Ponokalafí ʻEletā Dallin H. Oaks ʻO e Kōlomu ʻo e Kau ʻAposetolo ʻe Toko Hongofulu Mā Uá Tau fakaleleiʻi muʻa ʻetau tōʻonga moʻui fakatāutahá pea toe liunga ua ʻetau feinga ke maluʻi hotau ngaahi ʻofaʻangá mo hotau ʻātakaí, mei he hakeʻuta mai ʻa e ponokalafí. Ne u foki mai mo Sisitā ʻOakesi ʻi he faʻahitaʻu māfana kuo ʻosí, hili ia haʻama ʻi Filipaini ʻi ha taʻu ʻe ua. Ne ma saiʻia he ngāue aí, peá ma toe saiʻia pē heʻema foki maí. Lolotonga ʻema mavahé, ne ma vakai ki hotau ʻātakaí mei ha tafaʻaki ʻe taha, ʻi ha houngaʻia lahi ange pea taimi ʻe niʻihi ʻi ha hohaʻa makehe. Ne ma hohaʻa he mamata ki he hū mai ʻa e ponokalafí ki he ʻIunaiteti Siteití he lolotonga ʻo ʻema mavahé. Kuo taʻu lahi e fakatokanga hotau kau taki he Siasí ki hono fakatuʻutāmaki ʻo e ngaahi ʻata mo e fakamatala ʻoku fakataumuʻa ke ne fakaʻaiʻai ʻa e holi fakasekisualé. Ko ʻeni, kuo hanga ʻe he ivi kovi ʻo e ponokalafí, ʻoku ngaohi mo fakamafola fakakomēsialé, ʻo kāpui hotau sosaietí ʻo hangē ha kaupeau ʻo e koví. ʻI heʻetau konifelenisi fakaʻosí, ne tokanga taha ai ʻa Palesiteni Kōtoni B. Hingikelī ʻi haʻane malanga ai, ki he kaveingá ni, ʻo ne fakatokanga mai ʻi he lea mahino ngofua tahá “ko ha palopalema lahi ʻeni kiate kitautolu” (“Ko ha Kovi Fakamamahi ʻi Hotau Lotolotongá,” Liahona, Nōvema 2004, 59). Ko e tokolahi taha e kau pīsope ʻoku mau fetaulaki ʻi he ngaahi konifelenisi fakasiteikí ʻoku nau lipooti ʻa ʻenau hohaʻa lahi ʻi he palopalemá ni. Siʻi kaungā Lakanga Taulaʻeiki Faka-Melekiseteki, pea pehē mo kimoutolu kau talavou, ʻoku ou fie lea atu he ʻahó ni ʻo fekauʻaki mo e ponokalafí. ʻOku ou ʻilo ʻoku fehangahangai hamou tokolahi mo e meʻá ni pea tokolahi hamou niʻihi kuo fakameleʻi ʻe he meʻá ni. ʻI he tukutaha ʻo ʻeku leá ki he kaveinga ní, ʻoku ou ongoʻi ai hangē ko e palōfita ko Sēkopé, heʻene tala ange ki he kakai ʻo hono kuongá ʻoku fakamamahi kiate ia ke lea māsila lahi pehē ʻi he ʻao ʻo honau ngaahi ʻunohó mo ʻenau fānaú. Ka neongo hono faingataʻa ʻo e fatongiá, naʻá ne pehē kuo pau ke ne lea ki he kakaí fekauʻaki mo e kaveingá ni koeʻuhí he kuo fekauʻi ia ʻe he ʻOtuá (vakai, Sēkope 2:7–11). ʻOku ou fai ai ia ʻi he ʻuhinga tatau. ʻI he vahe hono ua ʻo e tohi ʻoku fakatauhingoa ki aí, ʻoku fakahalaki ai ʻe Sēkope