata ki he tupu hake ʻa e kau ʻAposetolo foʻou ko ia naʻá ne ʻamanaki ki aí, ka ʻoku ou ʻamanaki ʻe ʻi ai ha taimi ʻi he kahaʻú, te u toki lava ai ʻo fakahā tonu ange kiate ia, naʻe moʻui hono hakó ke nau mamata ki hono fakahokó.

Naʻe ʻikai foʻou ʻa e loto-moʻuá mo e ʻnofo ʻamanaki ki ha fakahinohino fakalangí, ki he kau fakafoʻou lotu ko ia naʻa nau teuteu ʻa e hala ki hono Fakafoki Mai ʻo e ongoongoleleí. Ko e taha ʻo e kau tangata malanga ʻiloa taha ʻi Niu ʻIngilaní (New England), ko Sonatane ʻEtuate (Jonathan Edwards), ʻa ia naʻá ne pehē, “ʻOku hangē kiate au . . . ʻoku taʻe ʻuhinga ʻetau pehē . . . ʻoku totonu ke ʻi ai ha ʻOtua . . . ʻokú ne fuʻu tokanga lahi [mai kiate kitautolu], . . . ka ʻoku ʻikai totonu ke ne folofola mai, . . . pea ʻikai fai mai ha folofola [meiate ia].”⁹

Naʻe hanga ʻe he tangata tuʻukimuʻa ko Lolo Uolotō ʻEmasoní (Ralph Waldo Emerson), ʻo veteki ʻa e ngaahi makatuʻunga ʻo e tui fakalotu ʻo Niu ʻIngilaní ʻi haʻane lea ʻi he Akoʻanga Fakalotu ʻi Hāvatí ʻo pehē: “Ko hoku fatongiá ke u fakahā atu kiate kimoutolu, ʻoku fie maʻu he taimí ni ʻa e fakahā foʻoú, ʻo lahi ange ia ʻi ha toe taimi.” Naʻá ne fakatokanga ʻo pehē,“Kuo mole ʻa e tokāteline ʻo e fakahinohino fakalaumālié; . . . Kuo hoko ʻa e ngaahi maná, kikité . . . mo e moʻui māʻoniʻoní ko ha meʻa [pē] ʻi he hisitōlia ʻo e kuonga muʻá. . . . Kuo lau ʻe he tangatá ko e maʻu fakahaá ko ha meʻa ʻo e kuohilí, pea kuo ʻosi ʻa e maʻu fakahaá, ʻo hangē kuo pekia ʻa e ʻOtuá . . . Ko e fatongia ia ʻo e faiako moʻoní ke fakahā mai kiate kitautolu ʻoku moʻui ʻa e ʻOtuá, ka ʻoku ʻikai mate; pea ʻokú ne folofola mai he ʻahó ni, kae ʻikai ʻi he kuohilí pē.”¹⁰ Pea ko e moʻoni ʻo e meʻa naʻe lea ki ai Misa ʻEmasoní, ʻoku peheni ia: “Kapau te tau kei ʻoange ai pē ʻa e maka ʻi he taimi ʻoku kole ai ʻe he kakaí ha maá, ʻe faifai pē pea ʻe ʻikai te nau toe haʻu ki he fale taʻo maá.”¹¹

Fakakaukau ki he ngaahi tukuakiʻi ne fai ʻe he kau tangata ʻiloa ko ia ʻi he hisitōlia ʻo e ʻIunaiteti Siteití, ʻa ia ne u lave ki aí, pea pehē foki ki he lotu ʻa Kolōlia Kelemení, pea mou sio ai ki hono mahuʻinga makehe ʻo e pōpoaki ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, kae tautautefito kiate kimoutolu ʻoku mou fetuʻutaki mo ʻemau kau faifekaú. Ko e kau palōfita? Ko e kau tangata kikite? Ko e kau tangata maʻu fakahā? ʻOku fakahā mai ʻe he ngaahi meʻa naʻe hoko ʻi he 1820 mo e 1830, mo e ngaahi meʻa ne hoko ʻi he meimei senituli ʻe ua ki mui maí, ʻoku ʻikai ko ha “ngaahi meʻa naʻe fakahā mai ʻi he kuo hilí pea kuo ʻosi” ʻa e ngaahi fakahaá mo kinautolu ʻoku nau maʻu iá.

