Vilitaki Atu ʻELETĀ JOSEPH B. WIRTHLIN ʻO e Kōlomu ʻo e Kau ʻAposetolo ʻe Toko Hongofulu Mā Uá Neongo ʻoku kehekehe hotau ngaahi faingataʻaʻiá, ka ʻoku ʻi ai ha meʻa ʻoku fie maʻu ʻe he ʻEikí meiate kitautolu, tatau ai pē pe ko e hā hotau ngaahi faingataʻaʻiá mo ʻetau mamahí: ʻOkú Ne fie maʻu ke tau vilitaki atu ki muʻa. Kuó u moʻui ʻo fuoloa feʻunga ke u sio tonu ʻi ha ngaahi faingataʻa ʻo e moʻuí. Kuó u ʻiloʻi ha kakai lelei makehe kuo nau kātekina ha ngaahi faingataʻa lahi fau kae lolotonga iá, ʻoku ʻi ai ha niʻihi, ʻi heʻenau fotu maí, ʻoku hangē ʻoku tokamālie pē moʻuí iá. Taimi lahi, ko kinautolu ʻoku fefaʻuhi mo e filí ʻoku nau fehuʻi, “Ko e hā ʻoku hoko ai ʻeni kiate aú?” ʻOku nau taʻe mamohe ʻi ha ngaahi pō lahi ʻo fakakaukau pe ko e hā ʻoku nau taʻe lata, puke, loto foʻi, mole ʻamanakí, pe loto mamahi aí. Ko e fehuʻi, “Ko e hā ʻoku hoko ai kiate aú?” ʻE ala faingataʻa hano tali pea ʻoku faʻa fakaiku loto mamahi mo mole ʻa e ʻamanakí. Ka ʻoku ʻi ai ha fehuʻi lelei ange ke tau fai kiate kitautolu, ko ʻeni ia, “Ko e hā ʻoku ou ako mei he meʻa kuo hokó?” He ʻikai ngata pē ʻi hono fakapapauʻi ʻe heʻetau founga tali ʻo e fehuʻí ni ʻa e tuʻunga ʻo ʻetau moʻui ʻi māmaní, ka ʻi ʻitāniti foki heʻene hoko maí. Neongo ʻoku kehekehe hotau ngaahi faingataʻaʻiá, ka ʻoku ʻi ai ha meʻa ʻoku fie maʻu ʻe he ʻEikí meiate kitautolu, tatau ai pē pe ko e hā hotau ngaahi faingataʻaʻiá mo ʻetau mamahí: ʻOkú Ne fie maʻu ke tau vilitaki atu ki muʻa. Ko e Tokāteline ʻo e Kātaki ki he Ngataʻangá ʻOku kau ʻi he ongoongolelei ʻo Sīsū Kalaisí ʻa e kātaki ki he ngataʻangá, he ko e taha ia ʻo ʻEne ngaahi tefitoʻi tokāteliné. Ne akoʻi ʻe Sīsū, “Ko ia ia ʻe faʻa kātaki ʻo aʻu ki he ngataʻangá, ko ia ia ʻe moʻuí.”1 Pea: “Kapau te mou nofo maʻu ʻi heʻeku leá, pea ko ʻeku kau ākonga moʻoni ʻakimoutolu.”2 ʻOku pehē ʻe ha niʻihi ko e kātaki ki he ngataʻangá ko haʻate kātekina pē ngaahi faingataʻá. ʻOku toe lahi ange ia ai—ko e founga ia ʻo e haʻu kia Kalaisi pea hoko ʻo haohaoa ʻiate Iá. Ne akoʻi ʻe Nīfai ko ha palōfita he Tohi ʻa Molomoná ʻo pehē: “Ko ia, ʻoku totonu ke mou vivili atu ki muʻa ʻi he tuʻu maʻu ʻia Kalaisí, pea maʻu ʻa e ʻamanaki ʻoku mālohi haohaoá, mo e ʻofa ki he ʻOtuá mo e kakaí fulipē. Ko ia, kapau te mou vilitaki atu, pea ʻuakai ʻi he folofola ʻa Kalaisí, pea kātaki ʻo aʻu ki he ngataʻangá, vakai, ʻoku folofola peheni ʻe he Tamaí: Te mou maʻu ʻa e moʻui taʻengatá.”3 Ko e kātaki ki he ngataʻangá ko