Fakamālohia Ho Kāingá ʻEletā Robert J. Whetten ʻO e Kau Fitungofulú Kuo pau ke mou fai e meʻa kuo fakatou akoʻi mai ʻe he Fakamoʻuí mo ʻEne kau palōfitá . . . : ʻo ngāue, fakamālohia e tuí pea tokoniʻi ʻa kinautolu ʻoku nau fie maʻu hoʻomou ʻofá mo e tāpuakí. ʻI he tali ʻa Sīsū ki he fehuʻi ko ia, “ʻEiki, ko e fekau fē ʻi he fonó ʻoku lahí?” naʻá Ne pehē: “Ke ke ʻofa [ki he ʻEiki] ko ho ʻOtuá ʻaki ho laumālie kotoa, mo hoʻo moʻuí kotoa, mo ho lotó kotoa. Ko e ʻuluaki pea ko e lahi ia ʻo e fekaú. Pea ko hono uá ʻoku tatau mo iá, ke ke ʻofa ki ho kaungāʻapí ʻo hangē pē ko koé. Ko e fekaú ni ʻe ua ʻoku tautau ai ʻa e fonó kotoa mo e kau palōfitá.”1 Talu mei ʻIsileli ʻo e kuonga muʻá pea tukuʻau mai he ngaahi toʻu tangatá, mo hono akoʻi mai maʻu pē ʻe Heʻene kau palōfita he kuohilí mo e lolotongá, ʻa e foʻi moʻoni taʻengata ko ia kuo pau ke tau maʻu ha ʻofa ʻi hotau lotó: ki he ʻOtua ko ʻetau Tamai Taʻengatá pea mo hotau kāingá, ka tau lava ʻo maʻu ʻa e moʻui taʻengatá. ʻI he ngaahi houa fakaʻosi ʻo e ngāue fakafaifekau ʻa Sīsū he māmaní, naʻá Ne folofola kia Pita: “Ka kuó [u] hūfia koe ke ʻoua naʻa mate hoʻo tuí: pea ʻo ka ke ka toe liliu, ke ke tokoni [ki ho] kāingá.”2 Naʻe maʻu ʻe Pita ha fakamoʻoni mei he Laumālié ki hono faka-ʻOtua ʻo Sīsū Kalaisí. Naʻe ʻiloʻi ia ʻe Pita pea naʻe hoko mai ia ʻi he fakahā. Ka naʻe toe hā mahino ange ʻene uluí, ʻa e liliu kakato ʻo ʻene moʻuí mo hono natulá, ʻi he hili ko ia e ʻaho ʻo e Penitekosí, hili hono maʻu e meʻafoaki liliu lotó mo e fakamoʻoni ʻo e Laumālie Māʻoniʻoní. ʻIo ʻe ngaahi tokoua mo e tuofāfine, hangē ko Pita ʻi muʻá, ʻoku ʻi ai haʻatau fakamoʻoni, ka kuo hoko nai ʻa e uluí ko ha founga taʻetūkua ʻi hoʻo moʻuí? ʻIkai ko kitautolu fakatāutahá, ko ha ngāue ia ʻo e fakalakalaká ʻi he toʻu kupu ʻo hotau Tupuʻangá? ʻOku tāpuekina nai ʻe he ʻOtuá ha niʻihi kehe ʻo fakafou ʻiate kimoutolu? ʻOku mou lotu nai ʻo kole ke ʻiloʻi pe ko hai ʻoku finangalo e ʻEikí ke mou tokoniʻí, mo hiki hake e kavenga mafasia ʻa ha taha? ʻOku mou ʻofa nai ki he niʻihi kehé, ʻo hangē pē ko hoʻomou ʻofa kiate kimoutolú? ʻI he taimi naʻe fakahā ai ʻe Sīsū ki he loeá kuo pau ke ne ʻofa ki hono kaungāʻapí ʻo hangē pē ko iá ka ne lava ʻo maʻu e moʻui taʻengatá, naʻe pehē ange ʻe he loeá kia Sīsū: “Ko hai hoku kaungāʻapí?” Pea tali ʻa Sīsū kiate ia ʻaki ʻa e talanoa fakatātā ʻo e Samēlia leleí, peá