Fakahoko ʻe Robert W. Cantwell
Talēkita Pule, Potungāue ʻAotita ʻa e Siasí
Ki he Kau Palesitenisī ʻUluaki ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní
Siʻi Ngaahi Tokoua: ʻOku ʻikai fakafalala e Potungāue ʻAotita ʻa e Siasí ki he ngaahi potungāue mo e ngaahi ngāue kehe ʻa e Siasí pea ʻoku fakaʻatā kiate kimautolu ʻa e ngaahi lekooti mo e ngaahi polokalama kotoa pē ʻoku fie maʻu ke vakaiʻi ʻaki ʻa e totonu ʻo hono puleʻi ʻo e paʻanga ʻoku hū mai ki he Siasí pea pehē ki hono maluʻi ʻo e koloa ʻa e Siasí. ʻOku kau ki he kau ngāue fakaʻaotita ʻa e Siasí ha kau tauhi tohi kuo fakamoʻoniʻi ʻenau feʻunga ke fai ʻa e ngāue fakatauhitohí, kau ʻaotita fakalotoʻi Potungāue kuo ʻosi fakamoʻoniʻi, kau ʻaotita ki he fakamatala fakakomipiutá pea mo ha kau mataotao fakapalofesinale kehe kuo fakamoʻoniʻi.
Hangē ko ia ʻoku fakamatalaʻi ʻi he fakahā he vahe 120 ʻo e Tokāteline mo e Ngaahi Fuakavá, ko e Fakataha Alēlea ki Hono Fakaʻaongaʻi ʻo e Vahehongofulú, ʻoku nau fakamafaiʻi ʻa e fakamole kotoa pē ki he paʻanga ʻa e Siasí. ʻOku kau ki he fakataha alēlea ko ʻení ʻa e Kau Palesitenisī ʻUluakí, Kōlomu ʻo e Kau ʻAposetolo ʻe Toko Hongofulu Mā Uá pea mo e Kau Pīsopeliki Pulé. Hili hano fakamafaiʻi ke fakaʻaongaʻi e paʻanga ʻa e Siasí, ʻoku fakaʻaongaʻi leva ʻe he ngaahi potungāue ʻa e Siasí ha ngaahi patiseti kuo fakangofua pea nau fakaʻaongaʻi e paʻangá ʻo fakatatau mo e ngaahi tuʻutuʻuni pea mo e ngaahi founga ngāue ʻa e Siasí
Fakatatau mo e ngaahi ʻaotita kuo fakahokó, ʻoku malava ai ʻa e Potungāue ʻAotita ʻa e Siasí ke nau pehē ko e ngaahi nāunau kotoa pē, ngaahi tokoni kotoa pē kuo maʻu, ngaahi fakamole kuo fakahoko pea mo e koloa ʻa e Siasí ki he taʻu 2004, naʻe fakaʻaongaʻi pea lekooti ia ʻo fakatatau mo e ngaahi founga fakatauhi-tohi totonú, patiseti kuo fakangofuá pea pehē ki he ngaahi tuʻutuʻuni mo e ngaahi founga ngāue ʻa e Siasí.
ʻI he fakaʻapaʻapa moʻoni atu,
Potungāue ʻAotita ʻa e Siasí
Robert W. Cantwell
Talēkita Pulé
Previous
