ʻEletā Jeffrey R. Holland
ʻO e Kōlomu ʻo e Kau ʻAposetolo ʻe Toko Hongofulu Mā Uá
Hangē ko e makehe ʻa e lakanga fakataulaʻeikí ki he Siasi moʻoní, ʻoku fie maʻu foki ki ai e lakanga fakataulaʻeiki ia ʻo e ʻOtuá.
ʻI he meimei taʻu ʻe 70 kuohilí, ʻi he kei hoko ʻa Palesiteni Tēvita O. Makei ko e tokoni ʻuluaki ʻi he Kau Palesitenisī ʻUluaki ʻo e Siasí, naʻá ne fai ai e fehuʻí ni ki ha haʻofanga konifelenisi lahi: “Kapau ʻe ʻeke atu kiate kimoutolu [fakatāutaha] he taimí ni ke mou fakamatalaʻi mai ʻi ha foʻi sētesi pē ʻe taha . . . e meʻa ʻoku makehe taha ai ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ko e hā leva hoʻo talí?”
Naʻá ne pehē leva, “Ko ʻeku tali ki aí . . . ko e mafai fakalangí ʻi he fakahā totonu.”1
Ko e mafai fakalangi foki ko iá ʻa e lakanga fakataulaʻeiki māʻoniʻoní.
Naʻe toe tānaki mai ʻe Palesiteni Kōtoni B. Hingikelī ʻene fakamoʻoní heʻene pehē, “[Ko e lakanga fakataulaʻeikí] ko hono foaki ia ʻo e mafai fakalangí, ʻa ia ʻoku kehe ia mei he ngaahi mālohi mo e mafai kotoa pē ʻi he funga ʻo e māmaní. . . . Ko e mālohi pē ia ʻe taha ʻi he māmaní ʻoku fakalaka atu he veili ʻo e maté. . . . Ka ʻikai ia, ko e siasí ko e foʻi hingoá pē ʻoku ui ʻakí, ka ʻoku ʻikai maʻu ai e mafai ia ke fakahoko e ngaahi meʻa ʻa e ʻOtuá.”2
ʻI he uike ʻe fā kuohilí, naʻe pehē ʻe Palesiteni Sēmisi E. Fausi ki he fānau ako BYU ʻi heʻenau fakataha lotú, “ʻOku fakamafaiʻi mo puleʻi ʻe he [lakanga fakataulaʻeikí] ʻa e ngaahi ʻekitivitī kotoa pē ʻa e Siasí. Ka ʻikai e ngaahi kī mo e mafai ʻo e lakanga fakataulaʻeikí, he ʻikai ke ʻi ai ha siasi.”3
ʻOku ou kamata he pooni ʻaki e ngaahi kupuʻi lea nounou ko ʻení (ʻa ia ʻe lava ke toe fai mai hano fakalahi) ke fakamamafaʻi mālohi ha meʻa mahuʻinga pē ʻe taha: hangē ko e makehe ʻa e lakanga fakataulaʻeikí ki he Siasi moʻoní, ʻoku fie maʻu foki ki ai e lakanga fakataulaʻeiki ia ʻo e ʻOtuá, fakataha mo hono ngaahi kī, ngaahi ouaú, hono tupuʻanga fakalangí pea mo ʻene malava ko ia ke “nonoʻo ʻi he langi ʻa e meʻa ʻoku nonoʻo ʻi māmaní,” he ka ne taʻe ʻoua ia, he ʻikai ke ʻi ai ha Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
ʻI he taʻu fakamanatu ko ʻeni ʻoku tau kātoangaʻi ai e taʻu 200 ʻo hono fāʻeleʻi ʻo e Palōfita ko Siosefa Sāmitá pea mo e taʻu 175 ʻo hono fokotuʻu ʻo e Siasí, ʻoku ou fie tānaki atu ai ʻeku fakamoʻoní ki ai, mo fakahaaʻi ʻeku houngaʻia taʻe fakangatangata ki hono toe fakafoki mai ʻo e lakanga fakataulaʻeiki toputapú ni, ʻa e faingamālie maʻongoʻonga mo e meʻafoaki fisifisimuʻá ni pea mo hono fatongia kiate kitautolu ʻi he ongo tafaʻaki fakatouʻosi ʻo e veilí.