Ne toki fehuʻi ange leva: “ʻOkú ke mahalo, ko hai ʻi he toko tolú ni naʻe kaungāʻapi kiate ia naʻe moʻua ki [he] kau kaihaʻá? Pea pehe ʻe ia, ko ia ia ne ne fai ʻofa kiate iá.”3 ʻI he talanoa fakatātā ko ʻení, ne akoʻi fakatāutaha ai kitautolu ʻe Sīsū ʻoku totonu ke tau fakahaaʻi maʻu pē ha ʻofa mo ha manavaʻofa ki he taha kotoa pē ʻo e fānau ʻa ʻEne Tamaí. Naʻe akoʻi ʻe he Tuʻi ko Penisimaní ki he Kāingalotu ʻi hono kuongá: “Koeʻuhí ke tauhi ha fakamolemole ʻo hoʻomou ngaahi angahalá mei he ʻaho ki he ʻaho . . . ʻoku ou fakaʻamu ke mou foaki mei hoʻomou ʻū meʻá ki he masivá, . . . hangē ko e fafanga ʻo e fiekaiá, . . . ʻaʻahi ki he mahakiʻiá, pea kau ʻi he tokoni kiate kinautolu ʻi he meʻa fakalaumālié mo fakatuʻasinó fakatouʻosi.”4 ʻOku mou fai nai ha tokoni fakalaumālie mo fakatuʻasino kiate kinautolu ʻoku fie maʻu iá? ʻOku mou tokoni nai ke fakamālohia e tui ʻa kinautolu ʻoku haʻu ki he tākangá, ʻo hangē ko e kole ʻa hotau kau palōfita ʻi hotau ʻahó ni? ʻOku ʻuhinga e fakauluí ki hono fakatapui hoʻo moʻuí ke tokanga, tokoniʻi e niʻihi ʻoku fie maʻu tokoní pea mo vahevahe atu hoʻo ngaahi meʻafoakí mo e ngaahi tāpuakí. Naʻe ʻikai folofola ʻa e ʻEikí ia ke toki “Fafanga pē ʻeku fanga sipí” ʻo ka faingamālie, pe “Tokangaʻi pē ʻeku fanga sipí ʻo kapau ʻoku ʻikai ke ke femoʻuekina.” Naʻá Ne pehē, “Fafanga ʻeku fanga sipí mo ʻeku fanga lamí; tokoniʻi kinautolu ke nau moʻui he māmaní, pea ʻai ke nau ofi kiate koe. Tataki kinautolu ki he feituʻu ʻoku malú—ki he maluʻanga ʻo e ngaahi fili angatonu te ne teuteuʻi kinautolu ki he moʻui taʻengatá.”5 ʻOku hanga ʻe he tōʻonga angaʻofa taʻesiokita mo e tokoni kotoa pē ʻo fakatupulaki ʻa homou tuʻunga fakalaumālié. ʻ E fakaʻaongaʻi kimoutolu ʻe he ʻOtuá ke tāpuekina ai e niʻihi kehé. ʻOku meimei ke nofo taha e tupulaki hokohoko ʻo hoʻomou moʻui fakalaumālié mo hoʻomou fakalakalaka taʻengatá, ʻi homou vā mo e niʻihi kehé, ʻa homou ʻulungāanga ko ia kiate kinautolú. ʻOku mou ʻofa nai ki he niʻihi kehé pea hoko ko ha tāpuaki kiate kinautolu? ʻIkai ko homou ʻulungāanga ki he niʻihi kehé ko e meʻafua totonu ia ʻo hoʻomou uluí? Ko e tokotaha ko ia ʻokú ne fai pē he Siasí ʻa e ngaahi meʻa ko ia ʻoku kaungatonu kiate iá, he ʻikai ʻaupito ke ne teitei aʻusia ʻe ia ʻa e taumuʻa ʻo e haohaoá. ʻOku hoko e tokoni ki he niʻihi kehé ko e taumuʻa ia ʻo e ongoongoleleí mo e moʻui hakeakiʻí. ʻI