Pea He ʻIkai Tūkia ʻa Kinautolu ʻi ha Meʻa ʻEletā David A. Bednar ʻO e Kōlomu ʻo e Kau ʻAposetolo ʻe Toko Hongofulu Mā Uá Tuʻunga ʻi he mālohi fakaivia ʻo e Fakalelei ʻa Sīsū Kalaisí, ko ia ʻoku faitāpuekina ai kitaua ke ta lava ʻo fakaʻehiʻehi mo ikunaʻi ʻa e ʻitá. ʻOku ou lotua he hoʻataá ni ke tokoniʻi kitautolu ʻe he Laumālie Māʻoniʻoní ʻi heʻetau vakaiʻi fakataha ha ngaahi tefitoʻi moʻoni mahuʻinga ʻo e ongoongoleleí. Ko e taha ha ʻekitivitī ʻoku ou manako taha ai heʻeku hoko ko ha taki lakanga fakataulaʻeikí, ko ʻeku ʻaʻahi ko ia ki he kāingalotú ʻi honau ngaahi ʻapí. ʻOku ou fiefia makehe ʻi heʻeku aʻutonu mo talanoa mo e kāingalotu ʻoku faʻa taku ko e kau “māmālohí.” ʻI he ngaahi taʻu ne u hoko ai ko ha palesiteni fakasiteikí, ne u faʻa fetuʻutaki ai ki ha taha ʻo e kau pīsopé ʻo fakaafeʻi ia ke ne faʻa lotu muʻa ke ʻiloʻi e niʻihi fakafoʻituitui mo ha ngaahi fāmili ke ma ʻaʻahi ki ai. Ki muʻa peá ma ō mo e pīsopé ki ha ʻapi, ne ma tūʻulutui hifo ʻo kole ki heʻetau Tamai Hēvaní ha fakahinohino mo ha tataki fakalaumālie, maʻamaua pea mo e kāingalotu te mau feʻiloakí. Naʻe fakahangatonu pē hono fakahoko ange ʻa homa fonongá. Ne ma fakahaaʻi ange ha ʻofa mo e houngaʻia ʻi he faingamālie ke ʻi honau ʻapí aí. Ne ma fakapapauʻi ange ko ha ongo tamaioʻeiki kimaua ʻa e ʻEikí kuó Ne fekau atu ki honau ʻapí. Ne ma fakahaaʻi ʻa homa ʻofa pea mo ʻetau fie maʻu kinautolú—pea pehē ki heʻenau fie maʻu e ngaahi tāpuaki ʻo e ongoongolelei kuo toe fakafoki maí. Meimei ki he kamataʻanga ʻemau fetalanoaʻakí, ne u fai ange ai ha fehuʻi peheni: “Kātaki, ʻe lava nai ke ke tokoni mai ke mahino kiate kimaua e ʻuhinga ʻoku ʻikai ke ke kau kakato ai ki he ngaahi tāpuaki mo e ngaahi polokalama ʻa e Siasí?” Kuo laungeau ha ngaahi ʻaʻahi pehē kuó u fakahoko. Naʻe kehekehe ʻa e fakafoʻituitui, fāmili, ʻapi mo e tali taki taha. Ka ʻi he fakaʻau atu e ngaahi taʻú, ne u ongoʻi ha meimei tali tatau pē ki heʻeku ngaahi fehuʻí. Ko e ngaahi tali ʻeni naʻe faʻa ʻomí: “‘I he ngaahi taʻu kuo hilí naʻe leaʻaki ʻe ha tangata he Lautohi Faka-Sāpaté ha meʻa naʻe fakatupu ʻita kiate au pea kuo teʻeki ai pē ke u toe foki atu.” “Naʻe ʻikai fie lea pe fie tokoni mai ha taha ia kiate au he kolo ko ʻení. Ne u ongoʻi hangē ko ha kehe aú. Ne u loto mamahi he anga taʻe fakakaumeʻa ʻa e koló ni.” “Naʻe ʻikai ke u fiemālie ki he faleʻi ne ʻomi ʻe he pīsopé. He ʻikai ke toe tuʻu hoku vaʻé homou ʻapisiasí lolotonga ʻene kei ʻi he tuʻunga ko ʻená.” Naʻe lahi mo ha ngaahi fakatupu ʻita kehe naʻe fakalau mai—mei he fetōʻaki he tafaʻaki