Naʻe ui ʻa ʻEletā Sione Teila, ko ha kiʻi talavou ne hiki mai mei ʻIngilani ki he fonuá ni, ke hoko ko e ʻAposetolo ʻa e ʻEiki ko Sīsū Kalaisí, pea ko ha palōfita, tangata kikite mo e tangata maʻu fakahā ʻi he taʻu tatau pē ko ia naʻe lea ai ʻa Misa ʻEmasoni ki he Akoʻanga Fakalotú. ʻI hono ui ko iá, naʻe pehē ai ʻe ʻEletā Teila ʻi ha taimi ʻe taha, ʻi heʻene fakahā ʻa ʻene kaungā ongoʻi fakataha mo e kau fekumi fakamaatoato ki he moʻoní: “Ko hai kuo fanongo ʻi ha tui fakalotu moʻoni taʻe kau ai ha fetuʻutaki mo e ʻOtuá? ʻOku ou pehē ʻe au, ko e fakakaukau ngalivale taha ia ʻe lava ke fakakaukau ki ai ʻa e tangatá.” Naʻe toe pehē ai ʻe Palesiteni Teila, “ʻOku ʻikai haʻaku tālaʻa ʻe taha, [he ko e] taimi ko ia ʻoku ʻikai tali ai ʻe he kakaí ʻa e tefitoʻi moʻoni ʻo e maʻu fakahā ʻi he lolotonga ní, ʻoku ikuna taʻe fakangatangata leva ʻa e fakataʻetaʻetuí mo e taʻe tui ʻOtuá. ʻOku ʻikai ke u ofo ai ʻi he tokolahi pehē fau ʻo e kakai ʻoku nau fehiʻa ki he tui fakalotú pea lau ko ha meʻa ia ʻoku ʻikai totonu ke tokanga ki ai ha kakai poto, he kapau ʻoku ʻikai ke ʻi ai ha maʻu fakahā, ʻoku hoko leva ʻa e tuifakalotú ko ha manuki mo ha meʻa noa pē. . . . ʻOku hoko ʻa e tefitoʻi moʻoni ʻo e maʻu fakahā ʻi he lolotonga ní, . . . ko e fakavaʻe ia ʻo ʻetau tui fakalotú.”¹²

Ko e tefitoʻi moʻoni koā ʻo e maʻu fakahā he lolotongá? Ko e makatuʻunga koā ia ʻo ʻetau tui fakalotú? ʻOku ou fie foki mei he ngaahi makatuʻunga ko iá ki he lolotongá ni, ʻa e taimí ni, ʻa ia ko e senituli 21. ʻOku kei tatau pē ʻa e meʻa ia ʻoku tokanga ki ai ʻa e kakai kotoa pē . . . ʻa e kau faifekau fakalotú, kau faʻu hisitōliá, pea mo e kakaí. ʻOku fakaava mai ʻa e ngaahi langí? ʻOku fakahā nai ʻe he ʻOtuá ʻa Hono finangaló ki he kau palōfitá mo e kau ʻaposetoló, ʻo hangē ko e ngaahi kuonga ʻi muʻá? ʻOku kei hoko ia, pea ʻokú Ne kei fakahoko ia, ko e pōpoaki mālohi ia ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ki he māmaní kotoa. Pea ʻoku ʻi he fakahā ko iá ʻa hono mahuʻinga ʻo e moʻui ʻa Siosefa Sāmitá, ko e Palōfita, ʻi he taʻu ʻe meimei 200 ko ʻení.

Kuo fehuʻi pea tali ʻe heʻene moʻuí ʻa e fehuʻi ko ʻení, “ʻOkú ke tui nai ʻoku folofola mai ʻa e ʻOtua ki he tangatá? Neongo ʻa e ngaahi meʻa kotoa pē kuo lavaʻi ʻe Siosefa ʻi he taʻu ʻe 38 mo e konga naʻá ne moʻui aí, ka naʻá ne tuku mai ha talatukufakaholo fakapapau ʻo e maʻu fakahā fakalangí—ʻo ʻikai ko ha foʻi fakahā pē ʻe taha taʻe ʻi ai hano fakamoʻoni pe ola, pea ʻoku ʻikai “ko ha faʻahinga fakahinohino fakalaumālie ia ʻoku tafe māmālie mai ki he ʻatamai ʻo e kakai lelei” ʻi he feituʻu kotoa pē, ka ko ha ngaahi fakahinohino pau, kuo fakamoʻoniʻi, pea hokohoko fai mai ʻe he ʻOtuá . Pea hangē ko e lau ʻa hoku kaumeʻa lelei mo ha tangata poto faivelenga ʻi he Siasí, “I he taimi naʻe fakafepakiʻi ai ʻa e ngaahi tupuʻanga ʻo e Tui Faka-Kalisitiané ʻe he ngaahi mālohi ʻo e tui ki he ivi ʻo e ʻatamaí mo e ngaahi tokāteline fakapolitikale, fakalotu, mo fakaako foʻoú, naʻe hanga ai ʻe Siosefa Sāmita [toko taha pē pea taʻetoeveiveiua], ʻo fakafoki mai ʻa e tui Faka-Kalisitiane ʻo onopōní ki hono tupuʻanga ʻi he fakahaá.”¹³