ʻa e kakaí ʻi he “feʻauaki” (v. 23, 28). Naʻá ne talaange kuo nau “hokaʻi ʻa e ngaahi loto ʻo [honau] ngaahi ʻunoho ongongofuá, pea kuo mole ʻiate [kinautolu] ʻa e falala ʻa [ʻenau] fānaú, ko e tupu ʻi [heʻenau] ngaahi sīpinga kovi ʻi honau ʻaó” (v. 35). Ko e hā koā ʻa e “feʻauʻaki” angahalaʻia ko ʻení? ʻOku ʻikai ha veiveiua ne ʻi ai ha niʻihi ne moʻua ʻi ha ngaahi tōʻonga kovi. Ka ko e ʻelito ʻo e malanga ʻa Sēkopé, ʻoku ʻikai ko e ngaahi tōʻonga kovi kuo fakahokó, ka ko e tōʻonga kovi ʻoku teuakí. Ne kamata ʻe Sēkope ʻene malangá ʻaki ʻene tala ki he kakaí “[kuo nau] talangofua ʻo aʻu mai ki he ʻahó ni ki he folofola ʻa e ʻEikí” (Sekope 2:4). Neongo ia, naʻá ne toe talaange kuó ne ʻilo ʻenau fakakaukaú, he ʻoku nau “kamata ke ngāue ʻi he angahalá, ʻa ia . . . ʻoku ngali fakalielia ʻaupito ki . . . he ʻOtuá” (v. 5). Naʻá ne toe pehē, “[Kuo pau] ke u fakamoʻoni kiate kimoutolu ʻo kau ki he angahala ʻa homou lotó” (v. 6). Ne lea ʻa Sēkope ʻo hangē ko e folofola ʻa Sīsuú ʻi heʻene pehē, “Ko ia ʻoku fakasio ki ha fefine ke holi ki aí, ʻoku tonoʻi ia ʻe ia ʻi hono lotó” (Matiu 5:28; vakai foki, 3 Nifai 12:28; T&F 59:6; 63:16). ʻI he taʻu ʻe 30 tupu kuo hilí, ne u fakalotolahiʻi ai ʻa e fānau ako BYU ke nau fakaʻehiʻehi mei hono lau mo mamata he “ngaahi tohi tuʻuaki ʻo e feohi fakasekisualé, kuo mafola holó.” Naʻá ku ʻoange ʻa e fakatātā ko ʻení: “ʻOku kovi ange ʻa e ponokalafí pe talanoá mo e ʻata fakalieliá, ʻi he ʻulí pe meʻakai kuo mafú. ʻOku ʻi ai ha maluʻi ʻo e sinó ke ne fakamaʻa pē ia mei he meʻakai ʻoku koví. ʻOku hanga ʻe he meʻakai koví ʻo fakatupu haʻo puke ka ʻoku ʻikai ke ne uesia tuʻuloa koe, tuku kehe pē ʻi ha ngaahi meʻa siʻi ʻe niʻihi. ʻI he tafaʻaki ʻe tahá, ko ia ʻoku keinanga ʻi he talanoa fakalieliá pe ponokalafi mo e ngaahi ʻata pe tohi ʻulí, ʻoku ne lekooti ia ʻi ha mīsini ʻoku lava ʻo maʻu maʻu pē mei ai ʻoku ui ko e ʻutó. He ʻikai puʻaki mai ʻe he ʻutó ia ʻa e ʻulí. Ko ʻene hili pē hono lekōtí, ʻe ʻi ai maʻu ai pē ia ki hano toe fie maʻu he kahaʻú, ʻo ne toutou fakamanatu e ngaahi ʻīmisi taʻe feʻungá ki ho ʻatamaí, mo tohoakiʻi koe mei he ngaahi meʻa lelei ʻo e moʻuí.”1 ʻE kāinga, kuo pau ke u tala atu ʻoku mamata ʻetau kau pīsopé mo e kau fai faleʻi fakapalofesinalé ki he fakautuutu