fakatokāteliné ʻi he kakai lalahí ʻo aʻu ki he fakaloto mamahi, fakamatalili mo e fakamavahevahe ʻa e toʻu tupú. Ka ko e kaveinga ʻeni naʻe toutou hā maí ko e: “Naʻá ku loto mamahi koeʻuhí . . .” Ne u fakafanongo tokanga mo fakamātoato mo e pīsopé kiate ia. Ne faʻa fehuʻi ange leva ʻe ha taha ʻiate kimaua ʻo fekauʻaki mo ʻenau ului maí mo ʻenau fakamoʻoni ki he ongoongolelei kuo toe fakafoki maí. ʻI heʻemau talanoá, naʻe faʻa tō ha loʻimata ʻi he manatu e kakai leleí ni ki hono fakamoʻoniʻi ange ʻa e moʻoní ʻe he Laumālie Māʻoniʻoní mo ʻenau fakamatalaʻi e meʻa fakalaumālie ne muʻaki hoko kiate kinautolú. Ko e konga lahi ʻo e kakai “māmālohi” kuó u ʻaʻahi ki aí, ne nau maʻu ha fakamoʻoni mahino mo pelepelengesi ki hono moʻoni ʻo e ongoongolelei kuo toe fakafoki maí. Ka ʻoku ʻikai ke nau kei kau kakato mai ki he ngaahi ʻekitivitī mo e ngaahi fakatahaʻanga ʻa e Siasí. Ne u faʻa pehē ange leva, “Tuku muʻa ke u fakapapauʻi ʻoku mahino kiate au e meʻa naʻe hoko kiate koé. ʻOku ʻikai faitāpuekina koe ʻe he ouau ʻo e sākalamēnití koeʻuhí ko hoʻo ʻita ʻi ha taha he lotú. Kuó ke mavahe mei he takaua ʻo e Laumālie Māʻoniʻoní. Pea koeʻuhí naʻe fakaʻitaʻi koe ʻe ha taha he lotú, kuó ke mavahe ʻaupito ai mei he ngaahi ouau ʻo e lakanga fakataulaʻeikí pea mo e temipale māʻoniʻoní. Kuó ke taʻofi ho faingamālie ke tokoni ai ki he niʻihi kehé pea ke ke ako mo tupulakí. ʻOkú ke fokotuʻu ha ngaahi ʻā vahevahe te ne taʻofi e tupulaki fakalaumālie hoʻo fānaú, makapuná mo e toʻu tangata ka hoko haké.” Kuo tuʻo lahi ha toe kiʻi fakakaukau ʻa e kakaí pea nau pehē mai leva: “Naʻe ʻikai pē ke aʻu ki ai ʻeku fakakaukaú.” Ne ma fakahoko ange leva mo e pīsopé ha fakaafe: “‘E homa kaumeʻa, ʻokú ma ʻi heni he ʻaho ní ke faleʻi atu koe kuo taimi ke tuku ā hoʻo ʻitá. ʻOku ʻikai ngata pē heʻema fie maʻu koé, ka ʻokú ke fie maʻu foki e ngaahi tāpuaki ʻo e ongoongolelei ʻo Sīsū Kalaisi kuo toe fakafoki maí. Kātaki muʻa ka ke foki mai ā—he taimí ni.” Fili ke ʻOua Naʻa Fakaʻitaʻi Koe ʻI he taimi ʻoku tau tui mo pehē ai kuo fakaʻitaʻi kitautolú, ʻoku tau faʻa ʻuhingá ʻoku tau ongoʻi naʻe anga fakamātatuʻa, ngaohikovia, fakatupuʻita pe anga taʻe fakaʻapaʻapa mai ha taha. Ka ko e moʻoni ʻoku hoko ha ngaahi meʻa fakamamahi, fakamā, taʻetotonu pea mo taʻeʻofa ʻi heʻetau fengāueʻaki mo e kakai kehé ʻo tupu ai ʻetau ʻitá. Ka neongo ia, ʻoku mātuʻaki faingataʻa moʻoni ki ha taha ke ne fakaʻitaʻi kitaua. Ko ʻetau tui ko ia ʻo pehē naʻe fakaʻitaʻi kitautolu ʻe ha tahá, ko ha foʻi fakakaukau hala moʻoni ia. Ko kitautolu pē ʻoku tau fili ke