Elder L. Aldin Porter
Ng Panguluhan ng Pitumpu
"Ang espirituwal na patotoo ng mga banal na kasulatan ng mga Nephita ay magdadala sa tuwina ng katiyakan ng pagkakaroon ng Tagapagligtas."
Kami sa Pitumpu ay nais ipahatid ang isang taos-pusong pagbati sa mga kapatid na sinang-ayunan ngayong araw na ito sa limang korum ng Pitumpu.
Mapapalad tayo, mga kapatid, na mabuhay sa daigdig na puno ng araw-araw halos na pagbabalita tungkol sa pagsulong laban sa sakit at iba pang panganib sa sangkatauhan. Tila walang katapusan ang pagsulong ng mga gawain ng tao sa pagtatagumpay sa mga hadlang sa isang mahaba at malusog na buhay. Halos lahat tayo ay nasanay na sa palagiang pagdaloy ng mga bago at kahanga-hangang bagay.
Subalit, sa kabila ng lahat ng ito, nahaharap din tayo sa walang tigil na pag-atake ng mga nakapangwawasak na paggambala sa kaluluwa na gaya ng pornograpiya, paggamit ng bawal na gamot, at pang-aabuso sa asawa at mga anak. May parada ng mga maling pilosopiya na inihahayag bilang bago at makabagong sagot sa mga suliranin ng daigdig.
Ang malawakang pinagmumulan ng komunikasyon na inihayag ng Panginoon para sa ating panahon ay nagamit nang husto sa masasamang layunin. Palagiang nagdadala ang mga pahayagan, telebisyon at video, at ngayon ay ang Internet sa ating mga tahanan ng mga materyal na dudungis sa ating mga kaluluwa at wawasak sa ating mga buhay. Ang ating mga tahanan sa nakalipas na panahon ay karaniwang mapayapang kanlungan laban sa sanlibutan. Nangangailangan ngayon ng halos walang-tigil na pagbabantay upang mapanatili ang kapayapaang iyon
Gayunpaman, may malaki tayong kadahilanan sa paniniwala na magiging mabuti ang lahat. Hindi tayo naiwang walang pananggalang laban sa masasamang elementong ito na magdudulot sa atin ng kalungkutan at kabiguan dito at magkakait sa atin ng mga kagalakan ng kawalang-hanggan sa kabilang buhay.
"Sa kanila'y sinabi ni Jesus, Ako ang tinapay ng kabuhayan: ang lumalapit sa akin ay hindi magugutom, at ang sumasampalataya sa akin kailan ma'y hindi mauuhaw" (Juan 6:35).
"Ito ang tinapay na bumababang galing sa langit, upang ang taong makakain, ay huwag mamatay.
"Ako ang tinapay na buhay na bumabang galing sa langit: kung ang sinoman ay kumain ng tinapay na ito, siya'y mabubuhay magpakailanman: at ang tinapay na aking ibibigay ay ang aking laman, sa ikabubuhay ng sanglibutan" (Juan 6:50–51).
Siya ang kasagutan sa mga ninanais ng mga puso ng tao para sa katiyakan. Siya ang kasagutan sa ating mga kasalanan at sa ating mga kalungkutan.
Siya ang tagapangalaga natin sa isang daigdig na patuloy na naghahanap ng kalutasan sa mga suliranin sa pamamagitan ng karahasan. Siya ang tagapangalaga natin sa isang daigdig kung saan ang mga isipan ng napakarami ay laging puno ng kasamaan. Tayo, sa lahat ng tao, ay dapat umasa sa hinaharap nang may sigla at pag-asa. Nasa atin ang Kanyang salita upang gabayan tayo, upang aliwin tayo, at upang bigyan tayo ng pag-asa sa hinaharap. Napakaraming liwanag at kadalisayan at kabutihan ang darating sa hinaharap; at, balang araw, mawawala ang kaharasan, dahil tiyak na magkasamang hihiga ang tupa at ang leon.
Mangyari pa, nakita ng Panginoon ang ating panahon. Nakita Niya ang nakawawasak na epekto ng pagkakasala. At Kanyang ipinropesiya na magbibigay Siya ng proteksyon para sa Kanyang mga tao.
