ʻEletā Marcus B. Nash
ʻO e Kau Fitungofulú
ʻOkú ke fie maʻu ʻa e ongoongoleleí mo e takaua ʻa e Laumālie Māʻoniʻoní ka ke lava ʻo maʻu ʻa e fiefia moʻoní, ʻo hangē pē ko hono fie maʻu ʻe he iká ʻa e vaí.
ʻI heʻeku hoko ko ha tīkoni ʻo hangē ko e tokolahi ʻo kimoutolu kau talavou, ne u lue lalo ai mo ʻeku tamaí ki ha anovai he moʻungá ke fai ʻema taumātaʻu. ʻI hono fakatui ko ia ʻe heʻeku tamaí ʻa e mounú ki heʻeku mātaʻú, naʻá ne talamai ʻe fie maʻu ke u feinga ke fakamaʻu e mātaʻú he loto ngutu ʻo e iká heʻene kamata tosi pē ʻa e mounú, he ka ʻikai ʻe hola ia. Naʻe ʻikai mahino kiate au pe ʻoku ʻuhinga ki he hā hono fakamaʻu e mātaʻú, ko ia naʻá ne fakamatalaʻi mai ʻoku fie maʻu ke hū lelei e mātaʻú ki he loto ngutu ʻo e iká heʻene ʻohofi pē ʻa e mounú ke ʻoua naʻá ne lava ʻo tupeʻi ʻo homo, pea ʻe fakamaʻu lelei e mātaʻú kapau te u fusiʻi kimui e vaʻakaú he feinga ʻa e iká ke maʻu e mounú. Ne u loto foki ke maʻu ha ika, ko ia ne u tuʻu mateuteu pē he matāfanga ʻo e anovai ko iá mo fakaongoongo ke ngaue ʻa e nailoní, ʻa ia ko e fakaʻilonga ia ʻoku feinga ʻa e iká ke ne maʻu e mounú. Hili ha ngaahi miniti siʻi, ne u fakatokangaʻi
ʻoku ngaue ʻa e nailoní, ko ia ne u fusiʻi ʻa e vaʻakaú ʻaki e kotoa hoku iví, ʻo fakakaukau te u fāinga mo ha fuʻu ika. Ka ne u ʻohovale ʻi heʻeku vakai atu ki he kiʻi iká—naʻe fihia mai e mātaʻú ʻi hono ngutú—ʻi hono liaki hake mei he vaí ʻo fakalaka hoku ʻulú ʻo tō ki ʻuta, ʻa ia ne u sītuʻa ki aí.
Ne u fakatokangaʻi ai ha meʻa ʻe ua: ʻUluakí, ʻoku moʻui mamahi e ika ʻoku mavahe mei he vaí. Neongo ʻoku ngāue lelei e laumeá, kapongá mo hono hikú he vaí, ka ʻoku ʻikai hanau ʻaonga ʻi ʻuta. Uá, naʻe mate e ika ne u maʻu he ʻaho ko iá he naʻe kākaaʻi ia ke ne lau e meʻa ne mātuʻaki fakatuʻutāmaki—mo fakamaté—ko ha meʻa mahuʻinga pe matamatalelei ʻoku ʻikai hano kovi ke kiʻi fakasiosio pē ki ai mo ʻahiʻahiʻi.
Siʻoku ngaahi tokoua ʻofeina ʻi he Lakanga Taulaʻeiki Faka-ʻĒloné, ʻoku ʻi ai ha lēsoni ʻe ua ke ako mei heni: ʻUluakí, hangē ko ia ne akoʻi mai ʻe Līhaí, ko e tefitoʻi taumuʻa ʻo hoʻo moʻuí ke “maʻu ʻa e fiefiá” (2 Nīfai 2:25). ʻOku fie maʻu ke mahino kiate koe ʻi hoʻo hoko ko e fānau ʻa e Tamai Hēvaní, ʻoku ʻi ai hao ngaahi ʻulungāanga fakalangi mo haʻo ngaahi fie maʻu fakalaumālie—pea hangē ko hono fie maʻu ʻe he iká ʻa e vaí, ʻokú ke fie maʻu foki ‘a e ongoongoleleí mo e feohi ʻa e Laumālie Māʻoniʻoní ka ke lava ʻo maʻu ʻa e fiefia moʻoní. Koeʻuhí ko e fānau koe ʻa e ʻOtuá (vakai, Ngāue 17:28), ko ia ʻoku ʻikai fenāpasi ai ho natula taʻengatá mo hoʻo fai hala ka ke pehē ʻoku tonú. He ʻikai lava ia. Ko e konga ia ho faʻunga fakalaumālié, ke ke maʻu ʻa e nongá, fiefiá mo e nēkeneká ʻo fakatatau mo e anga hoʻo moʻuiʻaki ʻa e ongoongoleleí.
