Vete Malí ʻEletā Dallin H. Oaks ʻO e Kōlomu ʻo e Kau ʻAposetolo ʻe Toko Hongofulu Mā Uá ʻOku ʻikai fie maʻu ki he nofo mali leleí ia ha tangata pe fefine haohaoa. ʻOkú ne fie maʻu pē ha tangata mo ha fefine ʻokú na loto fiemālie ke na faifeinga fakataha ki he haohaoá. ʻOku ou ongoʻi ke u lea atu ʻo fekauʻaki mo e vete malí. Ko ha kaveinga pelepelengesi, he ʻokú ne langaki ha ngaahi ongo mālohi ʻi he kakai ʻoku uesia aí, ʻi ha ngaahi founga kehekehe. ʻOku lau ʻe ha niʻihi ko kinautolú pe ko siʻenau fānaú, ko ha kau fuahia ʻi he vete malí. ʻOku pehē ʻe ha niʻihi kehe ia ʻoku nau monūʻia kinautolu ai. ʻOku pehē ʻe ha niʻihi ko e vete malí ko ha fakaʻilonga ʻo e taʻe-malava. Ka ʻoku pehē ʻe ha niʻihi ia ko ha haoʻanga ia ʻoku fie maʻu mei he nofo malí. Tatau ai pē pe ko e hā, ka ʻoku uesia ʻe he vete malí ha tokolahi fau ʻo e ngaahi fāmili he Siasí. Ko e hā pē hoʻo fakakaukaú, kātaki ka ke fanongo, ka u feinga ke lea mahino ʻo fekauʻaki mo e haʻahaʻa ʻo e vete malí ʻi he feohi ʻa e fāmili taʻengata ko ia ʻoku tau kumia ʻi he palani ʻo e ongoongoleleí. ʻOku ou leá ni ʻi he loto hohaʻa, ka ʻi he fakatuʻamelie. I. ʻOku tau moʻui ʻi ha māmani ʻoku tuʻu uesia ai ʻa e foʻi fakakaukau ʻo e malí pea angamaheni ʻaki e vete malí. Ko e foʻi fakakaukau ko ia ʻoku pehē ʻoku tokanga lahi ʻa e sōsaietí ki hono paotoloaki ʻo e nofo malí koeʻuhí, ko e lelei fakalūkufuá pea mo e lelei ʻa e ongomātuʻá mo ʻena fānaú, kuo fetongi ia ʻi ha tokolahi ʻe he fakakaukau ko ia, ko e malí ko ha feohi fūfūnaki pē ʻi ha vā ʻo ha ongomeʻa lalahi ʻokú na felotoi, ka ʻe lava ke fakangata ʻo ka fie maʻu.1 Ko e ngaahi fonua ne ʻikai haʻanau lao vete malí, kuo ʻi ai ʻenau lao pehē, pea ko e lahi taha ʻo e ngaahi puleʻanga ʻoku nau fakangofua ʻa e veté, kuo nau toe fakafaingofuaʻi ange ʻene lavá. Meʻapango he ko e fakatatau mo e lao ʻo e felotoi ke veté, ʻe faingofua ange ke veteki ha mali mo ha taha ʻoku ʻikai toe fie maʻu, ʻi ha vā ʻo ha taha ngāue ʻoku ʻikai kei fie maʻu ʻe hono pule ngāué. Kuo lau ʻe ha niʻihi ia ʻa e ʻuluaki malí ko ha “kamakamata pē,” ʻo hangē ha kiʻi fale ʻoku ʻahiʻahi fakaʻaongaʻi ʻe ha taha ki muʻa pea toki hikí. ʻOku lahi e ngaahi haʻahaʻa ʻi he hōloa ko ia e foʻi fakakaukau ʻoku tolonga mo mahuʻinga ʻa e nofo malí. Kuo hanga ʻe he vetemali ʻa e mātuʻá ʻo tākiekina e fakakaukau ʻiloa ko ia, tokua ko e malí ko ha fakapōpula ʻokú ne taʻofi ʻa e lavameʻa fakafoʻituituí, pea ʻoku fakasītuʻaʻi leva ai ʻe ha kakai kei talavou ʻe niʻihi ʻa e malí. ʻOku