Pe Ana Mafai Ona Tautatala Mai Nei Puipui Tuai Epikopo H. David Burton Epikopo Pulefaamalumalu Ua silia ma le seneturi, o auina atu mai lenei pulelaa i le lalolagi upu a perofeta, tagatavaai, ma talifaaaliga o aso e gata ai. Na saunoa Peresitene Hinckley i se fonotaga ma le au faasalalau ia Oketopa, 2004: “Ou te faaaloalo i lenei fale. Ou te alofa i lenei fale. Ou te faamamaluina lenei fale. Ou te manao e faasao. . . . Ou te manao i le Tapeneko tuai, o ona sooga vaivai ia fusi faatasi . . . ma faamalolosia ma ia faasaoina foi lona matagofie ofoofogia faanatura.” Ona ia tepa mai lea ia te au ma faapea mai, “Aua lava nei outou faia se mea e le tatau ona outou faia, po o le a lava le mea tou te fai, ia fai lelei ma fai ia sa’o.”1 Faatasi ai ma na upu faagaeetia ae taufaamata’u, na tuuina mai se poloaiga e faasao, faamalosi, ma toefuatai mai le uluai Tapeneko tuai o Sate Leki ua toe faafou ma saunia ai mo se isi vaitau o se tautua lauiloa. O le aso, le Peresitene pēlē, matou te tuuina atu lenei fale ua toeaina, ua faalaeiina atoa i galuega teuteu matagofie, ua faatatauina le fale atoa i lona mamalu ma lona matagofie e pei ona i ai i ona talafaasolopito—e ui ina ua fai si lagolelei tele o le fale. Ua toe faafoi nei ma le agaga mitamita e le Au Epikopo Pulefaamalumalu, faatasi ai ma le silia i le 2,000 matuaofaiva, le “Tapeneko tuai,” faatasi ai ma le tusi faamaonia fou mo le 100 tausaga. O le talosaga a Peresitene Hinckley ina ia toe faafoi mai le “uluai Tapeneko tuai” na avea ma fu’a taualuga mo le faia o faaiuga faigata faatusiata ma le fauga. Sa faaaoga lea fuaitau e faamatala ai le fatu ma le faamoemoega o le galuega. Sa avea e faapei o le tagavai o le saolotoga a Moronae lea, i lona faaaogaina, “na faatuina i olo uma” ma sisi ae i nuu uma”2 sa tatau ai. Pe ana mafai ona tautatala mai nei puipui tuai, semanu ua latou auai faatasi mai i le faaleoina atu o le faafetai faamaoni i Tusiata o le FFKR, le kamupani a le Jacobsen Construction, ma le vaega aupito taua, o le au faigaluega atoa a le Ekalesia mo galuega faatino, faatasi ai ma le toatele ua mafai ai ona faatino lenei galuega lavelave ona o o latou tomai. Fai mai se tasi uso sinia o le aufaigaluega, “A o tatou fefautuaai faatasi, sa mafai e le Alii ona tuuina mai ia i tatou le poto e sili atu nai lo a tatou lava mea e mafaia.” Sa lagona e tagata sa faatinoina le galuega le faaaloalo tele mo le matagofie o le Tapeneko, mo faufale na uluai fausiaina, faapea foi le maualuga o le tulaga tauleleia o la latou galuega. Sa latou maofa ua silia ma le seneturi, o auina atu mai lenei pulelaa i le lalolagi upu a perofeta, tagatavaai, ma talifaaaliga o aso e gata ai. Pe ana mafai ona tautatala mai nei puipui tuai, ou te mautinoa semanu latou te faaleo maia lo latou talisapaia o lo latou faavae fou mautu. Semanu e olioli nei puipui fou i lo latou fusi u’amea fou lea ua fusimau ai i latou ma tutusa’o ai. Semanu e faafetai mai nei puipui tuai ina ua salueseina mai ia atulaina e 14 o le vali mai le faalo, ona toe fono ai lea ma toe vali i se vali manaia lava. Semanu e faailoa mai e nei puipui tuai le agaga faafetai ona o le puipuiga ma le matagofie o se taualuga iila fou alumini, ma o le a fiafia faatasi foi ma nofoa i laufofoga fiafia o tagata e faaaogaina pe a latou iloaina ni nai suiga o nofoa, ma nai inisi ua faaopoopo o le avanoa mo tulivae. Tatou te talia