tau ʻitá; ʻoku ʻikai ko ha tuʻunga ia ne fakatupu ʻe ha meʻa pe fakamālohiʻi kitautolu ʻe ha taha ki ai. ʻI he vahevahe fakaʻeiʻeiki ko ia ʻo e ngaahi fakatupu kotoa ʻa e ʻOtuá, ʻoku ʻi ai ha ngaahi meʻa ke ngāue pea mo e ngaahi meʻa ke ngāueʻi (vakai, 2 Nīfai 2:13–14). ʻI heʻetau hoko ko e ngaahi foha mo e ngaahi ʻofefine ʻo ʻetau Tamai Hēvaní, kuo foaki mai ai kiate kitautolu ʻa e meʻafoaki ʻo e tauʻatāina ke filí, ʻa e mālohi ke tau ngāue mo fai ʻetau filí ʻiate kitautolu pē. ʻI hono foaki mai ko ia ʻo e tauʻatāina ke filí, ʻoku tau hoko ai ko ha kau fakafofonga, pea ko ia ʻoku pau ke tau ngāue kae ʻikai ngāue ha taha ia maʻatautolu. ʻOku hanga ʻe heʻetau tui ko ia ʻe lava ʻe ha taha pe meʻa ke ne fakaloto-mamahiʻi, fakaʻitaʻi, pe fakatupu ha ongoʻi tāufehiʻá, ʻo fakaʻauha ʻetau tauʻatāina ke filí mo ne liliu kitautolu ke tau hoko ko ha meʻa ʻoku ngāueʻi mai ʻe ha taha. Ka ʻi heʻetau hoko ko ha kau fakafofongá, ʻoku tau maʻu ai ʻa e mālohi ke ngāue mo fili ʻa e founga te tau tali ʻaki ha tūkunga ʻoku fakatupu ʻita pe fakatupu loto mamahi. Naʻe fili ʻa Tōmasi B. Maasi, ko e fuofua palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he kuonga fakakosipelí ni, ke ne ʻita ʻi ha kiʻi meʻa maumau-taimi hangē ko e kilimi ʻo e huʻakaú (vakai, Deseret News, Apr. 16, 1856, 44). Hili ko iá, naʻe valokiʻi fefeka ʻa Pilikihami ʻIongi he ʻao ʻo e kakaí ʻe he Palōfita ko Siosefa Sāmitá, ka naʻe fili ia ke ʻoua naʻá ne ʻita (vakai, Truman G. Madsen, “Hugh B. Brown—Youthful Veteran,” New Era, Apr. 1976, 16). ʻOku lahi ha ngaahi tūkunga ʻoku hoko ai e fili ke te ʻitá, ko ha fakaʻilonga ʻo ha palopalema fakalaumālie ʻoku loloto ange. Naʻe tuku ʻe Tōmasi B. Maasi ke ngāue atu ʻa e ʻitá kiate ia, peá ne iku ai ki he hē mei he moʻoní pea mo e mamahí. Naʻe fakaʻaongaʻi ʻe Pilikihami ʻIongi ʻa ʻene tauʻatāina ke filí ʻo ne ngāue ʻo fakatatau mo e ngaahi tefitoʻi moʻoni totonú pea naʻá ne hoko ai ko ha meʻangāue kāfakafa ʻi he toʻukupu ʻo e ʻEikí. Ko e Fakamoʻuí, ko e sīpinga maʻongoʻonga taha ia ʻo e founga totonu ke tau tali ʻaki ha ngaahi meʻa pe tūkunga ʻoku fakatupu ʻitá. “Pea ko e meʻa ʻi heʻenau angahalá, ʻe lau ia ʻe māmani ko e meʻa noa pē; ko ia te nau tauteaʻi ia, pea te ne kātakiʻi ia; pea te nau taaʻi ia, pea te ne kātakiʻi ia. ʻIo, te nau ʻaʻanu kiate ia, pea te ne kātakiʻi ia koeʻuhí ko ʻene ʻaloʻofá mo ʻene kātaki fuoloa ki he fānau ʻa e tangatá” (1 Nīfai 19:9). Tuʻunga ʻi he mālohi fakaivia ʻo e Fakalelei ʻa Sīsū Kalaisí, ko ia ʻoku faitāpuekina ai kitaua ke ta lava ʻo fakaʻehiʻehi mo