Ko e fatongia mahuʻinga ʻo e lakanga fakataulaʻeikí ʻi hono fakafehokotaki ʻo taimi mo ʻitānití, naʻe fakamahinoʻi tonu mai ia ʻe he Fakamoʻuí ʻi Heʻene fokotuʻu Hono Siasí lolotonga ʻEne ngāue he māmaní. Naʻá Ne folofola ki Heʻene ʻAposetolo pule ko Pitá, “Pea te u ʻoatu kiate koe ʻa e kī ʻo e puleʻanga ʻo e langí pea ko ia kotoa pē te ke nonoʻo ʻi māmaní, ʻe nonoʻo ia ʻi he langí; pea ko ia te ke veteki ʻi māmaní ʻe veteki ia ʻi he langí.”4 Hili ha ʻaho ʻe ono mei ai, naʻá Ne ʻave ʻa Pita, Sēmisi mo Sione ki ha funga moʻunga peá Ne nāunauʻia ai ʻi honau ʻaó. Pea naʻe hā mai leva ʻi he nāunau ʻa e kau palōfita mei he ngaahi kuonga fakakōsipeli ki muʻá, ʻo kau ai ʻa Mōsese mo ʻIlaisiā,5 ʻa ia ne nau foaki ʻa e ngaahi kī mo e ngaahi mālohi ne nau taki taha maʻú.
Meʻapangó, he naʻe ʻikai fuoloa kuo tāmateʻi e kau ʻaposetolo ko iá pe ʻave kinautolu mei he māmaní pea ʻave fakataha ai kinautolu mo ʻenau ngaahi kī ʻo e lakanga fakataulaʻeikí, ʻo iku ai ki hano toʻo atu ʻo e lakanga fakataulaʻeikí pea mo e mafai fakaʻotuá ʻi ha taʻu ʻe 1,400 tupu mei he lotolotonga ʻo e fānau ʻa e tangatá. Ka ko e konga ʻo e mana fakaonopooni pea mo e hisitōlia fakaofo ʻoku tau fakamanatu he pōní, ko e toe foki mai ko ia ʻa e kau talafekau fakalangi tatau pē ʻi hotau kuongá pea mo hono toe fakafoki mai ʻo e ngaahi mālohi tatau pē ne nau maʻú, ke faitāpuekina ai e faʻahinga kotoa ʻo e tangatá.
ʻI Mē 1829, lolotonga hono liliu ʻe Siosefa Sāmita ʻa e Tohi ʻa Molomoná, naʻá ne ʻiloʻi ai ha potufolofola fekauʻaki mo e papitaisó. Naʻá ne talanoa ki ai mo ʻene tangata tohi ko ʻŌliva Kautelé, pea naʻá na lotu fakamātoato ai ki he ʻEikí ʻo fekauʻaki mo e meʻá ni. Naʻe tohi ʻe ʻŌliva ʻo pehē: “Naʻá ma fai ha lotu fakamātoato ke ʻiloʻi e founga te ma lava ke maʻu ai e ngaahi tāpuaki ʻo e papitaisó pea mo e Laumālie Māʻoniʻoní. . . . Ne ma fekumi faivelenga . . . ke maʻu e mafai ʻo e lakanga fakataulaʻeiki māʻoniʻoní pea mo e mālohi ke ngāue ʻi he lakanga ko iá.”6
