Palesiteni Gordon B. Hinckley
ʻOku hanga ʻe he ngaahi meʻa kuo leaʻaki ʻe he tokotaha taki taha, ʻo fakafofongaʻi atu ʻa ʻene feinga ʻi he faʻa lotu ke vahevahe mo kimoutolu ʻa e ʻilo te ne tataki fakalaumālie kitautolú.
Siʻoku ngaahi tokoua mo e tuofāfine ʻofeina, kuo tau fakahoko ha konifelenisi fakaʻofoʻofa. Kuo tau toe fakatapui ʻa e Tāpanekale Sōlekí ke tau toe fakaʻaongaʻi ia hili hano fakaleleiʻi lahi. Kuo tau fakafonu e Senitā Konifelenisí ni ʻi he fakataha kotoa pē. Kuo aʻu atu ʻemau ngaahi leá ki he kāingalotu ʻo e Siasí he funga ʻo e māmaní.
Te tau foki leva ki hotau ngaahi ʻapí. ʻOku mau tapou atu kiate kinautolu ʻoku fakaʻulí ke nau fakahoko tokanga ia. ʻOua naʻa tuku ke hanga ʻe ha fakatuʻutāmaki ʻo maumauʻi ʻa e laumālie ʻo e konifelenisi fakaʻofoʻofá ni.
ʻOku mau fakatauange pē te mou fakaʻaongaʻi e makasini ʻa e Siasí ki he māhina ko Meé, ke hoko ia ko ha tohi fakamatala ki hoʻomou efiafi fakafāmili ʻi ʻapí, ke mou fakamanatu ai e ngaahi meʻa kuo fai he konifelenisí ni. ʻOku hanga ʻe he ngaahi meʻa kuo leaʻaki ʻe he tokotaha taki taha, ʻo fakafofongaʻi atu ʻa ʻene feinga ʻi he faʻa lotu ke vahevahe mo kimoutolu ʻa e ʻilo te ne tataki fakalaumālie mo fakalotoa e taha kotoa pē ʻoku fanongo ki aí, ke ne ngāue faivelenga pea hoko ko ha tokotaha ʻoku toe lelei angé.
ʻOfa ke ʻi ai e melinó mo e maʻumaʻulutá ʻi homou ngaahi ʻapí. ʻE husepāniti, ʻofa mo fakamahuʻingaʻi ho uaifí. Ko ia hoʻo koloa pelepelengesi mahuʻinga tahá. ʻE uaifi, poupouʻi mo lotua ho husepānití. ʻOkú ne fie maʻu e tokoni kotoa pē te ke lavá. Mātuʻa, angaʻofa mo angalelei ki hoʻomou fānaú. Ko kinautolu ʻa e toʻu tangata kei tupu hake te nau fakalāngilangiʻi homou hingoá.
Ko ia ʻi heʻetau māvae ʻi ha faʻahitaʻu ʻe tahá, ʻofa ke tāpuakiʻi kimoutolu ʻe he ʻOtuá, ʻe hoku kaungāngāue ʻofeina, ko ʻeku lotú ia ʻi heʻeku lea fakamāvae kiate kimoutolú, pea ʻi he huafa ʻo Sīsū Kalaisí, ʻēmeni.
Previous
