ʻEletā Anthony D. Perkins
ʻO e Kau Fitungofulú
ʻE hanga ʻe he tui ki he ʻofa haohaoa ʻa e Tamai Hēvaní pea mo Sīsū Kalaisí, ʻo “veuki” e ngaahi tauhele ʻa Sētané, ʻa e ongoʻi taʻefeʻungá, taʻetāú mo e ongoʻi loto halaiá.
ʻOku lea ʻa e fānaú ʻi he tui haohaoa ʻo pehē, “‘Oku mau tui ki he ʻOtua ko e Tamai Taʻengatá, mo Hono ʻAlo ko Sīsū Kalaisí, pea mo e Laumālie Māʻoniʻoní.”1 Ka ʻoku ʻikai ke faʻa ongoʻi ʻe he toʻu tupú mo e kakai lalahí ʻa e mālohi ʻo e fakamatala mahino ko ʻení.
Ko Sētane ʻa e “fili ki he māʻoniʻoni kotoa pē;”2 ko ia ʻokú ne fakatupu e loto veiveiua fekauʻaki mo e natula ʻo e Toluʻi ʻOtuá mo hotau vā mo Kinautolú. Naʻe kikiteʻi ʻe Sīsū Kalaisi ʻe kākaaʻi foki mo e kakai filí ʻi he ngaahi ʻaho fakaʻosí.3 Fakakaukau ki he ngaahi sīpinga ko ʻeni ʻe tolu ʻo e founga ʻoku hanga ai ʻe Lusifā ʻo “fokotuʻu ha ngaahi tauhele mo ha ngaahi hele ke ʻefihia ai ʻa e kau māʻoniʻoni ʻa e ʻOtuá.”4
Ko e tauhele ko ongoʻi taʻefeʻungá. ʻOku ongoʻi ʻe ha taha kei talavou faivelenga he ʻikai ke ne lava ʻo fai e meʻa ʻoku ʻamanaki ki ai e niʻihi kehé. ʻOku ʻikai faʻa fakahikihikiʻi ia ka ʻoku faʻa fakaangaʻi maʻu pē ia ʻi ʻapiako mo ʻapi. ʻOku talaange ʻe he mītiá ʻoku ʻikai ke talavou pe poto feʻunga. ʻOku fakafehuʻia fakaʻaho leva ʻe he finemui faivelengá ni pe ʻokú ne taau nai ke maʻu e ʻofa ʻa e Tamai Hēvaní, feilaulau fakalelei ʻa e Fakamoʻuí, pe ko e tākiekina ʻa e Laumālié.
Ko e tauhele ko hono lau ʻokú te taʻetāú. ʻOku ongoʻi ʻe ha faifekau lelei he ʻikai ke ne lava ʻo aʻusia e tuʻunga ʻoku finangalo ki ai e ʻOtuá. ʻOku fakakaukau atu e faifekau moʻui taau ko ʻení ki ha Tamai Hēvani tuʻutuʻuni fefeka ʻoku haʻisia ke fakamaau totonu, mo ha Fakamoʻui ʻokú Ne lava ʻo fakamaʻa e angahala ʻa e niʻihi kehé kae ʻikai ko e angahala ʻa e faifekaú ni, pea mo ha Laumālie Māʻoniʻoni ʻoku ʻikai fie takaua mo ha taha ʻoku ʻikai haohaoa.
Ko e tauhele ko ongoʻi halaia taʻeʻuhingá. Ko ha fefine matuʻotuʻa ʻa ia ko ha faʻē mateaki, kaumeʻa angaʻofa, kaunanga faivelenga he Siasí, pea faʻa ʻalu foki ki he temipalé. Ka ʻi he loto ʻo e fefiné ni, ʻoku ʻikai ke ne lava ʻo fakamolemoleʻi ʻene angahala naʻe fakahoko he ngaahi taʻu kuo hilí neongo naʻá ne ʻosi fakatomala mo fakaleleiʻi mo e kau taki lakanga fakataulaʻeikí. ʻOkú ne taʻepauʻia pe ʻe toe tali ia ‘e he ‘Eikí pea kuo siva ʻene ʻamanaki ki ha moʻui taʻengata ʻi he ʻao ʻo e Tamai Hēvaní.
Kapau ʻokú ke maʻu ha fakakaukau pe ongo tatau mo e kāingalotu lelei ko ʻení, ʻoku ou fakaafeʻi koe ke ke hangē ha kiʻi tamasiʻi siʻí ʻo toe ongoʻi “‘a e ʻofa haohaoa mo taʻefilifilimānako ʻa ia naʻe fakahā ʻe he Tamaí pea mo e ʻAló, ʻi he hāʻele hifo ʻa e Huhuʻí ki māmaní.”5 ʻE hanga ʻe he tui loto tauʻatāina ki he ʻofa haohaoa ʻa e Tamai Hēvaní pea mo Sīsū Kalaisí, ʻo “veuki”6 e ngaahi tauhele ʻa Sētané, ʻa e ongoʻi taʻefeʻungá, taʻetāú mo e ongoʻi loto halaiá.