Naʻe haʻu ai ʻa Sione Papitaiso ko e tali ki he “lotu fakamātoato” ko iá, ʻo ne toe fakafoki mai ʻa e ngaahi kī mo e mālohi ʻo e Lakanga Taulaʻeiki Faka-ʻĒloné, ʻa ia kuo foaki ki heʻetau kau talavou ʻi he haʻofangá ni. Hili ha ngaahi uike siʻi mei ai, naʻe toe foki mai ʻa Pita, Sēmisi mo Sione ke fakafoki mai ʻa e ngaahi kī mo e mālohi ʻo e Lakanga Taulaʻeiki Faka-Melekisētekí, ʻo kau ai ʻa e ngaahi kī ʻo e tuʻunga faka-ʻaposetoló. Pea ʻi he hili hono langa ʻo ha temipale ʻe lava ke haʻu ki ai ha kau talafekau fakalangí, naʻe hoko leva ʻi he ʻaho 3 ʻo ʻEpeleli 1836, ʻa e meʻa tatau pē mo ia ne hoko he kuonga muʻá ʻi he Moʻunga ʻo e Liliú, ʻa ia naʻe ui ʻe Palesiteni Hingikelī ko e “mahutafea ʻo Ketilani” ʻi he ngaahi fakahaá, ʻa ia naʻe hā nāunauʻia mai ai e Fakamoʻuí ki he Palōfita ko Siosefa Sāmitá mo ʻŌliva Kautele, kae pehē kia Mōsese, ʻIlaisiā mo ʻIlaiase, ʻo nau foaki ai ki he ongo tangatá ni ʻa e ngaahi kī mo e ngaahi mālohi mei honau taki taha kuonga fakakōsipeli. Naʻe fakaʻosi e ʻaʻahi ko iá ʻaki ha fakahā leʻo lahi, “Ko ia, kuo tuku mai ʻa e ngaahi kī ʻo e kuonga fakakōsipelí ni ki ho mo nimá.”7
ʻOku ʻikai ha ofo ʻi hono fakakau ʻe he Palōfita ko Siosefá ʻa e fakalea nounou mo mahino ko ʻení ʻi he ngaahi tefito ʻo [ʻetau] tuí, “ʻOku mau tui kuo pau ke uiuiʻi ʻa e tangatá ʻe he ʻOtua ʻi he kikite pea mo e hilifaki ʻo e nima ʻe kinautolu pē ʻoku maʻu ʻa e mafaí [koeʻuhí] ke malangaʻaki ʻa e Ongoongoleleí mo fai hono ngaahi ouaú.”8 ʻOku fie maʻu ha meʻa ia ʻoku mahulu hake pē he aleapau ʻa e tangatá, ʻi he taimi ʻoku tau ngāueʻaki ai e mafai fakalangí. He ʻikai lava ke fakalele ia ʻaki ha ako ki he meʻa fakalotú pe ko hano fakanofo kita ki ai ʻe he haʻofangá. ʻIkai, ʻi he ngāue kuo fakamafaiʻi ʻe he ʻOtuá, kuo pau ke ʻi ai ha mālohi ia ʻoku mahulu ange ʻi he mālohi kuo ʻosi maʻu ʻe he kakai ʻoku tangutu he sea ʻo e falelotú, veʻe halá pe ʻi he ngaahi faiʻanga lotú—ko ha foʻi moʻoni ne tokolahi ha kau fekumi fakalotu ne nau ʻiloʻi mo tala fakahāhā ʻi ha ngaahi toʻu tangata lahi, ʻo aʻu ki he taimi ʻo hono Toe Fakafoki mai ʻo e Moʻoní.
