ʻELETĀ L. TOM PERRY
ʻO e Kōlomu ʻo e Kau ʻAposetolo ʻe Toko Hongofulu Mā Uá
Fakatauange te tau fakafanongo ki he leʻo ʻo e kau palōfitá, ʻa ia kuo talu mei he kamataʻangá mo ʻenau fakatokanga mai kiate kitautolu ʻo fekauʻaki mo hono mahuʻinga ʻo e ngaahi tamaí ʻi he ʻapí.
ʻI heʻetau vakai lelei he ʻahó ni ki he māmaní, ʻoku fakautuutu ʻene hā mahino mai e toe ngāue mālohi ange ʻa Sētane ke maʻu pōpula e ngaahi laumālie ʻo e tangatá. Ko e tefitoʻi faʻunga ʻokú ne feinga ki aí ko e ʻiuniti mahuʻinga taha ʻo e sosaietí—ʻa e fāmilí.
ʻI he ngaahi taʻu lahi kuohilí, kuo feinga mālohi ai ʻa Sētane ke fakasiʻisiʻi mo holoki e mahuʻinga ʻo e tefitoʻi faʻunga mahuʻinga taha ko ʻeni ʻi he kotoa ʻo e ngaahi faʻunga kuo fokotuʻutuʻú. ʻOku mahino ʻaupito ʻa e fakautuutu ʻene lavameʻá—he ʻoku tau mamata ki hono ngaahi fakamoʻoní, ʻa ia kuo fakamatalaʻi pea tau fanongo fakaʻaho ki ai pea ʻoku kau ai e maumau ʻa ha ngaahi fāmili lahi. ʻI he ʻauha māmālie ko ia ʻa e fāmilí, ʻoku tau mamata ai ki hono ngaahi nunuʻa fakalilifu ʻi he sosaietí—ʻa e fakautuutu ʻo e faihiá, ʻulungāanga koví, masivá, fakaʻaongaʻi e faitoʻo konatapú pea mo ha ngaahi meʻa kehe pē ke fakalau atu.
Hangē kiate au ʻoku tukutaha e tokanga ia ʻa Sētané ʻi he ngaahi husepānití mo e ngaahi tamaí. Hangē ko ʻení, kuo kīkīvoi e mītiá he ʻahó ni ʻi hono ʻohofi kinautolú—ʻo manukiʻi mo tukuhifo e ngaahi husepānití mo e ngaahi tamaí pea mo honau ngaahi fatongia ne foaki ange ʻe he ʻOtuá.
Ngaahi Sīpinga mei he Folofolá
Mahalo naʻa ʻaonga ke ʻoatu e fehangahangai ʻo hono fakamatalaʻi ʻo e ngaahi husepānití mo e ngaahi tamaí ʻi he mītiá, pea mo ia ʻoku hā he folofolá. ʻOku lahi fau ʻi he folofolá ha kau faʻifaʻitakiʻanga maʻongoʻonga.
Ko e Tamaí pea mo e Fakamoʻuí. ʻI he Fuakava Foʻoú, ʻoku tau toutou vakai ai ki ha ngaahi ʻata ʻo e fetuʻutaki ʻa e Fakamoʻuí pea mo e Tamaí. Ko e taha ʻo e ngaahi ʻata mahino taha ko ʻení naʻe hoko ia ʻi he ngoué ki muʻa pea lavakiʻi Iá:
“Pea tūʻulutui [ʻa Sīsū] mo lotu,
“ʻO ne pehē, Tamai, kapau ko ho finangaló, ʻave ʻa e ipú ni ʻiate au: kae ʻoua naʻa fai hoku lotó ka ko e finangalo ʻoʻoú.
“Pea naʻe fakahā mai ʻa e ʻāngelo mei he langí kiate ia, o ne fakamālohia ia.”1
Mōsese mo Setelō. ʻOku tau maʻu ʻi he tohi ʻEkesōtosí ha sīpinga meia Setelō, ko e tamai ʻi he fono ʻa Mōsesé, ʻi heʻene vakai ki he anga hono puleʻi ʻo e fānau ʻa ʻIsilelí:
“Pea kuo mamata ʻa e tamai ʻi he fono ʻa Mōsesé ki he meʻa kotoa pē naʻá ne fai ki he kakaí, naʻe pehē ʻe ia, Ko e hā ʻa e meʻá ni ʻokú ke fai ki he kakaí ni? Ko e hā ʻokú ke nofo toko taha ai pē, pea tuʻu ʻa e kakai kotoa pē ʻo ofi kiate koe mei he pongipongí ki he efiafí?