ʻOku akoʻi mai ʻe he tohi Lea Fakatātaá, “He ko e ngaahi mahalo ʻa hono lotó, ko ia ai pē ia.”7 Tuku muʻa ke u fokotuʻu atu—makehe mei he lotu maʻu peé, ako folofolá, maʻu lotú mo e ʻalu ki he temipalé—ha ngaahi liliu ʻe nima ki hoʻo ngaahi fakakaukaú mo ho lotó ke ke ongoʻi ange ai e ʻofa ʻa e ʻOtuá.
ʻUluakí, ʻiloʻi ko e fānau pelepelengesi koe ʻa ha Tamai Hēvani ʻofa. ʻOku hivaʻi ʻe heʻetau fānaú ʻi he ʻiloʻilopau, ko e “Fānau Au ʻa e ʻOtuá, kuó Ne fekau maí.”8 ʻOku ongoʻi mo ʻiloʻi ʻe he longaʻi fānaú ʻa e meʻa mahalo kuo ngalo ʻiate koé. Ko e foha pe ʻofefine ʻofeina koe ʻo e Tamai Hēvaní naʻe ngaohi “‘i hono tataú,”9 mo mahuʻinga fau —ko ia ne foaki ai ʻe Sīsū Kalaisi ʻa ʻEne moʻuí koeʻuhí ko koe.
ʻOku mohu ʻaloʻofa e ʻOtua ko e Tamaí pea ʻoku tuʻuloa ʻEne ʻofa kiate koé neongo hoʻo ngaahi fehālākí. Ko e leʻo pē ʻo Sētané te ne ʻai ke ke ongoʻi taʻe mahuʻingá. Ka ʻe hanga ʻe he Laumālie Māʻoniʻoní ʻo ueʻi koe ke ke ongoʻi ha “mamahi ʻoku taau mo e ʻOtuá”10 pea ke fakatomala ʻi ha founga ʻe fakafonu ʻaki koe ha fakatuʻamelie ki ha liliu ʻoku leleí.
ʻI he taimi ʻokú ke ongoʻi taʻetaau aí, “manatu ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá.”11 Fakaʻehiʻehi mei haʻo toutou tukuhifo pe fakaangaʻi pē koé—ʻoku mahino ʻaupito e faikehekehe ʻo e loto fakatōkilaló mo e anga māʻulaló. ʻIloʻi pea fakaʻaongaʻi ho ngaahi talēnití kae ʻoua te ke tokanga taha pē ki ho ngaahi vaivaí.
Uá, hilifaki hoʻo kavengá kia Sīsū Kalaisi. ʻI hono lomekina koe ʻe he ngaahi meʻa lahi ʻoku fakafalala mai kiate koé pea mo e ngaahi faingataʻá, ʻoua naʻá ke fuesia toko taha pē e feinga tau ko iá. Muimui ki he sīpinga ʻa e longaʻi fānaú, ʻo ke tūʻulutui ʻo lotu.
Naʻe fekau mai ʻa Sīsū Kalaisi ke tau, “Sio pē kiate au ʻi he fakakaukau kotoa pē; ʻoua ʻe tālaʻa, ʻoua ʻe manavahē.”12 ʻOku fakahaaʻi mai ʻe he loto veiveiuá, manavaheé, mo e loto hohaʻá ʻoku tau feinga ke fuesia toko taha pē e ngaahi faingataʻa ʻo e moʻuí. Ko e taimi ko ia ʻokú ke fakakaukau ai ʻokú ke taʻefeʻungá, maʻu ha lototoʻa ke ke pehē loto pē, “‘Oku ou faʻa fai ʻa e ngaahi meʻa kotoa pē ʻia Kalaisi ʻokú ne [fakamālohia] aú.”13 Hili iá, peá ke “fai fiefia ʻa e ngaahi meʻa kotoa pē ʻokú [ke] lavá,”14 peá ke fiemālie ʻe hanga ʻe he ʻEikí ʻo fakahoko ʻa e toengá pea ʻe lelei ʻa e meʻa kotoa pē.