Ko e moʻoni naʻe ʻikai loto ha toko lahi he kuonga ko iá ke tala ʻe heʻenau kau faifekaú ʻoku nau maʻu mafai fakalangi makehe, ka naʻe toko lahi ha kakai ia ne nau fakaʻamu ke maʻu e lakanga fakataulaʻeiki ʻo e ʻOtuá pea ne nau fekumi tavale ke ʻiloʻi e feituʻu ke maʻu ai iá.9 ʻI he laumālie ko iá, naʻe totonu ke hanga ʻe hono toe fakafoki mai e mafai ʻo e lakanga fakataulaʻeikí ʻia Siosefa Sāmitá ʻo fakangata e mamahi kuo laui senituli hono ongoʻi ʻe ha niʻihi, ʻo hangē ko e meʻa ne nau ongoʻi ne lototoʻa feʻunga ʻa Sālesi Uaisēlē ke ne leaʻakí. Naʻá ne mavahe mei he feohiʻanga lotu ʻa hono tokoua ʻiloa ko Sioné, ko e tupu mei ha loto ʻa Sione ke ne fai fakanofo taʻe ʻi ai hano mafai ke fai peheé, ko ia ne hiki malimali ai ʻe Sālesi ʻo pehē:
“Meʻa faingofua ko e fokotuʻu pīsopé
ʻI he loto ʻo e tangatá pe fefiné:
ʻI hono fakanofo ʻo Kouki ʻe Uaisēleé,
Ka ko hai koā naʻá ne fakanofo ʻa Uaisēleé?”10
ʻI he tali ki he fehuʻi faingataʻa ko iá, ʻe lava ʻe kitautolu ʻi he Siasi ʻo Sīsū Kalaisi kuo toe fakafoki maí, ʻo fekumi ki he hokohoko ʻo e lakanga fakataulaʻeiki ʻoku fakaʻaongaʻi ʻe he tīkoni foʻou taha ʻi he uōtí, pīsope ʻokú ne tokangaʻi iá pea mo e palōfita ʻokú ne tokangaʻi kotoa kitautolú. ʻOku foki e laine ko iá ʻi ha hohoko ʻoku ʻikai motumotu, ki he kau ʻāngelo talafekau ne omi mei he ʻAlo ʻo e ʻOtuá ʻo foaki mai ʻa e meʻafoaki taʻe-hano-tatau ko ʻení mei he langí.
Pea ʻoku tau fie maʻu moʻoni ʻa e ngaahi tāpuaki ʻo e lakanga fakataulaʻeikí—ʻi heʻetau kau ki he Siasí, mo ʻetau hoko ko ha fakafoʻituitui mo ha ngaahi fāmili ʻi he Siasí. Ko ha kiʻi fakatātā ʻeni ʻe taha:
Ne u lave ʻanenai ange ki he vahaʻa taimi ʻi Ketilaní ʻi he hisitōlia ʻo e Siasí. Ko e taʻu 1836 mo e 1837, ko e ongo taʻu faingataʻa taha ia ne fehangahangai mo e Siasí ʻi heʻene kei kamata foʻoú—ʻi he meʻa fakapaʻangá, fakapolitikalé pea pehē ki he lotoʻi Siasí. ʻI he lolotonga e ngaahi haʻahaʻa ko iá, naʻe maʻu ai ʻe Siosefa Sāmita ʻa e ueʻi fakapalōfita ko ʻení ke ʻoatu ha niʻihi ʻo e kau tangata ala lavameʻa tahá (ʻa ia ko e kotoa e Kōlomu ʻo e Kau ʻAposetolo ʻe Toko Hongofulu Mā Uá) ke nau ngāue fakafaifekau ki muli. Ko ha laka fakatoʻa mo fakalaumālie ia, ne iku ʻo fakahaofi ai ʻa e Siasí mei he ngaahi palopalema he taimi ko iá, ka naʻe ʻuluaki hoko ia ko ha fakakavenga lahi ki he Kāingalotú—tautautefito kiate kinautolu ne ʻalu ʻo ngāue fakafaifekaú pea mahalo ne toe fakamamahi ange ia ki he niʻihi ne nofo ʻi ʻapí.
Te u lau atu mei he tohi ʻa ʻEletā Lōpeti B. Tomisoní:
“Kuo hokosia e ʻaho ke mavahe atu ai e kau Faifekau ki ʻIngilaní, pea ne u [tuʻu] atu ai he ʻapi ʻo Misa [Hiipa C.] Kimipoló ke fakapapauʻi e taimi ʻe kamata ai [ʻene fonongá], he naʻe ʻamanaki ke ma fononga fakataha ʻi ha maile ʻe uangeau pe tolungeau, mo fakataumuʻa ke fakaʻosi ʻeku ngāué ki Kānata he faʻahitaʻu ko iá.
