Palesiteni Gordon B. Hinckley
Kuo hoko ʻeni ko ha feituʻu fakatahaʻanga makehe mo fakaʻofoʻofa.
Siʻoku ngaahi tokoua mo e tuofāfine, ʻoku tau toe fakataha mai he hoʻataá ni ki he Tāpanekale fakahisitōlia ni, ʻa ia kuo tuʻo lahi haʻatau konifelenisi ai ki muʻa.
Kuo fai ki he falé ni ha fakaleleiʻi mo ha fakafoʻou lahi moʻoni ke ne aʻusia ʻa e tuʻunga fakatufunga fakaeonopooni taha ki hono matuʻuaki ʻo e mofuiké. ʻOku mau fakatauange mo lotua ʻi he ngāué ni, kuo ʻikai maumauʻi ai ʻa hono ngaahi fōtunga fakahisitōliá.
Naʻe fakahaofi ha niʻihi ʻo e ʻū sea motuʻá pea ʻe kei hokohoko atu pē hono fakaʻaongaʻí. Kae hangē ko ia mahalo kuo mou meaʻí, ʻoku fefeka tatau pē ʻa e sea foʻoú pea mo e sea motuʻá!
Kuo toe tānaki mai mo ha ngaahi matapā hūʻanga ke ne feau e ngaahi fie maʻu fakaeonopōní. Kuo toe fakamālohia mo fakafefekaʻi ʻa hono ngaahi pou maka ʻo e holisi ki tuʻá. Kuo fakamālohia e ʻató ʻaki hano tānaki atu ki ai ha ʻū sā ukamea, pea fakaʻato foʻou.
ʻOku ou fie fakamanatu atu, ʻoku ʻikai foʻou e ngaahi liliu ʻi he falé ni. Naʻe fai pē foki ha ngaahi liliu ki ai hili ha ngaahi ʻaho siʻi mei hono langá. Naʻe ʻikai ha kiʻi fakafaletolo ʻi ʻolunga he muʻaki palaní ka naʻe pau ke tānaki atu ia ki ai.
ʻI he ngaahi taʻu lahi ko ʻení, kuo hoko ʻeni ko ha feituʻu fakatahaʻanga makehe mo fakaʻofoʻofa. Kuo toko lahi ha kau tangata mo ha kau fafine kuo nau lea mei heni ʻo fakamoʻoniʻi ʻa hono Toe Fakafoki Mai e ongoongolelei ʻo Sīsū Kalaisí. Kuo lea atu mei he tuʻunga malangá ni ʻa e palōfita kotoa pē talu mei he taimi ʻo Pilikihami ʻIongí ʻo aʻu mai ki he taimí ni. Kuo lea atu foki mo ha kau tangata mo ha kau fafine ʻiloa, ʻo kau ai ha kau palesiteni kehekehe ʻo e ʻIunaiteti Siteití. Naʻe hoko ʻeni ko ha feituʻu fakaʻaliʻaliʻanga ʻo e ʻātí mo e tala fakafonua ʻo e koló ni. Naʻe fuofua fakaʻaongaʻi ʻe he Kau Ifi ʻa ʻIutaá ʻa e falé ni ke nau fakaʻaliʻali ai. Kuo fakahoko heni ha ngaahi fakaʻaliʻali fakaʻaati maʻongoʻonga, hangē ko e Mīsaiá pea mo e Tanner Gift of Music. Kuo fakahoko heni ha ngaahi ouau meʻafakaʻeiki ʻo ha kakai tangata mo fafine ʻiloa. Kuo hoko moʻoni ia ko ha feituʻu mahuʻinga fau ki he koló ni ʻi he ngaahi taʻu lahi ko ʻení.