“Pea pehē ʻe Mōsese ki heʻene tamai ʻi he fonó, Koeʻuhí ʻoku haʻu ʻa e kakaí ke fehuʻi kiate au ki he ʻOtuá: . . .
“Pea lea ʻa e tamai ʻi he fono ʻa Mōsesé kiate ia ʻo pehē, Ko e meʻá ni ʻokú ke faí ʻoku ʻikai lelei.
“He te ke fakaʻau ʻo ʻosi moʻoni koe, ʻa koe mo e kakaí ni ʻoku ʻiate koé: he ʻoku mamafa lahi ʻaupito ʻa e meʻá ni kiate koe: ʻoku ʻikai te ke mafai ia ʻe koe toko taha pē.”2
Naʻe akoʻi ange leva ʻe Setelō kia Mōsese ʻa e founga ke vahevahe atu ai ʻa e fatongiá ni, ʻaki hono uiuiʻi ha kau tangata te nau malava ke fai e ngāué, ʻa ia ne manavahē ʻOtua pea tuku ke nau hoko ko ha kau fakamaau ʻo pule ki ʻIsileli:
“Pea tuku ke nau fakamaau ʻa e kakaí ʻi he ngaahi kuonga kotoa pē: pea ʻe pehē ʻilonga ʻa e meʻa lahi kotoa pē, ke nau ʻomi ia kiate koe, ka ko e ngaahi meʻa ʻoku siʻí, ke nau fakamaauʻi: ko ia ʻe hoko ʻo faingofua ai kiate koe, pea te nau fai mo koe ke fua ʻa e kavengá.3
Ko ʻAlamā. ʻOku tau maʻu he Tohi ʻa Molomoná, ʻa e fakamatala kia ʻAlamā ko e foha ʻo ʻAlamaá, ʻi heʻene kau fakataha mo e kau angatuʻú ʻo fai ʻa e faʻahinga angahala kotoa pē. Naʻe lotu ʻa ʻene tamai ko ʻAlamaá ʻi he loto tui lahi ke ʻiloʻi ʻe hono fohá ʻa e moʻoní. ʻA ia ko ha lotu naʻe tali mai ʻi ha founga makehe moʻoni:
“Pea ko ʻeni, naʻe hoko ʻo pehē, lolotonga ʻene ʻalu holo ke fakaʻauha ʻa e siasi ʻo e ʻOtuá . . . ʻiloange naʻe hā mai kiate kinautolu ʻa e ʻāngelo ʻa e ʻEikí; pea naʻá ne ʻalu hifo ʻo hangē naʻe ʻi ha ʻaó; ʻo ne lea ʻo hangē ko e leaʻaki ʻa e leʻo ʻo e mana . . . ;
“Pea naʻe pehē fau hono lahi ʻo ʻenau ʻohovalé, naʻa nau tō ai ki he kelekelé, ʻo ʻikai mahino kiate kinautolu ʻa e ngaahi lea naʻá ne leaʻaki kiate kinautolú.
“Ka naʻá ne toe kaila ʻo pehē, ʻE ʻAlamā, tuʻu hake, pea ʻunuʻunu mai, he ko e hā ʻokú ke fakatangaʻi ai ʻa e siasi ʻo e ʻOtuá? He kuo folofola ʻa e ʻEikí: Ko hoku siasí ʻeni pea te u fokotuʻu maʻu ia; pea ʻe ʻikai ikuna ia ʻe ha meʻa, ka ko e faiangahala pē ʻa hoku kakaí.
