ʻOiauē, Manatu, Manatu Palesiteni Henry B. Eyring Tokoni Ua ʻi he Kau Palesitenisī ʻUluakí Naʻe faʻa leaʻaki ʻe he kau palōfita ʻo e Tohi ʻa Molomoná ʻo pehē, “‘Oiauē, manatu, manatu.”1 Ko ʻeku taumuʻá ke fakaʻaiʻai kimoutolu ke mou kumi ha ngaahi founga ke mou ʻiloʻi mo manatuʻi ai e angalelei ʻa e ʻOtuá. Naʻá ku maʻu ha ongoʻi lotohoungaʻia ki he kuaeá ʻi heʻenau fakamafola ko ia he pongipongi ní, ʻa ia naʻe fekauʻaki mo e Fakamoʻuí peá u fakamālō foki ke vakai hifo ki he fakalea ʻo e taha e ngaahi hiva naʻa nau hivá, “This Is the Christ (Ko e Kalaisí ʻEni,)” ʻa ia naʻe fatu ʻe Palesiteni Sēmisi E. Fausi. ʻI heʻeku tangutu hifo ʻi he tafaʻaki ʻo Misa Niuelí, naʻá ku ʻunuʻunu atu ʻo fehuʻi ange, “Fēfē hake hoʻo fānaú?” Naʻá ne tali mai, “‘I he taimi ne tangutu ai ʻa ʻEletā Fausi ʻi he sea ko ʻená, ko e fehuʻi ʻena naʻá ne faʻa fai maí.” ʻOku ʻikai ke u ofo ai he naʻe hoko ʻa Palesiteni Fausi ko ha sīpinga haohaoa ʻo ha ākonga naʻe fakamatalaʻi ʻi he Music and the Spoken Word he ʻaho ní. Naʻá ku ongoʻi maʻu pē ko e taimi te u fuʻu lahi aí, naʻá ku loto ke u hangē ko Palesiteni Fausí. Mahalo ʻoku kei taimi pē. ʻI he kei iiki ʻema fānaú, ne u kamata hiki e fanga kiʻi meʻa naʻe hoko fakaʻahó. Tuku muʻa ke u talaatu hono kamataʻangá. Ne u aʻu tōmui mai ki ʻapi mei haʻaku ngāue faka-Siasi. Ne ʻosi fakapoʻuli. ʻI heʻeku lue atu ki he matapā ʻi muʻa ʻi homau falé, ne u ʻohovale ke sio ki heʻeku tamai ʻi he fonó, ʻa ia naʻe nofo ofi mai pe ki ʻapi. Naʻá ne fua ha ʻū paipa ʻi hono umá pea naʻe vave ʻene laká pea kei tui teunga ngāue pē. Naʻá ku ʻiloʻi naʻe lolotonga ngāue ke pamu mai ha vai ki homau konga kelekelé mei ha kiʻi vaitafe ʻi lalo hifo ʻi homa ʻapí. Naʻá ne malimali mo kiʻi fakalea mai peá ne laka fakavave atu ki he fakapoʻulí ke hoko atu ʻene ngāué. Ne u kiʻi lue atu ki fale mo fakakaukau ki he ngaahi meʻa naʻá ne fai maʻamautolú pea ʻi heʻeku aʻu pē ki he matapaá, ne u fanongo ki he ngaahi lea ko ʻení ʻi hoku ʻatamaí—ʻo ʻikai ʻi he leʻo ʻoʻokú—“‘Oku ʻikai ko ʻeku ʻoatu e ngaahi meʻa ko ʻení maʻau pē. Hanga ʻo tohi ia.” Ne u hū ki fale. Naʻe ʻikai te u ʻalu ʻo mohe. Neongo ʻeku helaʻiá, ka naʻá ku toʻo mai ha pepa pea kamata ke u tohi. ʻI heʻeku fai iá, naʻe mahino kiate au ʻa e pōpoaki ne u fanongo ki ai ʻi hoku ʻatamaí. Naʻe fie maʻú ke u