ʻI he tafaʻaki ʻe tahá, ʻo ka ke ka fili ke ʻoua te ke moʻuiʻaki ʻa e ongoongoleleí, te ke moʻui mamahi ai ʻo hangē ko ha ika kuo toʻo mei he vaí (vakai, Mōsaia 4:30). Hangē ko e lea ʻa ʻAlamā ki hono foha ko Kolianitoní:
“Vakai, ʻoku ou pehē kiate koe, kuo teʻeki ai ke hoko ʻa e faiangahalá ko e fiefia.
“Pea ko ʻeni ʻe hoku foha, ko e kakai kotoa pē ʻoku ʻi he . . . anga fakaekakanó . . . ʻoku nau taʻe maʻu ʻa e ʻOtuá ʻi māmani, pea kuo kehe ʻenau [angafaí] mei he anga ʻo e ʻOtuá: ko ia, ʻoku nau ʻi he anga ʻoku faikehekehe mo e anga ʻo e fiefiá” (ʻAlamā 41:10–11).
Fakatokangaʻi ange, ko e “taʻe maʻu ʻa e ʻOtuá ʻi māmaní”—pe ko hono fakalea ʻe tahá, ko e fakafisi ko ia ke moʻuiʻaki ʻa ʻEne ongongoleleí pea ʻikai maʻu ai e takaua ʻa e Laumālié—ʻoku tuʻu fehangahangai ia mo e natula ʻo e fiefiá. He ko e ongoongolelei ʻo Sīsū Kalaisí, ko e —fakatokangaʻi ʻoku tuhuʻi pau mai, ʻo ʻuhingá ko ia pē taha —“palani lahi ia ʻo e fiefiá” (ʻAlamā 42:8). Kapau te ke fili ha tōʻonga moʻui ʻoku kehe mei ai pe feinga ke moʻui ʻaki pē e konga ko ia ʻo e ongoongoleleí ʻe faingamālié, ʻe hanga ʻe hoʻo fili ko iá ʻo kaihaʻasi meiate koe ʻa e fiefia kakato mo fisifisimuʻa naʻe fakataumuʻa mai maʻau ʻe heʻetau Tamai Hēvani ʻofá mo Hono ʻAló.
Ko e lēsoni hono ua mei heʻeku taumātaʻú: hangē ko e pau ko ia ke tokanga ʻaupito ha ika ʻi he anovaí telia ʻa e tauhele ʻi hono halá naʻa iku fakamavaheʻi ai ia mei he vaí, kuo pau foki ke ta poto ʻo fakaʻehiʻehi mei hano fakamavaheʻi kitaua mei ha moʻui fiefia ʻoku fakatefito ʻi he ongoongoleleí. Manatuʻi ʻoku hangē ko e lau ʻa Līhaí, ʻoku feinga ʻa e tēvoló ke “[mamahi] ʻa e tangata kotoa pē ʻo hangē ko iá” pea ʻokú ne maʻu ʻa e “mālohi ke fakapōpulaʻi” (2 Nīfai 2:27, 29) kitautolu he taimi ʻoku tau fai ai ha ngaahi meʻa ʻoku kovi mo taʻemaʻá. Ko ia, ʻoua naʻa tohoakiʻi kimoutolu ke mou ʻahiʻahiʻi ʻa e ngaahi meʻa ʻoku taʻe mahuʻingá, he ʻoku ʻosi mateuteu mai ʻa Sētane ke fakamaʻu ʻene mātaʻú. Ko e fakatuʻutāmaki ko ia ʻo hono fakamaʻu māmālie pe fakafokifā ʻo e mātaʻú, naʻe tataki ai ʻa e palōfita ko Molonaí—ʻa ia naʻá ne vakai mai ki hotau kuongá (vakai, Molomona 8:35)—ke ne fakatokanga mai kiate kitaua ke: ʻoua naʻa tau “ala ki he foaki ʻoku koví, pe ha meʻa ʻoku taʻemaʻa” (Molonai 10:30;
toki tānaki atu ʻa e fakamamafá).