“Pea ʻikaiʻia ko ia pē, ka naʻe pehē ʻe he ʻāngeló; Vakai, kuo ʻafioʻi ʻe he ʻEikí ʻa e ngaahi lotu ʻa hono kakaí, pea mo e ngaahi lotu foki ʻa ʻene tamaioʻeiki ko ʻAlamaá, ʻa ia ko hoʻo tamaí; he kuó ne lotu ʻi he fuʻu tui lahi koeʻuhí ko koe, koeʻuhí ke lava nai ke fakamahino kiate koe ʻa e moʻoní; ko ia, ko hono ʻuhinga ʻeni kuó u haʻu ai ke fakamahino kiate koe ʻa e mafimafi mo e mafai ʻo e ʻOtuá, koeʻuhí ke lava ke tali ʻa e ngaahi lotu ʻa ʻene kau tamaioʻeikí ʻo fakatatau mo ʻenau tuí.”4
ʻI he taimi naʻe ake ai ʻa ʻAlamā ko e Siʻí mei he meʻa ko ʻeni ne hokó, naʻe hoko ia ko ha tangata foʻou.
Ko e Hōloa e Fatongia ʻo e Ngaahi Tamaí
ʻOku fekumi ʻa Sētane ʻi ha palani kuó ne faʻu ke fakaʻauha ʻaki e fāmilí, ke fakasiʻisiʻi e fatongia ʻo e ngaahi tamaí. ʻOku hoko e fakautuutu ʻa e fekainaki mo e faihia ʻa e toʻu tupú, lahi ange mo e masivá pea taʻe pau mo e tuʻunga fakaʻekonōmiká, pea pehē ki he fakautuutu e tokolahi ʻo e toʻu tupu ʻi ʻapiako ʻoku hingá, ko ha fakamoʻoni mahino ia ki he siʻisiʻi ke ʻi ai ha takiekina fakaetamai ʻi ʻapí.5 ʻOku fie maʻu ʻe he fāmilí ha tamai ke ne fakamaʻunga ki ai.
Ko e moʻoni kuo tau ʻosi ʻiloʻi he taimí ni, mei he ngaahi meʻa kuo hoko he ngaahi senituli kuohilí, ʻoku hoko ʻa e tefitoʻi ʻiuniti ʻo e fāmilí ko e fakavaʻe pau mo malu taha ia ki he sosaietí pea ʻoku mahuʻinga ia ki he teuteu atu ʻa e toʻu tupú ki honau ngaahi fatongia he kahaʻú. ʻOku totonu ke tau ʻosi ʻiloʻi he taimí ni, kuo ʻikai ola lelei pea he ʻikai pē ola lelei ha toe faʻahinga faʻunga kehe ia ʻo e fāmilí. Naʻe fakahā mahino mai ʻeni ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā uá ʻi he: “Ko e Fāmilí: Ko ha Fanongonongo ki Māmani.”
“Ko kimautolu, ko e Kau Palesitenisī ʻUluakí pea mo e Fakataha Alēlea ʻo e Kau ʻAposetolo ʻe Toko Hongofulu Mā Ua ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku mau fakahā ʻi he loto māluʻia, ko e mali ʻi ha vā ʻo ha tangata mo ha fefine naʻe tuʻutuʻuni ia ʻe he ʻOtuá pea ko e fāmilí ko e uho ia ʻo e palani ʻa e Fakamoʻuí ki he ikuʻanga taʻengata ʻo ʻEne fānaú.
“Ko e kakai kotoa pē—ʻa e tangata mo e fefine—naʻe fakatupu ia i he tatau ʻo e ʻOtuá. Ko e toko taha fakafoʻituitui kotoa pē ko e foha mo e ʻofefine ia ʻo ha mātuʻa fakalangi, pea ʻi heʻene peheé, ʻoku maʻu ai ʻe he toko taha kotoa pē ha natula fakalangi pea mo ha ikuʻanga pau. Ko e tuʻunga tangata pe fefiné ko ha ʻulungāanga mahuʻinga ia ʻoku ʻiloʻi ai ʻa e tuʻunga mo e taumuʻa ʻo e tokotaha fakafoʻituituí, ʻi he maama fakalaumālié, mo e moʻui fakamatelié pea mo e taʻengatá. . . .
“ʻOku fekauʻaki ʻa e fuofua fekau naʻe tuku ʻe he ʻOtuá kia ʻĀtama mo ʻIví, pea mo e meʻa te na malava ʻi hona tuʻunga fakamātuʻa ko e husepāniti mo e uaifí. ʻOku mau fakahā ai heni ʻoku kei tuʻu maʻu pē ʻa e fekau ko ia ʻa e ʻOtuá ki heʻene fānaú ke nau fanafanau mo fakatokolahi ʻa māmaní. ʻOku mau toe fakahā foki heni kuo ʻosi tuʻutuʻuni ʻe he ʻOtuá ke toki ngāueʻaki pē ʻa e ngaahi mālohi toputapu ʻo e fakatupú ʻe ha tangata mo ha fefine, kuó na ʻosi mali fakalao ko ha husepāniti mo ha uaifi. . . .