hiki ha lekooti maʻa ʻeku fānaú ke nau lau ʻi ha ʻaho, ʻa e founga ne u mamata ki hono faitāpuekina ʻe he toʻukupu ʻo e ʻOtuá ʻa homau fāmilí. Naʻe ʻikai fie maʻu ke fakahoko ʻe he kuitangatá ʻa e ngaahi meʻa naʻá ne fakahokó maʻamautolú. Naʻá ne mei ʻomi pē ha taha kehe ke ne fai ia pe ko e ʻikai ke ne fai ia. Ka naʻá ne tokoni kiate kimautolu, ko hono fāmilí, ʻi he founga ʻoku fakahoko maʻu pē ʻe he kau ākonga ʻa Sīsū Kalaisi kuo fuakava mo e ʻOtuá. Ne u ʻiloʻi naʻe moʻoni ʻeni. Ko ia ne u tohi ia ke lava ʻe heʻeku fānaú ʻo manatuʻi ʻi ha ʻaho te nau fie maʻu ai iá. Ne taʻu lahi ʻeku hiki ha ngaahi fakamatala ʻi he ʻaho kotoa pē. Ne ʻikai hala ʻi ha ʻaho, neongo ʻeku helaʻiá pe ko haʻaku kamata ngāue hengihengia he ʻaho hono hokó. Ki muʻa peá u tohí, te u fakakaukauloto ki he fehuʻi ko ʻení: “Kuó u mamata nai ki he mafao mai e toʻukupu ʻo e ʻOtuá kiate kimaua pe ko ʻema fānaú pe fāmilí he ʻahó ni?” ʻI he hokohoko atu ʻeku hiki e ngaahi meʻá ni, naʻe kamata ke hoko ha liliu. ʻI heʻeku fakakaukau ki he ngaahi meʻa naʻe hoko he ʻaho ko iá, ne u mamata ki he fakamoʻoni ʻo e meʻa kuo fakahoko ʻe he ʻOtuá ki ha taha ʻo kimautolu, ʻa ia ne ʻikai ke u fakatokangaʻi ʻi he ngaahi taimi femoʻuekina ʻo e ʻahó. ʻI heʻene hoko iá pea naʻe lahi ʻene toutou hokó, naʻá ku ʻiloʻi ko ʻeku feinga ko ia ke u manatuʻí, naʻe tukuange leva ʻe he ʻOtuá ke fakahā mai kiate au ʻa e meʻa kuó Ne fakahokó. Ne tupulaki ʻi hoku lotó ha meʻa naʻe mahulu ange ia ʻi he loto houngaʻiá pē. Naʻe tupulaki ʻa e fakamoʻoní. Ne u ʻiloʻi fakapapau ange ʻoku fanongo mai ʻa ʻetau Tamai Hevaní ki heʻetau lotú mo tali ia. Ne lahi ange ʻeku ongoʻi loto houngaʻiá ʻi hono fakamolū mo fakamaʻa e loto ʻo e kakaí tupu mei he Fakalelei ʻa e Fakamoʻui ko Sīsū Kalaisí. Pea naʻe toe lahi ange ʻeku tui ʻe lava ke fakamanatu mai ʻe he Laumālie Māʻoniʻoní kiate kitautolu ʻa e ngaahi meʻa kotoa pē—ʻo aʻu pē ki he ngaahi meʻa naʻe ʻikai ke tau fakatokangaʻi pe tokanga ki heʻene hokó. Kuo ʻosi atu ha ngaahi taʻu lahi. Kuo lalahi ʻaupito hoku ngaahi fohá. ʻI he taimi ʻe niʻihi kuo fakaʻohovaleʻi au ʻe hanau taha ʻi haʻane pehē mai, “Tangataʻeiki, ne u lau ʻi heʻeku tatau ʻo e tohinoá ʻo kau ki he taimi naʻe . . .” pea te ne talamai hono tokoniʻi ia ʻe heʻene lau ha meʻa naʻe hoko fuoloá ke ne fakatokangaʻi