“Naʻe ʻosi ava mai e matapaá, ko ia ne u hū atu ai peá u ofo ʻi he meʻa ne u mamata ki aí. Ne u mei holomui ʻo fakakaukau kuó u hala lotoʻapi, ka ne ʻikai lava ke u toe ngaue. Naʻe lolotonga ʻohake ʻe he tamaí ni ʻa hono lotó . . . ki he ʻOtuá, [ʻo tautapa] kiate Ia ʻokú Ne tokangaʻi e ‘fanga manupuná, mo fafanga ʻa e fanga lēvení ʻi heʻenau tangí,’ ke Ne feau muʻa e ngaahi fie maʻu ʻa hono uaifí mo ʻene fānaú lolotonga ʻene mavahé. Pea hangē ko e kau pēteliaké pea mo e mālohi ʻo hono lakangá, naʻá ne hilifaki hono ongo nimá ki honau ʻulú fakatāutaha, ʻo tuku kiate kinautolu ha tāpuaki fakatamai, . . . peá ne tekaki kinautolu ke tokangaʻi mo maluʻi ʻe he ʻOtuá, ka ne ʻalu atu ʻo malangaʻaki ʻa e Ongoongoleleí ʻi ha fonua muli. Lolotonga ʻene foaki e [ngaahi tāpuaki ko iá] naʻe ʻikai ke mei ongona hono leʻó koeʻuhí ko e [feinga ʻa e niʻihi ne nau takatakaiʻi iá ke kukuta ʻenau tangí]. Naʻá ne hoko atu, ka naʻe toutou lōmekina moʻoni hono lotó. . . . Ko ia naʻe pau ke ne toutou longo, pea . . . tafe noa pē hono loʻimatá ʻi hono kouʻahé, ko hano fakahaaʻi e ongo naʻe toka mālohi ʻi hono lotó.” Naʻe pehē ʻe Misa Tomisoni, “Naʻe ʻikai ke u mālohi feʻunga ke mapukepuke hoku lotó. Ko ia ne u tangi ʻaloʻimata fakataha ai mo kinautolu. ʻI he taimi tatau pē, naʻá ku fakamālō ʻi heʻeku maʻu faingamālie ke u mātāʻia ha meʻa pehē.”11
Kuo tā tuʻo lahi e hoko ʻa e meʻa tatau pē ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní—koeʻuhí ko ha manavasiʻi, ko ha fiemaʻu, ko ha uiuiʻi, ko ha fakatuʻutāmaki, ko ha puke, fakatamaki pe mate. Kuó u ʻosi kau atu ki ha ngaahi momeniti pehē. Kuó u mamata ki he hā mai e mālohi ʻo e ʻOtuá ʻi hoku ʻapí pea mo ʻeku ngāué. Kuó u mamata ki hono valokiʻi ʻo e koví mo hono mapuleʻi ʻo e ngaahi ʻelemēniti ʻo natulá. ʻOku ou ʻiloʻi e ʻuhinga ʻo e kupuʻi lea, ko e ʻunuakiʻi e moʻunga faingataʻá pe ikunaʻi e haʻahaʻa ʻo e faingataʻá. ʻOku ou ʻilo e ʻuhinga ʻo e “laka ʻiate kinautolu”12 e ʻāngelo fakaʻauhá. Kuo hoko ʻa hono maʻu mo ngāueʻaki e mafai ʻo e Lakanga Taulaʻeiki Toputapú ʻi he Lakanga ʻo e ʻAlo ʻo e ʻOtuá,13 ko e taha ia ʻo e tāpuaki maʻongoʻonga taha ʻoku ou fakaʻamu ki ai mo hoku fāmilí ʻi he moʻuí ni. Pea ʻi hono fakaʻosí, ko e ʻuhinga fakaʻaho ia ʻo e lakanga fakataulaʻeikí—ʻa hono mālohi taʻe fakatataua, taʻefakangatangata mo tuʻoloa ke faitāpuekiná.