tokolahi ha niʻihi kuo mali, ʻo ʻikai ke nau lotoʻaki kakato, pea tuʻu teu pē ke hola ʻi ha hā mai ha palopalema. ʻI he tafaʻaki ʻe tahá, kuo ʻosi fakatokanga mai ʻa e kau palōfita ʻo onopōní, ko hono lau ko ia ʻo e nofo malí ko ha “kiʻi aleapau pē ʻe lava ke fai kapau ʻokú te loto ki aí . . . pea veteki pē ʻi he ʻuluaki palopalemá . . . ko ha kovi ia ʻoku taau ke fakahalaki moʻoni,” ʻo tautautefito kapau ʻe faingataʻaʻia ai ʻa e fānaú.2 ʻI he kuonga muʻá, pea naʻa mo ha ngaahi lao fakamatakali ʻi ha ngaahi fonua ʻe niʻihi ʻoku ʻi ai hatau kāingalotu, ʻoku maʻu ʻe he kakai tangatá ia ha mālohi ke veteʻi honau malí ʻi ha kiʻi ʻuhinga maumautaimi. Ko hono fakamoʻulaloaʻi taʻe māʻoniʻoni ko ia ʻo e kakai fefiné, naʻe ʻikai ke tali ia ʻe he Fakamoʻuí, ʻi heʻene fakahā: “Ko ia, naʻe [kātakiʻi] ai ʻe Mōsese ʻa hoʻomou tukange homou ʻunohó: ka naʻe ʻikai pehē mei he kamataʻangá. “Pea ʻoku ou tala atu kiate kimoutolu, Ko ia, ia ʻe tukuange hono ʻunohó, [tuku kehe pē kapau ko haʻane] tono tangata, pea [mali] ia mo ha tokotaha kehe, ko e tono fefine ia: pea ko ia ia ʻe [mali] mo ia kuo tukuangé, ko e tono fefine ia” (Mātiu 19:8–9). Ko e faʻahinga mali ko ē ʻoku fie maʻu ki he hākeakiʻí—ʻoku tolonga ʻo taʻengata pea fakaʻotua hono leleí—ʻoku ʻikai fakakaukau ia ki he veté. ʻOku mali ʻa e kakaí ʻi he temipale ʻo e ʻEikí ki he taʻengatá. Ka ʻoku ʻi ai ha ngaahi mali ʻe niʻihi ʻoku ʻikai huʻu ki he taumuʻa fisifisimuʻa ko iá. Koeʻuhí, “ko e fefeka [hotau] lotó,” pea ʻoku ʻikai fakamālohiʻi ʻe he ʻEikí ʻa e ola ʻo e tuʻunga moʻui fakasilesitalé. ʻOkú ne fakangofua ʻa e taha kuo veté ke toe mali ʻo ʻoua naʻa fakameleʻi ʻe he ʻuli ʻo e angaʻulí, ʻa ē ʻoku fakamahinoʻi ʻi he fono ʻoku māʻolunga angé. Kapau naʻe ʻikai fai ʻe he taha naʻe veté ha angahala mamafa, ʻe lava pē ke ne maʻu ha lekomeni temipale ʻi he tuʻunga moʻui taau tatau pē ʻoku ʻai ki he toenga ʻo e kāingalotú. II. ʻOku tokolahi siʻa kāingalotu lelei ʻo e Siasí kuo nau vete mali. ʻOku ou fie tomuʻa lea kiate kinautolu. ʻOku mau ʻilo ko homou tokolahi ko e tonuhia-ʻa-faiekina—ko ha kāingalotu ne toutou maumauʻi pe liʻaki ʻe honau hoa ki muʻá, ʻa e ngaahi fuakava toputapú mo taʻe fie fakahoko honau fatongia fakaemalí ʻi ha taimi lōloa. ʻOku ʻiloʻi tonu ʻe he kāingalotu kuo nau foua e tūkunga peheé, ha meʻa ʻoku kovi ange ia ʻi he vete malí. Ka mokoteilo leva ha nofo mali pea ʻikai pē ha ʻutu-ʻe-toe-hakea ke fakaake ʻaki, ʻe fie maʻu leva ha founga ke fakangata ʻaki. Kuó u mamata heni ʻi