ha tokāteline ia ʻo e hokohoko atu ʻi he hala ʻoku fakatau ki he moʻui taʻengatá, ʻi ha hili e hū atu ʻa e taha ko iá ʻi he hala ʻo e tuí, fakatomalá, papitaisó, mo e maʻu ʻo e Laumālie Māʻoniʻoní. ʻOku fie maʻu ʻi he kātaki ia ki he ngataʻangá ʻa hotau loto fie ngāue kakató, pe hangē ko hono akoʻi ʻe he palōfita he Tohi ʻa Molomoná ko ʻAmalekaí, kuo pau ke tau “haʻu kiate ia, ʻo ʻatu [hotau] ngaahi lotó kotoa ko ha feilaulau kiate ia, pea fai atu ʻi he ʻaukaí mo e lotú, pea tuʻu maʻu ʻo aʻu ki he ngataʻangá; pea hangē ʻoku pau ʻoku moʻui ʻa e ʻEikí, ʻe fakamoʻui [ʻa kitautolu].”4 ʻOku ʻuhinga ʻa e kātaki ki he ngataʻangá kuo tau ʻosi fokotuʻu maʻu ʻetau moʻuí ʻi he ngaahi tokāteline ʻo e ongoongoleleí, ʻo tauhi ʻa e ngaahi tokāteliné, tokoniʻi hotau kāingá ʻi he loto māʻulalo, moʻui ʻo anga faka-Kalaisi, mo tauhi ʻetau ngaahi fuakavá. Ko kinautolu ʻoku kātaki ki he ikuʻangá, ʻoku potupotu-tatau, ʻikai feliliuaki, loto fakatōkilalo, fakalakalaka maʻu pē, pea ʻikai kākā. ʻOku ʻikai makatuʻunga ʻenau fakamoʻoní ʻi ha ngaahi ʻuhinga fakaemāmani—ka ʻoku makatuʻunga ia ʻi he moʻoní, ʻi he ʻiló, taukeí, pea mo e Laumālié. Ko e Tala Fakatātā ʻo e Tangata Tūtūʻí Ne ngāue ʻaki ʻe he ʻEiki ko Sīsū Kalaisí ʻa e tala fakatātā mahinongofua ʻo e tangata tūtūʻí ki hono akoʻi ʻo e tokāteline ʻo e kātaki ki he ngataʻangá. “Ko e tangata tūtūʻí ʻokú ne tūtuuʻi ʻa e folofolá. “Ko kinautolu ʻeni ʻi he veʻe halá, ʻa ia ʻoku tūtuuʻi ki ai ʻa e folofolá; pea kuo nau fanongo, pea haʻu leva ʻa Sētane, ʻo ʻave ʻa e folofola naʻe tūtuuʻi ki honau lotó. “Pea ko kinautolu ʻeni foki kuo tūtuuʻi ʻi he potu makamakaʻiá; ʻi heʻenau fanongo ki he folofolá, ʻoku nau maʻu leva ia ʻi he fiefia; “Ka ʻoku ʻikai ha aka ʻiate kinautolu, ko ia, ʻoku nau maʻu ai ia ʻo fuonounou: pea ka tupu ʻa e mamahí pe ʻa e fakatangá, koeʻuhi ko e folofolá, ʻoku hinga leva ʻa kinautolu. “Pea ko kinautolu ʻeni kuo tūtuuʻi ʻi he ʻakau talatalá; ʻoku nau fanongo ki he folofolá. “Ka ko e tokanga ki māmaní, mo e kākā ʻo e koloá, mo e hū ʻa e holi lahi ki he ngaahi meʻa kehekehé, ʻoku kāsia ai ʻa e folofolá, pea taʻe fua ai ia. “Pea ko kinautolu ʻeni kuo tūtuuʻi ki he kelekele leleí; ʻoku nau fanongo ki he folofolá, pea maʻu ia, pea tupu ai ʻa e fua, ko e taki tolungofulu ʻa e niʻihi, pea taki onongofulu ʻa e niʻihi, pea taki teau ʻa e niʻihi.”5 ʻOku fakamatalaʻi ʻe he tala fakatātaá ni ʻa e ngaahi faʻahinga ʻo e kelekelé ʻoku tūtuuʻi mo tanumaki ai ʻa