ʻEletā Robert D. Hales
ʻO e Kōlomu ʻo e Kau ʻAposetolo ʻe Toko Hongofolu Mā Uá
ʻE hanga ʻe hoʻo founga tauhi ki he lakanga fakataulaʻeikí he taimi ní, ʻo teuteuʻi koe ke ke fakahoko e ngaahi fili mahuʻinga taha ʻi he kahaʻú.
ʻE ngaahi tokoua, ʻoku fakafiefia ke fakataha mo kimoutolu ʻi he funga ʻo e māmaní. ʻOku ou manatu ki he fakalea ʻo e himí, [“Vakai! ʻA e konga kau fakaʻeiʻeiki, Kuo toʻo fuka, heletā mo e pā, Laka atu ke ikuna ʻi he malaʻetau ʻo e moʻuí.”]1 ʻOku moʻoni, ko e konga kau fakaʻeiʻeiki ʻa kimoutolu ʻa e ʻOtuá, ʻoku mou faivelenga mo mateaki.
ʻOku ou fie lea he efiafí ni ki he kau mēmipa taʻu siʻi taha ʻo e konga kaú ni—ʻa e Lakanga Taulaʻeiki Faka-ʻĒloné: ʻa e kau tīkoní, kau akonakí, mo e kau taulaʻeiki ʻoku mou ō atu ke fehangahangai mo e ngaahi faingataʻa ʻo e moʻuí. Neongo ʻoku ʻikai ke mou manatuʻi, ka ne mou loto ke kau ki he ngāué ni ʻi ha foʻi fili pē ʻe taha ne mou fakahoko fuoloa ʻi heʻetau kei ʻi he maama fakalaumālié. ʻI he Fakataha Alēlea Lahi ʻi he Langí ne mou fili ai ke mou talangofua ki he finangalo ʻo hoʻomou Tamai Hēvaní mo Hono ʻAlo ko Sīsū Kalaisí. Manatuʻi ʻeni: Ko ha foha koe ʻo e ʻOtuá ne ke fili ke muimui ʻi he Fakamoʻuí ʻi he taimi naʻe mahuʻinga taha ke fakahoko ai iá, pea ʻokú ke hoko ai ko ha tangata maʻongoʻonga.
Koeʻuhí ko e fili fakalangi ko ia naʻá ne fakapapauʻi mai hoʻo fakalakalaka taʻengatá, naʻá ke maʻu ai ha sino fakamatelie, maʻu ʻa e tauʻatāina ke fili ʻa e leleí pe koví, pea ʻoku mou lolotonga tupulaki mo teuteu ke toʻo kiate kimoutolu ʻa e ngaahi ʻulungāanga ʻo hotau Fakamoʻuí. Kuo papitaiso kimoutolu pea maʻu e Laumālie Māʻoniʻoní. ʻOku mou ako ke ʻiloʻi pe ko hai ʻa kimoutolu, ko e hā ʻoku mou ʻi heni aí, mo e feituʻu ʻoku mou ʻalu ki aí. Pea ko ʻeni kuo mou maʻu ʻa e Lakanga Taulaʻeiki Faka-ʻĒloné!
Ko e lakanga taulaʻeiki faka-ʻĒloné ʻa e lakanga fakataulaʻeiki teuteú, pea kuo foaki mai ia ʻi he taimi ko ʻeni ʻi hoʻomou moʻuí ʻoku fai ai hoʻomou teuteú. ʻE hanga ʻe hoʻo founga tauhi ki he lakanga fakataulaʻeiki ko iá he taimí ni, ʻo teuteuʻi koe ke ke fakahoko e ngaahi fili mahuʻinga taha ʻi he kahaʻú. ʻOku kau ʻi he ngaahi fili ko ʻení ʻa hono maʻu ʻo e Lakanga Taulaʻeiki Faka-Melekisētekí, ʻalu ki he temipalé, ʻalu ʻo ngāue fakafaifekaú, akó, fili ha ngāue maʻuʻanga moʻuí, mo e fili hao hoa pea silaʻi kimoua ʻi he temipalé ki taimi mo ʻitāniti. ʻOku ʻi ai ʻa e taimi totonu ki he fili kotoa pē ʻoku tau fakahoko. Fakapapauʻi ʻokú ke fai hoʻo ngaahi filí ʻi he taimi totonú. ʻE fakahoko kotoa e ngaahi fili ko ʻeni te ne liliu hoʻomou moʻuí ʻi ha vahaʻataimi femoʻuekina mo nounou ʻaupito lolotonga hoʻomou ʻi he taʻu uofulu tupú—pea te u ui ʻa e vahaʻataimi ko iá ko e “Taʻu ʻe Hongofulu ke Fai Ai Hoʻo Ngaahi Filí.”