he ʻOtu Filipainí. Hili pē ha ʻaho ʻe ua ʻo ʻena mali temipalé, kuo liʻaki ʻe he husepānití ia hono uaifí pea kuo teʻeki ke lōngona mei ai ʻi ha taʻu ʻeni ʻe hongofulu tupu. Ne hola ha fefine mali ʻo veteʻi hono malí ʻi ha fonua muli, kae kei nofo ʻefihia fakaemali pē hono husepānití, ʻo fakatatau mo e lao ʻo Filipainí. Koeʻuhí, ʻoku ʻikai ha kupu he laó ʻe fakangofua ai ha vete mali, ko ia he ʻikai maʻu ʻe he siʻi niʻihi tonuhia ia ko ʻení ha founga ke fakangata ai honau tuʻunga malí, kae hoko atu ʻenau moʻuí. ʻOku mau ʻilo, ʻoku fakameʻapangoʻia siʻa niʻihi ʻi he manatu ki heʻenau vete-malí, he ko honau foʻui, pe ʻi ai pē hanau foʻui ai. ʻOku ʻilo ʻe he taha kotoa kuó ne foua e vete malí, ʻa ʻene uhú, mo ʻene fie maʻu ʻa e mālohi fai-fakamoʻui pea mo e ʻamanaki ʻoku maʻu ʻi he Fakaleleí. ʻOku ʻi ai e mālohi fai-fakamoʻuí pea mo e ʻamanaki lelei ko iá, maʻanautolu mo ʻenau fānaú foki. III. Te u lea atu he taimí ni ki he kāingalotu malí, tautautefito ki ha taha ʻoku fakakaukau ke vete mali. ʻOku ou tapou mālohi atu kiate koe mo kinautolu ʻoku nau faleʻi koé, ke ke ʻiloʻi, ko e lahi taha ʻo e ngaahi palopalema ʻo e nofo malí, ʻoku ʻikai ko hono faitoʻó ke vete, ka ko e fakatomala. Taimi lahi, ʻoku ʻikai tupu ia mei hoʻomo taʻe fetaulakí, ka mei he siokitá. ʻOku ʻikai ko e ʻuluaki sitepú ke māvae, ka ko ʻete liliu. ʻOku ʻikai taha pē ʻa e faitoʻó ke vete, pea ʻokú ne faʻa fakatupu ʻe ia ha loto mamahi ka fuoloa. Kuo hanga ʻe ha savea fakaemāmani lahi ʻo fekauʻaki mo e tuʻunga fiefia ki muʻa pea mo e hili “ha meʻa lahi ʻoku hoko he moʻuí,” ʻo fakahaaʻi mai ʻoku lava ke fakaakeake lelei ange ha taha mei he mate hano mali, ʻi haʻane vete-mali.3 Ko e kakai ko ia ʻoku nau pehē ʻe hanga ʻe haʻanau vete mali ʻo fakaleleiʻi ʻa e fepakipakí, ʻoku nau ʻiloʻi ki mui ange ʻoku toe faingataʻa ange ia kiate kinautolu, he ʻokú ne ʻomi ʻe ia ha palopalema lahi ange pea toki muimui mai e nunuʻá ʻi he ʻosi e veté—tautautefito ka ʻi ai ha fānau—ʻo ne fakatupu ha ngaahi palopalema foʻou. Tomuʻa fakakaukauʻi ʻa e fānaú. Koeʻuhí ʻoku fakamavaheʻi ʻe he veté siʻi ngaahi fiemaʻu ʻa e fānaú mei he fiemaʻu ʻa e mātuʻá, ko ia ʻoku ʻuluaki uesia leva ʻa e fānaú. ʻOku talamai ʻe he kau mataotao ʻo e moʻui fakafāmilí, ko e tefitoʻi tupuʻanga ʻo e hōloa ʻi he tuʻunga moʻui ʻa e fānaú, ko e vaivai ko ia ʻo e nofo malí, he ʻoku holoki ʻe he moveuveu ʻo e fāmilí ʻa e tokanga ʻa e mātuʻá ki he fānaú.4 ʻOku tau ʻilo ko e siʻi fānau ko ia ʻoku ohi hake ʻi he ʻapi ʻoku