hoʻomou fononga he moʻuí, kuo pau ke mou ala atu ʻo tokoni mo faitāpuekina e moʻui ʻa homou kaungā fonongá, ke foaki ʻetau moʻuí maʻanautolu ʻoku fie maʻu hoʻomou tokoní. He kuo folofola ʻa e ʻEikí ʻo pehē, “He ko ia ia ʻoku loto ke kalofaki ʻene moʻuí, ʻe mole ia; ka ko ia ia ʻe mole ʻene moʻuí koeʻuhí ko au mo e ongoongoleleí, ʻe maʻu ʻe ia ia.”6 Naʻe fakataumuʻa ʻe Sēmisi ʻene tohí ki he “faʻahinga ʻe hongofulu mā ua kuo fakahē mamaʻó.”7 ʻE lava ke tau fakaʻaongaʻi ʻene ngaahi akonakí kiate kitautolu, ko e kakai ʻa e ʻEiki he ʻaho ki mui ní, ʻa ia te tau tali ʻa e ongoongolelei kuo toe fakafoki maí. ʻOkú ne akoʻi mai ha ngaahi tefitoʻi moʻoni ke ne tataki homou vā mo e toenga ʻo e kāingalotu ʻo e Siasí. ʻOkú ne ui ko e “fono fakaʻeiʻeiki” ʻa e fekau ko ia ke “ʻofa ki ho kaungāʻapí ʻo hangē pē ko koé.”8 Naʻe ʻikai feʻunga kia Sēmisi ʻa e fakamoʻoní ʻataʻatā pē. Kuo pau ke hoko moʻoni ʻa e ongoongoleleí ko ha konga moʻoni ʻo hoʻomou moʻuí. “Pea te u fakahā kiate koe ʻa ʻeku tuí ʻaki ʻeku ngaahi ngāué”9 “Ka ke fai ʻe kimoutolu ki he folofolá, pea ʻoua naʻa ngata ʻi he fanongó [pē].”10 Ko e fakaʻuhinga ʻeni ʻa Sēmisi ki he ului moʻoní: “Ko e lotu māʻoniʻoni mo taʻe hano mele ʻi he ʻao ʻo e ʻOtua ko e Tamaí, ko ʻeni ia, ke ʻaʻahi ki he ngaahi tamai maté mo e kau fefine kuo mate honau ʻunohó ʻi heʻenau mamahí, peá ke fakaʻehiʻehi ia mei māmani ke taʻe hano mele.”11 Naʻá ne fakaʻosi ʻene tohi nounoú ʻaki e ngaahi leá ni: “ʻE kāinga, kapau ʻe hē hamou toko taha mei he moʻoní pea fakafoki mai ia ʻe ha taha; ke ʻilo ʻe ia, ko ia ʻokú ne fakafoki mai ʻa e angahalá mei hono hala heé, ʻokú ne fakamoʻui ha laumālie . . . pea ʻokú ne ʻufiʻufi foki ʻa e ngaahi angahala lahi.”12 ʻI he taimi ʻoku mou fakafoki mai ai hamou tokoua ne hē atú, ʻoku mou fakamoʻui ai ia pea mo kimoutolu foki. ʻOku fufū pe fakangata ai hoʻomou angahalá koeʻuhí ko hoʻomou ngāue ke fakamoʻui ʻa e niʻihi kehé. Kuo hoko ko ha tāpuaki lahi kiate au ʻeku nofo ʻi ʻAmelika Latina peá u mamata tonu ki hono fakahoko ʻo e ngaahi kikite mo e ngaahi talaʻofa ne fai ʻe he ʻEikí mo ʻEne palōfitá. “Te u tānaki fakataha ʻa hoku kakaí mei heʻenau nofo movetevete fuoloá, ʻe fale ʻo ʻIsileli, pea toe fokotuʻu ʻa ʻeku Saioné ʻi honau lotolotongá. . . . “. . . Te u fokotuʻu hoku siasí ʻiate kinautolu, pe te nau kau ki he fuakavá, pea ʻe lau ʻa kinautolu fakataha mo e