ai ha faʻahinga meʻa naʻe fakahoko ʻe he ʻOtuá maʻana he ʻaho ko iá. Ko ʻeku taumuʻá ke fakaʻaiʻai kimoutolu ke mou kumi ha ngaahi founga ke mou ʻiloʻi mo manatuʻi ai e angalelei ʻa e ʻOtuá. Te ne fakatupulaki ʻetau ngaahi fakamoʻoní. Mahalo pē he ʻikai te ke tauhi ha tohinoa. Mahalo he ʻikai te ke vahevahe ʻa e meʻa naʻá ke hiki mo tauhí kiate kinautolu ʻokú ke ʻofeina mo tokoniʻí. Ka ʻe tāpuekina koe mo kinautolu ʻi haʻo manatuʻi ʻa e meʻa kuo fai ʻe he ʻEikí. Mahalo te ke manatuʻi e foʻi hiva ʻoku tau faʻa hivaʻí: “[Tānaki ho ngaahi tāpuakí; lau tahataha kinautolu, Pea te ke ofo ʻi he meʻa kuo fai ʻe he ʻEikí.]”2 He ʻikai faingofua hono manatuʻí. ʻI heʻetau moʻui ʻo ʻikai manatu ki heʻetau moʻui ʻi he maama fakalaumālié, he ʻikai ke tau lava ʻo manatu ki heʻetau nofo mo ʻetau Tamai Hēvaní mo Hono ʻAlo ʻOfaʻanga ko Sīsū Kalaisí; pe ke tau lava ʻo mamata ki he ngāue ʻa e toʻukupu ʻo e ʻOtuá ʻi heʻetau moʻuí ʻaki hotau mata fakamatelié pe ʻi heʻetau fakaʻuhingá pē. ʻOku fie maʻu ʻa e Laumālie Māʻoniʻoní ka tau lava ʻo mamata ki he ngaahi meʻa peheé. Pea ʻoku ʻikai faingofua ke moʻui taau ke maʻu e takaua ʻa e Laumālie Māʻoniʻoní ʻi ha maama faiangahala peheni. Ko hono ʻuhinga ia kuo hoko ai ʻa hono fakangaloʻi ʻo e ʻOtuá ko ha palopalema kuo hokohoko mai ʻi Heʻene fānaú talu mei he kamataʻanga ʻo māmaní. Fakakaukau ki he kuonga ʻo Mōsesé, ʻa hono foaki mai ʻe he ʻOtuá ʻa e maná peá Ne tataki mo maluʻi ʻa ʻEne fānaú ʻi ha ngaahi founga fakaofo mo ʻilonga. Ka kei fakatokanga pē ʻa e palōfitá ki he kakai mohu tāpuekiná, ʻo hangē ko ia kuo fai pea ʻe kei fai ai pē ʻe he kau palōfitá: “Ka ke vakai pē kiate koe pea tauhi ʻi he fakamātoato ʻa ho laumālié, telia naʻa ngalo ʻiate koe ʻa e ngaahi meʻa kuo mamata ki ai ho matá, pea telia naʻa nau mahuʻi mei ho lotó ʻi he ʻaho kotoa pē ʻo hoʻo moʻuí.” 3 Pea ʻoku faingataʻa taha ʻa e tukupā ko ia ke manatú kiate kinautolu ʻoku lahi honau tāpuekiná. ʻOku maluʻi kinautolu ʻoku faitotonu ki he ʻOtuá pea ʻoku nau tupulaki. ʻOku tupu ia mei he tauhi ki he ʻOtuá mo tauhi ʻEne ngaahi fekaú. Ka ʻoku haʻu fakataha ʻa e ngaahi tāpuaki ko iá mo hono ʻahiʻahiʻi kinautolu ke ngalo ʻa e tokotaha ʻoku haʻu mei ai e ʻahiʻahí. ʻOku faingofua ke tau ongoʻi naʻe ʻikai ke maʻu e ngaahi tāpuakí mei ha ʻOtua ʻofa ʻoku tau fakafalala