Ko ha filimi vitiō naʻe huluʻi lolotonga e fakataha lahi ʻa e Fineʻofá, naʻe hā ai ʻa Palesiteni Kōtoni B. Hingikelī, ʻi heʻene fakamatalaʻi e hisitōlia ʻo e Fineʻofá. ʻOku hā he vitioó ʻa e Palōfita ko Siosefa Sāmitá, ʻEma Sāmita, Lusi Meki Sāmita mo e kau fuofua fefine ʻo e Fineʻofá, ʻi heʻenau fakataha he falekoloa piliki lanu kulokulá.
Palesiteni Hingikelī: ʻOku hoko e tupulaki ʻa e Fineʻofá mei hono kau mēmipa ʻe toko 18 ʻi hono fokotuʻu he ʻaho 17 ʻo Māʻasi 1842 ʻi Nāvuú, ʻo aʻu ki he toko nima miliona tupú he funga ʻo e māmaní, hili ha taʻu ʻe 160 mei aí, ko ha talanoa makehe mo fakaofo moʻoni . . .
Kuo mahulu atu e Fineʻofá ia mei he faʻunga ne fokotuʻu aí. ʻOku kau he ngaahi faʻunga ko iá ʻa e ngaahi ongo fakanatula ʻi he houʻeiki fafiné ke fai ha tokoní, paotoloaki ʻo e ngāue leleí, tokoniʻi ʻo e faingataʻaʻiá mo e fakatupulaki honau ʻatamaí mo e ngaahi talēnití. Naʻe fokotuʻu ai ʻe Siosefa Sāmita kinautolu ke hoko ko ha kautaha.
Siosefa Sāmita: ʻE hanga ʻe he “Kautaha ko ʻeni ʻo e Kakai Fefiné, ʻo ueʻi ʻa e kau tangatá ke fai ha ngāue lelei ʻi hono tokangaʻi e kau masivá—feinga ke fai ha ngāue ʻofa pea mo tokangaʻi ʻenau ngaahi fiemaʻú—pea tokoni ʻo fakatonutonu mo fakamālohia e faʻunga lelei ʻo e koló.”1
Palesiteni Hingikelī: Mei he kamataʻanga maʻulalo ko iá, kuo tupu ai ʻa e kautaha lahi taha mo ʻaonga taha kuó u ʻiloʻi he funga māmaní.
ʻI he fuofua fakataha ko iá, ʻi hono fili ʻo ʻEma H. Sāmita ke palesitení, naʻá ne pehē, “ʻoku totonu ke holi e mēmipa kotoa pē ke fai lelei.”2 Ko e laumālie ia he taimi ko iá pea mo e taimí ni foki. Kuo pau ke hoko maʻu pē ko e tefitoʻi moʻoni ke tataki ʻa e ngaahi toʻu tangata kotoa pē he kahaʻú—ʻa e totonu ke “holi e mēmipa kotoa pē ke fai lelei.”
ʻEma Sāmita: “Te tau fai ha meʻa fakaofo. . . . ʻOku tau ʻamanaki ki ha ngaahi meʻa fakaofo mo fakatuʻupakē.”3
Siosefa Sāmita: “Kuo pau ke maʻu fakahinohino e Kautahá ni ʻi he fokotuʻutuʻu kuo ʻomi ʻe he ʻOtuá—ʻo fakafou ʻiate kinautolu kuo fili ke takí.”4
“ʻOku fakanatula ki he kakai fefiné ke ongoʻi manavaʻofa, pea ʻoku mou ʻi ha tuʻunga ke ngāueʻi e ngaahi ongo ko ia kuo tōkaki ʻe he ʻOtuá homou lotó. Ko ha meʻa maʻongoʻonga mo nāunauʻia ia ʻo kapau te mou moʻuiʻaki e ngaahi tefitoʻi moʻoni ko ʻení! pea ʻe hoko maʻu pē ʻa e kau ʻāngeló ko homou takaua. ʻOku ʻikai ko e taú . . . fekeʻikeʻí mo e fakakikihí te ne fakatupulaki kitautolú, ka ko e angamaluú, ʻofá mo e maʻá.
“Pea mo e ngaahi tāpuaki ʻe lilingi mei he langí.
“ʻI hoʻomou foki ki ʻapí ʻoua naʻa mou leaʻita, kae tuku ke hoko ʻa e angaʻofá, manaʻofá mo e ʻofá ko e fungani hoʻomou ngāué. . . .
ʻI he tupulaki hoʻomou angatonú mo e angamaʻá, pea mo e angaleleí, tuku ke tupulaki hoʻomou ʻofá ki he niʻihi kehé — kuo pau ke mou faʻa kātakiʻi e ngaahi vaivai mo e fehālaaki ʻa e faʻahinga ʻo e tangatá. ʻOku mahuʻinga fau e ngaahi laumālie ʻo e tangatá! . . .