“. . . Tuʻunga ʻi ha palani fakalangi, ʻoku ʻa e ngaahi tamaí ai ke nau puleʻi honau ngaahi fāmilí i he ʻofa mo e māʻoniʻoni pea ko honau fatongiá ke tokonaki ʻa e ngaahi fiemaʻu ʻo e moʻuí pea mo ha maluʻi maʻa honau ngaahi fāmilí. Ko e tefitoʻi fatongia ia ʻo e ngaahi faʻeé ke lehilehiʻi hake ʻa ʻenau fānaú. ʻI he ngaahi fatongia toputapú ni, ʻoku haʻisia ai ʻa e ngaahi tamaí mo e ngaahi faʻeé ke nau fetokoniʻaki ko ha kaungā ngāue tuʻunga tatau. . . .
“ʻOku mau fakatokanga atu ko e niʻihi fakafoʻituitui ko ia ʻoku nau maumauʻi ʻa e ngaahi fuakava ʻo e angamaʻá, ʻa kinautolu ʻoku nau ngaohikoviʻi ʻa e malí pe fānaú, pe ʻoku ʻikai ke nau fakahoko honau ngaahi fatongia fakafāmilí, te nau tuʻu ʻi ha ʻaho ʻo fai ha fakamatala ʻi he ʻao ʻo e ʻOtuá. Ko e tahá, ʻoku mau toe fakatokanga atu ʻe hanga ʻe he movetevete ʻo e fāmilí ʻo ʻomi ki he kakai fakatāutahá, tukui koló mo e ngaahi puleʻangá ʻa e ngaahi fakamamahi naʻe kikiteʻi ʻe he kau palōfita ʻo e kuonga muʻá mo onopōní.”6
Ngaahi Fatongia ʻo e Tamaí
ʻI heʻetau fakakaukau atu ko ia ki he ngaahi fakatokanga vivili ʻo fekauʻaki mo e kahaʻu ʻo e fānau ʻa ʻetau Tamai Hēvaní, kuo pau ke vakaiʻi lelei ai ʻe he ngaahi tamaí mo e ngaahi faʻeé ʻa honau lotó ke fakapapauʻi ʻoku nau muimui ki he fakahinohino ʻa e ʻEikí ʻi hono faʻu ha ngaahi fāmili taʻengatá. Ki he ngaahi tamaí, ko e hā ʻoku ʻamanaki mai ʻa e ʻEikí ke tau faí?
Ko hono fokotuʻu pē ʻo ha fāmilí, ʻoku kau leva ʻa e ngaahi meʻá ni ʻi he ngaahi fatongia ʻo e tamaí:
1. Ko e tamaí ʻoku ʻulu ki hono fāmilí.
“Ko e tuʻunga fakatamaí ko ha tuʻunga fakatakimuʻa ia—ʻa e faʻahinga tuʻunga fakatakimuʻa mahuʻinga tahá. Kuo pehē ai pē ia mei he kamataʻangá; pea ʻe pehē ai pē ia. Tamai, ko koe ʻokú ke pule ʻi he ʻapí, fakataha mo e tokoni pea mo e poupou mo e fakalotolahi ʻa ho hoa taʻengatá. ʻOku ʻikai toe fai hano tālangaʻi pe ko koe ʻoku moʻui taau pe feʻunga tahá, ka ko ha ngāue [fakalangi] ia ne vahe mai.”7
ʻOku kau ʻi ho fatongia fakatakimuʻa ʻi ʻapí, ʻa e pau ke ke taki e fāmilí ʻi he lotú.
“ʻOkú ke pule ʻi he tēpile maʻu meʻatokoní mo e lotu fakafāmilí. ʻOkú ke pule ʻi he efiafi fakafāmili ʻi ʻapí; pea ʻi hono fakahinohinoʻi koe ʻe he Laumālie ʻo e ʻEikí, ʻokú ke fakapapauʻi ai ʻoku akoʻi ki hoʻo fānaú ʻa e ngaahi tefitoʻi moʻoni ʻoku totonú. Ko koe ʻokú ke fai e fakahinohino fekauʻaki mo e ngaahi meʻa kotoa pē ʻi he moʻui fakafāmilí.