ʻOku lahi ʻa e kovi mo e taʻemaʻa ʻi he hivá, ʻInitanetí, heleʻuhilá, makasiní, faitoʻo konatapú mo e tapaká. ʻE hoku kaungāmeʻa kei talavou, ʻoua naʻa mou teitei ala ki ha meʻa ʻoku kovi mo taʻemaʻa! ʻOku fūfuuʻi mai he faʻahinga meʻa peheé ha mātaʻu te ne maʻu fakaoloolo mo fakafokifā koe—pea ko ha meʻa fakamamahi moʻoni ʻa hono feingaʻi ke toʻo e mātaʻú. Naʻe pehē ʻAlamā ko e hala ʻo e fakatomalá ʻoku “ofi [ia] ki he maté,” (Mōsaia 27:28); pea ko e moʻoni naʻá ne pehē kuo teʻeki ai “hulu mo fakamamahi pehē fau ha meʻa ʻo tatau mo ʻeku ngaahi mamahí” (ʻAlamā 36:21).
Mahalo ʻoku ʻi ai hamou niʻihi ne mou kau ki ha meʻa kovi pe taʻemaʻa. Maʻu ha ʻamanaki lelei ʻi he moʻoni fakatokāteline mo fakahisitōlia ko ia naʻe tataki ʻa ʻAlamā ʻe heʻene tui ki he ʻEikí ke ne fakatomala, pea ko e ola ʻo ʻene fakatomalá, naʻá ne aʻusia ai ha fiefia lahi ʻi he mālohi ʻo e Fakalelei ʻa Kalaisí, peá ne fai ai e leá ni, ʻoku ʻikai “lava ke hulu mo mālie pehē fau ha meʻa ʻo tatau mo ʻeku fiefiá” (ʻAlamā 36:21). Ko e meʻa ia te mou aʻusia ʻi hoʻomou fekumi ki he ʻEiki ʻo fou he fakatomalá.
ʻOku ʻi ai ha tuʻunga ʻoku fie maʻu ke aʻu ki ai ʻetau fakatomalá. ʻOku ʻuhinga e fakatomalá ke fai e ngaahi liliu fakamātoato ʻoku finangalo e Fakamoʻuí ke ke fai ki hoʻo moʻuí ke ke fiefia aí. Ko e fakatomalá ko e ʻuluaki tefitoʻi moʻoni maʻongoʻonga ia ʻo e ongoongoleleí: ʻi he taimi ʻoku fakatupu ai ʻe hoʻo tui ki he ʻEikí ha liliu fakafoʻituituí, ʻoku hangē leva e ngāue ko iá ko e lau ʻa Hilamaní, ʻokú ne “takiakiʻi [koe] ki he mālohi ʻo e Huhuʻí ke fakamoʻui ʻa [ho] laumālié” (Hilamani 5:11). ʻI hoʻo feinga ke liliú, manatuʻi e lea ʻa ʻAlamaá ʻi heʻene pehē ʻoku maʻu ʻe he Fakamoʻuí ʻa e “fakamoʻui ʻa e tangata fulipē ʻoku tui ki hono huafá ʻo fua ʻaki ʻa e fua ʻoku ngali mo e fakatomalá” (ʻAlamā 12:15). Ko ha tokāteline mālohi, fakaivia mo mohu ʻamanaki lelei ʻaupito ʻeni!