toko taha ai pē mātuʻá hili ʻa e veté, ʻoku nau tuʻu uesia lahi ange ke ngāue hala ʻaki ʻa e faitoʻo kona tapú pe kava mālohí, angaʻuli fakasekisualé, kovi mo e akó, mo hano ngaohikovia kehekehe. Ka ai ha ongomātuʻa ʻoku ʻi ai haʻana palopalema fakamali ʻoku faingataʻa, ʻoku tonu ke na sio ki heʻena pīsopé. ʻI heʻene hoko ko e fakamaau ʻa e ʻEikí, te ne fai ha faleʻi pea mahalo mo ha fakatonutonu ko ē ʻe fakamoʻui ai kinauá. ʻOku ʻikai faleʻi ʻe he kau pīsopé ʻa e kāingalotú ke nau vete, ka te nau lava ʻo tokoniʻi ʻa e kāingalotú ʻi he nunuʻa ʻo ʻenau filí. Fakatatau mo e fono ʻa e ʻEikí, ko e malí, ʻo hangē ko e moʻui ʻa e tangatá, ko ha meʻa moʻui ʻoku mahuʻinga. Kapau ʻoku puke hotau sinó, te tau feinga ke fakamoʻui ia. ʻOku tonu ke pehē pē mo ʻetau nofo malí, pea kapau te tau fekumi ki he ʻEikí, te Ne tokoniʻi mo fakamoʻui kitautolu. ʻOku tonu ke fai ʻe he mātuʻa mali kotoa pē ʻi he Siasí ʻa e meʻa te nau lavá, ke fakahaofi ʻenau nofo malí. ʻOku tonu ke nau muimui ki he faleʻi lelei ʻi he pōpoaki ʻa e Kau Palesitenisī ʻUluakí ʻi he Liahona ʻo ʻEpeleli 2007.5 Koeʻuhí ke taʻofi ʻa e meʻa ko ē ʻoku ui ko e “taʻe fetaulakí,” ʻoku tonu ke na hoko ko e ongo kaumeʻa lelei taha, ʻo angaʻofa mo fakaʻatuʻi, feongoʻiʻaki ʻena ngaahi fiemaʻú, mo feinga maʻu pē ke fiefia ʻa e taha ko ʻeé. ʻOku tonu ke na fekoekoeʻi ʻi he meʻa fakapaʻanga ʻo e fāmilí, ʻo fetākinima ʻi hono mapuleʻi ʻena ngaahi holi ki he meʻa fakaetuʻasinó. ʻOku moʻoni ʻe ʻi ai pē taimi ʻe tōnounou ai ha taha pea kafo leva ʻa e tahá mo ongoʻi mamahi. Ka hoko ia, ʻoku tonu ke fuatatau ʻe he taha ʻoku tonuhiá, ʻa e mamahi kuo hokó mo e ngaahi lelei ʻo e kuo hilí kae ʻumaʻā ʻa e lelei lahi ange ʻe ala hoko he kahaʻú. ʻOua ʻe kukuta ʻa e ngaahi fehālaaki ʻo e kuo hilí, ʻo toutou taʻaki hake mei he taimi ki he taimi. ʻOku fakatupu ʻauha ʻa e kukutá ʻi he vā fakamalí; ʻoku fakaʻotua ʻa e faʻa fakamolemolé (vakai, T&F 64:9–10). Kolea e fakahinohino ʻa e Laumālie ʻo e ʻEikí ke fakamolemoleʻi ʻa e fehālākí (ʻo hangē ko ia kuo akoʻi lelei mai ʻe Palesiteni Fausí), ke ikunaʻi hoto ngaahi vaivaí mo fakaleleiʻi ʻa e ngaahi fetuʻutakí. Kapau kuó mo hōloa ki he tuʻunga tōlalo ʻaupito, ʻo mālō pē hoʻomo nofo mali, kātaki ka mo fetākinima, tūʻulutui fakataha, ʻo lotua moʻoni ha tokoni mo e mālohi fai-fakamoʻui ʻo e Fakaleleí. ʻE ʻomi kimoua ʻe hoʻomo tautapa fakataha ʻi he loto fakatōkilaló ke mo toe vāofi ange pea ki he ʻEikí foki, pea ʻe tokoni ia ʻi hoʻomo fāifeinga hake ki he maʻumaʻuluta