“ʻOkú ke foaki ʻa e ngaahi tāpuaki fakatamaí. ʻOkú ke kau kakato ki hono fokotuʻu ʻo e ngaahi tuʻutuʻuni mo e fakatonutonu fakafāmilí. ʻI hoʻo hoko ko ia ko e taki ʻi ho fāmilí, ʻokú ke palani mo feilaulau ai ke aʻusia ʻa e tāpuaki ko ia ko e fāmili uouangataha mo fiefiá. ʻOku fie maʻu ke fakatefito hoʻo moʻuí ʻi he fāmilí, kae lava ke ke fai kotoa e ngaahi meʻá ni.”8
Hangē ko e naʻinaʻi ʻa Palesiteni Siosefa F. Sāmitá: “ʻE kāinga, ʻoku siʻi ʻaupito hono mateakiʻi ʻo e tui fakalotú, ʻa e ʻofa mo e manavahē ki he ʻOtuá ʻi he ʻapí; pea lahi ʻaupito ʻa e anga fakamāmaní, siokitá, fakataʻetaʻetokangá, mo e ʻikai ke ʻi he fāmilí ʻa e anga ʻapasiá, he ka ne ʻikai pehē, he ʻikai ʻaupito teitei lahi ʻene hoko ʻa e ngaahi meʻa ia ko ʻení ʻi tuʻa mei he ʻapí. ʻI heʻene peheé leva, ʻoku fie maʻu ke fai hano fakaleleiʻi ʻo e ngaahi ʻapí. Feinga angé he ʻahó ni mo ʻapongipongi ke fai ha liliu ʻi homou ʻapí.”9
ʻE ngaahi tokoua, manatuʻi ʻoku hoko ho uaifí ko ho hoa ʻi homou fatongia ko e taki ki he fāmilí. Hangē ko e akonaki mai ʻa Palesiteni Kōtoni B. Hingikelií: “ʻI he Siasí ni, ʻoku ʻikai ʻaʻeva ʻa e tangatá ʻi muʻa pe ʻi mui ʻi hono uaifí, ka ʻi hono tafaʻakí. Ko ha ongo hoa ngāue tuʻunga tatau pē kinaua.”10 Talu mei he kamataʻangá mo hono fakahinohinoʻi ʻe he ʻOtuá ʻa e faʻahinga ʻo e tangatá ʻoku totonu ke hanga ʻe he malí ʻo fakatahaʻi ha husepāniti mo ha uaifi ʻi he uouangataha.11 Ko ia ai, ʻoku ʻikai ha meʻa ia he fāmilí ko e palesiteni mo ha tokoni palesiteni. ʻOku ngāue fakataha maʻu ai pē ʻa e ongomātuʻá ki he lelei ʻa hona fāmilí. ʻOkú na fāitaha ʻi he lea, ngāue mo e tōʻonga, ʻi heʻena taki, fakahinohinoʻi mo tataki hona fāmilí. Ko ha ongo hoa ngāue tuʻunga tatau pē ʻa kinaua. ʻOkú na palani, fokotuʻutuʻu fakataha ʻa e ngaahi meʻa fakafāmilí peá na laka atu leva ki muʻa ʻi he loto taha.
2. Ko e tamaí ko ha faiako.
ʻOku kaunga-tonu he ʻahó ni e akonaki ʻa Palesiteni Siosefa F. Sāmitá: “ʻOua naʻa tuku ke akoʻi hoʻomou fānaú ʻe ha kakai ʻoku pehē ko e kau mataotao . . . , ka ke mou akoʻi ʻa kinautolu ʻaki hoʻomou ngaahi akonakí pea mo hoʻomou ngaahi tā sīpingá, ʻi homou ʻapí. . . . ʻAi ke ke hoko pē koe ko ha tokotaha mataotao ʻi he moʻoní.”12
“ʻI he taimi ʻokú ke fakatokangaʻi ai e mahuʻinga ʻo hono akoʻi hoʻo fānaú, ʻokú ke maʻu ha loto fakatōkilalo koeʻuhí he ʻokú ke fakatokangaʻi ʻoku lava ke fakahoko ʻeni ʻi he akonaki mo e tā sīpinga. He ʻikai ke ke fai ha ʻulungāanga kehe ka ke akoʻi lelei ha ʻulungāanga ʻe taha. Kuo pau ke ke moʻuiʻaki, ako mo lotua e takaua maʻu pē ʻa e Laumālie Māʻoniʻoní. Kuo pau ke ke fakamaʻa mo fokotuʻutuʻu hoʻo moʻuí koeʻuhí ke hā mei hoʻo sīpingá mo hoʻo founga fakatakimuʻá, ʻa e maama ʻo e ongoongolelei ʻo Sīsū Kalaisí.