ma talisapaia ia fale fou e mafai ai ona tatou talisapaia ia leo o musika musuia. E na ona mafai e se tagata ona vaai faalemafaufau i mea e ono manatua e nei puipui tuai e uiga i le tele o lauga sa latou faalogologo toto’a i ai mo le tele o tausaga. O nei puipui tuai, pe ana mafai ona tautatala mai, semanu e taufono mai, “Sa matou i ai iinei!” ina ua tula’i mai Peresitene Iosefa F. Samita mai sona gasegase faaumiumi, e auai i se sauniga o le konafesi aoao ia Oketopa, 1918. I le sauniga amata, faatasi ai ma se siufofoga ua faatumulia i le lagona ootia, sa ia saunoa mai, “O le a ou lē, [ma ou] te le taumafai lava e pā’ia le tele o mea o loo i lo’u mafaufau i le taeao nei, ma o le a ou tolopoina seia aulia se isi taimi i le lumanai, pe a finagalo ai le Alii, lo’u taumafai e faamatala atu nisi o mea o loo i lo’u mafaufau, ma o loo nofo i lo’u loto.” Sa ia faaauau: “Ou te lei nofonofo ai na o au i nei masina e lima talu ai. Sa ou nofo i le agaga o le tatalo, o le aioiga, o le faatuatua ma le tinou; ma sa ma fesootai e le aunoa ma le Agaga o le Alii.”3 Sa matou iloa mulimuli ane, i lena aso ao le’i amataina le konafesi, na mauaina e Peresitene Samita se faaaliga o loo tusia faapea o le faaaliga i le togiolaina o e ua maliliu, lea na avea mulimuli ane ma vaega e 138 o le Mataupu Faavae ma Feagaiga. Pe ana fai e mafai ona tautatala mai nei puipui tuai, semanu ua latou faamanatu mai ia i tatou ia aso faanoanoa ma le pogisa o le Pau Tele o le Tamaoaiga. O le a latou toe manatua le konafesi aoao ia Aperila, 1936 ina ua fofoga mai e Peresitene Heber J. Grant o le a amata e le Ekalesia se fuafuaga mo le saogalemu, lea na faaigoa mulimuli ane o le fuafuaga o le uelefea a le Ekalesia. I le ono masina mulimuli ane na ia faamalamalama mai: “O la tatou faamoemoega muamua lava o le faavaeina lea . . . o se faatulagaga e aveesea ai le mea inosia o le paie, e tuueseina ai foi lea mea leaga o le fiamaua fua o se mea, a ia tutoatasi, maelega, ia iloa ona faasoasoa lelei ma faapea ai ona toe atiina ae le manatu o le tagata ia te ia lava. O le faamoemoega o le Ekalesia, o le fesoasoani atu lea i tagata ina ia mafai ona fesoasoani ia i latou lava. E tatau ona toe faamalosia le galue e avea ma mataupu taiala i olaga o tagata o la tatou Ekalesia.”4 I a Oketopa, 1964, ona o se tofiga mai ia Peresitene Tavita O. MaKei, sa saunoa ai Elder Harold B. Lee e uiga i tiutetauave faamātua. E manatua lelei e nei puipui tuai na ta’ua e Elder Lee o le a ia faitauina mai i se tusi o le 1915 i le Ekalesia na sainia e le Au Peresitene Sili. Ae a’o lei amataina sa ia saunoa, “Ou te masalo o se mea e pei ona ta’ua ai e Mark Twain e uiga i le tau: ‘Ua tele ina tatou talanoa i le tau, ae e foliga mai e leai lava sa tatou mea o faia i ai.’” Ona faitau ai lea e Elder Lee mai le tusi ua 50 tausaga talu ona tusia: “Matou te fautuaina ma uunaia le amataina o ‘Afiafi Faaleaiga’ i le Ekalesia atoa, o se taimi lea e mafai ai e le tama ma le tina ona faapotopoto faatasi le la fanau tama ma teine i totonu o le fale ma aoao atu ia i latou afioga a le Alii.” Ma na sosoo ai ma le folafolaga lenei: “Afai e usitaia e le Au Paia lenei fautuaga, matou te folafola atu o le a latou maua faamanuiaga e tele. O le a faateleina le alofa i le aiga ma le usiusitai i matua. O le a tuputupu ae le faatuatua i loto o le autalavou a Isaraelu, ma o le a latou maua le