Lolotonga ʻeku ako pailate laulāpuná, ne u teuteu ke fakahoko e ngaahi fili mahuʻinga peheé ʻi ha mīsini kuo ʻosi fakanāunau ke te ako puna ai. Hangē ko ʻení, ne u ako hono fili ʻo e founga puna mei ha vakapuna ʻo ka fakatokanga mai kuo vela e vaká pea kamata ke vilo. ʻOku ou manatuʻi haku kaumeʻa naʻe ʻikai ke ne fai e ngaahi teuteu ko ʻení. Naʻá ne hola ia mei he ako puná ʻo tā pulu pe kaukau tahi. Naʻe ʻikai pē te ne teitei ako e ngaahi founga ke fakahoko ʻo ka hoko ha fakatuʻutāmakí! Hili mei ai ha ngaahi māhina siʻi naʻe vela hono vaká pea naʻe vilo ʻo tō ki lalo. ʻI he vakai ʻa e tama taʻu siʻi ange ne na puná ki he fakatokanga ʻo e velá, naʻá ne ʻosi ʻilo mei he ako naʻá ne faí ʻa e taimi ke ne puna fakamalu ai mei he vakapuná ʻo ne moʻui. Ka ne nofo pē hoku kaumeʻa naʻe ʻikai mateuteu ke fai e fili ko iá ʻi he vakapuná ʻi heʻene toó ʻo ne mate ai.
ʻE fakangatangata pē homou taimi teuteú ʻi he taʻu ʻe hongofulu ka hokó. ʻI hoʻomou hoko ko e kau maʻu lakanga taulaʻeiki faka-ʻĒloné, ʻoku mahuʻinga ke mou teuteu he taimí ni. Kuo pau ke mou fakatupulaki e ngaahi founga kuo mou ʻosi ako kau ki he ngaahi fili mahuʻinga te mou fakahoko ʻi hoʻomou moʻuí ʻi he taʻu ʻe hongofulu ka hoko maí. Kuo pau ke mou ʻiloʻi e meʻa ke faí mo e taimi ke fakahoko aí ʻi he taimi ʻoku hoko mai ai ʻa e fili taki taha. Manatuʻi ʻoku fakatuʻutāmaki tatau pē ʻa e ʻikai ke fai ha filí mo hono fakahoko ʻo ha fili halá. ʻE ʻi ai hono ngaahi nunuʻa taʻengata ʻo e ngaahi fili lahi ʻoku mou fakahoko pe taʻe fakahokó.
Ko e taimi ʻeni ke mou hoko ai ko ha ākonga ʻa Sīsū Kalaisí, ʻa ia ʻoku ʻuhinga ia ki haʻamou tali ʻa ʻEne fakaafe ke “Haʻu, ʻo muimui ʻiate aú.”2 Ko e fili ʻeni ne tau fakahoko ʻi heʻetau ʻi he moʻui fakalaumālié. Kuo pau ke tau toe fakahoko ia ʻi he māmaní, ʻi he ʻaho kotoa pē, ʻi he tūkunga kotoa pē ʻaki ʻetau toʻo kiate kitautolu e huafa ʻo e Fakamoʻuí, manatu ki Heʻene feilaulau fakaleleí, pea mo tauhi ʻEne ngaahi fekaú. Naʻa tau fuakava ke fai ʻeni ʻi he taimi naʻa tau papitaiso aí, pea ʻoku tau maʻu ʻa e faingamālie ke fakafoʻou e ngaahi fuakava ko iá ʻi heʻetau toʻo ʻa e sākalamēnití ʻi he uike taki taha.
