Kae ʻOua Ke Tau Toe Fakataha Mai Palesiteni Gordon B. Hinckley ʻOfa ke tau manatuʻi mo toutou fakahaaʻi maʻu pē ʻi heʻetau moʻuí ʻa e ngaahi akonaki kuo tau maʻú. Siʻoku ngaahi tokoua mo e tuofāfine ʻofeina, ko ha kiʻi lea tuku pē ʻeni ke tāpuni ʻaki ʻa e konifelenisi fakaʻofoʻofá ni. Ne taʻe hano tatau e ngaahi hivá, fakalaumālie ʻa e ngaahi lotú, pea ongo moʻoni ki hotau lotó ʻa e ngaahi leá mo e fakamoʻoní pea kuo hiki hake hotau laumālié mo fakapapauʻi ʻa ʻetau tuí. Ka ʻi heʻetau foki atu ko ʻeni ki hotau ngaahi ʻapí mo ʻetau ngaahi ngāueʻangá, ʻofa ke tau manatuʻi pea toutou fakahaaʻi maʻu pē ʻi heʻetau moʻuí ʻa e ngaahi akonaki kuo tau maʻú. ʻOfa ke tau kei matuʻuaki ai pē e ngaahi ʻahiʻahi ʻa e filí. ʻOfa he ʻikai ke tau ongosia ʻi hono fuesia hotau ngaahi fatongia ʻi he Siasí, kae hoko ia ko ha meʻa ke ne ʻomi kiate kitautolu ha fiefia mo ha fiemālie. ʻOku ou fakatauange ke tau nofo fakataha ko ha husepāniti, uaifi, mātuʻa mo e fānau ʻi he ʻofa mo e angaʻofa pea fefakaʻapaʻapaʻaki. Siʻoku ngaahi tokoua mo e tuofāfine ʻofeina, ʻoku ou fakatauange ke fai tāpuekina kimoutolu ʻe he Otuá. ʻOku ou ʻoatu ʻa ʻeku ʻofá, mo ʻeku fakamoʻoní, pea tuku atu mo ha tāpuaki kiate kimoutolu, pea ʻoku ou lotua ke tau kau maʻu pē mo e ʻEikí kae ʻoua leva ke tau toe fakataha mai. ʻOfa ke ʻiate kimoutolu e ngaahi tāpuaki ʻo e langí, ko ʻeku lotú ia ʻi he loto fakatōkilalo moʻoni pea ʻi he huafa toputapu mo māʻoniʻoni ʻo Sīsū Kalaisí, ʻēmeni.