Ko ha fale makehe mo laulōtaha ʻeni ʻi he māmaní kotoa. Naʻe langa ia he senituli ʻe taha mo e konga kuohilí he taimi masivesiva hotau kakaí. Naʻe hoko moʻoni ia ko ha Tāpanekale ne langa ʻi he maomaonganoá. Naʻe teʻeki ai vave ke ʻosi ʻa e temipalé ia he taimi ko iá. Ko kinautolu ne nau langa e Tāpanekalé, ne nau fai ia ʻi he tui, fakataha mo honau pōtoʻi tā-mape fakatufunga kei foʻofoʻoú. Naʻe pehē ʻe he kau lotolotouá, ʻa ia ʻoku toko lahi maʻu pē, kapau ʻe toʻo ʻa hono palepalé, ko e holo ia ʻa e ʻató. Naʻe ʻikai hoko ʻeni pea kuó ne kei tuʻu ʻo matuʻuaki ʻa e laʻalaʻaá mo e matangí he ngaahi taʻu lahi ko ʻení.
Kuo ʻiloa ia he funga ʻo māmaní ko e ʻapi ʻo e Kuaea ʻa e Tāpanekale Māmongá, ʻa ia kuo fanongoa mei ai ʻa ʻenau fakamafola letiō fakauiké ʻo laka ange ʻi ha toe faʻahinga polokalama fakaletiō kehe, ʻi he taʻu ʻeni ʻe 75 tupu kuo hilí, talu mei he 1929.
ʻI he ʻaho ní, ʻe toe tukuatu he Sāpate taki taha ʻa e Hivá mo e Folofolá ki he funga ʻo e māmaní mei he Tāpanekale ko ʻení ʻi he “fetaulakiʻanga ʻo e Hihifó.” ʻE toe hoko ia ko e ʻapi ʻo e Kuaea Tāpanekalé mo e ʻOkesitulā ʻi he Temipale Sikueá, ʻa ia kuo nau fakahoko ha ngaahi polokalama mo ha ngaahi ngāue lahi kehe. ʻE fakaʻaongaʻi ia ki ha ngaahi konifelenisi fakasiteiki mo fakavahelahi, ngaahi ako fakapuleʻangá, fakaʻaliʻali hivá pea mo ha ngaahi fakafiefia kehe.
Naʻe lekooti ʻe he kautaha ko e Millennial Star, ʻa ia ne pulusi ʻi ʻIngilani he ʻaho Tokonaki ko hono 9 ʻo ʻOkatopa 1875, naʻe fai ʻe Sione Teila ha lotu lōloa mo fakaʻāuliliki ʻi hono fakatapui ʻo e fale toputapú ni, hili ha ngaahi taʻu lahi mei hono fuofua fakaʻaongaʻí.
Pea ko ia ʻe hoku ngaahi tokoua mo e tuofāfine, ʻi heʻetau fakaʻosi e fakatahaʻangá ni, ʻoku ou fakaafeʻi kimoutolu he taimí ni ke tau kau fakataha ʻo punou hotau ʻulú pea kuikui hotau matá ʻi heʻetau fai ha lotu ʻo toe fakatapuí.
Lotu Fakatapuí
ʻE ʻOtua ko ʻemau Tamai Taʻengatá, ʻoku punou homau ʻulú ʻi Ho ʻAó he loto ʻapasia moʻoni ʻi he meʻa fakahisitōliá ni. ʻOku mau fakataha mai ki he Tāpanekale maʻongoʻongá ni, ʻa ia kuo toe fakaleleiʻi mo fakafoʻou hili ha senituli ʻe taha ʻo hono fakaʻaongaʻí.
ʻI he mafai ʻo e lakanga fakataulaʻeiki māʻoniʻoní pea ʻi he huafa ʻo Sīsū Kalaisí, ʻoku mau fakatapui mo toe fakatapui pea mo tekaki atu ʻa e Tāpanekale Sōlekí ni ki he ʻAfioná mo Ho ʻAlo ʻOfaʻangá, ke hoko ia ko ha feituʻu he ngaahi taʻu lahi ka hoko maí, ʻe lava ke fakataha mai ki ai Ho kakaí ʻi ha ngaahi ʻuhinga kehekehe.