ʻi he nofo malí. Ko ha vakai ʻeni ʻa ha pīsope poto mo taukei ʻi hono faleʻi ʻo e kāingalotu ʻoku ʻi ai ʻenau palopalema fakaemalí. Naʻá ne pehē, fekauʻaki mo kinautolu ʻoku iku veté: “Ko e fakalūkufuá, ʻoku pehē ʻe he ongomātuʻa pe taha ko iá, ʻoku nau ʻiloʻi ʻoku ʻikai ko ha meʻa lelei ʻa e veté, ka ʻoku nau kikihi kotoa tokua ʻoku kehe pē tūkunga ia ʻoku nau ʻi aí. “ʻI he fakalūkufuá, ʻokú na nofo pē ʻi he foʻui honau malí kae siʻi haʻanau tukuakiʻi ki honau ʻulungāangá. Kuo mōlia ʻa e fetuʻutakí ia. “Fakalūkufuá, ne nau toe sio ki mui, ʻo ʻikai fie siʻaki ʻa e ngaahi tōʻonga hala he kuo hilí, ka nau hoko atu. “ʻI he taimi ʻe niʻihi, ne kau ai ha angahala mamafa, ka ʻi he taimi lahi, ne ʻʻikai pē ke na toe feʻofaʻaki,’ peá na pehē, “ʻOku ʻikai ke ne toe feau ʻeku ngaahi fie maʻú’ pe ʻKuo liliu ia.’ “ʻOku hohaʻa ʻa e taha kotoa fekauʻaki mo ʻene kaunga kovi ki he fānaú, ka ʻoku meimei ko e aofangatukú maʻu pē, “e kau kovi ange kiate kinautolu kapau te ma kei fakataha pē mo faʻa kē.’” ʻI he tafaʻaki ʻe tahá, ko e ongomeʻa ko ē ne muimui ki he faleʻi ʻa e pīsopé ni mo nofo fakatahá, kuo aʻu ʻo lelei ange ʻena nofo malí. Naʻe kamata e fakakaukau ko iá ʻi heʻena felotoi ke tauhi ʻa e ngaahi fekaú, faimālohi he ʻalu ki he lotú, lau folofola mo lotú pea mo ngāue ke fakaleleiʻi ʻena ngaahi tōnounoú. Naʻá na “fakatokangaʻi hono mahuʻinga mo e mālohi ʻo e Fakaleleí ki hono malí pea mo ia foki” pea “naʻá na faʻa kātaki mo toutou feinga pē.’ Ko e taimi naʻe fakaʻaongaʻi moʻoni ai ʻe he ngaahi mātuʻa naʻá ne faleʻí ʻa e ngaahi meʻa ko ʻení, ʻo fakatomala mo feinga ke fakahaofi ʻenau nofo malí, naʻe pehē leva ʻe he pīsopé “naʻe peseti ʻe 100 hono fakahaofi ʻena nofo malí.” Naʻa mo kinautolu ʻoku nau pehē ko honau malí pē ʻoku tonu ke tukuakiʻí, ʻoku ʻikai tonu ke nau faʻa fakavavevave. Ne pehē ʻi ha fakatotolo fakaʻāuliliki ʻe taha, “ʻoku ʻikai ha fakamoʻoniʻi ia kuo hanga ʻe he veté pe māvaé ʻo ʻai e kakai lalahí ke nau toe fiefia ange, mei heʻenau kei nofo fakataha taʻefiefia mo honau malí. Naʻe lipooti ʻe ha mātuʻa mali ʻe ua mei he tolu kotoa pē, naʻa nau fiefia ange ʻi he ʻosi atu ha taʻu ʻe nima, neongo naʻa nau mamahi ʻi heʻenau nofo malí.”6 Ne fakamatalaʻi ʻe ha fefine naʻe siʻi kei ʻūkuma pē ʻi ha nofo mali faingataʻa ʻi ha ngaahi taʻu lahi, kae ʻoua kuo lalahi ʻa e fānaú: “Ne ʻi ai ha tafaʻaki ʻe tolu ki heʻema malí—ko hoku husepānití mo au pea mo e ʻEikí. Naʻá ku pehē, kapau ʻe kātaki ha tafaʻaki ʻe ua, te ma kei lava pē ʻo