Palesiteni Gordon B. Hinckley
Kuo faitāpuekina moʻoni ʻe he ʻEikí ʻa Hono Siasí, pea ko hotau fatongiá ke fai e meʻa kotoa te tau lavá ke ʻunuakiʻi ia ki muʻa.
Siʻoku ngaahi tokoua mo e tuofāfine, ‘i heʻetau fakataha mai ki ha toe konifelenisi lahi ʻo e Siasí, ʻoku ou fiefia ke lipooti atu ʻoku kei tupulaki mālohi pē ʻa e Siasí. ʻI he 1982, ʻa ia ko e taʻu ʻe 24 kuohilí, ne u hiki ʻeni ʻi heʻeku tohinoá ʻo pehē: “‘E aʻu ki he konifelenisi lahi ʻi ʻOkatopá, kuo aʻu ʻetau tuʻuʻanga satelaité ki he 300 tupu. ʻA ia ko hono ʻuhingá, ʻe laka hake he senitā fakasiteiki ʻe 300 he māmaní ʻe lava ke fakataha hake ki ai hotau kakaí ʻo kau mai ai ki he konifelenisí.”
Kuo fakahā mai kiate au ʻoku feʻunga mo ha tuʻuʻanga satelaite ʻe 6,066 ʻa e Siasí ʻi ha fonua ʻe 83. ʻOku ou fakafetaʻi neongo ʻoku fakautuutu hotau tokolahí, ka ʻoku toe fakautuutu ai pē foki mo ʻemau malava ke aʻu atu pea fetuʻutaki mo e Kāingalotú he funga ʻo e māmaní.
ʻE lava ke tau fakaʻamu ke lahi ange e papitaisó ʻi he ʻIunaiteti Siteití mo Kānata, ka ko e fakaʻamu tatau pē foki ia ki he nagahi feituʻu kotoa pē ʻo e māmaní. Ka neongo ia, ʻoku tō-atu e ututaʻú he ʻoku ʻi ai ha kāingalotu ʻi ha ngaahi fonua ʻe 160. Naʻe ʻikai tokolahi ʻa e Kāingalotú he kuohilí, ka ʻoku ʻi ai ha ngaahi uooti mo ha ngaahi siteiki mālohi he ʻahó ni, pea ngāue fakatakimuʻa ai ha kakai tangata mo fafine faivelenga mo lavameʻa.
Neongo ʻoku fakangatangata pē ʻemau lava ʻo fefolauʻakí, ka ʻoku fetongi pē ia ʻe he malava ʻa e Kau Palesitenisī ʻUluakí, kau mēmipa ʻo e Toko Hongofulu Mā Uá, mo e Kau Fitungofulú ʻo lea atu he satelaité ki ha ngaahi siteiki lahi ʻi he māmaní.
ʻOku liliu ʻa e ngaahi tūkungá, ka ʻoku kei tatau pē ʻetau pōpoakí. ʻOku tau fakamoʻoniʻi ki he māmaní kuo fakaava mai ʻa e ngaahi langí pea kuo hā mai mo folofola mai ʻa e ʻOtua ko ʻetau Tamai Taʻengatá mo Hono ʻAló, ʻa ia ko e ʻEiki kuo toetuʻú. ʻOku tau fai ha fakamoʻoni molumalu kuo toe fakafoki mai ʻa e lakanga fakataulaʻeikí, mo e ngaahi kī mo e mafai ʻo e ngaahi tāpuaki taʻengatá.
Ne mau toki fakatapui ʻa e Temipale Sākalamenitō Kalefōnia foʻoú, ʻa ia ko e temipale ia hono 7 ʻi he vahefonua ko iá, pea ko e temipale ia hono 123 he māmaní. Ne mau toe tanupou foki ha kelekele ki ha temipale ʻe taha ʻi he feituʻu Sōlekí.
ʻOku mau fiefia ke fanongonongo atu ʻoku lele lelei pē ʻa hono monomono ʻo e Tāpanekale Sōlekí pea ʻe toe fakahoko mei he fale makehe mo fakaʻofoʻofá ni ʻi he faʻahitaʻu failaú e ngaahi fakamafola fakauike ʻa e Kuaea Tāpanekalé.
ʻOku fakahoko ʻe he Siasí ha ngāue fakalakalaka lahi moʻoni ke maluʻi ai e ʻātakai ʻo e Temipale Sikueá. Neongo ʻe lahi ʻa e fakamolé, ka he ʻikai toʻo ia mei he paʻanga vahehongofulú.
Ka ʻoku kei hokohoko atu pē hono fakahaaʻi e faivelenga hotau kakaí ʻi heʻenau totongi vahehongofulú mo e ngaahi foakí.
ʻI hono fakakātoá, ʻe lava pē ke u pehē atu kuo faitāpuekina moʻoni ʻe he ʻEikí ʻa Hono Siasí, pea ko hotau fatongiá ke fai e meʻa kotoa te tau lavá ke ʻunuakiʻi ia ki muʻa.
ʻE hoku ngaahi tokoua mo e tuofāfine, te tau fanongo he taimí ni ki ha ngaahi lea ʻe fai ʻe hatau ngaahi tokoua mo e tuofāfine, hili e hiva ʻa e kuaeá. Pea ʻi heʻetau hoko atu e konifelenisi lahí ni, fakatauange ke tataki ʻe he Laumālie ʻo e ʻEikí ʻa e ngāue mo e lea kotoa pē ʻe fakahoko pea ʻofa ke fonu mahuohua hotau lotó mo ʻetau fakakaukaú, ko ʻeku lotú ia ʻi he huafa ʻo Sīsū Kalaisí, ʻēmeni.