Ko e taimi ʻeni ke tau fokotuʻutuʻu mo teuteuʻi ai kitautolu ke maʻu e Laumālie Māʻoniʻoní ko hotau takaua maʻu pē. ʻOku ʻuhinga ʻeni ki hoʻomou fai ʻa ia kuo akoʻi kiate kimoutolu ʻe hoʻomou mātuʻá mo e kau takí—ako e folofolá, lotu he pongipongi mo e efiafi, ʻai ke ke hā maʻa mo maau maʻu pē, muimui ki haʻo taimi tēpile, fokotuʻu pea aʻusia haʻo ngaahi taumuʻá, faitotonu ʻi hoʻo ngaahi fengāueʻaki mo e niʻihi kehé, tauhi hoʻo ngaahi leá, pea moʻui taau mo e lakanga fakataulaʻeiki ʻokú ke maʻú. Moʻui ʻaki ʻi he taimi kotoa pē ʻa e ngaahi tuʻunga moʻui kuo fakahā ʻe he kau palōfitá ʻi he kiʻi tohi tufa, “Ki Hono Fakamālohia ʻo e Toʻu Tupú.”
Ko e taimi ʻeni ke ke fili ai ho ngaahi kaumeʻá peá ke moʻui taau ke maʻu hao hoa taʻengata. Ngaahi tokoua, ʻoku faingofua ʻaupito ʻeni. Hangē ko e meʻa ne akoʻi mai ʻe heʻeku faʻeé kiate aú, “ʻOku saiʻia pē e kakaí he feohi mo e kakai ʻoku nau manako he ngaahi meʻa tataú.” ʻE lava ʻe ho toʻú ke fakalotoʻi koe ke ke fai ha ngaahi meʻa maʻongoʻonga pe ko ʻenau fakataueleʻi koe ke ke fou ʻi ha ngaahi hala ngalikehe mo fakatupu mamahi. ʻOku hanga ʻe he ngaahi kaumeʻa moʻoní ʻo fakatupu ke toe faingofua ange hono moʻuiʻaki ʻo e ongoongoleleí. ʻOku ʻikai ha taimi te nau teitei ʻai ai ke tau fili ʻi he vahaʻa ʻo ʻenau ngaahi foungá mo e ngaahi founga ʻa e ʻEikí. ʻOku nau tokoniʻi kitautolu ke tau hoko ko ha tokotaha ʻokú ne fusiakiʻi mai mo ha ngaahi kaungāmeʻa lelei kehe. Pea ʻoku nau tokoniʻi kitautolu ke hoko ko ha tokotaha ʻa ia ʻe lava ʻe ha hoa māoniʻoní ʻo fili ke nofo mo ia ʻi he taʻengatá. Kapau ʻokú ke fie maʻu e ngaahi kaumeʻa peheé, fehuʻi hifo pē kiate koe, ko ha kaumeʻa pehē nai au ki
he niʻihi kehé? Ko ha tokotaha tatau nai au mo e tokotaha ʻoku ou loto ke hoko ko hoku hoa taʻengatá?