fakataha.” Ko e mālohi ko ia ʻo e ʻamanaki leleí ʻoku hā ʻi he ngaahi sīpingá ni, ʻoku faʻa fakapaleʻi ʻaki ʻa e fakatomalá mo e liliú, ka ʻi he taimi ʻe niʻihi ʻoku ʻikai hoko. ʻOku kehekehe fau ʻa e ngaahi tūkunga fakafoʻituituí. He ʻikai ke tau lava ʻo mapuleʻi pea he ʻikai ke tau haʻisia ki he fili ʻa e kakai kehé, ʻo aʻu ki haʻane fakamamahiʻi lahi kitautolu. ʻOku ou tui pau ʻoku ʻofa mo tāpuekina ʻe he ʻEikí siʻi ngaahi husepāniti mo e uaifi ʻoku feinga ʻi he ʻofa ke tokoniʻi honau hoa ʻoku fekuki mo e faʻahinga palopalema lahi peheé, ʻo hangē ko e ponokalafí pe ngaahi tōʻonga ʻulungāanga kehe pe nunuʻa taimi lōloa ʻo hano ngaohikovia ʻi he kei siʻí. Ko e hā pē hono olá, neongo pe ko e hā hano faingataʻa e meʻa ʻoku hokó, kuó ke maʻu ʻa e talaʻofa ko ia he ʻikai taʻofi meiate koe ʻa e ngaahi tāpuaki ʻo e feohi fakafāmili taʻengatá, kapau te ke ʻofa ki he ʻEikí, tauhi ʻEne ngaahi fekaú, mo fai pē hoʻo lelei tahá. Ko e taimi naʻe “tofanga ai he mamahi lahí” ʻa e talavou ko Sēkopé, ʻi he angafai ʻa e kau mēmipa kehe hono fāmilí, naʻe fakapapauʻi ange ʻe he tamai ko Līhaí, “ʻOkú ke ʻilo ʻa e māfimafi ʻo e ʻOtuá; pea te ne fakatapui ʻa hoʻo ngaahi faingataʻaʻiá ke hoko ko ha tāpuaki kiate koe” (2 Nīfai 2:1–2). Ko e meʻa tatau pē ne fakapapauʻi mai ʻe he ʻAposetolo ko Paulá, “ʻoku fengāueʻaki fakataha ʻa e ngaahi meʻa kotoa pē ke lelei ai ʻa kinautolu ʻoku ʻofa ki he ʻOtuá” (Loma 8:28). IV. Fakaʻosí, te u lea nounou kiate kinautolu ʻoku fakakaukau malí. Ko e founga lelei taha ke fakaʻehiʻehi ai mei ha vete mo ha mali taʻe faitotonu, anga kovi mo fakamālohi, pe taʻe poupou, ko e ʻoua te ke mali mo ha taha pehē. Kapau ʻokú ke fie mali lelei peá ke siofi fakalelei. ʻOku ʻikai feʻunga ʻa e feohi pē ʻi he “ʻevá” pe fetuʻutaki pē ʻi he ʻinitanetí, ke fai ai ha mali. ʻOku tonu ke fai ha teiti, hoko ai mo ha feohi ʻoku fakakaukauʻi lelei. ʻOku totonu ke lahi feʻunga ha ngaahi faingamālie ke ke ʻilo ai ʻa e ʻuluangāanga ʻo e taha ʻoku ʻamanaki ke mo malí, ʻi ha ngaahi tūkunga kehekehe. ʻOku tonu ke ʻilo ʻe he taha teu malí, ʻa e meʻa kotoa pē te nau lavá, fekauʻaki mo e ongo fāmili ʻe kau atu ki aí, ʻo ka mali. ʻI he meʻá ni kotoa, ʻoku tonu ke tau ʻiloʻi ʻoku ʻikai fie maʻu ki he nofo mali leleí ia ha tangata pe fefine haohaoa. ʻOkú ne fie maʻu pē ha tangata mo ha fefine ʻokú na loto fiemālie ke na faifeinga fakataha ki he haohaoá. Naʻe akoʻi mai ʻe Palesiteni Sipenisā W. Kimipolo: “Kuo pau ke ʻiloʻi ʻe ha ongomeʻa ʻokú na omi ki he ʻōlita ʻo e