Naʻe ako tonu ʻe he Palōfita ko Siosefa Sāmitá ʻi heʻene moʻuí, ʻoku ʻamanaki mai e ʻEikí ke tau fakaʻehiʻehi mei he mamahí ʻaki ʻetau moʻui ʻaki ʻEne ongoongoleleí pea ʻokú ne finangalo ke tau ʻiloʻi ʻe lava ke tau fakatomala. ʻI he taimi naʻe mole ai ʻa e peesi ʻe 116 ʻo hono liliu ʻo e Tohi ʻa Molomoná koeʻuhí ko e fakavaivai ʻa Siosefa ki he loto ʻo e tangatá, naʻá ne mamahi. Naʻe folofola ange ʻa e ʻEikí: “Naʻe totonu pē ke ke “faitotonu; pea ʻe fakamafao atu ʻe [he ʻOtuá] ʻa hono toʻukupú ʻo poupouʻi koe mei he ngaahi ngahau vela kotoa pē ʻo e filí; pea te ne ʻiate koe ʻi he taimi kotoa pē ʻo e faingataʻá” (T&F 3:8). Ko e meʻa ia ke fai ʻe kimoutolu kau talavou: faivelenga pea ʻe poupouʻi koe ʻe he toʻukupu ʻo e ʻOtuá. Naʻe toe fakamanatu foki ki he Palōfitá—ʻo tatau mo ia ʻoku fai mai kiate kitautolú—ʻe fakamolemoleʻi ia kapau te ne fakatomala. Fakakaukau angé ki he fiefia lahi naʻá ne maʻu ʻi he taimi naʻá ne fanongo ai ki he folofola ʻa e ʻEikí: “Kae manatu, ʻoku manavaʻofa ʻa e ʻOtuá; ko
ia, ke ke fakatomala mei he meʻa kuó ke faí, ʻa ia ʻoku fepaki mo e fekau naʻá ku fai kiate koé, pea ʻoku kei fili pē koe“ (T&F 3:10).
Ko ʻeku fakaafé ia kiate kimoutolu taki taha he pōní, ke mou moʻuiʻaki ʻa e ongoongoleleí ka mou fiefia moʻoni, pea fakaʻehiʻehi mei he koví mo e mamahi ʻokú ne ʻomaí, pea kapau kuó ke fai ha meʻa ʻoku kovi pe taʻemaʻa, fai leva ʻa e liliu ʻoku finangalo e ʻEikí ke fai ke ke fiefia aí—pea ʻoku ou fakamoʻoni atu te ne tuku ke ke lavameʻa ʻo fakafou ʻi Hono mālohi taʻefakatatauá.
ʻI hoʻo tali ʻa e fakaafe ko ʻení, te ke maʻu ai ha fiefia ʻoku tuʻuloá pea te ke fokotuʻu e fakavaʻe hoʻo moʻuí ʻi he “maka ʻo hotau Huhuʻí” koeʻuhí ko e taimi ko ia ʻe haʻu ai ʻa e ngaahi ngahau ʻa e tokotaha angakoví pea lōmekina koe ʻe he ngaahi matangi ʻo e māmaní, ʻo hangē ko ia kuo pau ke hokó, pea ʻe hangē leva ko e akonaki ʻa Hilamaní, ʻe ʻikai ke nau maʻu ha “mālohi ke fusi hifo ʻa kimoua ki he vanu ʻo e mamahí mo e malaʻia taʻengatá koeʻuhí ko e maka kuo langa ai ʻa kimouá, ʻa ia ko e tuʻunga mālohi, ʻa ia ko e tuʻunga ʻe ʻikai lava ke hinga ʻa e kakaí ʻo kapau te nau langa ai” (Hilamani 5:12; toki tānaki atu ʻa e fakamamafá). ʻOku ou fakamoʻoni ki he ʻEiki ko Sīsū Kalaisí: Ko Ia ʻa e Maká, ʻa e fakavaʻe pau ʻo e fiefiá mo e fakamoʻuí. ʻOkú Ne moʻui, pea ʻokú Ne maʻu ʻa e mālohi kotoa ʻi he langí mo e māmaní, pea ʻokú Ne ʻafioʻi ho hingoá mo Ne ʻofeina koe. ʻI he huafa toputapu ʻo e ʻEiki ko Sīsū Kalaisí, ʻēmeni.
Previous
