Seia Tatou Toe Feiloai Peresitene Gordon B. Hinckley Ia tatou manatua ma ia tatou faaalia e le aunoa i o tatou olaga ia fautuaga ua tatou maua. Tau ia o se upu e faai’u ai, o’u uso e ma tuafafine, e tapunia aloaia ai lenei konafesi maoae. E ese le matagofie o musika, sa musuia foi tatalo, ma ua ootia foi o tatou loto i lauga ma molimau, ua siitia ai o tatou agaga, ma ua faamausali ai lo tatou faatuatua. O lenei, pe a tatou toe taliu atu i o tatou aiga, ma a tatou galuega, ia tatou manatua ma ia faaalia e le aunoa i o tatou olaga ia fautuaga ua tatou maua. Ia tumau lo tatou puipuia mai togafiti a le tiapolo. Ia le avea lo tatou galulue i le tele o o tatou tiutetauave faale-Ekalesia e fai ma avega mamafa, ae ia aumaia ai le olioli ma le lotomalie. Ia tatou nonofo faatasi o ni tane ma ni ava, o matua ma fanau, i le alofa ma le agalelei ma le faaaloalo o le tasi i le tasi. Ia faamanuia outou e le Atua, o’u uso e ma tuafafine pele. Ou te tuuina atu o’u alofaaga ma la’u molimau ma a’u faamanuiaga ia te outou, ma [ou te] tatalo ina ia faatasi le Alii ma i tatou uma taitoatasi seia tatou toe feiloai. Ia i ai faamanuiaga o le lagi i o outou luga. Ou te tatalo ai ma le lotomaulalo i le suafa paia o Iesu Keriso, amene.