Te faaroo, te taviniraa, te aueue ore Elder David S. Baxter No te Hitu Ahuru Ia faarahi tatou i to tatou faaroo, ia tupu na roto i te taviniraa, e ia faaea tamau noa ma te papû, noa’tu eaha te tupu mai, e ite tatou i te here o to tatou Faaora. A toru ahuru ma iva matahiti i ma‘iri a‘e nei, ua patoto e piti na misionare a te Fatu i te uputa o to‘u utuafare i Glasgow i te fenua Ekotia. Ua putapu roa matou i to raua nehenehe, to raua haehaa, to raua faaroo. Ia tae ana‘e mai raua i to matou fare, e ite matou i te here e i te hau. E au i te iteraa no te maitai viivii ore. Ua haapii raua na roto i te ite, te haavare ore, e te mâtau. E ua ite matou e e parau mau te reira. Tau hepetoma rii i muri mai, ua bapetizohia e ua haamauhia matou ; e ua haaatihia matou i te reira iho taime i te faahoaraa e i te aroha o te mau melo e o te feia faatere o to matou utuafare apî oia te Ekalesia. O te haamataraa te reira o te hoê oraraa no te evanelia o tei haafaufaa e o tei haamaitai i to matou oraraa, ma te hopoi mai i te hoê iteraa i te tumu e i te arata‘iraa hohonu, e vai i te vairaa e te hau. Ma te ti‘aturi e riro teie ei tauturu no te feia apî i roto i te Ekalesia, te hinaaro nei au e faaite e toru na tumu faufaa no te evanelia o ta‘u i haapii mai. A tahi, te mana faaohiparaa e te tauiraa o te faaroo i roto ia Iesu Mesia. E au teie faaroo i te mata‘i ora no te pae faaroo. Ia vaiiho tatou i teie faaroo ia tere i roto ia tatou, e faaara e e faaitoito te reira i to tatou ite i te pae varua. E hopoi te reira i te ora i roto i to tatou varua. A tere ai teie faaroo, e ite ïa tatou i te muhumuhu o te Varua. E haamaramaramahia to tatou feruriraa, e otu‘itu‘i vitiviti to tatou uaua varua, e e putapu to tatou aau. E faaamu te faaroo i te ti‘aturi. Ei reira ïa to tatou hi‘oraa e taui ai ; e maramarama mai ïa to tatou iteraa. E haamata ïa tatou i te imi i te mea maitai a‘e i roto i te oraraa e i roto ia vetahi ê, eiaha râ i te mea ino. E roaa ïa ia tatou te hoê iteraa hohonu no te tumu e no te auraa o te oraraa. E faatea te hepohepo i te e‘a no te oaoa. Te faaroo mai teie te huru o te hoê ïa horo‘a no te ra‘i mai area râ, e mea ti‘a ia imi e ia faarahi i te reira. Te faaite ra te Ditionare o te Bibilia e, « E roaa te faaroo na roto i te faarooraa i te iteraa papû o te feia e faaroo to ratou ».1 Ei reira ïa te faaroo e faaamuhia’i mai te mea e ti‘aturi tatou. Mai te tahi atoa mau viretu, e haapuaihia te faaroo ia faaohipa tatou i te reira ; e haapuai e e faaohipa tatou mai te mea ra e mea hohonu to tatou faaroo. E hotu mai te faaroo no te hiaai parau-ti‘a, no te ti‘aturi e no te haapa‘o. Ua faaite te Buka a Moromona i te hoê hi‘oraa no te metua o te Arii Lamoni o tei faaroo i te iteraa papû o Aarona, e ua hinaaro i te ti‘aturi e i te faaohipa, e ua arata‘ihia oia ia parau i roto i te hoê pure haehaa e « … mai te mea ra e te vai ra e Atua, e o oe taua Atua ra, ia faaite mai oe ia oe iho ia‘u nei, e e haapae atu vau i ta‘u atoa ra hara ia ite au ia oe na ».2 E na reira atoahia tatou mai te mea e vaiiho tatou ia tatou iho ia haaputapuhia e te varua o te iteraa papû, a faaohipa’i tatou i te ti‘aturiraa, mai te mea e hinaaro e feruri e imi tatou – a faarahi ai tatou i to tatou faaroo. A piti, ia tavini tatou e tupu tatou i te maitai. Ua haapii te peresideni George Albert Smith e, « E ere i te mea o ta tatou e farii o te haafaufaa i to tatou oraraa, o te mea râ o ta tatou e horo‘a ».3 Ua riro te taviniraa hi‘o ore ei raau rapaau maitai roa no te mau ma‘i pee no te raveraa ohie o te tere haere nei na te ao nei. Te tupu nei te inoino o vetahi mau taata e aore râ, te hepohepo nei ia ite ratou aita ratou e tau‘ahia nei, e e faufaa rahi atu â to ratou oraraa ahiri e te haapa‘o nei ratou i te mau hinaaro o te tahi atu mau taata. Te vai nei te pahonoraa na roto i te faaafaroraa i te mau fifi o te feia i pihai iho ia tatou i te haapeapearaa i to tatou iho oraraa ia amo i te mau hopoi‘a, noa’tu te teimaha nei tatou iho, ma te rave itoito tatpi, eiaha râ i te amuamuraa no te mea aita a tatou e haamauruururaa. Ia