ke toko lahi ange e kau tangata ʻoku ʻefihia ʻi he ponokalafí, pea ko e toko lahi ʻo kinautolu ko ha kāingalotu mālohi he Siasí. ʻOku fakamaʻamaʻaʻi ʻe ha niʻihi ʻoku ʻefihia he ponokalafí ʻa hono fulikivanú ʻo nau kei ngāueʻaki pē ʻa e lakanga fakataulaʻeiki ʻo e ʻOtuá he ʻoku nau fakakaukau he ʻikai ke ʻilo ʻe ha taha ʻoku nau ʻefihia ai. Kāinga, ʻoku ʻilo ia ʻe he taha ʻoku ʻefihia hení, pea pehē foki ki he ʻEikí. Kuo fokotuʻu ʻe ha niʻihi tokua ʻoku totonu ke hoko ʻa e ponokalafí ia ko ha fehuʻi makehe pē he ʻinitaviu ki he lekomeni temipalé. Kuo ʻosi ʻi ai ia. ʻOku ʻi ai ha fehuʻi nai ʻe nima ai ke ne fakatupu ha vetehia pe talanoa ki he kaveingá ni kapau ʻoku aʻusia ʻe he taha ʻoku ʻinitaviú ʻa e tuʻunga fakalaumālie mo e faitotonu ʻoku tau fiemaʻu meiate kinautolu ʻoku hū ki he fale ʻo e ʻEikí. Ko e taha ʻo e ngaahi akonaki fakangalongataʻa taha ʻa e Fakamoʻuí ʻoku fekauʻaki ia mo e sio fakapulipuli he ponokalafí. “ʻE malaʻia ʻa kimoutolu, ko e kau tangata tohi mo e [kau] Fālesi, ko e [kau] mālualoi! he ʻoku mou fakamaʻa ʻa e tuʻa ipu inú mo e ipu kaí, ka ʻoku fonu ʻi loto ʻi he fakamālohi mo e holi kovi. “ʻA e [kau] Fālesi kui, tomuʻa fakamaʻa ʻa e loto ipu inú mo e ipu kaí, koeʻuhí ke maʻa ai foki ʻa e tuʻa ipú” (Matiu 23:25-26; vakai foki, ʻAlama 60:23). Ne hoko atu ʻa e Fakamoʻuí heʻene fakahalaki kinautolu ʻoku tokanga ki he meʻa ʻoku hā ki tuʻá kae taʻe tokanga ke fakamaʻa e tangata ʻi lotó: “He ʻoku mou tatau mo e fonualoto kuo vali hinehina, ʻa ia ʻoku matamatalelei moʻoni ʻi tuʻa, ka ʻoku fonu ʻi loto ʻi he ngaahi hui ʻo e kakai maté, mo e meʻa fakalielia kotoa pē. “ʻOku pehē pē ʻa kimoutolu foki, ʻoku mou hā māʻoniʻoni ki tuʻa ki he kakaí, ka ʻoku mou fonu ʻi loto ʻi he mālualoí mo e angahalá” (Mātiu 23:27–28). ʻOku fakatuʻutāmaki fau ʻa e ngaahi nunuʻa fakalaumālie vavé, ki he faʻahinga mālualoi peheé. Ko kinautolu ʻoku fekumi mo sio he ponokalafí, ʻoku nau tukuange ai ʻa e mālohi ʻo honau lakanga fakataulaʻeikí. Kuo folofola ʻa e ʻEikí “ʻO ka tau ka feinga ke ʻufiʻufi ʻetau ngaahi angahalá . . . vakai, ʻoku mahuʻi atu leva ʻa e ngaahi langí; ʻoku mamahi mo e Laumālie ʻo e ʻEikí; pea ʻo ka toʻo atu ia, ko e ʻēmeni ia ki he lakanga taulaʻeiki pe ko e mafai ʻo e tangata ko iá” (T&F 