PALESITENI GORDON B. HINCKLEY
ʻOku ou fakaʻamu ange te tau toutou ʻalu maʻu pē ki he fale ʻo e ʻEikí.
Kuo tau feia ha toe konifelenisi mahuʻinga ʻe taha. Ko ha ngaahi fakataha fakaofo ʻeni. ʻOku nau fakahoko ha taumuʻa mahuʻinga lahi. ʻOku tau fakataha mai ʻi he laumālie ʻo e lotu mo ha holi ke ako. ʻOku tau fakafoʻou ʻetau ngaahi fetuʻutakí ʻi heʻetau hoko ko ha kau mēmipa ʻo e fuʻu fāmili toko lahí ni ʻo e kau Māʻoniʻoni ʻi he Ngaahi ʻAho Kimui Ni ʻoku nofo ʻi ha ngaahi fonua lahi, pea nau lea ʻi ha ngaahi lea fakafonua kehekehe, pea nau haʻu mei ha ngaahi anga fakafonua faingataʻa kehekehe, pea toe kehekehe foki mo e anga honau fōtungá. Ka ʻoku tau ʻiloʻi ʻoku tau taha kotoa pē, ko ha foha pe ʻofefine kitautolu taki taha ʻo ʻetau Tamai Hēvaní.
ʻI ha ngaahi miniti siʻi pē mei heni ʻe ʻosi atu ʻa e kakaí mei he fuʻu Senitā Konifelenisi ko ʻeni ʻi Sōleki Sití. ʻE tāmateʻi ʻa e ngaahi māmá pea loka ʻa e ngaahi matapaá. ʻE hoko pehē foki ki he ngaahi falelotu ʻe lau afe kehe ʻi he funga ʻo e māmaní. ʻOku ou ʻamanaki ai te tau foki atu ki hotau ngaahi ʻapí, kuo tāpuekina lahi ʻa kitautolu. Kuo fakamālohia foki ʻetau tuí pea mo ʻetau loto fakapapaú. Pea fakamālohia foki mo ʻetau fakapapau ke tau feinga ke tau lelei angé. ʻOku ou fakatauange te tau maʻu ha lototoʻa lahi ange, ʻi he ngaahi tafaʻaki ʻo ʻetau moʻuí ne tau ongoʻi loto-foʻi pe mole ai ʻetau ʻamanakí. ʻOku ou fakatauange, te tau ongoʻi ha laumālie fakatomala, kapau naʻa tau hē atu pe taʻe tokanga ki he ongoongoleleí. ʻOku ou fakatauange kuo fakapapau hotau lotó ke tau liliu, kapau naʻa tau taʻeʻofa, pe angakovi mo siokita. Pea ko kinautolu ʻoku ʻaʻeva ʻi he tuí, ʻe fakamālohia ʻenau tui ko iá.
Ko e ʻaho Mōnite ʻeni ia ʻi he feituʻu Hahake Mamaʻó. Ko ʻapongipongí ko e ʻaho Mōnite ia ʻi he Hemisifia Hihifó mo ʻIulope. Ko ha taimi ia kuo tau vaheʻi ke fai ai ʻa e Efiafi Fakafāmili ʻi ʻApí. ʻOku ou fakatauange ʻe tānaki mai ʻe he ngaahi tamaí mo e ngaahi faʻeé ʻa ʻenau fānaú ʻi he taimi ko iá, ʻo haʻohaʻo takai ʻena fānaú ʻiate kinaua, ʻo nau talanoa ai ki ha ngaahi meʻa naʻa nau fanongo ki ai ʻi he konifelenisi ko ʻení. ʻOku ou fakaʻamu ke nau hiki ʻa e ngaahi meʻa ko iá, pea nau fakakaukau ki ai, mo manatuʻi ia.
ʻOku ou fie fakamanatu atu ha meʻa ʻe taha kiate kimoutolu ʻi heʻetau fakaʻosi ʻa e konifelenisi ko ʻení. ʻOku ou fakaʻamu ange te tau toutou ʻalu maʻu pē ki he fale ʻo e ʻEikí. Pea hangē ko ʻeku lea naʻe fai atu ʻi he fakataha fakaava ʻo e konifelenisí, kuó u fai hoku tūkuingatá ke ʻoatu ʻa e ngaahi temipalé ke ofi ange ki hotau kakaí. ʻOku kei toko lahi pē ha kakai ʻoku nau kei fononga mamaʻo mai ki ai, pea ʻoku ou fakatauange te nau kei feinga pē kae ʻoua kuo feʻunga ke fokotuʻu ha temipale ʻi honau lotolotongá.
