Hono ʻIkai Lahi ʻa e ʻIló mo e ʻOfá ʻELETĀ DAVID B. HAIGHT ʻO e Kōlomu ʻo e Kau ʻAposetolo ʻe Toko Hongofulu Mā Uá ʻOku moʻoni ʻa e ongoongoleleí. ʻOku ou ʻiloʻi ia; he ko e fakamoʻoni au ki ai. ʻOku ou tuʻu atu heni ʻi he loto-fakatōkilalo moʻoni—ʻa ia ko ha loto ʻoku fonu ʻi he ʻofa ki he ngāué ni, pehē kiate kimoutolu ʻoku ʻi hení mo kimoutolu ʻoku fanongo maí. Naʻá ku tuʻu atu heni ʻi he tafaʻaki ʻo Palesiteni Kōtoni B. Hingikelií ʻi heʻetau konifelenisi he māhina ʻe ono kuo hilí, pea naʻá ne kole mai ke u taʻataʻalo atu kiate kimoutolu, pea naʻá ku feinga ʻaki hoku ivi kotoa ne maʻu he taimi ko iá ke u taʻataʻalo atu kiate kimoutolu. Naʻe tala mai ʻe ha niʻihi kiate au, naʻa nau pehē ko ʻeku taʻataʻalo fakamāvae atu ia kiate kimoutolú. Ka ko au ʻeni ʻoku ou tuʻu atu ʻi heni he ʻahó ni, ke mou ʻiloʻi, mo fakahā atu ko au ʻeni kuó u foki mai. Pea ʻoku ʻikai ke ʻi ai ha taha ke ne hiki hake hoku nimá. ʻOku ou ʻiloʻi ʻa e mālohi ʻo e lotú mo e tuí mo e ngāue mateakí, pea ʻoku ou ʻiloʻi kuo fai mai ha ngaahi fakamoʻoni mahuʻinga mei he langí ke fakamoʻoni ki hono moʻoni ʻo e ongoongoleleí. Ko ia ʻoku ou tuʻu atu heni he ʻahó ni ke fai ʻeku fakamoʻoní, mo fakafeʻiloaki atu kiate kimoutolu. ʻOku ou ʻamanaki pē ʻe aʻu ki he konifelenisi hokó te u moʻui lelei ʻaupito pea lava ke u fai ʻa e ngāue kuo kole mai kiate au ke u faí. ʻOku moʻui ʻa e ʻOtuá. Ko ʻetau Tamaí Ia—ko ʻetau Tamai Hēvaní. Naʻe faʻu ʻe ʻIlisa R. Sinou, ha niʻihi ʻo ʻetau ngaahi hiva ʻiloa tahá, kae tautautefito ki he ngaahi hiva sākalamēnití, pea naʻá ne faʻu ʻa e hiva ko ʻení: Hono ʻikai lahi ʻa e ʻiló mo e ʻofá Naʻe fakafonu ʻaki e langi ʻi ʻolungá Mou kiʻi fakakaukau siʻi ki ai. Koeʻuhí he naʻa tau ʻi ai. Hono ʻikai lahi ʻa e ʻiló mo e ʻofá Naʻe fakafonu ʻaki e langi ʻi ʻolungá Pea fekauʻi mai ʻa e Fakamoʻuí mei ʻolungá Ke mamahi, pea tafe hono taʻataʻá, mo pekiá!] (“Naʻe Lahi Fau ʻa e ʻOfá,” Ngaahi Himi, fika 105) Naʻa tau fili ke tau haʻu ki māmani. Ko ia kuo tau fakataha mai ʻi he fale fakatahaʻanga lahí ni, ʻa ia te tau lava ke fealeaʻaki mo fakamoʻoni ai. ʻOku ou fakamoʻoniʻi atu, ʻi he lolotonga ʻa e ngaahi pō ko ia naʻe ʻikai te u faʻa lava ai ʻo mohé, naʻá ku maʻu ai ha taimi lahi, ʻa ia ʻokú te feinga ai ke fakaleleiʻi ʻete ngaahi palopalema kotoa pē, mo fokotuʻu ha ngaahi taumuʻa foʻou fekauʻaki mo e ngaahi meʻa ʻoku fiemaʻu ke faí, ne u maʻu ai ʻa e ngaahi fakakaukau fakalangi ko ia ʻokú ne hiki hake ʻetau moʻuí. ʻOku ʻofa ʻa e ʻOtua ko ʻetau Tamai Fakahēvaní ʻiate kitautolu, pea ʻoku totonu ke pehē ʻetau ʻofa ʻiate Iá. Naʻá Ne fili Hono ʻAló ke hāʻele mai ki he māmaní ʻo ʻomi ʻa e ongoongolelei ʻa Sīsū Kalaisí, ʻa ia ʻoku ui ʻaki Hono huafá ʻa e Siasi ko ʻení, pea ʻoku tau fakamoʻoni ki aí. ʻOku ou ongoʻi lāngilangiʻia ʻi heʻeku tuʻu atu heni ʻo fakamoʻoni ʻi he ʻahó ni ki he makatuʻunga ʻo e Siasí ni, mo ʻetau ʻofa kia Palesiteni Hingikelī, ʻa ia ʻokú ne tataki ʻa kitautolu ʻi he ʻaho ní. ʻOku moʻoni ʻa e ongoongoleleí. ʻOku ou ʻiloʻi ia; he ko e fakamoʻoni au ki ai. ʻI he huafa ʻo hotau ʻEiki ko Sīsū Kalaisí, ʻēmeni.