121:37). ʻOku toe mole foki ʻe kinautolu ʻoku fakaʻaongaʻi e ponokalafí, ʻa e feohi ʻo e Laumālié. ʻOku fakatupu ʻe he ponokalafí ha ʻāʻāvea ʻokú ne fakaʻauha ʻa e tuʻunga fakalaumālié. “Ko e loto fakakakanó, ko e mate ia”—ʻo mate fakalaumālie (Loma 8:6; vakai foki, 2 Nīfai 9:39). Kuo tā tuʻo lahi hono akoʻi mai ʻe he folofolá he ʻikai nofo e Laumālie ʻo e ʻEikí ʻi ha fale tapu ʻoku ʻuli. ʻI heʻetau maʻu ʻa e sākalamenití ʻi he moʻui tāú, kuo talaʻofa mai ʻe “ʻiate [kitautolu] maʻu ai pē ʻa hono Laumālié.” Ke tau maʻu e talaʻofa ko iá, ʻoku tau fuakava ai ke tau “manatu maʻu ai pē kiate ia”(T&F 20:77). Ko e niʻihi ko ia ʻoku fekumi mo fakaʻaongaʻi e ponokalafí ke fakaʻaiʻai ʻaki e holi fakasekisualé, ʻoku nau maumauʻi moʻoni ʻa e fuakava ko iá. ʻOku nau toe maumauʻi foki ʻa e fuakava toputapu ke fakaʻehiʻehi mei he ngaahi tōʻonga taʻe māʻoniʻoni mo taʻe maʻá. He ʻikai lava ke nau maʻu e Laumālie ʻo e ʻEikí. ʻOku fie maʻu ke talangofua ʻa e kakai peheé ki he kole ʻa e ʻAposetolo ko Pitá: “Ke ke fakatomala ʻi hoʻo ngaahi angahalá ni, pea hū ki he ʻOtuá, heiʻilo ʻe fakamolemole kiate koe ʻa e mahalo ʻo ho lotó” (Ngāue 8:22). Ngaahi tokoua, mou fakatokangaʻi ʻoku ʻikai ke u lave atu au ki hono kovi ʻo e ponokalafi ki he ʻatamaí mo e tōʻonga faihiá. ʻOku ou fakamatala atu ʻene uesia ʻa e tuʻunga fakalaumālié— ʻa ʻetau malava ke maʻu e feohi ʻo e Laumālie ʻo e ʻEikí mo e ʻetau malava ko ia ke ngāueʻaki e mālohi ʻo e lakanga fakataulaʻeikí. ʻOku toe fai foki ʻe he ponokalafi ha maumau lahi ki heʻetau fetuʻutaki mahuʻinga tahá. Ne lau ʻe Palesiteni Hingikelí ʻi heʻene lea ki he houʻeiki tangata ʻo e lakanga fakataulaʻeikí ʻi ʻOkatopá, ha tohi ʻa ha fefine ne kole mai ki ai ke fakatokanga ki he kāingalotu ʻo e Siasí ko e ponokalafi “ʻokú ne maumauʻi ʻa e lotó mo e laumālié ʻo aʻu ki he taupotu tahá, mo ne fakaʻauha ʻa e ngaahi fetuʻutakí” (Liahona, Nōvema 2004, 59). ʻI ha konifelenisi fakasiteiki ki muí ni mai, ne mono mai ʻe ha fefine ha tohi tatau pē. Ne fua ʻe hono husepānití ʻi ha ngaahi taʻu lahi ha ngaahi fatongia fakasiasi mahuʻinga ka ne maʻu ia ʻe he ponokalafí. Ne fakamatala ai ki hono faingataʻa ke fakamātoatoʻi ʻe he kau taki lakanga fakataula- ʻeikí e palopalema ponokalafí ni: “Ne u maʻu ha ngaahi