faʻahingá ni, ʻa ia ko e toenga ʻo Sēkopé, ʻa ia kuó u foaki ki ai ʻa e fonuá ni ko honau tofiʻa.”13 Kuo laui afe ha kakai kuo nau fakataha mai mei he puleʻanga kotoa pē ki ʻAmelika Latina. ʻOku fakapapauʻi mai ʻe he ngaahi kikité ʻe hoko hoko atu hono fakahoko e kikiate ko ʻení. Ko e tupu tokolahí ko e taha ia ʻo ʻetau faingataʻa lahi tahá, ka ko e faingamālie lelei tahá foki ia kiate kitautolu. Naʻe pehē ʻe he ʻAposetolo ko Paulá ki he kāingalotu foʻou ʻi hono kuongá, “Ko ʻeni, ʻoku ʻikai ai ko e kau muli mo e kau ʻaunofo ʻa kimoutolu, ka ko e kaungā kolo mo e kāinga māʻoniʻoni, pea mo e fale ʻo e ʻOtuá.”14 Hangē ko e feituʻu ko ia ʻoku vave ai e tupu tokolahi ʻa e Siasí, ʻoku kei ongoʻi ai ʻe ha toko lahi ia ko ha kau muli pe ʻaunofo pē ʻa kinautolu pea kuo nau liʻekina. Kapau ʻoku tau fie mamata ki hono fakahoko ʻo e ngaahi talaʻofá, kuo pau ke tau fai e meʻa ne fakamatalaʻi mai ʻe Molonaí: “Pea kuo hili ʻa e tali ʻa kinautolu ki he papitaisó . . . naʻe lau ʻa kinautolu fakataha mo e kakai ʻo e siasi ʻo Kalaisí; pea naʻe tohi honau ngaahi hingoá, koeʻuhí ke manatuʻi mo fafanga [kinautolu] . . . ke taki ʻa kinautolu ʻi he hala totonú.”15 ʻOku toko lahi ha kāingalotu mālohi ʻoku nau tui ʻoku kehe ʻa e ʻulungāanga ʻo e kāingalotu māmālohi mo e kau ului foʻou ʻoku hē mei he Siasí, koeʻuhí ko e ʻikai ke nau tui ki he tokāteline ʻo e Siasí. ʻOku ʻikai poupouʻi e fakamahamahalo ko ʻení ʻe he ngaahi fakatotolo kuo faí. ʻOku hā mei he ako ne faí, meimei ko e kāingalotu māmālohi kotoa pē ne ʻinitaviú, ne nau tui ʻoku ʻi ai ha ʻOtua pea ko e Kalaisí ʻa Sīsū pea ko Siosefa Sāmitá ko ha palōfita pea ʻoku moʻoni ʻa e Siasí. ʻOku lahi ha ngaahi uooti mo ha ngaahi kolo ʻoku ʻi ai ha kakai tangata mo fafine lelei mo angatonu, ka ʻoku ʻikai ke nau ʻiloʻi e founga ke toe foki mai ai ki he Siasí. ʻOku kau ai ha ngaahi faʻē mo ha ngaahi tamai lelei. Ne nau toki mavahe atu pē ka kuo ʻikai ha taha ʻe ʻaʻahi ange ʻo vakai kinautolu, pea nau maʻu ai e fakakaukau ʻoku ʻikai tokanga moʻoni ange ha taha kiate kinautolu. ʻI he taimi ʻoku ʻaʻahi ai ʻa e kakai tangata pe fafine ʻo e tuí ki he niʻihi fakafoʻituitui ko ʻení pea hoko ko honau kaungāmeʻa mo fakamālohia, lotu fakataha mo akoʻi kiate kinautolu ʻa e ongoongoleleí, ʻe foki mai leva ʻa e niʻihi ko ʻení mo honau ngaahi fāmilí. “Ko e meʻa ʻi hoʻomou fai ia ki ha taha ʻoku kihiʻi siʻi