Naʻe talaʻofa mai ʻe Fakamoʻuí, “Haʻu kiate au ʻa kimoutolu kotoa pē ʻoku feinga mo mafasiá, pea te u foaki ʻa e fiemālié kiate kimoutolu.”15 Pea ʻi hoʻo “tuku hoʻo kavengá ki [he ʻEikí],”16 te ke ongoʻi ai e nonga ʻo e Laumālié.17
Tolú, fakamolemoleʻi pē koe ʻi hoʻo ngaahi angahalá mo e tōnounoú. ʻOku ʻikai ʻamanaki e Tamai Hēvaní ia ke ke haohaoa ʻi he moʻuí ni. Naʻá ne ʻafioʻi ʻe fakahoko ʻe Heʻene fānaú ha fehālaaki ʻi heʻenau ako mei he ngaahi meʻa kuo nau foua ʻi he moʻui fakamatelié. Ka naʻe “ofa pehē ʻa e ʻOtuá ki he māmaní”18 ko ia naʻe ʻomi ʻi Heʻene palani ʻo e fiefiá ha Fakamoʻui angaʻofa.
Naʻe folofola ʻa Sīsū ʻo pehē, “Ko au ko e ʻEikí, te u fakamolemoleʻi ʻa ia ʻoku ou loto ke fakamolemoleʻí, ka ʻoku ʻekeʻi meiate kimoutolu ʻa hoʻomou fakamolemoleʻi ʻa e kakai kotoa pē.”19 Kamata pē ʻiate koe, peá ke fakamolemoleʻi foki e niʻihi kehé. Kapau he ʻikai toe manatu e ʻOtuá ki he ngaahi angahala kuo tau fakatomalaʻí, 20 ko e hā ʻoku ʻikai ke tau lava ai ʻe kitautolu ʻo fakangalokí? Fakaʻehiʻehi mei hono fakamoleki noa e taimí he fakakaukau atu ki he kuohilí.
Kuo pau ke ke falala ki he Fakalelei ʻa Sīsū Kalaisí ka ke lava ʻo fakamolemoleʻi koe mo e niʻihi kehé. Naʻe lotu ʻa e palōfita ko Seinokí ʻo pehē, “‘Okú ke houhau ki he kakaí ni, ʻe ʻEiki, koeʻuhí ko ʻenau taʻe fie ʻilo ki hoʻo ngaahi ʻaloʻofá ʻa ia kuó ke foaki kiate kinautolu koeʻuhí ko ho ʻAló.”21 ʻOku houhau ʻetau Tamai Hēvaní ʻi heʻetau taʻotaʻofi e mālohi ʻo e feilaulau fakalelei ʻo Hono ʻAló. ʻI hoʻo ngāue ʻi he tui kia Sīsū Kalaisí, ʻe lava ke “matafi atu”22 hoʻo ongoʻi loto halaiá. Kapau ʻokú ke kei ongoʻi loto halaia pē hili e fakatomala moʻoní, tui ki hoʻo kau taki lakanga fakataulaʻeikí ʻi heʻenau pehē atu ʻokú ke tāú.23
Faá, puke maʻu ha ʻamanaki lelei ki he moʻui taʻengatá. Kapau ʻokú ke pehē ʻoku hanga ʻe haʻo ngaahi angahala, tōnounou, mo ha ngaahi fili taʻefakapotopoto he kuohilí, ʻo taʻofi koe mei hono maʻu e ngaahi tāpuaki ʻa e ʻOtuá, fakakaukau ki he meʻa ne foua ʻe ʻAlamā ko e Lahí. ʻI heʻene fakamatala ki heʻene kei hoko ko ha taulaʻeiki taʻefaitotonu ʻa e tuʻi angakovi ko Noá, naʻe pehē ai ʻe ʻAlamā, “Pea ko au foki, ne u ʻefihia ʻi he tauhelé, peá u fai ʻa e ngaahi meʻa lahi naʻe fakalielia ʻi he ʻao ʻo e ʻEikí, ʻa ia naʻe langaki ai ʻeku fuʻu fakatomala mamahi.”24 Naʻe fakatomala kakato moʻoni ʻa ʻAlamā pea tuʻunga he taʻe fakangatangata e Fakalelei ʻa Kalaisí, ne hoko ai ʻa ʻAlamā ko ha palōfita pea naʻe talaʻofa ange kiate ia ʻa e moʻui taʻengatá.25 ʻI hoʻo fakahoko ko ia ho lelei tahá ke talangofua mo fakatomalá, ʻe lava foki ke ke maʻu ha tofiʻa ʻi he nāunau fakasilesitialé tuʻunga ʻi he Fakalelei mo e ʻaloʻofa ʻa
Sīsū Kalaisí.26
