Meʻa Tukú Palesiteni Gordon B. Hinckley ʻOku mau ʻoatu homau ʻofá mo ha tāpuaki. ʻOfa ke nofoʻia homou ngaahi ʻapí ʻe he Laumālie ʻo e ʻEikí. Siʻoku ngaahi tokoua mo e tuofāfine ʻofeina, ko ha mana ʻa e ngaahi konifelenisi ko ʻení. ʻOku ʻikai ha meʻa ke ne fakatataua kinautolu ʻi he māmaní. ʻI hoʻo fakakaukau ʻoku tau fakataha mai ki he holo konifelenisi maʻongoʻongá ni pea ʻoku tau fakahoko atu ia ki he funga māmaní ke lava ʻa e kakai ʻi he ngaahi konitinēniti kotoa pē ʻo lotu fakataha ki he ʻOtua moʻuí, ko e mana maʻongoʻonga moʻoni ia. Kuo fakaʻofoʻofa kotoa e ngaahi lea ne fakahokó. ʻOku mau fakaʻamu ange pē naʻe lahi e taimí ke tau fanongo ai ki he Kau Taki Māʻolungá kotoa. Meʻapango ko e ʻikai ke lava iá. Kuo tataki fakalaumālie kitautolu ʻe he ngaahi pōpoaki ʻa e kau fakafofonga mei he ngaahi houalotú. Kuo ueʻi fakalaumālie foki kitautolu ʻe he ngaahi lotú. Naʻe tōtōatu moʻoni e hivá. ʻOku tau fakamālō koeʻuhí ko e Senitā Konifelenisi maʻongoʻongá ni, ʻa e holo fakaʻofoʻofa ko ia ʻoku tau fakataha aí, pea pehē ki he tekinolosiá ʻoku malava ke fakaaʻu atu ai ʻemau ngaahi leá ki hotau kakaí ʻi ha ngaahi fonua lahi mo e ngaahi tuʻunga kehekehe. ʻOku tau fakaʻamu pē ke melino ʻa e māmaní pea ʻoku tau toutou lotua foki ke hoko ia. Siʻoku kaungā-ngāue ʻofeina,ʻoku mau ʻoatu homau ʻofá mo ha tāpuaki. ʻOfa ke nofoʻia homou ngaahi ʻapí ʻe he Laumālie ʻo e ʻEikí. ʻOfa ke tataki ʻe he ʻofá hoʻomou ngaahi fetuʻutaki fakafāmilí. Ko ʻemau lotú ia ʻi heʻemau lea fakamāvae atu pea tau tutuku ʻi ha māhina ʻe ono, ʻi he huafa toputapu mo māʻoniʻoni ʻo hotau Huhuʻí, pea ʻoatu mo ʻemau ʻofá mo e tāpuaki ʻi Hono huafá, ʻio ko e ʻEiki ko Sīsū Kalaisí, ʻēmeni.