e ngaahi tenga ʻo e moʻoní. ʻOku fakafofongaʻi ʻe he faʻahinga takitaha ʻo e kelekelé ʻa e tuʻunga ʻo ʻetau loto ʻakí mo hotau ivi kātakí. Ko e ʻuluaki faʻahinga ʻo e kelekelé, ʻa ē ʻi he “veʻe halá,” ʻokú ne fakafofongaʻi kinautolu ʻoku nau fanongo ki he ongoongoleleí, ka ʻoku ʻikai ke nau ʻoange ha faingamālie ki he moʻoní ke aká. Ko e faʻahinga kelekele hono uá, “potu makamakaʻiá” ʻokú ne fakafofongaʻi kitautolu ʻi he Siasí, ʻa ia ʻi he ʻuluaki ʻasi mai pē ʻa e feilaulaú pe faingataʻá, ʻoku tau hola loto mamahi, ʻo ʻikai fie feilaulaú. Ko e faʻahinga kelekele hono tolú, “ne tūtuuʻi ʻi he ʻakau talatalá,” ʻokú ne fakafofongaʻi ha kāingalotu ʻe niʻihi ʻo e Siasí ʻoku takihalaʻi pe maʻunimā kinautolu ʻe he tokanga ki he koloá mo e ngaahi holi fakakakano ʻo e māmaní. Fakaʻosí, ko kinautolu ʻi he “kelekele leleí” ko e kāingalotu ia ʻo e Siasí ʻoku hāsino mei heʻenau moʻuí ʻa honau tuʻunga fakaākonga ki he ʻEikí, pea ʻoku loloto honau aká ʻi he kelekele ʻo e ongoongoleleí, pea ʻoku nau fakatupu ai ha ngaahi fua lahí. ʻI he tala fakatātā ʻo e tangata tūtūʻí, ʻoku fokotuʻu mai ai ʻe he Fakamoʻuí ha ngaahi tūkiaʻanga ʻe tolu ʻo e kātakí, ʻa ia te nau lava ke fakakāsiaʻi hotau laumālié mo taʻofi ʻetau fakalakalaka taʻengatá. Ko e ʻuluaki tūkiaʻanga ʻo e kātakí ko e “tokanga ki māmaní,” ko hono moʻoní ko e hīkisia.6 ʻOku hāsino ʻa e hīkisiá ʻi ha ngaahi founga kehekehe ʻoku fakatupu ʻauha. Hangē ko ʻení, ko e hīkisia fakaʻatamaí ʻoku eʻa ʻaupito ia ʻi hotau kuongá ni. Kuo fakahīkihikiʻi ʻe ha niʻihi kinautolu ʻo māʻolunga ange ia ʻi he ʻOtuá mo ʻEne kau tamaioʻeiki kuo paní, koeʻuhí ko ʻenau akó mo ʻenau lavameʻa fakaʻatamaí. Kuo pau ke ʻoua naʻa tau teitei tuku hotau potó ke muʻomuʻa ʻi hotau laumālié. ʻE lava ʻe hotau potó ke ne tokoniʻi hotau laumālié, pea ʻe lava ʻe hotau laumālié ke ne fafangaʻi hotau potó, ka ʻo kapau te tau tuku hotau potó ke muʻomuʻa ia ʻi hotau tuʻunga fakalaumālié, te tau humu, loto fakamaau, pea ʻe lava ke mole ai ʻetau fakamoʻoní. ʻOku mahuʻinga lahi ʻa e ʻiló pea ko e taha ia ʻo e ngaaahi meʻa te tau ō mo ia ki he moʻui ka hokó.7 ʻOku totonu ke tau ako maʻu ai pē. Neongo ia, kuo pau ke tau tokanga ke ʻoua naʻa tuku ki tafaʻaki ʻetau tuí he ko hono moʻoní ko e tuí ʻokú ne fakaleleiʻi hotau ivi ke akó. Ko e tūkiaʻanga hono ua ʻo e kātakí ko e “kākā ʻo e koloá.” ʻOku totonu ke tau fakangata ʻetau tokanga ki he koloá. Ko ha founga pē ia ki hotau ikuʻangá, ka ʻoku totonu