Palesiteni Gordon B. Hinckley
ʻOku moʻui ʻa e ʻOtua ko ʻetau Tamai Taʻengatá. . . . Ko e Kalaisí ʻa Sīsū, ko e Huhuʻi ʻo e faʻahinga ʻo e tangatá. Kuó Na fakafoki mai ʻa ʻEna ngāué ʻi he kuonga fakakosipeli fakaʻosí ni, ʻo na meʻangāueʻaki ʻa e Palōfita ko Siosefá.
Siʻoku ngaahi tokoua mo e tuofāfine, kuo tau fakahoko ha konifelenisi fakaʻofoʻofa moʻoni. Ne tau fakahoko ai ha kātoanga kai fakalaumālie mei he tēpile ʻa e ʻEikí. Kuo fakaʻofoʻofa ʻa e hivá, ngaahi lotú pea mo e ngaahi leá. Kuo fakakoloa mo fakamaama kitautolu pea mo fakamālohia ʻetau tuí.
Kuo hā mahino e tupu ʻa e Siasí mei hono liliu ko ia ʻa ʻetau ngaahi leá ki ha ngaahi lea fakafonua ʻe 80 pea kuo fakamafola ʻetau pōpoakí ʻi he satelaité ki he kāingalotú ʻi he funga ʻo e māmaní pea mo ha ngaahi fonua lahi ʻaupito. Ko e fua fakaofo ia ʻo e ngaahi lea ʻa Molonai ki he palōfita kei talavoú he pō 21 ʻo Sepitema, 1823.
Naʻá ne kei talavou he taimi ko iá, ko ha tamasiʻi faama naʻe ʻikai ha ako fakaʻatamai feʻunga. Naʻe ʻikai haʻane meʻa ʻe maʻu. Naʻe masiva ʻene mātuʻá. Naʻá ne nofo ʻi ha kolo ki ʻuta naʻe ʻikai ʻiloa. Ka naʻe pehē ʻe he ʻāngeló kiate ia ko ha “talafekau ia kuo fekau mei he ʻao ʻo e ʻOtuá. . . ; pea ʻoku ʻi ai ha ngāue ʻoku finangalo ʻa e ʻOtuá ke fai [ʻe Siosefa]; pea ʻe ongoongoa ʻa [hono] hingoá ʻi he lelei mo e kovi ʻi he ngaahi puleʻanga, mo e ngaahi faʻahinga mo e ngaahi lea kotoa pē, kaekehe ʻe fakatou lauʻikoviʻi mo fakaongoongoleleiʻi ia ʻi he kakai fulipē” (Siosefa Sāmita 2:33).
Naʻe founga fēfē ʻene hoko ʻa e meʻá ni? Mahalo naʻe fifili ʻa Siosefa. Pau pē naʻá ne ongoʻi moʻutāfuʻua.
Ka naʻe hoko kotoa ia. Pea ʻoku ʻi ai ha ngaahi meʻa maʻongoʻonga ange ʻoku teʻeki ai ke hoko.
ʻI he ʻaho 23 ʻo Tīsema ʻo e taʻu ní 2005, ʻoku tau ʻamanaki fakalāngilangiʻi ai hono ʻaho fāʻeleʻí ʻaki ʻetau fai ha kātoanga lahi ko e fakaʻapaʻapa kiate ia.
ʻOku ou taumuʻa ke ʻalu ki he feituʻu ne fāʻeleʻi aí, ʻo ka lava, ke toe fakahoko ʻa e ʻaʻahi tatau naʻe fai ki ai he ʻaho 23 ʻo Tīsema 1905, ʻe he palesiteni hono ono ʻo e Siasí, ʻa ia Siosefa F. Sāmita. Naʻá ne fakatapui ai ha maka fakamanatu ke fakaʻilongaʻi ʻaki e feituʻu ne fāʻeleʻi ai ʻa e Palōfitá pea naʻe toe langa foki mo ha fale fakamanatu ai.