ikunaʻi ʻa e ʻitá. “‘Oku maʻu ʻa e fiemālie lahi ʻe kinautolu ʻoku ʻofa ki hoʻo fonó; pea ʻe ʻikai tūkia ʻa kinautolu ʻi ha meʻa” (Saame 119:165). Ko ha Fale Faiʻanga Fakatotolo ʻo e ʻIló he Ngaahi ʻAho Kimui Ní Mahalo ʻe ngali faingataʻa ke tau malava ʻo ikunaʻi ʻetau ʻitá. Ka neongo ia, ko e malava ko ʻeni ke ikunaʻi ʻetau ʻitá, ʻoku ʻikai fakataumuʻa pe fakangatangata pē ia ki he kau taki ʻiloa ʻo e Siasí hangē ko Pilikihami ʻIongí. ʻOku fakataumuʻa e natula moʻoni ʻo e Fakalelei ʻa e Huhuʻí pea mo e ʻuhinga ʻo hono toe fakafoki mai ʻo e Siasí, ke tokoniʻi kitautolu ke tau maʻu tonu ʻa e faʻahinga mālohinga fakalaumālie ko ʻení. Naʻe akoʻi ʻe Paula ki he Kāingalotu ʻi ʻEfesoó naʻe fokotuʻu ʻe he Fakamoʻuí ʻa Hono Siasí ki “hono fakahaohaoa ʻo e kakai māʻoniʻoní mo e ngāue fakafaifekaú, ke langa hake ʻa e sino ʻo Kalaisí: “Kae ʻoua ke tau hoko kotoa pē ki he fakataha ʻi he tuí, pea mo e ʻiloʻi ʻo e ʻAlo ʻo e ʻOtuá ki he tangata haohaoá, [ʻa ia ko e meʻafua ki] hono lahi ʻo e fonu ʻo Kalaisí” (ʻEfesō 4:12–13). Fakatokangaʻi ange muʻa e foʻi lea ko e fakahaohaoaʻi. Hangē ko ia ne fakamatalaʻi ʻe Niila A. Mekisuelé, ko e Siasí ʻoku ʻikai “ko ha feituʻu mālōlōʻanga ia maʻanautolu kuo haohaoá, ʻa ia ʻoku feau ai ʻenau ngaahi fie maʻu kotoa pē” (“A Brother Offended,” Ensign, May 1982, 38). Ka ko e Siasí ko ha faleako faiʻanga fakatotolo ʻo e ʻiló pea mo ha fale ngāue ʻe lava ke tau maʻu ai ha ngaahi taukei ʻi heʻetau toutou fefakahokoʻaki ʻa e ngāue taʻemotu ko ia ko hono “fakahaohaoaʻi ʻo e Kāingalotú.” Naʻe toe fakamatalaʻi mahino mai foki ʻe ʻEletā Mekisuele ko e fale faiʻanga fakatotolo ʻo e ʻiló, ʻoku ui ia ko e Siasi kuo toe fakafoki maí, pea ʻoku fakafofongaʻi ʻe he kāingalotú ʻa e “kakai ʻoku fai mei ai e akó” (vakai, “Jesus, the Perfect Mentor,”Ensign, Feb. 2001, 13) ʻa ia ʻoku mahuʻinga ki he tupulakí mo e fakalakalaká. ʻOku ako ha faiako ʻaʻahi ki hono fatongiá ʻi heʻene tokoniʻi mo ʻofeina e kau fafine ʻi he Fineʻofá. ʻOku ako ʻe ha faiako ʻaʻahi teʻeki taukeí ha ngaahi lēsoni mahuʻinga ʻi heʻene akoʻi ha kau ako tokanga mo taʻe tokangá, peá ne hoko ai ko ha faiako lelei ange. Pea ʻoku ako ha pīsope foʻou ki hono fatongiá ʻi he ueʻi fakalaumālie mo ʻene ngāue fakataha mo e kāingalotu ʻo e uōtí, ʻa ia ne nau hikinima ʻo poupouʻi ia, neongo ʻenau ʻiloʻi hono ngaahi vaivai fakaetangatá. ʻI he mahino ko ia ko e Siasí ko ha fale faiʻanga fakatotolo ʻo e ʻiló, ʻoku tokoni ia ki heʻetau teuteu atu ki ha meʻa moʻoni ʻe hoko. ʻE ʻi ai ha founga mo ha taimi ʻe fakahoko mo leaʻaki ai ʻe ha