ke fakataumuʻa hotau ikuʻangá ki hono langa pē ʻo e puleʻanga ʻo e ʻOtuá. ʻOku ou ongoʻi ʻoku fuʻu toko lahi fau ha kakai ʻoku nau hohaʻa ange kinautolu pe ko e faʻahinga kā fēfē ʻoku nau fakaʻuli aí, vala totongi mamafa ʻoku nau tuí, pe ko e lahi honau falé ʻi hono fakafehoanaki ki he kakai kehé, pea ʻoku ʻikai ke nau fakatokangaʻi ai ʻa e meʻa ʻoku mahuʻinga angé.8 Kuo pau ke tau tokanga ʻi heʻetau moʻui fakaʻahó ke ʻoua naʻa tau tuku ʻa e ngaahi meʻa ʻo māmaní ke mahuʻinga ange ia ʻi he ngaahi meʻa fakalaumālié. Ko e tūkiaʻanga hono tolu ʻo e kātakí naʻe folofola ki ai ʻa e Fakamoʻuí ko e “holi ki he ngaahi meʻa [kehé]” ʻOku ʻākilotoa kitautolu ʻe he mahaki fakaʻauha ko e ponokalafí, ʻo laka ange ia ʻi ha toe taimi ki muʻa. ʻOku hanga ʻe he ponokalafí ʻo fakatupu ʻa e ongoʻi angaʻulí, movetevete ʻo e ʻapí pea pehē ki he moʻuí. ʻOku hanga ʻe he ponokalafí ʻo holoki hotau ivi fakalaumālie ke kātakí. ʻOku fāitatau e ponokalafí mo e ʻoneʻone fofoó. ʻE faingofua ʻaupito haʻane maʻu-nimā mo ikunaʻi kita he mōmēniti pē ʻokú te manga atu ai ʻo ʻikai ke fakatokangaʻi ʻa hono fakatuʻutāmakí. ʻOku ngalingali te ke fie maʻu ha tokoni ke ke hao hake ai mei he ʻoneʻone fofō ʻo e ponokalafí. Ka hono ʻikai lelei lahi ange ke ʻoua naʻá ke teitei manga atu ki ai. ʻOku ou kole fakamātoato atu ke mou tokanga mo fakaalaala ʻaupito. Ko e Kātaki ki he Ngataʻangá ko ha Tefitoʻi Moʻoni ia ki he Taha Kotoa ʻI ha ngaahi uike siʻi ki muʻa pea siʻi mālōlō ʻa Palesiteni Hiipa J. Kalānité, ne ʻalu atu ai ha taha ʻo e Kau Takí ke ʻaʻahi ki ai ʻi hono ʻapí. Ki muʻa pea mavahe ʻa e tangatá, ne fai ʻe Palesiteni Kalānite ha lotu: “ʻE ʻOtua, tāpuakiʻi muʻa au ke ʻoua naʻa teitei mole ʻeku fakamoʻoní ka u tuʻu maʻu ʻo aʻu ki he ngataʻangá!”9 ʻOkú ke fakakaukau atu, ko Palesiteni Kalānite ʻeni, ko e taha ʻo e kau palōfita maʻongoʻonga ʻo e Fakafoki mai ʻo e Ongoongoleleí, ko e Palesiteni ʻo e Siasí ʻi ha meimei taʻu ē ʻe 27, ʻoku lotu ke tuʻu maʻu ʻo aʻu ki he ngataʻangá? ʻOku ʻikai ha taha ia ʻe hao mei he mālohi mo e ngaahi fakatauele ʻa Sētané. ʻOua te ke hīkisia ʻo ke fakakaukau ʻokú ke hao koe mei he ivi ʻo e filí. Sio tokanga telia naʻá ke tō ki heʻene ngaahi kākaá. Nofo ofi ki he ʻEikí ʻaki haʻo ako fakaʻaho ʻa e folofolá mo lotu fakaʻaho. ʻOku ʻikai totonu ia ke tau tangutu ʻo mālōlō mo pehē kuo pau hotau fakamoʻuí. Kuo pau ke tau fakafemoʻuekinaʻi ʻetau moʻuí kakato.10 ʻOku fakaʻaiʻai mo fakamanatu mai ʻe he ngaahi