ʻI heʻemau fakalaulauloto ki he meʻá ni, ʻoku foki ai ʻemau manatú ki he Palōfita ko Siosefá, ʻa ia naʻe hoko ko ha meʻangāue ʻi Ho toʻukupú ʻi hono toe fakafoki mai ʻo e ongoongolelei taʻengata ʻa e ʻEiki ko Sīsū Kalaisí, fakataha mo hono ngaahi meʻafoaki mo e mafai pea mo e tāpuaki kotoa pē ʻoku fekauʻaki mo iá.
ʻOku mau fakafetaʻi ki he ʻAfioná koeʻuhí ko e tui lahi ʻa homau kakaí, ʻa ia ne tuli mei Nāvuú pea nau foua ha mamahi lahi mo mate honau tokolahi, ʻo nau kolosi mai ʻi ʻAiouā ke fokotuʻu ʻa e Nofoʻanga Fakafaʻahitaʻu Momokó pea nau fakahoko mei ai ha fononga lōloa ki he teleʻa ko ʻeni ʻo e Ano Māsima Lahí.
ʻOku mau fakafetaʻi ki he ʻAfioná, koeʻuhí ko e ngāue fakatakimuʻa fakalaumālie ʻa Palesiteni Pilikihami ʻIongí, ʻa ia naʻe teʻeki ke ne mātā ʻa e teleʻá ni, tukukehe pē ʻi ha vīsone, ʻo ne tataki mai homau kakaí ki heni. Naʻe ʻikai lahi ʻene ʻilo ki he feituʻú ni. Naʻe ʻikai maheni mo e kelekelé pe ko hono ʻeá, ʻa e vaí mo e ngaahi tafaʻaki kehé. ʻI he feituʻu toafá ni naʻe palau mo tō ngoue, fuʻifuʻi mo tanumaki pea utu ai ʻe he kau paioniá e ngaahi fua ʻo ʻenau ngāué. Ne nau fokotuʻu ha kolo pea kuo hoko ia he taimí ni ko ha kolo lahi ʻoku nofoʻi ʻe ha kakai ʻe lau kilu.
Naʻe nofoʻi e teleʻá ni mo hono ngaahi feituʻu ʻātakaí ʻe ha konga lahi ʻo e Kāingalotú ʻi he taimi naʻe kamata mai ai e nofó. ʻI he taimi ní, kuo tupulaki mo mafola e ngāue ʻa e ʻAfioná ʻi he funga ʻo e māmaní pea kuo aʻu e kāingalotu he ngaahi fonua kehé ia ʻo toko lahi ange ʻi he kāingalotu he fonuá ni.
ʻE Tamai ʻofeina, afeitaulalo kae hokohoko atu muʻa hoʻo fakatupulaki e ngāue ʻa e ʻAfioná. Fakalakalaka mo fakalahi ia. Tāpuakiʻi ʻa e kakaí ʻi heʻenau totongi ʻenau vahehongofulú mo e ngaahi foakí ke malava ai ʻo tupulaki pea mafola atu. ʻOfa ke laka atu ia ʻo fakafonu ʻa e māmaní kotoa, ʻo hangē ko ia ne fakataumuʻa ki ai e maka naʻe tā mei he moʻungá taʻe kau ai ha nimá ke teka atu ʻo fakafonu ʻa e māmaní. Fokotuʻu hake muʻa ha kau taki mālohi ʻi he ngaahi toʻu tangata he kahaʻú pea ʻofa ke fiefia mo nekeneka Ho kakaí ʻi heʻenau tokoni ki Hoʻo ngāué.
Ko ia ʻoku mau fakatapui mo toe fakatapui pea mo tekaki atu ʻa e fale toputapú ni, pea ʻoku mau fai mo kolea kotoa ʻeni ʻi he huafa toputapu ʻo Sīsū Kalaisí, ʻēmeni.
Previous