tuu tatou i to tatou varua i roto i te taviniraa e tauturu te reira ia tatou ia haamaitai atu â i ta tatou mau utuuturaa, ta tatou mau tau‘araa e ta tatou mau titauraa. A faahope ai tatou i to tatou puai i te amoraa i te hopoi‘a a vetahi ê, e tupu te semeio i te tahi taime. E iti mai ta tatou mau hopoi‘a. E riro tatou i te oaoa. E rahi mai ïa ta tatou faufaa i roto i to tatou oraraa. A toru, eita te aupîpîraa e haapapû i te ti‘amâraa mai roto mai i te mau fifi o te oraraa. Noa’tu e haere noa tatou i to tatou haereraa na te e‘a afaro e te piriha‘o ma te haapa‘o maitai e te faaroo, e farerei tatou i te mau pe‘ape‘a e te mau tamataraa. Te vaira te mau mahana, penei a‘e te mau ava‘e e te mau matahiti, e fifi te oraraa. E ite tatou i te tuhaa a te enemi, te mauiui upoo, te taa ê raa, te mauiui, e te oto – i te tahi mau taime, e hau roa’tu i ta tatou iho nei tuhaa. Nahea tatou ia aro mai te enemi ? Te vai nei te hoê rave‘a. Ia ti‘a maite e ia faaoroma‘i. A faaea itoito noa ma te aueue ore e te parau mau. E tae mai te ati rahi o te mau tamataraa o te oraraa ia vaiiho tatou i teie mau mea ia ume ê ia tatou i to tatou haere‘a mau. I teie tau no te mau ati e te mau tamataraa e ma‘iti vetahi i te faaru‘e i te faaroo i te taime mau e hinaarohia ia taa i te reira. E haamo‘e-ê-hia te pure i te taime mau e hinaaro-rahi-mau-hia te reira. E huri-ê-hia te mau peu maitai i te hiti i te taime e hinaarohia ia faaherehere i te reira. E haamo‘ehia te Atua, e te mau taata atoa, inaha râ, e hape, e feaa e ua faaru‘e Oia ia tatou. Te parau mau râ, to tatou noa ïa paruru, to tatou noa iho paruru, ta tatou ti‘aturiraa o te tape‘a-maite-raa ïa i tei maitai ra. Ia haaatihia tatou i te mahu poiri ra, e mo‘e ïa tatou mai te mea e ma‘iti tatou i te faaru‘e i te auri oia te parau a te Atua. E mana papû to te parabole a te Faaora no te taata paari o tei patu i to’na fare i ni‘a i te păpă, no te mea e faahoho‘araa te reira i te mau tamataraa tei tupu i roto i te oraraa o teie taata paari. Ua ma‘iri ihora te ûa, e tahe ihora te pape pu‘e, e te mata‘i hoi i te uihiraa mai. Inahra râ, ua ora oia i taua mau mea atoa ra – no te mea ua patu oia i ni‘a i te păpă o te hoê niu papû e, ua faaea noa oia i reira i te taeraa mai te mata‘i. I roto i te tatara-papû-raa o te parau o te hoê ratere e aore râ, te haereraa i mua o te hoê pĭpĭ, ua papa‘i John Bunyan e : Eaha te hinaarohia i roto i te faufaa mau, Ia haere mai oia i ô nei ; Ia faaea tamau mai oia i ô nei, Ia tae mai te mata‘i, ia tae mai te tau ; Aita ïa e faataiaraa No te tamaru ia’na To’na hinaaro matamua O te riroraa ïa ei ratere.4 Ua a‘o u‘ana te Aposetolo Paulo i to Kolosa e, « ia tamau maite i te faaroo, ia tatumu e ia mau maite, e ia ore e aueue i te ti‘aturiraa a te evanelia nei ta outou i faaroo a‘e nei ».5 E i te feia no Korinetia i tae mai ai teie iteraa papû puai : « Ua ati matou i te pohe, aita râ i apĭapĭ ; ua peapea matou, aita râ i ahoaho ; « Ua hamani-ino-hia, aita râ i faarue-roa-hia ; ua hurihia i raro, aita râ i pohe roa ».6 No te aha teie hi‘oraa i ti‘a’i ? Teie te tumu o ta Paulo i horo‘a mai : « O te Atua hoi o tei faaue i te maramarama ia anaana mai no roto i te pouri ra, o tei anaana mai ïa i roto i to tatou aau, ia noaa te maramarama ra o te ite i te hanahana o te Atua i te mata o Iesu Mesia ra ».7 O to‘u ïa iteraa papû ia faarahi tatou i to tatou faaroo, ia tupu na roto i te taviniraa, e ia faaea tamau noa ma te papû, noa’tu eaha te tupu mai, e ite tatou i te here o to tatou Faaora. E tuu ïa tatou ia tatou iho i roto i te ti‘araa e nehenehe ai tatou e farii i te aano e te hohonu o te mau haamaitairaa o te Taraehara. E faarirohia to tatou ti‘araa melo ei aupipiraa. E haapuaihia, e tamâhia, e faaapîhia e e faaorahia tatou i te pae varua e i te pae aehuehu. Te faaite papû nei au i te reira na roto i te i‘oa o Iesu Mesia, amene. Te Mau Nota 1. Bible Dictionary, ‘Faaroo’, 669. 2. Alama 22:18. 3. I roto Conference Report, Eperera 1935, 46. 4. The Pilgrim’s Progress, (1997), 295. 5. Kolosa 1:23. 6. 2 Korinetia 4:8, 9. 7. 2 Korinetia 4:6.