mana e faafetaiaia ai faatosinaga a le tiapolo ma faaosoosoga e oo atu ia i latou.”5 E manatua lelei foi e nei puipui tuai le sāō o le Tapeneko ina ua fofogaina mai o le a saunoa mai Elder Bruce R. McConkie i le konafesi. Sa lagonaina e nei puipui tuai se agaga loloto o le migao a o faaiuina e Elder McConkie lana saunoaga i nei upu faagaeetia loto: “O lenei, e tusa ai ma lenei togiola atoatoa, na aumaia i le faamaligiina o le toto o le Atua—ou te molimau atu na faataunuu i Ketesemane ma Kolokota, ma e faatatau ia Iesu Keriso, ou te molimau atu o ia o le Alo o le Atua soifua, ma sa faasatauroina mo agasala a le lalolagi. O Ia o lo tatou Alii, lo tatou Atua, ma lo tatou Tupu. Ua ou iloa lenei mea e a’u lava ia, ae le mai i se isi tagata. “O au o se tasi o ana molimau, ma e i ai se aso o le a ou tagotago ai i faailoga o fao i ona lima ma ona vae ma ou faasusuina ona vae i o’u loimata. “Peitai o le a le sili a’e so’u iloa i lena taimi nai lo lo’u iloa i le taimi nei, o ia o le Alo o le Atua Silisiliese, o ia o lo tatou Faaola ma le Togiola, ma e oo mai le faaolataga e ala i lona toto togiola ma e leai lava se isi auala.”6 I le 1995, na saunoa ai Peresitene Hinckley i tamaitai o le Ekalesia, “Ona o le tele naua o manatu sese o le lalolagi ua faapea o le mea moni lea, ona o le tele naua o le taufaasese e faatatau i tulaga faatonuina ma tulaga faatauaina, ona o le tele naua o faaosoosoga ma mea faatosina e faifai malie ai lava ona pisia i mea o le lalolagi, ua matou lagona e tatau ona lapataia outou ma mua’i lapataia.” Ona ia faitauina mai ai lea: “O i matou o le au Peresitene Sili ma le Aufono a le Au Aposetolo e Toasefululua O Le Ekalesia a Iesu Keriso o le Au Paia o Aso e Gata Ai, matou te tautino atu ma le faamaoni, o le faaipoipoga i le va o se alii ma se tamaitai, ua faauuina e le Atua, ma o le aiga o le totonugalemu lea o fuafuaga a Le Foafoa, ma le taunuuga e faavavau o Lana fanau. . . . “O le tane ma le ava ua i ai le tiutetauave paia e alofa ma tausi e le tasi le isi ma a la fanau. ‘O le fanau o le tofi lea mai le Alii’ (Salamo 127:3). Ua i ai i matua se tiute paia e tausia a latou fanau i le alofa ma le amiotonu, ia tuuina atu i ai mea e manaomia i le faaleagaga ma le faaletino, ia aoao i latou e alolofa ma feauaunaai, ia tausia poloaiga a le Atua ma avea ma tagatanuu usiusitai i tulafono i soo se mea e nonofo ai. O tane ma ava—tina ma tama—o le a latou tali atu i le Atua mo le faataunuuina o nei mea e ao ona faia.”7 Ou te matua faafetai lava ona o lenei fale ofoofogia. Ua tu e pei o se maafaamanatu paia o lo tatou taimi ua tuanai ma o se tagavai maoae foi o le faamoemoe mo le lumanai. Ou te molimau atu i le paia o lo tatou Tama oi le Lagi ma le alofa tele o lo tatou Faaola ia i tatou taitoatasi. Ua matua faamanuiaina lava i tatou ua taitaiina e se perofeta a le Atua. I le suafa o Iesu Keriso, amene. Faamatalaga 1. “Tabernacle Renovation Press Briefing—Remarks by President Gordon B. Hinckley,” Oke. 1, 2004; tagai www.newsroom.lds.org. 2. Alema 46:36; 62:4. 3. I le Confrence Report, Oke. 1918, 2. 4. I le Conference Report, Oke. 1936, 3. 5. I le Conference Report, Oke. 1964, 83–84. 6. “The Purifying Power of Gethsemane,” Ensign, Me 1985, 11. 7. “Stand Strong against the wiles of the World,” Ensign, Nov. 1995, 100–101; tagai foi “O Le Aiga: O Se Folafolaga i le Lalolagi,” Liahona, Oke. 2004, 49.