Ko e taimi ʻeni ke ke teuteu ai ki hoʻo ngāue fakafaifekaú. Te ke lava ʻo ngāue fakafaifekau taimi kakato ʻo fakatatau pē ki he tūkunga fakafoʻituitui ʻokú ke ʻi aí. Neongo ʻoku mahuʻinga ʻeni, ka ke manatuʻi ʻoku toe mahuʻinga ange ke ke hū he temipalé peá ke toki ʻalu ʻo ngāue fakafaifekaú. Ko e ngāue fakafaifekaú ko ha faingamālie taʻe hano tatau ia ke tauhi ai e ngaahi fuakava naʻe fai ʻi he temipalé ʻaki hono moʻuiʻaki e fono ʻo e fakatapuí—ʻa hono foaki kakato ho taimí, ngaahi meʻafoakí, mo ho ngaahi talēnití ki he ʻEikí, pea tauhi kiate Ia ʻaki ho lotó, iví, ʻatamaí, mo e mālohí kotoa. Kuó u ongoʻi maʻu pē ko e taʻu ʻe ua te ke ngāue aí, ko hano vahehongofuluʻi ia ʻo ho taimí ʻi he ngaahi ʻuluaki taʻu ʻe uofulu mā taha ʻo hoʻo moʻuí. Pea neongo he ʻikai te ke lava ʻo ngāue fakafaifekau taimi kakato, ʻe lava ke ke teuteu atu ki ha ʻaho ʻi he kahaʻú, ʻa ia ko e taimi totonú ia, ke ke ʻalu ai ki he temipalé pea fakahoko ha ngaahi fuakava taʻengata ke ke lava ai ʻo maʻu ho
ngaahi tāpuaki taʻengatá.
Ko e taimi ʻeni ke ke teuteu ai ki he akó mo haʻo ngāue maʻuʻanga moʻui. ʻI hoʻomou hoko ko e kau talavou ʻo e Lakanga Taulaʻeiki Faka-ʻĒloné, ʻoku mou teuteu ai ki he moʻuí. ʻE fakafeʻungaʻi koe ʻe hoʻo ako mālohi he taimi ní ke ke maʻu ʻi he kahaʻú ʻa e faleʻi naʻe fai ʻe Palesiteni Hingikelií—ke ke maʻu ʻa e feinga ako kotoa pē te ke lavá. 3 Fili he taimí ni ke fai ho lelei tahá ʻi he akó mo e ngāué. Hili ia pea maʻu ho ngaahi faingamālié, kuó ke ʻosi mateuteu ai ke tali mo fakaʻaongaʻi kinautolu. ʻOku totonu ke tau manatuʻi kotoa pē: “ʻOku foaki ha meʻa-foaki ki he tangata takitaha.”4 Fakatupulaki hoʻo ngaahi meʻafoakí pea mo ho ngaahi talēnití. ʻE kau talavou, hanga ʻo filifili ʻi he faʻa lotu ʻa hoʻomou ngaahi kalasí, ngaahi polokalama akó, mo e ngaahi ngāue ko ia te ne teuteuʻi kimoutolu ki ha ngaahi faingamālie mo ha ngaahi fatongia lahi ange ʻi he kahaʻú.
Ko e taimi ʻeni ke mou talangofua aí. ʻI he maama fakalaumālié, naʻe ʻikai ke tau fili ke talangofua fakakonga pē ki he finangalo ʻo e ʻOtuá. Naʻe ʻikai ke tau fili pe ko e fē ʻa e ngaahi konga ʻo e palani taʻengatá ke tau muimui aí. Ne u ako e lēsoni ko iá ʻi he pō ne mau fuofua ako puna tautau toko taha aí, he naʻe tuku mai e fakahinohino kiate kimautolu hono kotoa, “ʻOua naʻa mou puna vilo takai ʻi he poʻulí. Ko e kau pailate akoako pē kimoutolu pea kuo teʻeki akoʻi kimoutolu ki ai.” Naʻe fili ki mui ai ha pailate lelei pea ko haku kaumeʻa, ke ne talangataʻa ki he fekau ko iá. ʻI heʻene puna mo vilo takatakai he langí feʻunga tonu hifo mo Tekisisí, naʻá ne sio atu he sioʻata muʻá mo ne pehē pē ʻokú ne sio ki he ngaahi fetuʻu ʻi ʻolunga ʻiate iá, ta ko ʻene sio ʻaʻana ia ki he maama ʻo e ngaahi keliʻanga lolo ʻi laló. Naʻá ne ninimo: naʻe hanga ʻe he fusi ʻe he kalāvité ʻa hono vakapuná ʻo ʻai ke hangē ʻokú ne puna lelei peé, kae lolotonga iá kuó ne mafuli ʻo ʻalu ʻa lalo ki ʻolunga pea ʻolunga
ki lalo. ʻI heʻene fusiʻi e meʻa ke toe māʻolunga hake ai ʻene puná, naʻe tūʻulu hono vaká ʻo tuiʻi e keliʻanga lolo ʻi laló.