“Kuo pau ke ke palani ho ʻahó ʻo fakatatau mo e fakahinohino ʻa e Laumālie ʻo e ʻEikí, ʻo ke fekumi fakamātoato ki he meʻa ʻe lelei kiate koe mo ho fāmilí ki muʻa pea toki hanga ʻe he tokanga ki he ngaahi meʻa kehé ʻo fakakuihi koe mei ho ngaahi fuofua fatongia ko ʻení. Hangē ko ia kuo akonekina kitautolu ki ai ʻe he kau palōfita moʻuí, ‘He ʻikai ha faʻahinga lavameʻa ʻi he moʻuí te ne lava ke totongi huhuʻi ʻa e tō nounou ʻi he ʻapí’ (David O. McKay, ʻi he Conference Report, Apr. 1964, 5; toʻo mei he J. E. McCulloch, Home: The Savior of Civilization [1924], 42).”13
3. Ko e tamaí ʻokú ne tokonaki e ngaahi fiemaʻu fakatuʻasinó.
Naʻe fakahā mahino mai ia ʻe Palesiteni ʻEselā Tafu Penisoni: “Kuo tuku mai ʻe he ʻEikí ki he houʻeiki tangatá ʻa e fatongia ke tokonaki maʻa honau ngaahi fāmilí ʻi ha founga ʻe lava ai ʻe he uaifí ʻo fakahoko hono fatongia ko e faʻē ʻi he ʻapí. . . . Taimi ʻe niʻihi ʻoku ngāue ʻa e faʻeé ʻi tuʻa mei he ʻapí ʻi hano poupouʻi pe ko ha vivili ʻa hono husepānití . . . [koeʻuhí] ko e [ngaahi] fiemālie ʻe lava ke maʻu mai ʻe he paʻanga hū mai makehe ko iá. ʻE ngaahi tokoua, he ʻikai ngata pē ʻi ha faingataʻaʻia ʻa e fāmilí he tuʻunga ko iá, ka te ne fakafeʻātungiaʻi hoʻo tupulakí mo hoʻo fakalakalaka fakalaumālié.14
ʻE ngaahi tamai, tuʻunga ʻi ha tuʻutuʻuni fakalangi, ʻoku mou hoko ai ko e pule ki homou ngaahi fāmilí. Ko ha fatongia mamafa ʻeni pea ko e fatongia mahuʻinga taha ia te mou lava ke fuesiá, he ko ha fatongia taʻengata ia. ʻOku mou fokotuʻu ʻa e fāmilí ki hono tuʻunga mahuʻinga totonú. Ko e konga ia hoʻomou moʻuí ʻe tolonga ʻo tuʻuloa hili ʻa e maté. ʻOku ou fakamoʻoni atu ʻoku moʻoni ʻa e fakamatala ko ʻení:
“Ko e tuʻunga ko ia ʻoku maʻu ʻe he houʻeiki tangatá ʻi he fāmilí, tautautefito kiate kinautolu ʻoku maʻu ʻa e Lakanga Taulaʻeiki Faka-Melekisētekí, ko e taha ia ʻo e ngaahi fuofua meʻa mahuʻinga tahá pea ʻoku totonu ke ʻiloʻi mo paotoloaki lelei ia ʻi he fokotuʻutuʻu pea mo e mafai kuo foaki ʻe he ʻOtuá ki he tangatá, ʻi hono fokotuʻu ia ke ʻulu ki hono fāmilí.”