ki ai, ka mei hotau ngaahi mālohi pē ʻotautolú. Kuo toutou fakahā ʻe he kau palōfitá ʻa ʻenau loto mamahí ʻo peheni: “Pea ko ia ʻoku tau lava ʻo vakai ki he kākā, mo e taʻe-falalaʻanga ʻa e loto ʻo e fānau ʻa e tangatá; ʻio, ʻoku tau vakai ai ki he ʻEikí ʻi heʻene fuʻu angalelei taʻe-fakangatangatá ʻokú ne tāpuakiʻi mo ngaohi ke tuʻumālie ʻa kinautolu ʻoku nau falala kiate iá. “‘Io, pea ʻoku tau lava ʻo ʻilo ʻi he taimi pē ko iá ʻokú ne ngaohi ke tuʻumālie ʻa hono kakaí, ʻio, ʻi hono fakatupulaki ʻa e fua ʻo ʻenau ngoué mo ʻenau ngaahi tākanga monumanu īkí mo ʻenau ngaahi tākanga monumanu lalahí, mo e koulá mo e silivá mo e ngaahi meʻa mahuʻinga kehekehe kotoa pē ʻo e faʻahinga kotoa pē mo e ngāue tufunga lelei kotoa pē; ʻo ne fakahaofi ʻenau moʻuí, ʻo ne fakahaofi ʻa kinautolu mei he nima ʻo honau ngaahi filí; ʻo ne fakamolū ʻa e loto ʻo honau ngaahi filí koeʻuhí ke ʻoua naʻa nau tala tau kiate kinautolu; ʻio, ko hono fakakātoá, ʻo ne fai ʻa e meʻa kotoa pē koeʻuhí ko e tuʻumālie mo e fiefia ʻa hono kakaí; ʻio, ko e taimi ia ʻoku nau fakafefeka ai honau lotó, ʻo nau fakangaloʻi ʻa e ʻEiki ko honau ʻOtuá pea nau molomoloki hifo ʻi honau lalo vaʻé ʻa e Tokotaha Māʻoniʻoní—ʻio, pea ʻoku peheé koeʻuhí ko e fiemālie ʻenau moʻuí mo ʻenau fuʻu tuʻumālie lahi ʻaupitó.” Pea ʻoku hoko atu e lea ʻa e palōfitá ʻo pehē: “‘Io, hono ʻikai vave ke fielahi ʻi he hīkisiá; ʻio, hono ʻikai vave ke pōlepole, pea fai ʻa e faʻahinga kotoa pē ʻo e meʻa ʻoku koví; pea hono ʻikai tuai ke nau manatuʻi ʻa e ʻEiki ko honau ʻOtuá, ʻo fakatokanga honau telingá ki heʻene ngaahi akonakí, ʻio, hono ʻikai tuai ke ʻaʻeva ʻi he ngaahi hala ʻo e potó!”4 ʻOku fakamamahi, ka ʻoku ʻikai ko e tuʻumālié pē ʻa e ʻuhinga ʻoku ngalo ai ʻa e ʻOtuá ʻi he kakaí. ʻE lava pē ke faingataʻa hono manatuʻi iá ʻi he taimi ʻoku palopalemaʻia ai ʻetau moʻuí. ʻI he taimi ʻoku tau fāingataʻaʻia ai, ʻo hangē ko ia ʻoku hoko ki ha tokolahi, ʻi he masivá pe mālohi mai hotau ngaahi filí pe ʻikai fakamoʻui ʻa hotau kakai ʻoku puké, ʻe lava pē ke ʻomai ʻe he fili ʻo hotau ngaahi laumālié ʻa e pōpoaki ʻoku ʻikai ha ʻOtua pe kapau ʻoku ʻi ai ha ʻOtua, ʻoku ʻikai te Ne tokanga mai kiate kitautolu. ʻE faingataʻa leva ke fakamanatu mai ʻe he Laumālie Māʻoniʻoní ʻa e ngaahi tāpuaki kuo foaki mai ʻe he ʻEikí ʻi