Vakai Atu ki he Taʻengatá! Elaine S. Dalton Tokoni Ua ʻi he Kau Palesitenisī Lahi ʻo e Kau Finemuí ʻOku mahino nai kiate koe ʻa e ʻuhinga ʻoku mahuʻinga ai ke te maʻa mo haohaoá? ʻI hono fāʻeleʻi mai homa fuofua mokopuna tangatá, naʻe fakatovave atu e fāmilí kotoa ki falemahaki. Ko ha meʻa fakaofo ia ʻeku vakai atu ki homa foha lahi tahá ko Mātiu, ʻi heʻene fuofua mai ʻa e kiʻi pēpē tangata foʻou mo pelepelengesi ko ʻení. ʻI heʻemau tuʻu he matapā sioʻata ʻo e loki ʻo e fānau valevalé mo homa foha siʻi taha ko Setí, ne mau sio hifo ki he fofonga ʻo e kiʻi laumālie foʻou ko ʻení—ʻa ʻene maʻa mo haohaoa mo toki mavahe mai mei langí. Hangē naʻe fakafokifā pē kuo tuʻu maʻu e taimí, pea mau sio atu ki he palani lahi mo taʻengatá. Naʻe toe mahino ange e toputapu ʻo e moʻuí, ko ia ne u fanafana ange kia Seti, “‘Oku mahino nai kiate koe ʻa e ʻuhinga ʻoku mahuʻinga ai ke te maʻa mo haohaoá?” Naʻá ne tali vaivai mai, “‘Io, Fineʻeiki, ʻoku mahino.” Naʻe mālohi fau e momeniti ko iá, peá u fakaʻamu ai ʻe ongoʻi mo ʻiloʻi ʻe he talavou mo e finemui, tāutaha mo e taha kotoa pē ʻo kitautolu ʻa e mahuʻinga ke tau moʻui taau mo haohaoá. Ko ʻetau moʻui taau mo haohaoa fakafoʻituituí, te ne fakafeʻungaʻi kitautolu ke tau fakahoko hotau ngaahi misiona fakafoʻituituí he māmaní. Naʻe fuoloa pē kamata ia hotau misiona fakatāutahá ki muʻa pea tau toki omi ki he māmaní. ʻI he maama fakalaumālié, naʻe “uiuiʻi mo teuteuʻi” ai kitautolu ke tau moʻui ʻi ha māmani mo ha kuonga ʻoku hulutuʻa ai e ngaahi ʻahiʻahí mo e faingataʻá. Naʻe “tuʻunga [ʻeni] ʻi [heʻetau] fuʻu tui lahí mo e ngaahi ngāue lelei” pea mo ʻetau “fili ʻa e leleí.”1 Naʻe mahino kiate kitautolu e palani ʻa ʻetau Tamaí pea ne tau ʻiloʻi naʻe lelei ia. Naʻe ʻikai ngata pē heʻetau fili iá, ka naʻa tau taukaveʻi foki ia. Naʻa tau ʻiloʻi ʻe fonu fakatauvele, faingataʻa, mo ʻahiʻahi ʻa hotau misiona ʻi he māmaní, ka naʻa tau ʻiloʻi foki ʻe faitāpuekina kitautolu ʻe he kakato ʻo e ongoongoleleí, kau palōfita moʻuí pea mo e tataki ʻa e Laumālie Māʻoniʻoní. Naʻe mahino mo tau ʻiloʻi ʻe makatuʻunga ʻetau lavameʻa ʻi he māmaní ʻi heʻetau moʻui taau mo haohaoá. ʻOku ʻuhinga nai ki he hā ke moʻui tāú? ʻI he Tohi ʻa Molomoná, naʻe fehuʻi ai ʻe he tamai ʻa Lamonaí ʻo pehē, “Ko e hā te u fai ke u maʻu ai ʻa e moʻui taʻengata ko ia, ʻa ia kuó ke lea ki aí?”2 Naʻe fai leva ʻe he tuʻí ha tukupā ki he ʻEikí ʻo ne pehē, “Te u liʻaki ʻeku ngaahi angahala kotoa pē koeʻuhí ke u ʻiloʻi koe.”3 Ko ʻene mahino pē ki he tamai ʻa Lamonaí ko hai moʻoni iá, pea pehē ki he palani maʻongoʻonga ʻokú ne kau ki aí, naʻe hoko leva ʻa e moʻui taau mo haohaoá, ko e holi moʻoni ia ʻa hono lotó. Ke hoko ʻo tāú, ʻoku tau fai ha ngaahi fili ʻe lava ke tau toe foki ai ki he ʻao ʻo ʻetau Tamai Hēvaní. ʻOku tau fai e ngaahi meʻa ko ia te ne fakafeʻungaʻi kitautolu ki he ngaahi tāpuaki kuó Ne tokateu mai maʻatautolú. Ko e