taha ʻi he Siasí ha meʻa ʻe ngali fakatupuʻita. Kuo pau ke hoko mai kiate kitautolu kotoa pē ʻa e meʻá ni—pea he ʻikai ke hoko tuʻo taha pē ia. Neongo naʻe ʻikai loto e kakaí ke fakalaveaʻi pe fakaʻitaʻi kitautolu, ka ʻe lava pē ke nau taʻe fakaʻatuʻi mo angakovi. He ʻikai ke ta lava ʻo puleʻi e tōʻonga pe ʻulungāanga ʻo e kakai kehé. Ka ʻe lava ke ta puleʻi ʻa e meʻa te ta faí. Manatuʻi muʻa ko ha ongo fakafofonga pē kitaua ʻokú ta maʻu ʻe tauʻatāina ke filí pea ʻe lava ke ta fili ke ʻoua te ta ʻita. Lolotonga ha vahaʻa taimi ʻo e taú, naʻe fetohiʻaki ʻa Molonai ko e ʻeikitau ʻo e kau Nīfaí, pea mo Peihōlani ko e fakamaau lahi mo e pule ki he fonuá. Naʻe faitohi ʻa Molonai kia Peihōlani tupu mei he faingataʻaʻia ʻa ʻene kau taú ʻi he siʻi e tokoni mei he puleʻangá ʻo ne “talatalaakiʻi ʻa kinautolu” (ʻAlamā 60: 2) mo ne tukuakiʻi fefeka ia ki heʻene taʻefakaʻatuʻí, fakapikopikó mo e taʻetokangá. Naʻe mei lava pē ke fehiʻa ʻa Peihōlani kia Molonai mo ʻene fekaú, ka naʻá ne fili ke ʻoua te ne ʻita. Naʻe tali kiate ia ʻe Peihōlani ʻi he manavaʻofa, mo ne fakamatalaʻi ange ʻoku ʻi ai ha angatuʻu ki he puleʻangá, ʻa ia naʻe ʻikai ʻiloʻi ki ai ʻa Molonai. Naʻá ne tali ange leva ʻo pehē, “Vakai, ʻoku ou pehē kiate koe ʻe Molonai, ʻoku ʻikai te u fiefia ʻi hoʻomou ngaahi fuʻu faingataʻaʻiá, ʻio, ʻoku fakamamahi ia ki hoku lotó. . . . Pea ko ʻeni kuó ke fakaangaʻi au ʻi hoʻo tohí, ka ʻoku tatau ai pē ʻoku ʻikai te u ʻita; ka ʻoku ou fiefia ʻi he angatonu ʻa ho lotó” (ʻAlamā 61:2, 9). Ko e taha e ngaahi fakaʻilonga maʻongoʻonga taha ʻo ʻetau matuʻotuʻa fakalaumālié, ʻoku hā ia ʻi heʻetau tōʻonga ʻoku fai ki he ngaahi vaivai, tō-nounou mo e tōʻonga fakatupu ʻita ʻa e niʻihi kehé. Mahalo ʻe fakatupu ʻita ha taha, meʻa ʻoku hoko pe ko ha lea naʻe fai, ka ʻe lava ke ta fili ke ʻoua naʻá ta ʻita ai—peá ta lea fakataha mo Peihōlani, “ka ʻoku tatau ai pē.” Fakaafe ʻe Ua ʻOku ou fakaʻosi ʻaki ʻeku pōpoakí ha fakaafe ʻe ua. Fakaafe #1 ʻOku ou fakaafeʻi kimoutolu ke mou ako e ngaahi akonaki ʻa e Fakamoʻuí ʻo fekauʻaki mo ʻene ngaahi fengāueʻakí pea mo ha ngaahi meʻa ne hoko ʻa ia ʻoku tau pehē naʻe fakatupu ʻita, pea mou fakaʻaongaʻi ia ʻi hoʻomou moʻuí. “Kuo mou fanongo naʻe lea pehē, Ke ke ʻofa ki ho kaungāʻapí, kae fehiʻa ki ho filí. “Ka ʻoku ou tala atu kiate kimoutlu, ʻofa ki homou ngaahi filí, tāpuakiʻi ʻa kinautolu ʻoku kapeʻi ʻa kimoutolú, fai lelei kiate kinautolu ʻoku fehiʻa kiate kimoutolú, pea hūfia ʻa kinautolu ʻoku fai kovi mo fakatanga kiate kimoutolú. . . . “He kapau ʻoku mou ʻofa kiate kinautolu