ʻE lava ke toe lahi ange hono ngāueʻaki hotau ngaahi temipalé. Ko ha faingamālie mahuʻinga ʻoku tau maʻu ʻi he māmani longoaʻa, femoʻuekina, mo feʻauʻauhi ko ʻení, ke ʻi ai ha fale toputapu ʻa ia te tau lava ʻo ongoʻi ai ʻa e mālohi fakahaohaoa ʻo e Laumālie ʻo e ʻEikí. ʻOku uesia maʻu pē kitautolu ʻe he ʻelemēniti ʻo e siokitá. ʻOku fiemaʻu ke tau ikunaʻi ia, pea ʻoku ʻikai ha founga lelei ange, ka ko ʻetau ʻalu pē ki he fale ʻo e ʻEikí, pea tau ngāue ai ke fakafofongaʻi ʻa kinautolu ʻoku ʻi he tafaʻaki ʻe taha ʻo e veili ʻo e maté. Ko ha meʻa fakaofo moʻoni ia. ʻI he taimi lahi ʻoku ʻikai ke tau ʻiloʻi ʻa e niʻihi ʻoku tau fakahoko ki ai ʻa e ngāué. ʻOku ʻikai ke tau ʻamanaki ki ha fakamālō. ʻOku ʻikai ke tau ʻiloʻi pe te nau tali ʻa e meʻa ʻoku tau ʻoatu maʻanautolú. Ka ʻoku tau ʻalu pē, pea tau aʻusia ai ha tuʻunga he ʻikai te tau lava ʻo aʻusia ʻi ha toe ngāue kehe. ʻOku tau hoko moʻoni ai ko e kau fai fakamoʻui ʻi he Moʻunga ʻo Saioné. ʻOku ʻuhinga nai ia ki he hā? Hangē ko hono foaki ʻe hotau Huhuʻí ʻa ʻEne moʻuí ʻi ha feilaulau fakafofonga maʻá e kakai kotoa pē, peá Ne hoko ai ko hotau Fakamoʻuí, ko e founga tatau pē, ʻoku tau lava ai ʻi ha kiʻi meʻa siʻi ʻi heʻetau fakahoko ʻa e ngāue fakafofonga ʻi he temipalé, ko ha kau fakamoʻui kiate kinautolu ʻi he tafaʻaki ʻe tahá ʻa ia ʻoku ʻikai te nau lava ʻo fakalakalaka, kae ʻoua kuo fai ha ngāue ʻe kitautolu ʻi he māmaní ʻo fakafofongaʻi kinautolu.
Ko ia ai, ʻe hoku ngaahi tokoua mo e tuofāfine, ʻoku ou fakalotolahiʻi kimoutolu ke mou fakaʻaongaʻi lahi ange ʻa e faingamālie ko ʻení. Te ne fakaleleiʻi hotau ngaahi ʻulungāangá. Te ne toʻo atu ʻa e ngaahi ongoʻi siokita ko ia ʻi heʻetau moʻuí. Te ne ʻomi moʻoni ha fakahaohaoa ki heʻetau moʻuí pea tau hoko ai ko ha kau tangata mo ha kau fefine lelei ange.
ʻOku maʻu ʻe he temipale kotoa pē ha loki silesitiale fakaʻofoʻofa. Naʻe faʻu ʻa e loki ko iá ke ne fakafofongaʻi ʻa e puleʻanga fakasilesitialé. Ko e taimi ko ia naʻe fakahoko ai ha ngāue lahi ki hono fakafoʻou ʻo e Temipale Mesa ʻAlesoná ʻi he ngaahi taʻu kuo hilí, pea fakaava ia ke mamataʻi ʻe he kakaí, naʻe fakamatalaʻi ai ʻe ha tokotaha ʻaʻahi ʻe taha ʻa e loki silesitialé ʻo pehē ko e lotofale ia ʻo e ʻOtuá. ʻE lava pē ke tau fakakaukau pehē ki he loki silesitialé. Ko e faingamālie makehe ʻo kitautolu ʻataʻatā pē, lolotonga ʻetau teunga hina kakató, ke tau nofo ʻi he loki silesitiale fakaʻofoʻofa ko iá, ʻi hono fakaʻosi ʻetau fakahoko ouaú, ʻo fakalaulauloto, fakakaukau mo lotu fakalongolongo.
Te tau lava ʻo fakakaukau ai ki he angalelei lahi ʻa e ʻEikí kiate kitautolú. Te tau lava ʻo fakakaukau ai ki he palani lahi ʻo e fiefiá ʻa ia kuo fokotuʻu ʻe heʻetau Tamaí maʻa ʻEne fānaú. Pea ko ia ʻoku ou kole atu ai kiate kimoutolu, ʻa hoku ngaahi tokoua mo e tuofāfine, ke mou fakahoko ia ʻi hoʻomou kei maʻu ʻa e mālohi ke fakahoko iá. ʻOku ou ʻiloʻi ko e taimi ko ia te ke fakaʻau ʻo motuʻa ange aí, ʻe toe faingataʻa ange ke tuʻu hake mo tangutu hifo. Ka ko ha tāpuaki fakaʻofoʻofa moʻoni ʻeni.
Ko ia, ʻe hoku ngaahi tokoua mo e tuofāfine, ʻoku ou toe fakahā atu hoku ʻofa kiate kimoutolu. ʻOfa ke fofonga fiefia hifo ʻa e langí kiate kimoutolu. ʻOku moʻoni ʻa e ngāue ko ʻení. ʻOua naʻa mou tālaʻa ai. ʻOku moʻui ʻa e ʻOtua ko ʻetau Tamai Taʻengatá. Ko Sīsū hotau Huhuʻí, mo hotau ʻEikí, ko e ʻAlo ʻo e ʻOtua moʻuí. Ko Siosefá ko ha palōfita, ko e Tohi ʻa Molomoná ʻoku fakalangi ʻa hono tupuʻangá, pea ko e ngāue toputapu ʻeni ʻa e ʻOtuá ʻi he māmaní. ʻOku ou ʻoatu ʻeku fakamoʻoní kiate kimoutolu, mo ʻeku ʻofá, mo ʻeku tāpuakí ʻi heʻetau māvae ko ʻeni ʻo foki ki hotau ngaahi ʻapí. ʻOfa ke ʻiate kimoutolu ʻa e ʻOtuá kaeʻoua kuo tau toe feʻiloaki, ko ʻeku lotú ia ʻi he loto fakatōkilalo pea ʻi he huafa toputapu ʻo Sīsū Kalaisí, ʻēmeni.
Previous