Ka ʻokú ke puna ʻi ha vakapuna pea ʻokú ke fetongi māmālie pē ho tuʻuʻangá ʻaki ha tikili ʻe taha, he ʻikai lava ho telingá ʻo tala ʻa e fetongí. Ngaahi tokoua kei talavou mo matuʻotuʻa, ko e taimi ʻoku tau fili ai ke tau talangofua fakakonga peé, ʻoku tau fetongi hotau vā fetuʻutaki mo e ʻEikí—pea ko e kiʻi fetongi siʻisiʻi pē ʻeni ʻi he taimi taki taha. ʻI he ngāue mai ʻa e ngaahi mālohi ʻo e filí ke kākaaʻi kitautolú, ʻoku ʻikai ke tau lava ʻo tala, pea ʻoku hoko leva kiate kitautolu ha ninimo fakalaumālie. Lolotonga iá ʻe hangē ʻoku tau fononga pē ki ha feituʻu malú, ka ko hono moʻoní ʻoku tau huʻu atu ki ha fakatuʻutāmaki. Naʻa tau fili kakato ke tau muimui ki he ʻEikí ʻi he maama fakalaumālié. Ka tau muimui ʻi he founga ko iá ʻi heʻetau moʻui he māmaní, te tau lava ʻo taki taha foki ki heʻetau Tamai Hēvaní.
Ko e taimi ʻeni ke fakaʻaongaʻi totonu ai hotau taimí. “Ko e moʻuí ni ko e taimi ia ki he tangatá ke teuteu ai ke feʻiloaki mo e ʻOtuá.”5 ʻOku ou fakamoʻoni atu ʻe feʻunga pē ʻa homou taimi ʻi he māmaní ʻo kapau te mou ako ke fakaʻaongaʻi fakapotopoto ia ʻi hoʻomou kei talavoú. “ʻOiauē, manatu, ʻe hoku foha, ʻo ako ʻa e potó ʻi hoʻo kei siʻí; ʻio, ako ʻi hoʻo kei siʻí ke tauhi ʻa e ngaahi fekau ʻa e ʻOtuá.”6
Ko e taimi ʻeni ke maluʻi ai ʻa hoʻo totonu ko e fānau ʻa e ʻOtuá. ʻI he ofi ke ngata e moʻui ʻa e palōfita ʻo e Fuakava Motuʻa ko Sēkopé, naʻá ne foaki ha tāpuaki fakatamai ki hono ngaahi fohá takitaha. Ko Lūpeni naʻe lahi tahá pea naʻe ʻaʻana ʻa e totonu ki he ʻuluaki fānaú—ko ha ngaahi tāpuaki ʻeni naʻe fakataumuʻa pē maʻana. Ka naʻe pehē ʻe heʻene tamaí kia Lūpeni, “ʻOkú ke ngaueue koe ʻo hangē ko e vaí, pea ʻe ʻikai te ke hoko ʻo lelei.”7 Kiʻi fakakaukau angé ki hono ʻuhinga ʻo e ngaueue ʻo hangē ko e vaí. Ko e taimi ʻoku vela ai e vaí, ʻoku mole hono maó ki he ʻeá. Ko e taimi ʻoku momoko aí, ʻoku fefeka. Ko e taimi ʻoku ʻikai fakatafe fakalelei aí, ʻokú ne holoki e kelekelé peá ne fakaʻauha ʻa e meʻa kotoa pē ʻe tafe atu aí.