Nangusap Siya kay Enoc tungkol sa mga huling araw--ang mga panahon ng kasamaan at paghihiganti--at sinabi Niya:
"At darating ang araw na ang mundo ay mamamahinga, subalit bago dumating ang araw na yaon ang kalangitan ay magdidilim, at isang tabing ng kadiliman ay babalot sa mundo; at ang kalangitan ay mayayanig, at gayon din ang lupa; at matinding paghihirap ang mapapasa mga anak ng tao, subalit ang aking mga tao ay pangangalagaan ko;
"At kabutihan ang aking ipadadala mula sa langit; at katotohanan ay aking ipadadala sa lupa, upang magpatotoo sa aking Bugtong na Anak; ang kanyang pagkabuhay na mag-uli mula sa mga patay; oo, at ang pagkabuhay na mag-uli rin ng lahat ng tao; at kabutihan at katotohanan ay papapangyarihin kong umabot sa mundo gaya nang isang baha, upang tipunin ang aking mga hinirang mula sa apat na sulok ng mundo." (Moises 7:61–62)
Napansin ba ninyong Kanyang sinabi na, "Katotohanan ay aking ipadadala sa lupa"? Para ano? "Upang magpatotoo sa aking Bugtong na anak."
Ang Aklat ni Mormon ay tinipon at isinalin para sa ating panahon. Lumabas ito mula sa lupa katulad ng ipinropesiya upang pagpalain at gabayan ang mga buhay ng mga tao sa panahong ito. Dumating ito sa araw at sa panahon na nalalaman ng Panginoon na magkakaroon ng labis na kaguluhan sanhi ng kasamaan.
Sa pagtatapos ni Moroni sa napakalaking gawain ng kanyang ama at ng iba pa, nagbigay siya ng pangako na malawakan nang naibahagi sa maraming wika. Subalit nangangamba akong naging napakapangkaraniwan na nito sa atin. Natutuhan natin ang tungkol dito sa Panlinggong Paaralan, sa seminary, sa mga Gabing Pantahanan ng Mag-anak, at isinaulo pa ito ng mga misyonero. Subalit ngayon hinihiling ko na makinig kayo habang binabasa ko ang pangakong ito na parang hindi pa ninyo ito napakikinggan.
"At kapag inyong matanggap ang mga bagay na ito, ipinapayo ko sa inyo na itanong ninyo sa Diyos, ang Amang Walang Hanggan, sa pangalan ni Cristo, kung ang bagay na ito ay hindi totoo; at kung kayo ay magtatanong nang may matapat na puso, na may tunay na layunin, na may pananampalataya kay Cristo, kanyang ipaaalam ang katotohanan nito sa inyo, sa pamamagitan ng kapangyarihan ng Espiritu Santo" (Moro. 10:4).
Ito ang pangako, na ipapakita sa atin ng ating Walang Hanggang Ama ang katotohanan--isang personal na paghahayag na may walang hanggang ibubunga.
Ibinigay ang Aklat ni Mormon sa ikahihikayat ng mga Judio at Gentil na si Jesus ang Cristo, nagpapatunay ng Kanyang sarili sa lahat ng bansa.
Huwag balewalain ang mga paghahayag ng Diyos. Huwag ipagwalang-bahala ang kahanga-hangang pangako nito. Taimtim akong nagpapatotoo sa inyo na ang pangakong ito ay natupad hiindi lamang sa aking buhay kundi sa buhay ng daan-daang libo, maging ng milyun-milyong tao.
Masusumpungan ninyo na kapag natupad ang pangako ni Moroni at binigyan kayo ng kaalaman na ang Aklat ni Mormon ay tunay ngang salita ng Diyos, kasamang darating nito ang isang patotoo na si Jesus ang Cristo, ang Manunubos at Tagapagligtas ng sanlibutan. Wala pa akong nalalamang pangyayari na hindi ito naganap. Bukod pa rito, hindi ako naniniwala na magkakaroon ng paglabag sa alituntuning ito. Ang espirituwal na patotoo ng mga banal na kasulatan ng mga Nephita ay magdadala sa tuwina ng katiyakan ng pagkakaroon ng Tagapagligtas.
Kasama ng gayong patotoo na pinatotohanan ng Espiritu Santo ay darating ang tiyak na kaalaman na nagsasabi ng totoo si Joseph Smith nang sabihin niya na nakita niya ang Ama at ang Anak noong tagsibol ng umaga noong 1820.
Ang kaalaman na buhay si Jesucristo at Siya ang ating Manunubos at Tagapagligtas ay napakahalaga anuman ang kabayaran nito. Ito ang katuparan ng pangako ni Moroni sa ating buhay.
Pagkatapos noon, malalaman natin sa pamamagitan ng pag-aaral at panalangin na binigyan Niya tayo ng buhay sa pamamagitan ng Pagkabuhay na mag-uli. Malalaman natin na nangako Siya sa atin ng magandang buhay sa kabilang buhay na lampas sa kakayahan nating maunawaan. Dapat nating maunawaan na dumarating lamang ang patotoong ito sa pamamagitan ng pagsunod sa mga alituntunin at ordenansa ng ebanghelyo.