tali kehekehe ʻo hangē ʻoku ou ʻafaʻi pe ko haku foʻui pē ʻoʻokú. ʻOku sai ʻaupito ʻemau pīsope lolotongá. Ko e taʻu ʻeni ʻe 15 pea kuo feinga ʻeni hoku husepānití ke ikuʻi ʻene palopalemá, ka ʻoku faingataʻa ange ke tuku he ʻosi ko ʻeni e taʻu ʻe 15, pea ʻikai ha faʻa lau ia ki he mole kuo hokó.” ʻOku uesia ʻe he ponokalafí ʻa e malava ʻa ha taha ke fiefia ʻi ha feohi fakaeloto, feʻofaʻakí pea mo fakalaumālie lelei mo ha fefine. ʻOkú ne holoki e mālohi ʻokú ne taʻofi ʻa e tōʻonga taʻe taau, taʻe totonu, mo taʻe fakalaó. Pea ʻi hono fakaʻuliʻi ʻo e konisēnisí, ʻoku tuku ai kinautolu ʻoku fakaʻaongaʻi e ponokalafí ke nau faʻifaʻitaki ʻa e meʻa ʻoku nau mamata aí, tatau ai pē pe ko e hā hono kovi ki heʻenau moʻuí mo e kakai kehé. ʻOku toe maʻunimā foki ʻe he ponokalafí ʻa e taha ko iá. ʻOkú ne holoki e ivi fakakaukau leleí pea “haʻi” ʻa kinautolu ʻoku nau ngāueʻakí, ʻo fakatūkia lahi kiate kinautolu. Ne tohi mai ha tangata ne maʻu ʻe he ponokalafí mo e faitoʻo kona tapú, ʻo kau ki hono fakatātaá: “Ko ʻeku vakaí, ʻoku ʻikai mafakatataua ʻa e kōkeiní ia ki heni. Kuó u ʻosi ʻahiʻahiʻi fakatouʻosi. . . . Naʻa mo hono tuku ʻo e faitoʻo kona tapú, ʻoku ʻikai teitei tatau ia mo e [feinga ke tuku ʻa e ponokalafí]” (tohi ʻo e ‘aho 20 Māʻasi, 2005). ʻOku kumi tonuhia ha niʻihi ʻo pehē tokua ʻoku nau sio pē he ponokalafi ʻoku “ʻikai fuʻu koví” kae ʻikai ko e ponokalafi ʻoku “kovi ʻaupitó.” ʻOku ui ʻeni ʻe ha pīsope poto ko e taʻe fie lau ʻo e koví ko e kovi. Naʻá ne pehē ko e kakai ʻeni ʻoku kumi ʻuhinga ʻi he meʻa ʻoku nau mamata aí ʻaki ha ngaahi fakafehoanaki hangē ko e “ʻikai fuʻu kovi” pe “kiʻi konga pē taha ʻoku koví.” Ka ʻoku ʻikai fuatautau e koví ʻi hono tuʻungá, ka ʻi hono olá. Ko e taimi ʻoku fakaili ai ʻe he kakaí ʻa e fakakaukau koví ke ngāue ʻo aʻu ki ha tuʻunga ʻoku mahuʻi ai e Laumālié, ʻoku mole leva honau maluʻi fakalaumālié pea nau moʻulaloa ki he mālohi mo e fakahinohino ʻa e taha angakoví. ʻI heʻenau fakaʻaongaʻi ʻa e ʻinitanetí pe ngaahi ponokalafi kehé ki he meʻa ko ia ʻoku fakamatalaʻi ʻe he pīsopé ni ko e “fakaʻaiʻai hono fiemaʻú,” (tohi ʻo e 13 Māʻasi, 2005), ʻoku ʻuliʻi lahi ai kinautolu ʻe he angahalá. ʻOku fakamatalaʻi ʻe he malanga maʻongoʻonga ʻa e Tuʻi ko Penisimaní, ʻa hono ngaahi