ʻI he taimi te u ʻi Veamoni aí, ʻe ʻi heni pē ʻi he Senitā Konifelenisi ko ʻení ʻa Palesiteni Monisoni mo Palesiteni Fausi mo ha niʻihi ʻo e Kau Taki Māʻolungá. ʻE fonu ʻa e fuʻu falé ni pea ʻe fakamafola ʻa e polokalamá ʻi he satelaité ki ha ngaahi feituʻu lahi. ʻE fai ai ha ngaahi hiva pea fai mo ha ngaahi lea fakaʻapaʻapa ʻi he Fakatonga ʻo Loiolotoní pea mo Sōleki Siti, ki he palōfita maʻongoʻonga ʻo e kuonga fakakōsipelí ni.
Ko e hiva fakaʻofoʻofa ko ia ne fai ʻe he kuaeá he pongipongí ni ke fakaʻapaʻapa ki he Palōfitá, ko haʻanau teuteu atu pē ia ki he kātoanga ʻe fakahoko ʻi Tīsemá. ʻOku tau ʻamanaki lelei atu ki ai pea ʻoku mau fakatauange te tau kau fakataha mai ki ai.
ʻOku ʻoatu kiate kimoutolu ʻemau fakamoʻoni ki hono faka-ʻOtua ʻo e ngāué ni. Ko ha ngāue fakaofo ʻeni. Ne mei hoko pē ʻetau moʻuí ko ha meʻanoa ka ne taʻeʻoua ia. ʻOku moʻui ʻa e ʻOtua ko ʻetau Tamai Taʻengatá. ʻOkú Ne ʻofeina kitautolu. ʻOkú Ne tokaimaʻananga mai. Ko e Kalaisí ʻa Sīsū, ko e Huhuʻi ʻo e faʻahinga ʻo e tangatá. Kuó Na fakafoki mai ʻa ʻEna ngāué ʻi he kuonga fakakosipeli fakaʻosí ni, ʻo Na meʻangāueʻaki ʻa e Palōfita ko Siosefá. Ko ʻeku fakamoʻoni toputapú ia ʻoku ʻoatu fakataha mo ʻeku ʻofá mo ʻeku tāpuakí kiate kimoutolu siʻoku ngaahi tokoua mo e tuofāfine ʻofeina ʻi he Siasi houngaʻiá ni. ʻOfa ke tāpuakiʻi ʻe he ʻOtuá ʻa e toko taha kotoa pē.
ʻI hono fakaʻosí, ʻoku ou fie fakamālō kiate kinautolu kotoa pē kuo nau fai ha ngāue lahi moʻoni ke lava ʻo fakahoko atu ai e konifelenisí ni, ʻa kinautolu ʻoku ʻikai hā ki tuʻa pe ʻiloa ʻenau ngāué. ʻOku nau ngāue he ʻaho mo e pō ke tau maʻu ai ʻa e ola maʻongoʻongá ni—ʻa e kau fakanofonofó, ʻa e kau ngāue fakatekinikalé, ʻa e kau ngāue leʻó, ʻa e kakai tokoni fakafaitoʻó, ʻa e kau polisi halá, mo e kau liliu leá, ʻa e kau sekelitali ʻoku ngāue ki heʻemau ngaahi leá mo toutou taipeʻi maʻu pē iá.
ʻOfa ke faitāpuekina kitautolu ʻe he ʻOtuá. ʻOfa ke tau faifeinga ke ʻaʻeva ʻi he angatonu ʻi Hono ʻaó. ʻOku ou kolea he loto fakatōkilalo, pea ʻoatu mo ha tāpuaki tuku kiate kimoutolu, ʻi he huafa toputapu mo māʻoniʻoni ʻo hotau Fakamoʻuí, ʻa ia ko e ʻEiki ko Sīsū Kalaisí, ʻēmeni.
Previous