ʻOku ou kau fakataha mo kimoutolu he houngaʻia ʻi he ngaahi tāpuaki ko iá, pehē ki he kuaea ʻa e kakai moʻuí mo e kau pekia ʻi he hiva fakataha he taʻu fakamanatu ko ʻení, “ʻOku Mau Fakamālō [Koeʻuhí] ko e [Tangata Naʻe Alea mo [Sihová]!”14 peá ne fetuʻutaki foki mo ʻĀtama; Kepaleli; Mōsese mo Molonai; ʻIlaisiā; ʻIlaiase; Pita; Sēmisi mo Sione; Sione Papitaiso; pea mo ha niʻihi tokolahi kehe.15 Ko e moʻoni naʻe “[pani ʻe Sīsū] ʻa e Palōfita mo e Tangata Kikite ko iá.”16 Fakatauange te tau lava ʻe kitautolu kau talavou mo e toulekeleka, fānau tangata mo e kakai lalahi, ngaahi tamai mo e foha, ʻo fakamahuʻingaʻi e lakanga fakataulaʻeiki ko ia naʻe fakafoki mai ʻia Siosefa Sāmitá, pea pehē ki he ngaahi kī mo e ngaahi ouau ʻo e lakanga fakataulaʻeikí, ʻa ia ko ia pē ʻoku fakahaaʻi ai e mālohi ʻo e ʻOtuá, he ka ne taʻe ʻoua ia, he ʻikai lava ke fakahaaʻi ia.17 ʻOku ou fakamoʻoni ki hono toe fakafoki mai ʻo e lakanga fakataulaʻeikí pea mo e “founga ʻoku makehe taha ai” ʻa e Siasi moʻoni ʻo e ʻOtuá talu mei muʻá, pea ʻi he huafa ʻo Ia ʻoku ʻOʻona ʻa e lakanga fakataulaʻeikí, ʻa ia ko e ʻEiki ko Sīsū Kalaisí, ʻēmeni.
Ngaahi maʻuʻanga fakamatalá
1. ʻI he Conference Report, April 1937, 121.
2. “Priesthood Restoration,” Ensign, Oct. 1988, 71.
3. “Where is the Church?” devotional address, Brigham Young University, March 1, 2005, 8.
4. Mātiu 16:19.
5. Vakai, Mātiu 17:1–3.
6. Hā ʻi he Richard Lloyd Anderson, “The Second Witness of Priesthood Restoration,” Improvement Era, Sept. 1968, 20; toki fakamamafaʻi.
7. T&F 110:16; vakai foki ki he v. 1–15.
8. Ngaahi Tefito ʻo e Tuí 1:5; toki fakamamafaʻi.
9. Vakai, David F. Holland, “Priest, Pastor, Power,” Insight, BYU, Fall, 1997. 17, ki hano vakavakaiʻi fakalelei ʻo e ngaahi fakamatala naʻe lolotonga maʻu ʻi ʻAmelika ʻi he taimi ʻo hono Toe Fakafoki Mai ʻo e Ongoongoleleí.
10. Hā ʻi he C. Beaufort Moss, The Divisions of Christendom: A Retrospect, (n.d.), 22.
11. Hā ʻi he Orson F. Whitney, Life of Heber C. Kimball, (1945), 108–109.
12. T&F 89:21.
13. Vakai, T&F 107:1–3.
14. Ngaahi Himí, fika 16.
15. Naʻe fetuʻutaki ʻa Siosefa Sāmita mo ha kau palōfita pea mo ha kau talafekau mei he tafaʻaki ʻe taha ʻo e veilí. Ke maʻu e hingoa ʻo kinautolu ʻoku hā he folofolá, vakai ki he T&F 128: 20–21.
16. Ngaahi Himí, fika 16.
17. Vakai, T&F 84:19–21.
Previous