heʻetau moʻuí talu mei heʻetau kei valevalé pea lolotonga hotau ngaahi faingataʻaʻiá. ʻOku ʻi ai ha founga faitoʻo faingofua ki he mahaki fakamanavahē ko ʻeni ko hono fakangaloʻi ʻo e ʻOtuá, ʻEne ngaahi tāpuakí pea mo ʻEne ngaahi pōpoaki kiate kitautolú. Ne talaʻofaʻaki ʻeni ʻe Sīsū ki Heʻene kau ākongá ʻi he teu ke tutukí, toetuʻú pea ʻave meiate kinautolu ke hāʻele hake ki Heʻene Tamaí ʻi he nāunaú. Naʻa nau hohaʻa pe ʻe lava fēfē ke nau hoko atu ʻi ha ʻikai te Ne kei ʻiate kinautolú. Ko e talaʻofa ʻeni. Naʻe fakahoko ia maʻanautolu. ʻE lava ke fakahoko ia maʻatautolu kotoa he taimí ni: “Ko e ngaahi meʻá ni kuó u tala kiate kimoutolu, ʻi heʻeku ʻiate kimoutolú. “Ka ko e Fakafiemālie ko e Laumālie Māʻoniʻoní, ʻa ia ʻe fekau ʻe he Tamaí ʻi hoku huafá, te ne akoʻi ʻa kimoutolu ʻi he meʻa kotoa pē, mo fakamanatuʻi ʻa kimoutolu ʻi he meʻa kotoa pē, ʻa ia kuó u leaʻaki kiate kimoutolú.”5 Ko e kī ki hono maʻu ʻo e faʻahinga manatu ko ia ʻokú ne ʻomi mo tauhi maʻu ʻa e fakamoʻoní, ko hono maʻu ʻo e Laumālie Māʻoniʻoní ke hoko ko hoto takauá. Ko e Laumālie Māʻoniʻoní okú ne tokoniʻi kitautolu ke tau mamata ki he meʻa kuo fai ʻe he ʻOtuá maʻatautolú. Ko e Laumālie Māʻoniʻoní ʻe lava ʻo tokoni kiate kinautolu ʻoku tau tokoniʻí ke nau mamata ki he meʻa kuo fai ʻe he ʻOtuá maʻanautolú. Kuo tuku mai ʻe he Tamai Hēvaní ha sīpinga faingofua ke tau maʻu ai ʻa e Laumālie Māʻoniʻoní, ʻo ʻikai tuʻo taha pē kae hokohoko atu ʻi he ngaahi faingataʻa ʻo ʻetau moʻui fakaʻahó. ʻOku toutou leaʻaki ʻa e sīpingá ʻi he lotu ʻo e sākalamēnití: ʻOku tau palōmesi te tau manatu maʻu ai pē ki he Fakamoʻuí. ʻOku tau palōmesi te tau toʻo kiate kitautolu ʻa Hono huafá. ʻOku tau palōmesi ke tauhi ʻEne ngaahi fekaú. Pea ʻokú Ne talaʻofa mai ʻe ʻiate kitautolu maʻu ai pē ʻa Hono Laumālié.6 ʻOku fengāueʻaki ʻa e ngaahi palōmesi ko iá ʻi ha founga fakaʻofoʻofa ke fakamālohia ʻetau ngaahi fakamoʻoní pea ʻe hokosia ʻa e taimi ʻe liliu ai hotau ʻulungāangá, tuʻunga ʻi he Fakaleleí, ʻo kapau te tau tauhi ʻetau palōmesí. Ko e Laumālie Māʻoniʻoní ʻokú ne fakamoʻoniʻi ko Sīsū Kalaisí ko e ʻAlo ʻOfaʻanga Ia ʻo ha Tamai Hēvani ʻokú Ne ʻofa ʻiate kitautolu mo finangalo ke tau maʻu mo Ia ʻa e moʻui taʻengatá ʻi ha ngaahi fāmili. Naʻa mo e kamataʻanga pē ʻo e fakamoʻoni ko iá, ʻoku tau maʻu ai ha