hifo ʻi hoku kāingá ni, ko hoʻomou fai ia kiate aú.”16 Ko hai ʻa kinautolú ni “siʻi hifo ʻi hoku kāingá”? ʻOku ʻuhinga nai e ʻEikí ki he tokotaha foʻou ne toki kau fakamuimuitaha mai ki he tākangá? pe ko kinautolu ko ia kuo tō atu ki he fakapoʻuli ʻo e māmālohí, pea te nau toe foki mai ʻo ka ala ange ha nima fie fakafeohi moʻoni ʻo taki mai kinautolu? ʻI he feingatau ko ʻeni ki he ngaahi laumālie ʻo e tangatá, ʻoku toe fakamahinoʻi lelei mai ai kiate kitautolu ʻa e ngaahi tuʻutuʻuni fakangāue ko ʻení. Kuo pau ke ʻalu fakataha ʻa e kāingalotú mo e kau faifekau taimi kakató ʻi heʻenau akoʻi ʻa e ngaahi lēsoní pea nau ʻi ai hanau fatongia mahuʻinga ʻi hono fakaului mai ʻo e niʻihi kehé. Kuo pau ke hanga ʻe he kau faifekaú ʻo “malangaʻaki ʻeku ongoongoleleí ʻi he laumālié”17 ʻo fakaʻaongaʻi e fakalea honau lotó, ʻa e ngaahi lea ʻo e moʻoní ʻoku nau tukulotoʻi ʻi heʻenau akó mo e lotú. ʻOku ʻikai ngata pē ʻa e fatongia ʻo ʻetau kau faifekaú ki he fakaului ʻo e niʻihi kehé, he taimi ʻoku fai ai ʻa e papitaisó. ʻOku nau hoko atu ʻo akoʻi ʻa e kāingalotu foʻoú mo e niʻihi kehe ʻoku nau fie maʻu ha meʻatokoni fakalaumālié. ʻOku hanga ʻe he ngaahi tohi ne toki ʻomi mei he Kau Palesitenisī ʻUluakí ʻo fakamanatu mai ki he kau taki lakanga fakataulaʻeikí ʻa honau fatongia ʻi hono fakamālohia mo poupouʻi ʻo e kāingalotu foʻoú. “ʻOku totonu ke fakahoko ʻa e fakafeohí ʻe he tokotaha kotoa pē ʻi he uōtí. . . . ʻE lava ke fakahoko ʻe he kau faiako fakaʻapí mo e kau faiako ʻaʻahí ha fatongia mahuʻinga.” ʻOku totonu ke ʻoange ki he kāingalotu foʻoú ha “ngaahi faingamālie ke nau ngāue mo tokoni ai ki he mālohi ʻa e uōtí.”18 Siʻi ngaahi tokoua mo e tuofāfine, kapau te tau hokohoko atu hono fakahoko ʻo e fakauluí mo e liliú, ʻo tatau pē ki he kāingalotu foʻoú mo kinautolu kuo fuoloa he Siasí, kuo pau ke tau ngāue pea fai ha tokoni fakalaumālie ki he niʻihi kehé, pea kuo pau ke tau tokoniʻi ʻa e niʻihi kehé ke nau aʻusia kakato ʻa e ngaahi tāpuaki ʻo e ongoongolelei kuo Toe Fakafoki Maí, ʻo kau ai e ngaahi tāpuaki ʻo e temipalé. Naʻe fai ʻe he Palōfita ko Siosefa Sāmitá ha tohi ki he Kāingalotu ʻi hono taimí ʻo pehē: “Siʻi Ngaahi Tokoua—Ko ha fatongia ia ʻoku totonu ke fai tauʻatāina ʻe he mēmipa kotoa pē ki hano kāinga—ke ʻofa mo poupou maʻu pē kiate kinautolu. Koeʻuhí ke tau taʻehalaia he ʻao ʻo e ʻOtuá, kuo pau ke tau feʻofaʻaki . . . ʻe lava ke tau ʻofa ki hotau kaungāʻapí ʻo hangē pē ko kitautolú pea ke tau tui mālohi lolotonga e faingataʻá.”19 Kuo pehē ʻe hotau palōfita ko Palesiteni Kōtoni B. Hingikelií: “ʻOku ou fakatauange peá u lotua, te tau taki taha fakapapau . . . ke fekumi kiate kinautolu ʻoku fie maʻu tokoní . . . pea ʻomi ʻa kinautolu ʻi he laumālie ʻo e ʻofa, ki he Siasí, ʻa ia ʻoku ʻi ai ha ngaahi nima mālohi mo ha ngaahi loto ʻofa ke fakamāfanaʻi, fakafiemālieʻi, tokoniʻi mo poupouʻi kinautolu pea mo tataki ʻa kinautolu ʻi he hala ki he fiefiá mo e moʻui lavameʻá.”20 ʻOku ʻikai ha meʻa ko e ʻofa lau pē, he ko e fekau ʻuluaki ia mo lahí, ʻa ia ko ha fekau ʻoku fie maʻu ki ai e ngāué—“Kapau ʻoku mou ʻofa kiate au, fai ʻeku ngaahi fekaú”21 pea “[Kapau ʻoku mou ʻofa kiate au] . . . fafanga ʻeku fanga sipí.”22 Kuo pau ke mou fai e meʻa kuo fakatou akoʻi mai ʻe he Fakamoʻuí mo ʻEne kau palōfita he kuohilí mo e lolotonga ní; ʻo ngāue, fakamālohia e tuí pea tokoniʻi ʻa kinautolu ʻoku nau fie maʻu hoʻomou ʻofá mo e tāpuakí. ʻOku mou maʻu e talaʻofa ʻa e ʻEikí: “Pea ʻilonga ia ʻe tali ʻa kimoutolú, te u ʻi ai foki mo au, he te u muʻomuʻa ʻi homou ʻaó . . . pea ʻe ʻi homou lotó ʻa hoku Laumālié.”23 Siʻi ngaahi tokoua mo e tuofāfine, ʻi hoʻomou ala atu ke tokoniʻi ha tahá, ʻe tāpuekina kimoutolu ʻaki Hono Laumālié. ʻOku akoʻi mai ʻe he ʻEikí ʻe fakatou “femahinoʻaki . . . pea [ʻe] fakamāmaʻi fakatouʻosi pea [ʻe] fiefia fakataha.”24 Ko ʻeku lotú ia ke tāpuekina fakatāutaha kitautolu ʻe he Tamai Hēvaní ʻaki ʻa e ʻofa ki he niʻihi kehé, “ʻa ia kuó ne foaki kiate kinautolu kotoa pē ʻoku muimui moʻoni ʻi hono ʻAló.”25 ʻOku ou fakamoʻoni ʻoku moʻui ʻa Hono ʻAlo ko Sīsū Kalaisí, pea ko ʻEne ongoongoleleí, ko e ongoongolelei ia ʻo e ʻofa. ʻI he huafa ʻo Sīsū Kalaisí, ʻēmeni. Ngaahi Maʻuʻanga Fakamatalá 1.Mātiu 22:36–40. 2.Luke 22:32. 3.Luke 10:29, 36–37. 4.Mōsaia 4:26; toe fakamamafaʻi. 5. Vakai, Sione 21:15–16. 6.Maʻake 8:35. 7.Sēmisi 1:1. 8.Sēmisi 2:8. 9.Sēmisi 2:18. 10.Sēmisi 1:22. 11.Sēmisi 1:27. 12.Sēmisi 5:19–20. 13.3 Nīfai 21:1, 22. 14.ʻEfesō 2:19. 15.Molonai 6:4. 16.Mātiu 25:40. 17.T&F 50:14. 18.Tohi mei he Kau Palesitenisī ʻUluakí, ʻaho 22 Tīsema 2004 mo e 11 Fēpueli, 2005. 19.History of the Church, 2:229. 20.“Reach with a Rescuing Hand” Ensign, Nov. 1996, 86. 21.Sione 14:15. 22.Sione 21:17. 23.T&F 84:88. 24.T&F 50:22. 25.Molonai 7:48.