nunuʻa koví. ʻI he taimi ʻoku tau fakamavaheʻi ai kitautolu mei he Laumālie ʻo e ʻEikí, ʻoku tau hoko ai ko e fili ʻo e māʻoniʻoní, ʻoku mahino kiate kitautolu ʻa ʻetau halaiá, pea ʻoku tau “[mahuʻi ai] mei he ʻao ʻo e ʻEikí” (vakai, Mōsaia 2:36–38). Naʻá ne pehē, “ʻOku ʻikai maʻu ʻe he ʻaloʻofá hano mafai ki he tangata ko iá, ko ia, ko hono tautea fakaʻosí ke ne kātekina ʻa e fakamamahi taʻengatá” (v. 39). Fakakaukau angé ki he sīpinga fakamamahi ʻi he Tuʻi ko Tēvitá. Neongo ko ha tangata fakalaumālie ʻiloa ia ʻi ʻIsileli, ka naʻá ne tuku ke ne sio ki ha meʻa naʻe ʻikai tonu ke sio ki ai (vakai, 2 Samuela 11). ʻI hono fakataueleʻi ia ʻe he meʻa ne sio aí, naʻá ne maumauʻi ai ha e Fekau ʻe Hongofulú, ʻo kamata pē he “ʻOua naʻá ke tono fefiné” (ʻEkesōtosi 20:14). Ne tō ʻi he foungá ni ha tuʻi ko ha palōfita, mei hono hākeakiʻí (vakai, T&F 132:39). Ka ko e ongoongo fakafiefiá, he ʻoku ʻikai fie muimui ha taha ia ki he hala ʻoku fakatau hifo ki he mamahí. Ko e taha kotoa pē ʻoku maʻu ʻi he meʻa kovi ko iá, ʻokú ne maʻu ʻa e kī ke fulihi hono halá. ʻE lava pē ʻo hao. ʻE lava pē ʻo maʻa kapau ʻe fakatomala. Naʻe fakamatalaʻi ia ʻe ʻAlamā ko e Siʻí: “ʻIo, ne u manatuʻi ʻeku ngaahi angahalá mo ʻeku ngaahi hia kotoa pē, ʻa ia naʻe fakamamahi ai au ʻaki ʻa e ngaahi mamahi ʻo helí. . . . “. . . Naʻe tautea hoku lotó ʻi he fuʻu ilifia fakaʻulia ʻi he fakakaukau pē ki he hū ki he ʻao ʻo hoku ʻOtuá. . . . “Pea naʻe hoko ʻo pehē lolotonga hoku fakamamahiʻi peheʻi ʻi he mamahi ʻi he tautea hoku lotó ʻi he manatu ki heʻeku ngaahi fuʻu angahalá, ʻiloange ne u manatuʻi foki ʻeku fanongo ki ha kikite ʻa ʻeku tamaí ki he kakaí ʻa ia naʻe kau ki he hāʻele mai ʻa ha toko taha, ʻa ia ko Sīsū Kalaisi, ko ha ʻAlo ʻo e ʻOtuá, ke ne totongi ki he ngaahi angahala ʻa māmaní. “Ko ʻeni, ʻi he langaki mai ʻa e fakakaukaú ni ki hoku lotó, ne u tangi ʻi hoku lotó: ʻE Sīsū, ko e ʻAlo ʻo e ʻOtua, ʻaloʻofa mai kiate au, ʻa ia ʻoku ʻi he ʻahu ʻo e mamahí pea kuo takatakai ʻiate au ʻa e ngaahi haʻi taʻengata ʻo e maté. “Pea ko ʻeni vakai, ʻi heʻeku fakakaukau ki aí, naʻe ʻikai te u toe lava ke manatuʻi ʻa ʻeku ngaahi mamahí, ʻio, naʻe ʻikai ke toe tautea hoku lotó ʻi heʻeku manatu ki heʻeku ngaahi angahalá. “Pea hono ʻikai ke lahi ʻa e