lotoholi ke ngāue Maʻana mo tauhi ʻEne ngaahi fekaú. ʻI heʻetau vilitaki ʻo fai iá, ʻoku tau maʻu e ngaahi meʻafoaki ʻo e Laumālie Māʻoniʻoní ke ne ʻomi ha mālohi kiate kitautolu ʻi heʻetau ngāué. ʻOku tau vakai lelei ange ki he toʻukupu ʻo e ʻOtuá, ʻo fuʻu mahino pea ʻikai ngata pē heʻetau manatuʻi Iá, ka ʻoku fakaʻau ke tau ʻofa foki kiate Ia pea tau hoko ʻo tatau mo Ia ʻo fakafou ʻi he mālohi ʻo e Fakaleleí. Mahalo pē te ke fehuʻi, “Ka ʻe kamata fēfē ʻa e founga ko ʻení ʻi ha taha ʻoku ʻikai haʻane ʻilo ʻe taha ki he ʻOtuá pea ʻikai haʻane manatu ki ha ngaahi meʻa fakalaumālie naʻe hoko?” Kuo aʻusia ʻe he tokotaha kotoa pē ha faʻahinga meʻa fakalaumālie ka naʻe ʻikai ke nau fakatokangaʻi. Ko e tokotaha kotoa pē ʻoku haʻu ki he māmaní, ʻoku foaki kiate ia ʻa e Laumālie ʻo Kalaisí. ʻOku fakamatalaʻi ʻi he tohi ʻa Molonaí ʻa e founga ʻoku ngāue ai e laumālie ko iá: “He vakai, ʻoku foaki ʻa e Laumālie ʻo Kalaisí ki he tangata kotoa pē, koeʻuhi ke ne ʻiloʻi ʻa e leleí mei he koví; ko ia ʻoku ou fakahā kiate kimoutolu ʻa e founga ke fakamāú; he ko e meʻa kotoa pē ʻoku fakaafeʻi ke faileleí pea ʻoku fakalotoʻi ke tui kia Kalaisí, ʻoku ʻomai ia ʻi he mālohi mo e foaki ʻa Kalaisí; ko ia te mou faʻa ʻiloʻi ai ʻi ha ʻilo haohaoa ʻoku tupu ia mei he ʻOtuá. “Ka ko e meʻa kotoa pē ʻoku fakalotoʻi ʻa e tangatá ke faikoví, ʻo ʻikai tui kia Kalaisí, pea fakaʻikaiʻi iá, pea ʻikai tauhi ki he ʻOtuá, ʻoku mou faʻa ʻiloʻi ai ʻi ha ʻilo haohaoa ʻoku tupu ia mei he tēvoló; he ko hono anga ʻeni ʻo e ngāue ʻa e tēvoló, he ʻoku ʻikai te ne fakalotoʻi ha tangata ʻe taha ke failelei, ʻikai, ʻoku ʻikai ha taha; pea ʻoku ʻikai foki ke fai pehē mo ʻene kau ʻāngeló; pea ʻoku ʻikai ke fai pehē mo kinautolu ʻoku fakavaivaiʻi ʻa kinautolu kiate iá. . . . “Ko ia ʻoku ou kole kiate kimoutolu ʻe kāinga, ke mou kumi faivelenga ʻi he maama ʻa Kalaisí ke mou ʻiloʻi ʻa e leleí mei he koví; pea kapau te mou puke maʻu ʻa e meʻa kotoa pē ʻoku leleí, pea ʻikai fakaangaʻi ia, kuo pau ke mou hoko moʻoni ko ha fānau ʻa Kalaisi.”7 Ko ia, ʻoku aʻusia ʻe he kakaí ha ngaahi meʻa fakalaumālie ki muʻa pea nau toki maʻu ʻa e totonu ki he ngaahi meʻafoaki ʻo e Laumālie Māʻoniʻoní ʻi he taimi ʻoku hilifakinima ai kinautolú pea ki muʻa pē ʻi hono fakamoʻoniʻi ange ʻe he Laumālie Māʻoniʻoní ʻa e moʻoní