ʻoku ʻofa kiate kimoutolú, ko e hā ʻa e totongi te mou maʻú? he ʻikai ʻoku fai pehē ʻa e kau tānaki tukuhaú? “Pea kapau ʻoku mou feʻofoʻofani mo homou kāingá pē, ʻoku lelei lahi hake ia? he ʻikai ʻoku pehē ʻa e kau tānaki tukuhaú? “Ko ia ke haohaoa ʻa kimoutolu he ʻoku haohaoa ʻa hoʻomou Tamai ʻoku ʻi he langí” (Mātiu 5:43–44; 46–48). ʻOku mālie ʻa e muimui mai e naʻinaʻi ko ia ke “haohaoa ʻa kimoutolú” ʻi he akonaki fekauʻaki mo e meʻa ke tau fai ki ha taha ʻoku fai hala pe fakatupu ʻita maí. ʻOku mahino mai ʻoku kau he ngaahi fie maʻu tukupau ki hono fakahaohaoaʻi ʻo e Kāingalotú, ʻa e ngaahi ngāue ʻokú ne siviʻi mo ʻahiʻahiʻi kitautolú. Kapau ʻe leaʻaki pe fai ʻe ha taha ha meʻa ʻoku fakatupu ʻita, ko hotau ʻuluaki fatongiá ke fakafisi mei haʻatau ʻita pea tau fetuʻutaki fakahangatonu fakatāutaha pē mo e tokotaha ko iá ʻi he angatonu. ʻOku hanga ʻe he founga ko iá ʻo fakaafeʻi mai e tataki ʻa e Laumālie Māʻoniʻoní mo ne fakafaingamālieʻi hano fakamaʻalaʻala ke mahino e ngaahi maʻuhala mo e ʻuhinga totonú. Fakaafe #2 Mahalo ko e tokolahi ʻo e kakai mo e ngaahi fāmili ʻoku fie maʻu lahi taha ke nau fanongo ki he pōpoaki ko ʻeni ʻo e fili ke ʻoua naʻá te ʻitá, ʻoku ʻikai ke nau haʻu kinautolu ki he konifelenisí he ʻahó ni. ʻOku ou tui ʻoku tau maheni kotoa pē mo ha kāingalotu ʻoku nau fakamamaʻo mei he lotú pe siasí koeʻuhí ne nau fili ke nau ʻita—pea ʻe faitāpuekina kinautolu ʻo ka naú ka foki mai. Mou faʻa lotu muʻa, ke ʻiloʻi ha taha ke mou ʻaʻahi ki ai mo fakahoko ange ha fakaafe ke nau toe foki mai ke tau lotu fakataha? Mahalo ʻe lava ke ke vahevahe ange ha tatau ʻo e lea ko ʻení pe ko haʻamou aleaʻi ʻa e ngaahi tefitoʻi moʻoni kuo tau vakai ki ai he ʻaho ní. Kātaki ʻo manatuʻi ange muʻa ʻoku totonu ke fai e kole ko iá ʻi he ʻofa mo e angamalū—kae ʻikai ʻi he laumālie ʻo e fie māʻoniʻoni mo e hīkisia. ʻI heʻetau tali ʻa e fakaafe ko ʻení ʻi he tui ki he Fakamoʻuí, ʻoku ou fakamoʻoni mo palōmesi atu ʻe fakaava ʻa e ngaahi matapaá pea fakafonu hotau ngutú ʻaki e meʻa ke tau leaʻakí, pea ʻe fakamoʻoniʻi ʻe he Laumālie Māʻoniʻoní ʻa e moʻoni taʻengatá pea ʻe toe ulo māfana hake ʻetau fakamoʻoní. ʻI heʻeku hoko ko e taimaioʻeiki ʻa e ʻEikí, ʻoku ou fakaongo atu ai ʻEne folofolá ʻa ia naʻe pehē, “Kuó u tala ʻa e ngaahi meʻá ni kiate kimoutolu, koeʻuhí ke ʻoua naʻa mou tūkia” (Sione 16:1). ʻOku ou fakamoʻoni ki hono moʻoni, faka-ʻOtua mo e moʻui ʻa e Fakamoʻuí pea mo Hono mālohi ke tokoniʻi kitautolu ke tau fakaʻehiʻehi mo ikunaʻi ʻa e ʻitá. ʻI he huafa toputapu ʻo Sīsū Kalaisí, ʻēmeni.