fiefia mo e fuʻu maama fakaofo ne u vakai ki aí; ʻio, naʻe fonu hoku lotó ʻi he fuʻu fiefia naʻe tatau hono lahí mo ʻeku mamahí! (ʻAlamā 36:13–14, 17–20). Ki hoku ngaahi tokoua ko ē ʻoku fihia pe uesia ʻe he fakatauele ko ʻení, ʻoku ʻi ai pē founga. ʻUluaki, fakahaaʻi ʻoku kovi. ʻOua te ke taukapoʻi pe feinga ke fakatonuhiaʻi koe. Kuo laka hake he taʻu e fitungofulu tupu mo e kole mai hotau kau takí ki he houʻeiki fefiné mo e fānaú ke nau fakaʻehiʻehi mei he kovi ko ʻení.2 ʻOku fonu ʻetau ngaahi makasini faka-Siasi lolotongá ʻi he ngaahi fakatokanga, ngaahi fakamatala, pea mo ha ngaahi tokoni ʻi he kaveingá ni—ʻoku laka hake ʻi ha ngaahi fakamatala ʻe uofulu tupu kuo ʻosi pulusi pe ne ʻosi pulusi ʻi he taʻú ni mo e taʻu kuo ʻosí ʻataʻatā pē.3 Uá, kumi tokoni mei he ʻEikí mo ʻEne kau tamaioʻeikí. Fakafanongo pea muimui ki he ngaahi lea ʻa Palesiteni Hingikelií: “Mou kole ki he ʻEikí ʻaki homou laumālié kotoa, ke ne toʻo atu meiate kimoutolu ʻa e mālohi ko ʻeni ʻokú ne fakapōpulaʻi kimoutolú. Pea ʻofa ke mou maʻu ha loto toʻa ke kumi ki he fakahinohino ʻofa ʻa hoʻomou pīsopé, pea ʻo ka fie maʻu, mo e faleʻi ʻa e kau mataotao ʻofa mo tokangá” (Liahona, Nōvema 2004, 59). Tolú, fai ho tūkuingatá ke fakaʻehiʻehi ʻaki mei he ponokalafí. Ka ai ha taimi te ke fakatokangaʻi ai ʻokú ke ʻi he lotolotonga ʻo e ponokalafí—he ʻe ala hoko pē foki ʻeni ki ha taha ʻi he maama ʻoku tau ʻi aí—muimui he sīpinga ʻa Siosefa ʻo ʻIsipité. Ko e taimi ne puke ai ia ʻe he fakatauelé, naʻá ne mavahe mei ai pea “hola ia ʻo hao ki tuʻa” (Sēnesi 39:12). ʻOua naʻá ke teitei fakavaivai ki ha momoʻi fakatauele ʻe taha. Fakaʻehiʻehi mei he faiangahalá pea mo hono ngaahi nunuʻa fakaʻauhá. Ko ia, tāmateʻi ia! Hanga kehe! Fakaʻehiʻehi mei ai ki he taupotu tahá. Tataki hoʻo fakakaukaú ki he ngaahi hala ʻoku leleí. Manatuʻi maʻu pē hoʻo ngaahi fuakavá peá ke faivelenga ʻo ʻalu maʻu pē ki he temipalé. Ne pehē ʻe he pīsope poto ne u lau mei ai ʻanenaí ko ha “taha lakanga fakataulaʻeiki ʻoku hinga ki he ponokalafí, ʻoku ʻikai teitei hoko ia lolotonga e taimi ʻoku toutou lotu ai he temipalé; ka ʻoku hoko ia he taimi ʻoku fakataʻetaʻetokanga ai ki heʻene lotu he temipalé” (tohi ʻo e 13 Māʻasi, 2005). Kuo pau ke tau ngāue ke maluʻi kinautolu ʻoku tau