Nimá, fiefia ʻi he ʻaho kotoa pē. Ko e taha ʻo e maʻuʻanga ʻo e fiefiá ko e ngāue tokoní, he ko e taimi ʻokú ke femoʻuekina ai he tokoni ki he niʻihi kehé, ʻe siʻi ai ha faingamālie ke ke tokanga ki hoʻo ngaahi tōnounoú. Naʻe akoʻi fakapotopoto mai ʻe he Fakamoʻuí, “He ko ia ia ʻoku loto ke kalofaki ʻene moʻuí, ʻe mole ia; ka ko ia ia ʻe mole ʻene moʻuí koeʻuhí ko au mo e ongoongoleleí, ʻe maʻu ia.”27
Te ke toe fiefia ange ʻi he moʻuí kapau he ʻikai ke ke fakakaukau pē ki he ngaahi meʻa ʻoku fakamamahí, ʻi he fakaʻau ke tau motuʻa angé, ka ke fetongi ia ʻaki e fakatuʻamelie lelei ʻa e fānaú. Ko e fakatuʻamelié ko ha ʻulungāanga ia ʻoku tau malava ʻo vakai ai ki he toʻukupu ʻofa ʻo e ʻOtuá ʻi heʻetau moʻuí. ʻOku faleʻi mai ʻe ha himi manakoa ke, “Tānaki ʻa ho tāpuakí; sio ki he ʻofa ʻa e ʻOtuá.”28
ʻOku ou fakamoʻoni ki ha Tamai Hēvani ʻoku mafao mai hono toʻukupu maʻongoʻonga mo ʻofá ki he tokotaha kotoa pē ʻo ʻEne fānaú. ʻOku ou fakamoʻoni kia Sīsū Kalaisi, ʻa ia ʻoku “mafimafi ke Ne fakamoʻui”29 kitautolu mei heʻetau ongoʻi taʻefeʻungá, taʻetāú, pea mo e angahalá. ʻOku ou fakamoʻoni ki he Laumālie Māʻoniʻoní, ʻa ia te ne feohi mo ha taha ʻoku ʻikai haohaoa ka ʻoku loto fakatomala. Kiate kimoutolu Kāingalotu faivelenga mo taau ʻoku fehangahangai mo e ngaahi tauhele ʻa e tēvoló he ngaahi ʻaho ní,30 “‘ofa ke tuku kiate kimoutolu ʻe he ʻOtuá, ke maʻamaʻa hoʻomou ngaahi kavengá ʻi he fiefia Hono ʻAló.”31 ʻI he huafa toputapu ʻo Sīsū Kalaisí, ʻēmeni.
Maʻuʻanga fakamatalá
1. Tefito ʻo e Tuí 1:1.
2. ʻAlamā 34:23; vakai foki, Ngāue 13:10; Mōsaia 4:14; Molonai 9:6.
3. Vakai, Mātiu 24:24; vakai foki, Siosefa Sāmita—Mātiu 1:22, 37.
4. ʻAlamā 10:17.
5. T&F 138:3.
6. Hilamani 3:29.
7. Lea Fakatātā 23:7.
8. “Fānau Au ʻa e ʻOtuá,” Ngaahi Himí, fika 193.
9. Sēnesi 1:27; vakai foki, ʻAlamā 22:12; ʻEta 3:15–16; T&F 20:17–18; Mōsese 6:8–10; ʻĒpalahame 4:26–27.
10. 2 Kolinitō 7:10.
11. T&F 18:10.
12. T&F 6:36; vakai foki, ʻĪsaia 41:10; Mātiu 10:31; Luke 8:50; T&F 50:41; 122:9.
13. Filipai 4:13; vakai foki, 2 Kolinitō 12:7–10; Hepelū 11:33–34; 1 Nīfai 7:12; 17:3; Sēkope 4:7; ʻAlamā 26:12; ʻEta 12:27.
14. T&F 123:17.
15. Mātiu 11:28.
16. Saame 55:22.
17. Vakai, Kalētia 5:22; vakai foki, T&F 19:23.
18. Sione 3:16.
19. T&F 64:10.
20. Vakai, T&F 58:42; vakai foki, Saame 25:7; ʻĪsaia 43:25; Selemaia 31:34; Hepelū 8:12; 10:17; ʻAlamā 36:19.
21. ʻAlamā 33:16.
22. Vakai, ʻĪnosi 1:3–8; vakai foki, ʻAlamā 24:10; 36:16–19.
23. Vakai, Marvin J. Ashton, “On Being Worthy,” Ensign, May 1989, 20–22.
24. Mōsaia 23:9.
25. Vakai, Mōsaia 26:20.
26. Vakai, Taitusi 3:7; 1 Pita 5:10; 2 Nīfai 2:6–8; 10:24–25; 25:23; ʻĪnosi 1:27; Molonai 7:41; T&F 138:14.
27. Maʻake 8:35; vakai foki, ʻAlamā 36:24–25.
28. “Tānaki Ho Ngaahi Tāpuakí,” Ngaahi Himí, fika 148.
29. 2 Nīfai 31:19; vakai foki, ʻĪsaia 63:1; ʻAlamā 7:14; 34:18; T&F 133:47.
30. Vakai, 2 Tīmote 2:26.
31. ʻAlamā 33:23.
Previous