“. . . Pea ʻoku fakaava atu ʻa e matapaá kiate kimoutolu ʻi he huafa ʻo e ʻOtuá pea ʻe kamata mei heni ʻa e tafe atu e potó mo e ʻiló kiate kimoutolu — pea ko e kamataʻanga ʻeni ʻo ha ngaahi ʻaho lelei ange ki he Kautahá ni.”5
Palesiteni Hingikelī: Kuo hoko e lea fakakikite ko iá ko ha siate folau ʻi ha senituli ʻe taha mo e konga ʻo e Fineʻofa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Naʻe pehē ʻe Lusi Meki Sāmita ko e faʻē ʻa e Palōfitá heʻene lea ki he kau fefine ʻi Nāvuú,
Lusi Meki Sāmita: “Kuo pau ke tau fetauhiʻaki, mo fetokoniʻaki mo fefakafiemālieʻaki pea maʻu fakataha e fakahinohinó ke tau lava ʻo nofo fakataha ʻi langi.”6
Palesiteni Hingikelī: Kuo hā mei he hisitōlia ʻo e kautahá na e ʻikai tatali pē e kau fefiné ke nau tangutu fakataha ʻi langi ʻo kai e fua melie ʻo e ngaahi ngāue naʻá ne fakamatalaʻí.
Kuo nau aʻusia ha konga lahi ʻo langi ʻi māmani ʻi heʻenau fetokoniʻaki, fefakafiemālieʻaki, mo feakoʻiʻakí. He ko hai te ne lava ke fakafuofuaʻi e ola fakaofo kuo hoko he moʻui ʻa ha kau fefine ʻe laui miliona kuo fakalahi ʻenau ʻiló, vīsoné mo ʻenau moʻuí pea mo ʻenau mahino ki he ngaahi meʻa ʻa e ʻOtuá, ʻa ia kuo fakatupulaki ʻe ha ngaahi lēsoni taʻefaʻalaua kuo akoʻi pea mo ako ʻi he ngaahi fakataha ʻa e Fineʻofá?
He ko hai te ne lava ke fakafuofuaʻi e fiefia kuo maʻu ʻe he kau fefiné ʻi heʻenau feohi fakataha ʻi he uōtí pe koló, ʻo fakatupulaki ai e moʻui ʻa e niʻihi kehé ʻi he feohi fakakaungāmeʻa leleí? He ko hai naʻá ne lavelaveʻiloa e maʻongoʻonga ʻo e ngaahi ngāue ʻofa kuo fakahokó, ʻa e meʻakai kuo hilifaki he ngaahi tēpile masivá, pea mo e tui kuo fakaili he ngaahi momeniti ʻo e mahamahakí, ʻa e ngaahi lavea kuo faitoʻó pea mo e mamahi kuo fakanonga ʻe he ngaahi nima ʻofá mo e ngaahi lea ʻo e fakafiemālié mo e fakanonga kuo fai he ngaahi momeniti ʻo e maté mo e ongoʻi tuēnoá?
Naʻe pehē ʻe Palesiteni Siosefa F. Sāmita ki he Fineʻofá, “Ko e kautaha ʻeni ne fatu fakaʻotua pea fakamafaiʻi, fokotuʻu mo fakanofo fakalangi ʻe he ʻOtuá ke tokoni ki hono fakamoʻui e ngaahi laumālie ʻo e houʻeiki fafine mo tangatá. Ko ia ai, ʻoku ʻikai ha faʻahinga kautaha ʻe lava fakatataua ia ki ai, . . . pe te ne lava ke fai e ngāue kuo fai ʻe he Fineʻofá. . . .
“. . . Fakamuʻomuʻa mo fakamahuʻingaʻi ʻa e Fineʻofá, pea ʻai ke hoko ia ko e kautaha māʻolunga māʻolunga, lelei taha mo fisifisimuʻa taha he māmaní. Kuo uiuiʻi kimoutolu ʻe he leʻo ʻo e Palōfita ʻa e ʻOtuá ke mou fai ia, ke mou tuʻukimuʻa pea maʻongoʻonga ange he lelei tahá, maʻa tahá mo mateakiʻi taha ʻo e totonú.”7
ʻOfa ke tāpuakiʻi ʻe he ʻOtuá ʻa e Fineʻofa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOfa ke hokohoko atu e tupulaki hono ongoʻi e laumālie ʻo e ʻofá ne hoko ko ha ivi fakaʻaiʻai ki hono kau mēmipá he senituli ʻe taha mo e konga he funga ʻo e māmaní. ʻOfa ke ongo atu e mālohi ʻo ʻenau ngāue ʻofá ki he moʻui ʻa ha toko lahi taʻefaʻalaua, ʻi ha feituʻu pē ʻoku fakahaaʻi ai. Pea ʻofa ke nofoʻia ʻe he maama mo e mahino, ako mo e ʻilo pea mo e moʻoni taʻengatá, ʻa e moʻui ʻa e houʻeiki fafine ke hoko maí, koeʻuhí pē ko e kautaha makehe mo fakalangi ko ʻeni kuo fokotuʻú. ʻOfa ke nau ʻiloʻi honau ngaahi fatongiá mo e tāpuaki ke hoko “ko ha meʻangāue ʻi he toʻukupu ʻo e ʻOtuá ʻi hono [fakahoko ʻo e ngāue maʻongoʻongá ni]” (ʻAlamā 26:3).
Maʻuʻanga Fakamatalá
1. Relief Society Minutes, Mar. 17, 1842, Archives of The Church of Jesus Christ of Latter-day Saints, 7.
2. Relief Society Minutes, Mar. 17, 1842, 13.
3. Relief Society Minutes, Mar. 17, 1842, 12.
4. Relief Society Minutes, Apr. 28, 1842, 40.
5. Relief Society Minutes, Apr. 28, 1842, 38–40.
6. Relief Society Minutes, Mar. 24, 1842, 18–19.
7. Teachings of Presidents of the Church: Joseph F. Smith (1998), 184.
Previous