kiate kinautolu pea toki papitaiso kinautolú. Talu mei heʻenau kei īkí mo hono fakaafeʻi kinautolu ʻe he Laumālie ʻo Kalaisí ke nau failelei mo fakatokanga ange ke ʻoua naʻa nau faikovi. ʻOku nau manatu ki he ngaahi meʻa ko iá neongo ne teʻeki ai ke nau ʻiloʻi ʻa e tokotaha naʻe haʻu mei aí. ʻE foki mai ʻenau manatú ʻi he taimi ʻe akoʻi ai kinautolu ʻe he kau faifekaú pe ko kitautolu pē ʻa e folofola ʻa e ʻOtuá pea nau fanongo ki ai. Te nau manatuʻi ʻa e ongoʻi ʻo e fiefia pe mamahi ʻi he taimi ʻoku akonekina ai kinautolu ʻi he ngaahi moʻoni ʻo e ongoongoleleí. Pea ʻe fakamolū ʻe he manatu ko ia ki he Laumālie ʻo Kalaisí, ʻa honau lotó ke lava ʻe he Laumālie Māʻoniʻoní ʻo fakamoʻoni kiate kinautolu. ʻE tupu mei ai haʻanau tauhi e ngaahi fekaú pea nau loto ke toʻo kiate kinautolu ʻa e huafa ʻo e Fakamoʻuí. Pea ʻi heʻenau fai ia ʻi he vai ʻo e papitaisó pea ʻi heʻenau fanongo ki hono leaʻaki e ngaahi leá ni ʻe he tamaioʻeiki kuo fakamafaiʻi ʻe he ʻOtuá, “Maʻu ʻa e Laumālie Māʻoniʻoní,” ʻe toe lahi ange ʻa e mālohi te nau maʻu ke manatuʻi maʻu pē ʻa e ʻOtuá. ʻOku ou fakamoʻoni kiate kimoutolu ko e ongoʻi māfana ko ia ne mou maʻu ʻi hoʻomou fanongo ki hono leaʻaki ʻo e moʻoní ʻi he konifelenisi ko ʻení, ko e haʻu ia mei he Laumālie Māʻoniʻoní. Ko e Fakamoʻui ko ia naʻe talaʻofa ʻe haʻu ʻa e Laumālie Māʻoniʻoní, ko e ʻAlo ʻofaʻanga mo nāunauʻia Ia ʻo ʻetau Tamai Hēvaní. Mou lotu mo fakalaulauloto ʻa pō mo e pō ʻa pongipongí pea fai ʻa e ngaahi fehuʻí ni: Naʻe ʻomai nai ʻe he ʻOtuá ha pōpoaki maʻaku?” Naʻá ku vakai nai ki Hono toʻukupú ʻi heʻeku moʻuí pe moʻui ʻa ʻeku fānaú? Te u fai ia. Hili iá te u kumi ha founga ke fakatolonga ai ʻeku manatu ki he ʻaho ko ia ʻe fie maʻu ai ke u manatuʻi mo kinautolu ʻoku ou ʻofa aí, e ʻofa lahi ʻa e ʻOtuá ʻiate kimautolú pea mo ʻetau fuʻu fie maʻu lahi Iá. ʻOku ou fakamoʻoni ʻokú Ne ʻofa mo faitāpuekina kitautolu, ʻo lahi ange ia ʻi he meʻa kuo fakatokangaʻi ʻe hatau tokolahi. ʻOku ou ʻiloʻi ʻoku moʻoni ia pea ʻoku fakafiefia kiate au ʻeku manatuʻi Iá. ʻI he huafa ʻo Sīsū Kalaisí, ʻēmeni. Maʻuʻanga Fakamatalá 1. Mōsaia 2:41; ʻAlamā 37:13; Hilamani 5:9. 2. “Tānaki Ho Ngaahi Tāpuakí,” Ngaahi Himi, fika 148. 3. Teutalōnome 4:9. 4. Hilamani 12:1–2, 5. 5. Sione 14:25–26. 6. Vakai, T&F 20:77, 79. 7. Molonai 7:16–17, 19.