malí, ko e founga te na maʻu ai ʻa e nofo mali fiefia ʻokú na ʻamanaki ki aí, . . . ʻoku fou ia ʻi he feilaulau, fevahevaheʻaki, pea aʻu ai pē ki hono tukuange ʻo ha ngaahi tauʻatāina fakafoʻituitui. ʻOku ʻuhinga ia ki hono fakapotopotoʻi fuoloa ʻa e paʻangá ʻi he faingataʻá. ʻOku ʻuhinga ia ʻe haʻu fakataha ʻa e fānaú mo ha ngaahi kavenga fakapaʻanga, ʻi he fie maʻu ke tau tokoniʻi kinautolú, ʻi heʻetau hohaʻa mo tokanga kiate kinautolú; ka ʻoku toe ʻuhinga foki ia ki he ongo fakalata mo fakafiefia taha ʻi he meʻa kotoa peé.”7 ʻOku ou fakamoʻoniʻi ʻi he meʻa kuó u fouá, ki hono fakafiefia ʻo e nofo malí mo e moʻui fakafāmili ko ia ʻoku fakamatalaʻi ʻi he fanongonongo ki māmani fekauʻaki mo e fāmilí, ʻa ē ʻoku fakavaʻe ai ʻa e “fatongia toputapu ʻo e husepānití mo e uaifí ke na feʻofaʻaki mo fetauhiʻaki pea ki heʻena fānaú,” pea “ʻi he ngaahi akonaki ʻa e ʻEiki ko Sīsū Kalaisí.”8 ʻOku ou fakamoʻoniʻi Ia ko hotau Fakamoʻui mo lotua ʻi Hono huafá, ʻa kinautolu kotoa pē ʻoku feinga ki he ngaahi tāpuaki ʻo e fāmili taʻengatá, ʻi he huafa ʻo Sīsū Kalaisí, ʻēmeni. Maʻuʻanga fakamatalá 1. Vakai, Bruce C. Hafen, Covenant Hearts (2005), 37-39; Allan Carlson, Fractured Generations (2005), 1–13; Bryce Christensen, Divided We Fall (2006), 44–45. 2. David O. McKay, ʻi he Conference Report, Apr. 1969, 8–9; pe “Structure of the Home Threatened by Irresponsibility and Divorce,” Improvement Era June 1969, 5. 3. Richard E. Lucas, “Adaptation and the Set-Point Model of Subjective Well-Being: Does Happiness Change After Major Life Events?” Current Directions in Psychological Science, Apr. 2007, maʻu ʻi he tuʻasila www.psychologicalscience.org. 4. See Jean Bethke Elshtain and David Popenoe, “Marriage in America” (1995), quoted ʻi he Bruce C. Hafen, “Marriage and the Stateʻs Legal Posture toward the Family,” Vital Speeches of the Day, Oct. 15, 1995, 18; vakai foki, “Marriage and the Public Good: Ten Principles,” (2006), 24. 5. James E. Faust, “Ko Hono Fakatupulaki Hoʻo Nofo Malí,” Liahona, ʻEpeleli 2007, 2–6. 6. Linda J. Waite mo e niʻihi kehe, “Does Divorce Make People Happy? Findings from a Study Unhappy Marriages (Institute for American Values, 2002), 6; vakai foki, fakatotolo mataotao he fakaʻaongaʻi ʻi he “Marriage and the Law, A Statement of Principles,” (Institute for American Values, 2006), 21. 7. The Teachings of Presidents of the Church: Spencer W. Kimball, (2006), 194. 8. “Ko e Fāmilí: Ko ha Fanongonongo ki Māmani,” Liahona, ʻOkatopa 2004, 49.