ʻuhinga ʻeni ʻoku tau ʻi māmani aí—ke tau “vakai pe te [tau] fai ʻa e ngaahi meʻa kotoa pē ʻe fekau ʻe he ʻEikí.”4 ʻOku fakafou heʻetau tui ki he ʻEiki ko Sīsū Kalaisí ʻa ʻetau lava ʻo matuʻuaki e ngaahi ʻahiʻahí.5 ʻE makatuʻunga ʻi heʻetau tuí ʻa ʻetau lava ʻo siʻaki ʻa e koví. Te tau fakaliliʻa ai he “‘oku fepikitaki [pē] ʻa e māmá ia mo e māmá” pea “‘ofa pē ʻa e angamaʻá ia ki he angamaʻá.”6 ʻOku fie maʻu e tuí, fakatomalá pea mo e talangofuá, ka tau hoko ʻo taʻemele mei he māmaní. Kuo pau ke tau moʻuiʻaki e ngaahi tuʻunga moʻuí pea fai e ngaahi meʻa ʻe lava ke tau maʻu ai e feohi mo e tataki ʻa e Laumālié—he ʻoku ʻikai lava ke nofo ʻa e Laumālié ʻi ha faletapu ʻoku ʻuli.7 Naʻe pehē ʻe ha talavou ʻoku ou ʻiloʻi: “‘Oku fuʻu faingataʻa ia. He ʻikai lava ha taha ia ʻo moʻuiʻaki e ngaahi tuʻunga moʻuí. ʻOku faingataʻa moʻoni.” Ka ʻi heʻetau ʻiloʻi ko ia ko e ngaahi foha mo e ngaahi ʻofefine kitautolu ʻo e ʻOtuá, kuo pau ai ke tau faifeinga ke moʻui taau. Naʻe ʻi ai ha toʻu tupu ne nau fokotuʻu haʻanau moto ʻoku pehē “Te u Lava ʻo Fai e Ngaahi Meʻa Faingataʻá.” Naʻe mahino kiate kinautolu honau tupuʻangá, ʻenau misioná, mo e feituʻu ʻoku maʻu ai e fakahinohinó pea ne nau maʻu ha ivi ʻo fakafou ʻi hono tauhi ʻenau ngaahi fuakavá. Naʻe mahino foki kiate kinautolu ko e taimi te nau fai ai fehālaakí, te nau lava ʻo liliu! ʻOku loto ʻa Sētane ke tau fakakaukau ʻoku ʻikai malava ke fai ha fakatomala. ʻOku ʻikai ʻaupito ke moʻoni ʻeni. Kuo talaʻofa mai ʻe he Fakamoʻuí ʻa e fakamolemolé.8 ʻOku hanga ʻe heʻetau maʻu he moʻui taau ʻa e sākalamēnití he uike taki tahá, ʻo fakafaingofuaʻi ʻetau hoko ʻo maʻa mo haohaoá, ʻi heʻetau fuakava ke “manatu maʻu pē [ki he Fakamoʻuí], mo tauhi ʻene ngaahi fekaú.”9 ʻOku faingofua e ongoongolelei ʻo Sīsū Kalaisí, pea kuo foaki mai kiate kitautolu e ngaahi meʻangāue ʻokú ne tofa e hala hangatonu mo fāsiʻí. ʻOku mahino ʻa e halá: “He ʻoku faingofua pē ʻeku haʻamongá pea ʻoku maʻamaʻa ʻeku kavengá.”10 ʻI he taʻu ʻe tolungofulu mā valu kuohilí, ne fai ʻe Palesiteni Kōtoni B. Hingikelī ʻeku mali mo hoku husepānití ʻi he Temipale Sōlekí. Kuo hoko e faleʻi mo e fakahinohino naʻá ne fai mai he ʻaho ko iá, ko ha maama ia ki heʻema moʻuí. ʻI heʻema mavahe mei he temipalé ko ha husepāniti mo ha uaifí, ne ma ō ki he paʻake he veʻe temipalé ʻo hiki ʻi ha tohinoa ʻa e ngaahi akonaki poto ne ma maʻú. Naʻá ne naʻinaʻi mai ke ma manatuʻi maʻu pē ke fai ʻema ngaahi lotú ʻi he efiafí mo e pongipongí, ke ma lotu ko ha ongo meʻa mali pea mo fakafāmili. Naʻá ne naʻinaʻi mai ke totongi kakato ʻema vahehongofulú. Naʻá ne naʻinaʻi mai ke ma lau fakaʻaho e folofolá pea fakaʻaongaʻi ia heʻema moʻuí. Pea naʻá ne akonaki mai ke ma moʻui taau maʻu pē. Naʻá ne pehē, “Moʻui maʻu pē ʻi ha founga ʻo ka hokosia e taimi te mo fie maʻu ai e ngaahi tāpuaki ʻa e ʻEikí, ʻe lava ke mo ui kiate Ia ʻo maʻu kinautolu koeʻuhí ko hoʻomo