ʻOku tau “[fakamālō ki he ʻOtuá, koeʻuhí ko ha Palōfita ke ne tataki kitautolu ʻi he ngaahi ʻaho fakaʻosi ko ʻení,]¹⁴ koeʻuhí he ʻe lahi e ngaahi ʻaho ʻo e faingataʻá. ʻOku tau fakafetaʻi koeʻuhí ko e pongipongi ko ia ʻi he faʻahitaʻu failau ʻo e 1820, ʻa ia naʻe hā mai ai ʻa e Tamaí mo e ʻAló ʻi he nāunauʻia ki ha kiʻi talavou taʻu 14. ʻOku tau fakafetaʻi koeʻuhí ko e pongipongi ko ia naʻe haʻu ai ʻa Pita, Sēmisi, mo Sione ʻo fakafoki mai ai ʻa e ngaahi kī ʻo e Lakanga Fakataulaʻeiki Māʻoniʻoní pea mo hono ngaahi lakangá kotoa. Pea ʻoku tau fakafetaʻi ʻi hotau toʻu tangatá ni koeʻuhí ko e pongipongi ʻo e ʻaho 30 ʻo Sepitema 1961, ʻa ia ko e taʻu ʻe 43 ʻaki e fakaʻosinga ʻo e uiké ni, ʻa ia naʻe ui ai ʻa ʻEletā Kōtoni B. Hingikelī, [he taimi ko iá] ki he lakanga fakaʻaposetoló, pea ko e tangata ia hono 75 kuo ui ki he lakanga ko iá ʻi he kuonga ko ʻení. Pea hokohoko mai ai ki ha ʻaho hangē ko ʻení, pea ʻe hokohoko pehē atu kae ʻoua ke hāʻele mai ʻa e Fakamoʻuí.

ʻOku ou fakamoʻoniʻi atu ʻi he māmani ko ʻeni ʻo e nofo taʻemanonga mo tailiilí, moveuveu fakapolitikalé mo e fakaʻauʻau hifo ʻo e tuʻunga angamaʻá, ko Sīsū ʻa e Kalaisí—pea ko Ia ʻa e Mā ʻo e moʻuí mo e Vai ʻo e moʻuí—pea ʻoku kei hoko, pea te Ne hoko maʻu pē ko e Pā maluʻi ʻʻo ʻetau moʻuí, ko e Maka Fungani ʻo ʻIsilelí, mo e Taula ʻo Hono Siasi moʻuí. ʻOku ou fakamoʻoni ki Heʻene kau aalōfitá, kau tangata kikité, mo e kau tangata maʻu fakahaá, ʻa ia ʻoku nau hoko ko e makatuʻunga tuʻu-holoaki ʻo e Siasi ko iá, pea ʻoku ou fakamoʻoniʻi ʻoku moʻui mo ngāue he taimí ni ʻa e ngaahi lakanga mo e kau tangata lea ko iá, ʻo fakatatau ki he fakahinohino ʻa hotau Fakamoʻuí, ʻi hotau kuongá ni, pea maʻa hotau kuongá ni. ʻOku ou fakamoʻoni ki he ngaahi moʻoni ko ʻení mo hono faka-ʻOtua ʻo e ngāue ko ʻení. Pea ʻoku ou fakamoʻoniʻi kinautolu ʻi he huafa toputapu ʻo Sīsū Kalaisí, ʻēmeni.

MAʻUʻANGA FAKAMATALÁ

1. History of the Church, 2:197.

2. Luke 6:12–13.

3. ʻEfesō 2:19–20.

4. ʻEfesō 4:14.

5. Hilamani 5:12.

6. Hepelū 3:1.

7. Hilamani 5:12.

8. Magnalia Christi Americana, 1:498.

9. The Works of Jonathan Edwards, vol. 18, The “Miscellanies” 501–832, ed. Ava Chamberlain (200), 89–90.

10. The Complete Essays and Other Writings of Ralph Waldo Emerson, ed. BrooksAtkinson (1940), 75, 71, 80.

11. Louis Cassels, naʻe ngāueʻaki ʻe Howard W. Hunter, “Spiritual Famine,” ʻi he Ensign, Sānuali 1973, 64.

12. “Discourse by John Taylor”, Deseret News 4 Māʻasi 1874, 68, naʻe toki fakamamafaʻi.

13. Vakai ki he ʻēsei ʻa Richard L. Bushman ko e, “A Joseph Smith for the Twenty-First Century,” ʻi he Believing History (2004). ʻOku toʻo ʻa e ngaahi lea ko ʻení mei he peesi 274, ka ʻoku totonu ke lau kotoa ʻa e ʻēseí.

14. Vakai ki he “Fakamālō ki he ʻOtuá” Ngaahi Himi, fika 10.