ʻI hoʻomou hoko ko e kau maʻu Lakanga Taulaʻeiki Faka-ʻĒloné, ʻoku ʻi ai foki mo hoʻomou totonu ʻi hoʻomou hoko ko e fānau ʻa e ʻOtuá. ʻOku ou fakatukupaaʻi kimoutolu ke mou talangofua mo mālohi. ʻOku ou fakatukupaaʻi kimoutolu ke mou tauhi ki hoʻomou fakapapau mo e tukupā ke muimui ʻi he Fakamoʻuí. Tuʻu fakamakatuʻu ʻi hono moʻuiʻaki ʻo e ongoongoleleí. ʻOku ʻikai ʻilo ʻe hatau taha ʻa e ngaahi tāpuaki ko ia ʻoku fakatatali mai maʻatautolú. Ko e founga pē ʻe mole ai meiate kitautolu e ngaahi tāpuaki ko iá ko haʻatau talangataʻa. ʻOua naʻa mou fetongiʻaki homou tofiʻa taʻengatá ʻa e ngaahi meʻa ʻo e māmaní. Tau talangofua mo teuteu he taimí ni ke fakaʻapaʻapaʻi, maluʻi pea maʻu ʻetau totonu nāunauʻia ko e fānau ʻa e ʻOtuá.
ʻE kau talavou, ko e mālohi mahuʻinga kimoutolu ʻo e konga kau ʻa e ʻEikí, ko e kau tau kei talavou ʻo e ngaahi ʻaho ki mui ní.” 8 “Ko e meʻa ko ia ʻoku [mou] tūtuuʻí, ko e meʻa pē ia te [mou] utú.”9 ʻI heʻeku fakakaukau atu ki he ututaʻu nāunauʻia ʻoku hanga mei muʻá, ʻoku ou fakaafeʻi ai kimoutolu ke mou fakalaulauloto ki he founga te mou fai ʻaki hoʻomou ngaahi filí ʻi he taʻu ʻe hongofulu ka hoko maí.
ʻOku ʻomi ʻe he fono ʻo e ututaʻú ha founga ke faiʻaki e ngaahi filí. Teuteuʻi koe ʻaki haʻo lotu ʻi hoʻo ʻiloʻi ko ia ko e foha koe ʻo e ʻOtuá. Tō ʻa e ngaahi tengá ʻaki hoʻo talanoa mo kinautolu te nau ʻoatu ʻa e faleʻi leleí: hili ko ia peá ke fekumi ki he tataki ʻa e Laumālie Māʻoniʻoní. Tuku ke tupu hake ʻa e ngaahi tenga ʻo e ueʻi fakalaumālié. ʻOku fie maʻu ke tokangaʻi e ngaahi fakakaukau ʻoku mafoa haké. ʻOku fie maʻu ha taimi ke nau matuʻotuʻa ai. ʻE fakahoko ʻe he maama ʻo e ueʻi fakalaumālié ʻa e ututaʻu fakalaumālie ko ia ʻe hoko mai ʻi heʻetau fehuʻi ki heʻetau Tamai Hēvaní ʻi he lotu pe kuo tau fai koā ha fili ʻoku totonu. ʻI heʻetau muimui ʻi he maama ko iá, ʻe mole atu ʻa e fakapoʻulí pea ʻe tupulaki ʻa e maama ko iá “ʻo ngingila ange kae ʻoua ke aʻu ki he ʻaho haohaoá”10—ʻa e ʻaho ko ia te tau ʻi he ʻafioʻanga ai ʻo ʻetau Tamai ʻi Hēvaní.