moʻui tāú.” Naʻá ne pehē: “‘E ʻi ai ha ngaahi taimi ʻi hoʻomo moʻuí te mo fie maʻu ai ha ngaahi tāpuaki he taimi pē ko iá. ʻE fie maʻu ke mo moʻui ʻi ha founga foaki mai ai ia—ʻo ʻikai koeʻuhí ko e manavaʻofá, ka koeʻuhí ko hoʻomo moʻui tāú.” Naʻe ʻikai mahino kiate au he taimi ko iá ʻa ʻene ʻuhingá, ka ʻi he taʻu ʻe 38 ne hoko aí, kuo lahi fau e ngaahi taimi kuó ma ui ai ki he Tamai Hēvaní ke foaki vave mai “ha ngaahi tāpuaki.” Kuo hoko ʻa e ngaahi tōʻonga māʻoniʻoni mo angatonu fakaʻaho ko ʻení ke ma nofo maʻu ai ʻi he hala ʻoku fakatau ki he ʻao ʻo ʻetau Tamai Hēvaní. Pea ʻoku ou lea he ʻahó ni ʻo pehē, “‘Oku mau fakamālō ki he ʻOtuá, koeʻuhí ko ha palōfita ʻokú ne tataki kitautolu ʻi he ngaahi ʻaho fakaʻosí ni.”11 ʻOku mahuʻinga ʻa e moʻui taau fakafoʻituituí, ki he hū ki Hono ngaahi temipale māʻoniʻoní pea ko hono tumutumú ʻetau hoko ko e kau ʻea-hoko ki he “meʻa kotoa pē ʻoku [ʻa e] Tamaí.”12 Kuo folofola ʻa e ʻEikí, “Tuku ke ngaohi ke fakaʻofoʻofa maʻu ai pē ʻe he angamaʻá ʻa hoʻo ngaahi fakakaukaú; pea ʻe ʻāsili mālohi ʻa hoʻo falalá ʻi he ʻao ʻo e ʻOtuá.”13 ʻI heʻetau fai ʻení, ʻe lava ke tau hū laukau atu ki he ngaahi temipale māʻoniʻoni ʻo e ʻOtuá mo ʻiloʻi ʻoku tau taau mo e feituʻu ʻoku hāʻele holo ai e ʻEikí. ʻI heʻetau moʻui tāú, ʻoku ʻikai ngata pē heʻetau lava ʻo hū ai ki he temipalé, ka ʻe lava ke hū mai foki e temipalé kiate kitautolu. ʻOku ʻatautolu leva e ngaahi talaʻofa ʻa e ʻEikí ki he fakamoʻuí mo e fiefiá— pea ʻAʻana leva hotau misiona he māmaní. ʻI he māhina kuo ʻosí, naʻe hū ai he temipalé ʻa homa foha siʻisiʻi taha ko Setí mo ha finemui moʻui taau ke na mali ki taimi mo ʻitāniti. ʻI heʻene taki mai ia ʻo tūʻulutui he ʻōlitá, ne u vakai atu ki he sioʻatá he ongo tafaʻakí peá u fie fanafana ange, “‘Oku mahino kiate koe ʻa e ʻuhinga ʻoku mahuʻinga ai ke maʻa mo haohaoá?” Ka naʻe ʻikai fie maʻu ia ke u fakamanatu ange he naʻe fanafana ange ʻa e Laumālié ia. Ki he toʻu tupu fakaʻeiʻeikí, vakai atu ki he matapā sioʻata ʻo e taʻengatá! Vakai kiate koe ʻi he loto temipale māʻoniʻoni ʻo e ʻEikí. Vakai atu ki haʻo moʻui taau mo haohaoa. ʻOku fakafalala atu ha ngaahi toʻu tangata kiate koe! ʻOku ou fakamoʻoni ʻoku malava ke tau moʻui taau ʻo tuʻunga he mālohi huhuʻi mo lavameʻa ʻo e Fakalelei ʻa Sīsū Kalaisí. ʻOku ou fakatauange ko e ngaahi lea ʻeni ʻe fakamatalaʻi ʻaki kitautolú, “[Te nau] ʻaʻeva mo au ʻi he kofu hinehina: he ʻoku [nau moʻui taau].”14 ʻI he huafa ʻo Sīsū Kalaisí, ʻēmeni. Maʻuʻanga fakamatalá 1. Vakai, ʻAlamā 13:3. 2. ʻAlamā 22:15. 3. ʻAlamā 22:18. 4. ʻĒpalahame 3:25. 5. Vakai, ʻAlamā 37:33; 3 Nīfai 7:18 6. Vakai, T&F 88:40. 7. Vakai, Hilamani 4:24. 8. Vakai, Ki Hono Fakamālohia ʻo e Toʻu tupú (2001), 30. 9. Molonai 4:3. 10. Mātiu 11:30. 11. “Fakamālō ki he ʻOtua,” Ngaahi Himí, fika 10. 12. T&F 84:38; vakai foki, veesi 35–37. 13. T&F 121:45. 14. Fakahā 3:4; vakai foki ki he veesi 5.