ʻofa aí. ʻOku fokotuʻu ʻe he mātuʻá ha ngaahi meʻa fakatokanga ke ʻiloʻi ʻa e taimi ʻe uesia ai honau ʻapí ʻe he ʻahú mo e kāponi mōnokisaití. ʻOku totonu foki ke tau fokotuʻu ha ngaahi meʻa maluʻi mei he ngaahi meʻa fakatuʻutāmaki fakalaumālié, hangē ko ha meʻa ke siviʻi ʻaki hono fakaʻaongaʻi e ʻinitanetí, mo fokotuʻu e komipiutá ʻi ha potu ʻe lava ke ʻiloʻi ai ʻe he toengá e meʻa ʻoku ʻasi aí. Pea ʻoku totonu foki ke tau langaki e ivi fakalaumālie ʻo hotau fāmilí ʻaki e feohi ʻofá, lotu fakafāmilí, pea mo e ako folofolá. Fakaʻosí, ʻoua naʻá ke fakavaivai ki he ponokalafí. ʻOua naʻá ke fakaʻaongaʻi ho mālohi fakataú ke ke poupouʻi ʻaki e tuʻunga māʻulalo fakae- angamaʻa ko ʻení. Pea ʻe kau finemui, kātaki ʻo ʻiloʻi kapau te ke vala taʻe feʻunga, te ke fakalahiʻi ʻa e palopalemá ni ʻaki hoʻo hoko ko e ʻata ʻo e ponokalafí ki ha niʻihi ʻo e kau tangata ʻoku mamata atú. Kātaki ʻo fanongo ki he ngaahi fakatokangá ni. Tau fakaleleiʻi muʻa ʻetau tōʻonga moʻui fakatāutahá pea toe liunga ua ʻetau feinga ke maluʻi hotau ngaahi ʻofaʻangá mo hotau ʻātakaí mei he hakeʻuta mai ʻa e ponokalafí, ʻa ia ʻoku tuʻu ke ne uesia ʻetau tuʻunga fakalaumālié, ʻa ʻetau nofo malí, pea mo ʻetau fānaú. ʻOku ou fakamoʻoni ko e meʻa ʻeni ʻoku tonu ke tau fai ke tau maʻu ai ʻa e ngaahi tāpuakí meiate Ia ʻoku ʻoku tau hū ki aí. ʻOku ou fakamoʻoni kia Sīsū Kalaisi, ko e Maama mo e Moʻui ʻo Māmaní, ʻa ia ko Hono Siasí ʻeni, ʻi he huafa ʻo Sīsū Kalaisí, ʻēmeni. Ngaahi maʻuʻanga fakamatalá 1. (Challenges of the Year Ahead, tohi tufa 1974), 4–5; toe paaki ʻi he “Things They’re Saying,” New Era, Fēpueli 1974, 18). 2. Vakai ki he sīpingá mei he Gordon B. Hinckley, “Ko ha Kovi Fakamamahi ʻi Hotau Lotolotongá,” Liahona, Nōvema 2004, 59–62; David E. Sorensen, “ʻHe ʻIkai Lava Ke ke Fakalatalataʻi Ha Ngata Huhu Kona,” Liahona, Siulai 2001, 48–50; Thomas S. Monson, “Ponokalafí—Ko e Vaka ʻo e Maté,” Liahona, Nōvema 2001, 2–6; David B. Haight, “Ko e Angamaʻa Fakataautahá,“ Tūhulu, ʻOkatopa 1984, 75–78. 3. Vakai ki he sīpingá mei he Rory C. Reid, “Ko e Hala Ke Foki Mai Aí: Siʻaki ʻa e Ponokalafí,” Liahona, Fēpueli 2005, 29-33; Arianne B. Cope, “Internet Café,” New Era, March 2005, 34–37; Nycole S. Larsen, “The Decision,” Friend, March 2004, 40–41.