lea ko ʻeni ʻa Palesiteni Pilikihami ʻIongí, he ʻikai ke tau lava ʻo teitei foʻi ʻi he feinga ke kātakí: “Ko e kakai tangata mo fafine ʻoku nau fie maʻu ha nofoʻanga ʻi he puleʻanga fakasilesitialé, te nau ʻilo kuo pau ke nau fepaki ʻi he ʻaho kotoa pē [ke aʻusia e taumuʻa toputapu ko ʻení].”11 Ivi ke Kātakí ʻOku ou ʻiloʻi ʻoku toko lahi ha kakai ʻoku loto mamahi, taʻe lata, mamahiʻia mo foʻi. Ko e ngaahi meʻá ni ko e konga mahuʻinga ia he moʻui ʻa e tangatá. Neongo ia, ʻoua muʻa naʻa mole hoʻo falala ki he Fakamoʻuí mo ʻEne ʻofa kiate koé. ʻOku pau maʻu pē ia. Kuó Ne talaʻofa he ʻikai te Ne tuku taʻe fakafakafiemālieʻi kitautolu.12 ʻI he taimi ʻoku tau fehangahangai ai mo e ngaahi faingataʻa heʻetau moʻuí, ʻoku fakafiemālieʻi kitautolu ʻe he folofola ʻa e ʻEikí he vahe 58 ʻo e Tokāteline mo e Ngaahi Fuakavá: “ʻOku ʻikai te mou lava ke mamata ʻaki homou mata fakaemāmaní ʻi he taimí ni, ki he finangalo ʻo homou ʻOtuá ʻo kau ki he ngaahi meʻa ʻe hoko ʻa muí, pea mo e nāunau ʻe hoko mai hili ʻa e faingataʻa lahí. “He ʻe hoko mai ʻa e ngaahi tāpuakí hili ʻa e ngaahi faingataʻa lahi. Ko ia, ʻe hokosia ʻa e ʻaho ʻe hilifaki ai kiate kimoutolu ʻa e kalauni ʻo e nāunau lahi; ʻoku teʻeki ai ke hokosia ʻa e feituʻu laʻaá ka ʻoku ofi ia.”13 Ko ia siʻoku ngaahi tokoua mo e tuofāfine, kuo pau ke tau vilitaki atu ki muʻa, pea hoko ʻo hangē moʻoni ange ai ko e ʻEikí. ʻOku tau ʻilo kotoa kinautolu ne nau fehangahangai mo ha ngaahi faingataʻa lahi ʻo e moʻuí pea nau kātekina lelei iá. Ko ha sīpinga lelei ʻe taha ko ha taha ʻo e kau fuofua Kāingalotú, ʻi he senituli 19 ko Uōleni M. Sionisoni. Naʻe fekau atu ia ʻe he kau taki ʻo e Siasí, ke ʻalu ʻo fakalele ʻa e Kolosiʻanga Vaka Lií, ʻa ia ko ha kolosiʻanga mahuʻinga ʻi he Vaitafe Kololató ʻi he toafa ʻo ʻAlesona Tokelaú. Ne kātekina ʻe Misa Sionisoni ha ngaahi faingataʻa lahi, ka ne kei tuʻu maʻu pē ʻi heʻene moʻuí. Fanongo angé ki he fakamatalaʻi ʻe Misa Sionisoni e meʻa fakamamahi ne hoko ki hono fāmilí ʻi haʻane tohi kia Palesiteni Uilifooti Utalafi: “ʻI Mē 1891, ne haʻu ai ha fāmili . . . ki heni [Vaka Lií] mei Litisifila ʻi ʻIutā, ʻo nau nofo heni he faʻahitaʻu momokó mo hanau ngaahi kaumeʻa. Naʻa nau tanu ʻi Penituiti ha kiʻi tamasiʻi . . . pea ʻikai fufulu e salioté pe ko kinautolu ʻaki ha faitoʻo. . . . Naʻa nau omi ki homau ʻapí, ʻo mohe ai ʻi ha pō ʻe taha, pea feohi ai mo ʻeku kiʻi fānau īkí. . . . “Naʻe ʻikai haʻamau ʻilo ki he anga ʻo e mahakí [ngaloʻafú], ka naʻa mau falala ki he ʻOtuá, pea koeʻuhí ko ʻemau ʻi heni ʻi ha misiona faingataʻá, mo feinga mālohi ʻo fakatatau mo ʻemau ʻiló ke talangofua ki he [ngaahi fekaú] . . . ke fakahaofi ʻema kiʻi fānaú. Kae pangó, ʻi ha ʻaho ʻe fā mo e konga mei ai, kuo fulutāmakia pē siʻema kiʻi [tamasiʻi lahí] ʻi heʻeku kei fua iá, ʻo ne siʻi mālōlō. Ne siʻi mālōlō mo ha toko ua kehe ʻi he mahakí ni pea mau ʻaukai mo lotu ʻo fakatatau mo ʻemau pehē ʻoku fakapotopotó, he ʻoku lahi hamau ngaahi fatongia ke fai heni. Ne mau ʻaukai ʻi ha houa ʻe uofulu mā fā pea ne tuʻo taha haʻaku ʻaukai ʻi ha houa ʻe fāngofulu, ka ne ʻikai hano ola, he naʻe siʻi mālōlō mo hoku ongo kiʻi ʻofefine īkí foki. Hili ha uike mei heʻene maté kuo puke mo hoku ʻofefine taʻu hongofulu mā nima ko Melinitaá pea ne ma fai ʻa e meʻa kotoa ne ma lavá ke tokoniʻi ia, ka ne toe muimui atu mo ia ʻi he toengá. . . . Kuo toʻo atu ha toko tolu ʻo ʻeku fānau fefiné mo haku foha ʻe taha, ka ʻoku teʻeki aʻu ki he ngataʻangá. Kuo tō lalo ʻeni mo hoku ʻofefine lahi taha kuo taʻu hongofulu mā hivá ʻi he mahakí, pea ʻoku mau ʻaukai mo lotu maʻana he ʻahó ni. . . . ʻOku ou fie kole ai hoʻo tuí mo hoʻo lotú koeʻuhí ko kimautolu. Ko e hā nai ha meʻa kuo mau fai kuo liʻaki ai kimautolu ʻe he ʻEikí, pea ko e hā te mau lava ʻo fai ke toe hōifua mai ai[?]” Hili ha taimi nounou mei ai, kuo faitohi ʻa Misa Sionisoni ki ha taki fakalotofonua mo hano kaumeʻa, ʻo fakahaaʻi ʻene tui ke vilitaki atú: “Ko e faingataʻa lahi taha ʻeni ki heʻeku moʻuí, ka ne u haʻu ke maʻu ʻa e fakamoʻuí pea ʻoku ou loto lahi ʻe tuʻunga. . . . ʻi ha tokoni ʻa e Tamai Hēvaní, te u pīkitai ki he vaʻa ukameá ʻo tatau ai pē pe ko e hā ha faingataʻa ʻe tō kiate au. Kuo teʻeki ke u holomui ʻi hono fakahoko hoku ngaahi fatongiá, pea ʻoku ou ʻamanaki mo falala te u maʻu ʻa e tui mo e ngaahi lotu ʻa hoku kau takí, koeʻuhí ke lava ʻo moʻui taau ke maʻu ʻa e ngaahi tāpuakí.”14 Neongo ʻe tokoni kiate kitautolu e ngaahi faingataʻa lahi ne hoko Misa Sionisoní ke tau fehangahangai ai mo hotau ngaahi faingataʻá, kae tuku pē muʻa ke u fokotuʻu atu ha ngaahi ʻulungāanga ʻe tolu ke tanumaki ʻaki ʻetau kātakí ʻi hotau kuongá ni. ʻUluakí, fakamoʻoni. ʻOku ʻomi ʻe he fakamoʻoní ʻa e mahino taʻengata ko ē ʻoku fie maʻu ke tau sio fakalaka atu ai ʻi he ngahi faingataʻa ʻoku tau fehangahangai mo iá. Manatuʻi e meʻa ne kikiteʻi ʻe Hiipa C. Kimipoló: “ʻE hokosia ʻa e kuonga he ʻikai toe lava ai ha