Ko hono fakaʻosí, ʻai ke ke ʻi ai. Naʻa tau ʻi ai kotoa pē ʻi he Fakataha Alēlea ʻi he Langí ke fili e palani lahi ʻo e fiefia ʻoku tau fiefia ai he taimi ní. ʻE kau talavou, ko e taimi ko ia kuó ke fai ai ha fakapapau kiate koe pē, ki ho fāmilí, ki hoʻo pīsopé, ki ho pule ngāué, ʻai ke ke ʻi ai. Ko e taimi ʻoku totonu ke ke ʻi he lotú, Mutualé, pe fakahoko ha fatongia ʻi he lakanga fakataulaʻeikí, ʻai ke ke ʻi ai. Ka hokosia e taimi ke ke ʻosi ai mei he akoʻangá pe ngaahi polokalama akó, ʻai ke ke ʻi ai. Ka hokosia e taimi ke ke ngāue fakafaifekau aí, ʻai ke ke ʻi ai. ʻAi ke ke ʻi ai ʻi he taimi ʻoku tūʻulultui ai ʻi he ʻōlita ʻo e temipale māʻoniʻoni ʻo e ʻOtuá ʻa e finemui ʻokú ke ʻofa taha aí, (kae ʻoua naʻá ke hoko ko ha fakamoʻoni pē). Ko e taimi ʻoku fakatahataha ai ho fāmilí ʻi he puleʻanga fakasilesitialé, ʻai ke ke ʻi ai. Ko e taimi ʻoku talitali mai ai ʻa e Fakamoʻuí ke fakafeʻiloaki kiate koe ʻi hoʻo foki ange mo e lāngilangi
mei hoʻo moʻui ʻi he māmaní, pea finangalo hoʻo Tamai Hēvaní ke ne ʻōʻōfaki koe ʻaki Hono toʻukupu ʻofá, ʻai ke ke ʻi ai.
Hili e taʻu ʻe hongofulu ʻo hono fai hoʻo ngaahi filí, laka atu peá ke fakalakalaka. “Tuʻu hake, ʻE kau tangata ʻa e ʻOtuá!”11 Hoko ko ha ngaahi husepāniti mo ha ngaahi tamai faivelenga. Fai mālohi. Tuʻu hake pea moʻui taau mo e ngaahi ʻofefine ʻo e ʻOtuá ʻoku nau poupouʻi mo fakamālohia kitautolú. ʻOfa ke tau fakaʻapaʻapaʻi kinautolu ʻoku hangē ko ʻetau fakaʻapaʻapaʻi ʻa e ʻEikí.
ʻOku ou fakamoʻoni kiate kimoutolu ʻoku ʻafioʻi ʻe hoʻomou Tamai Hēvaní hoʻomou ʻi heni he pōní. ʻOku mou kau ki Heʻene konga kau māfimafí, ʻa ia [“kuo fokotuʻutuʻu maau, ko e kau tau uouangataha, mālohi mo fefeka, ʻoku muimui ʻi honau Takí mo hiva fiefia: Ikuna, ikuna, ʻIate ia kuó Ne huhuʻi ʻa kitautolú! Ikuna, ikuna, ʻIa Sīsū Kalaisi, ko hotau ʻEikí!”]12 ʻOkú Ne ʻi ai. Ko Hono finangaló ke tau ʻi ai mo Ia, ʻokú Ne tataki kitautolu, pea ʻoku tau ikuna ʻiate Ia, pea ko ʻeku fakamoʻoní ia ʻi he huafa ʻo Sīsū Kalaisí, ʻēmeni.
Maʻuʻanga fakamatalá
1. “ʻA e Kau Tau ʻa e ʻOtua,” Ngaahi Himi, fika 154.
2. Luke 18:22.
3. Vakai, “Ko ha Faleʻi mo ha Lotu ʻa e Palōfitá maʻá e Toʻu Tupú,” Liahona, ʻEpeleli 2001, 33.
4. T&F 46:11.
5. ʻAlamā 34:32.
6. ʻAlamā 37:35.
7. Sēnesi 49:4.
8. Vakai, ʻAlamā 53.
9. T&F 6:33.
10. T&F 50:24.
11. Hymns, no. 323.
12. Ngaahi Himi, fika 154.
Previous