“. . . ʻOku ʻikai mo ha toe mafai ʻe māʻolunga ange he tamaí ʻi he ngaahi meʻa fekauʻaki mo e fokotuʻutuʻu fakafāmilí, kae tautautefito ʻeni ki he taimi ʻoku puleʻi ai ia ʻe ha taha ʻokú ne maʻu e Lakanga Fakataulaʻeiki māʻolunga angé. . . . ʻOku faka-ʻOtua e kamataʻanga ʻo e fakahokohoko fakapēteliaké pea ʻe kei hokohoko atu ia ʻi he taimí ni pea ki ʻitāniti. Ko ia ai, ʻoku ʻi ai leva ha ʻuhinga makehe ke mahino ai ki he kakai tangatá, kakai fefiné pea mo e fānaú ʻa e fakahokohoko pea mo e mafai ko ʻení ʻi he ngaahi ʻapi ʻo e kakai ʻa e ʻOtuá, mo nau feinga ke fokotuʻu ia ʻi he tuʻunga naʻe fakataumuʻa ki ai ʻe he ʻOtuá, ko ha feituʻu ki hono fakafeʻungaʻi mo hono teuteuʻi ʻo ʻEne fānaú ke nau maʻu ʻa e hakeakiʻi māʻolunga tahá. Kuo foaki maʻu pē ʻa e mafai māʻolunga taha ʻi he ʻapí ki he tamaí, pea ʻoku ʻikai ha mafai ʻe toe māʻolunga ange ai ʻi he ngaahi meʻa kotoa pē fekauʻaki mo e ʻapí pea mo e fāmilí.”15
Kuó u lau atu ha ngaahi lea ne ʻikai ke u fakahaaʻi atu pe ko e lea ia ʻa hai. Naʻe ʻi ai hono ʻuhinga ʻeku fai iá. ʻE ʻasi lelei atu ia ʻi he makasini Ensign mo e Liahona ʻo Meé. ʻOku ou fakaafeʻi kimoutolu ke mou ako mo toe fakamanatu e ngaahi pōpoaki fakakonifelenisí ni. Ko ha ngaahi makasini lelei moʻoni ʻeni pea ʻoku totonu ke maʻu ia ʻi he ʻapi kotoa pē. ʻE toki moʻui leva ʻa e laumālie ʻo e konifelenisí ni ʻi he taʻú kakato ʻi he ngaahi peesi ʻo e ongo makasini ko ʻení.
Fakatauange te tau fakafanongo ki he leʻo ʻo e kau palōfitá, ʻa ia kuo talu mei he kamataʻangá mo ʻenau fakatokanga mai kiate kitautolu ʻo fekauʻaki mo hono mahuʻinga ʻo e ngaahi tamaí ʻi he ʻapí. ʻOku ou fakatauange pē te tau toe fakapapau kakato ange ke fakahoko hotau ngaahi fatongiá mo hotau ngafa kuo foaki mai ʻe he ʻEikí ʻi heʻetau hoko ko e ngaahi tamai ʻi Saioné, ʻi he loto fakatōkilalo moʻoni pea ʻi he huafa ʻo Sīsū Kalaisí, ʻēmeni.
NGAAHI MAʻUʻANGA FAKAMATALÁ
1. Luke 22:41–43.
2. ʻEkesōtosi 18:14–15, 17–18.
3. ʻEkesōtosi 18:22.
4. Mōsaia 27:10–14.
5. Vakai, David Blankenhorn, Fatherless America: Confronting Our Most Urgent Social Problem (1995), introduction, 25–48; David Popenoe, Life Without Father (1996), 52–78.
6. Liahona, ʻOkatopa 1998, 24; toki fakamamafaʻi.
7. Ko e Kōlomu ʻo e Kau ʻAposetolo ʻe Toko Hongofulu Mā Uá, Father Consider Your Ways: A Message from the Church of Jesus Christ of Latter-day Saints (tohi tufa, 1973); toe paaki ʻi he Ensign, June 2002, 16.
8. Ensign, June 2002, 16.
9. “Worship in the Home,” Improvement Era, Dec. 1903, 138.
10. ʻI he Conference Report, Oct. 1996, 68; pe Liahona, Sānuali 1997, 49.
11. Vakai, Sēnesi 2:24.
12. Improvement Era, Dec. 1903, 138.
13. Ensign, June 2002, 14.
14. ʻI he Conference Report, Oct. 1987, 60–61; pe Ensign, Nov. 1987, 49.
15. Joseph F. Smith, “The Rights of Fatherhood,” Juvenile Instructor, 1 Mar. 1902, 146.
Previous