tangata pe fefine ke moʻui ʻi ha maama ʻa ha taha kehe. Kuo pau ke tataki kitautolu takitaha ʻe he maama ʻoku ʻi lotó. . . . “. . . Kapau ʻoku ʻikai ke ke maʻu ia, he ʻikai ke ke lava ʻo tuʻu; ko ia, feinga ke ke maʻu ha fakamoʻoni kia Sīsū pea pīkitai ki ai, koeʻuhí ka hoko mai ʻa e taimi ʻo e faingataʻá ke ʻoua naʻá ke tūkia ʻo tō.”15 Uá, loto fakatōkilaló. Ko e loto fakatōkilaló, ko ha ʻilo mo ha loto ia kuo pau ke fakafalala ai ha taha ki he tokoni ʻa e ʻEikí ka ne lavaʻi ʻa e moʻuí ni. He ʻikai ke tau lava ʻo kātaki ki he ngataʻangá ʻi hotau ivi ʻotautolú pē. Ka ne taʻeʻoua Ia, ko e meʻa noa pē kitautolu.16 Tolú, fakatomalá. ʻOku fakaʻatā kitautolu ʻe he meʻaʻofa nāunauʻia ʻo e fakatomalá ke tau foki ki he halá ʻi ha loto foʻou, ʻo ne ʻomi ha ivi ke tau kātaki ʻi he hala ʻoku fakatau ki he moʻui taʻengatá. ʻOku hoko ai ʻa e sākalamēnití ko e tefitoʻi meʻa mahuʻinga ʻo ʻetau kātaki ki he ikuʻangá ʻi he moʻui ko ʻení. ʻOku ʻomi ʻe he sākalamēnití ha faingamālie mahuʻinga fakauike ke fakafoʻou ai ʻetau fuakava he papitaisó pea fakatomala mo vakavakaʻi ʻetau fakalakalaka ki he hākeakiʻí. Ko e ngaahi foha mo e ʻofefine kitautolu ʻo e ʻOtua Taʻengatá, ʻoku malava ke tau hoko ko e ngaahi ʻea-hoko fakataha mo Kalaisi.17 ʻI heʻetau ʻiloʻi ko ia ko hai ʻa kitautolú, ʻoku totonu ke ʻoua ʻaupito naʻa tau tukuange ʻa e taumuʻa ko ia ko hono ikunaʻi hotau ikuʻanga taʻengatá. ʻOku ou fakamoʻoniʻi, ka tau vakai mai mei ʻitāniti, ki he kiʻi vahaʻa taimi nounou ʻo ʻetau moʻui ʻi māmaní, ʻe hiki hotau leʻó ʻo kalanga fiefia, he neongo ʻa e ngaahi faingataʻa ʻoku tau tofanga aí, ne tau maʻu ʻa e poto, tui, mo e loto toʻa ke kātaki mo vilitaki atu. ʻOfa ke tau fai pehē he kuongá ni pea taʻengata, ko ʻeku fakaʻānauá ia ʻi he huafa ʻo Sīsū Kalaisí, ʻēmeni. MAʻUʻANGA FAKAMATALÁ 1. Mātiu 24:13. 2. Sione 8:31. 3. 2 Nīfai 31:20. 4. ʻAmenai 1:26. 5. Maʻake 4:14–20. 6. Vakai, Ezra Taft Benson, in Conference Report, Apr. 1989, 3–7; or Ensign, May 1989, 4–6. 7. Vakai, T&F 130:18–19. 8. Vakai, Mātiu 23:23. 9. Leaʻaki ʻe John Longden, ʻi he Conference Report, Oct. 1958, 70. 10. Vakai, T&F 58:27. 11. Discourses of Brigham Young, sel. John A. Widtsoe (1954), 392. 12. Vakai, Sione 14:18. 13. T&F 58:3–4. 14. Hā ʻi he Jay A. Parry and others, eds., Best-Loved Stories of the LDS People, 3 vols. (1997–2000), 3:107–8. 15. ʻI he Orson F. Whitney, Life of Heber C. Kimball (1945), 450. 16. Vakai, Sione 15:5. 17. Vakai, Loma 8:17.