Basahin ang Aklat ni Mormon. "Nang may matapat na puso at may tunay na layunin," magsimulang magbasa. Pag-isipang mabuti ang mga salita. Madalas na huminto sandali at tanungin ang inyong Ama sa Langit "kung ang mga bagay na ito ay hindi totoo." Magpatuloy sa pagbabasa, sa pag-iisip nang mabuti, at sa pagtatanong. Hindi ito madaliang pagbabasa. May mga hadlang sa inyong pagbabasa. Magpumilit.
Lumapit sa inyong Ama sa Langit na naiwaksi na sa inyong sarili ang mga di matwid na opinyon at pagkamakasarili. Panatilihing bukas ang inyong puso upang matanggap ang damdaming nanggagaling mula sa mga bukal na walang hanggan. Maraming mahahalagang inspirasyon ang ihahayag sa inyo. Balang araw ay darating sa inyong puso at isipan ang katiyakan na si Jesucristo ang buhay na Anak ng buhay na Ama. Darating kasama nito ang kaalaman na si Joseph Smith ang propeta ng Panunumbalik at na may mga apostol at propeta sa mundo ngayon. Malalaman ninyo nang may tiyak na kaalaman na si Pangulong Gordon B. Hinckley ang propeta sa daigdig at ang Pangulo ng Ang Simbahan ni Jesucristo ng mga Banal sa mga Huling Araw.
Ipinangangako ko ito ngayon sa mga nagsisiyasat sa Simbahan, sa mga miyembrong nawalan ng sigla para sa gawain at, samakatwid, ay nalilito sa kaguluhan sa daigdig. Ipinangangako ko ito sa mga yaong dahil sa pagkakasala at pamumuhay nang walang pananampalataya ay nawalan ng pag-asa sa mga bagay na walang hanggan.
Kapag dumating ang banal na patotoong ito, mag-iibayo ang ating pagmamahal para sa Kanya nang walang hangganan; mag-iibayo ang ating hangaring makilala Siya. Malulungkot tayo sa pagbasa natin sa mga salitang gaya ng propesiya ni Haring Benjamin tungkol sa Kanya:
"At masdan, siya ay magdaranas ng mga tukso, at sakit ng katawan, gutom, uhaw, at pagod, nang higit sa matitiis ng tao, maliban na yaon ay sa kamatayan; sapagkat masdan, ang dugo ay lumalabas sa bawat butas ng kanyang balat, napakasidhi ng kanyang magiging pagdurusa dahil sa kasamaan at mga karumal-dumal na gawain ng kanyang mga tao.
"At siya ay tatawaging Jesucristo, ang Anak ng Diyos, ang Ama ng langit at lupa, ang Lumikha ng lahat ng bagay mula sa simula" (Mosias 3:7–8).
Aapaw sa pasasalamat ang ating puso sa Kanyang pagsasakripisyo para sa ating kapakanan. Hindi bago ang doktrina ng personal na paghahayag na ito. Itinuro na ng walang hanggang alituntuning ito noon pa man:
"Nang dumating nga si Jesus sa mga sakop ng Cesarea ni Filipo, ay itinanong niya sa kaniyang mga alagad, na sinasabi, Ano baga ang sabi ng mga tao kung sino ang Anak ng Tao?
"At kanilang sinabi, Anang ilan, Si Juan Bautista; ang ilan, Si Elias; at ang mga iba, Si Jeremias, o isa sa mga propeta.
"Kaniyang sinabi sa kanila, Datapuwa't, ano ang sabi ninyo kung sino ako?
"At sumagot si Simon Pedro at sinabi, Ikaw ang Cristo, Ang Anak ng Diyos na buhay.
"At sumagot si Jesus at sa kaniya'y sinabi, Mapalad ka, Simon Bar-Jonas: sapagkat hindi ipinahayag sa iyo ito ng laman at dugo, kundi ng aking Ama na nasa langit" (Mateo 16:13–17).
Matapos dumating ang banal na patotoong ito, makikita ninyo ang Kanyang mga kamay sa libu-libong mga bagay.
"At masdan, ang lahat ng bagay ay may kani-kanyang kahalintulad, at ang lahat ng bagay ay nilalang at nilikha upang magpatotoo sa akin, kapwa mga bagay na temporal, at mga bagay na espirituwal; mga bagay na nasa langit sa itaas, at mga bagay na nasa lupa, at mga bagay na nasa loob ng lupa, at mga bagay na nasa ilalim ng lupa, kapwa sa itaas at sa ilalim: lahat ng bagay ay nagpapatotoo sa akin" (Moises 6:63).
Makasusumpong tayo ng malaking kagalakan sa pagninilay-nilay sa Kanyang buhay, at di-maglalaon ay malalaman natin na tunay na lahat ng bagay ay nagpapatotoo sa Kanya. Dagdag pa rito, sa gitna ng mga pagsubok at hamon, makasusumpong tayo ng kapayapaan, sa pagkakaalam na sa huli ang lahat ay magiging mabuti. Makasusumpong tayo ng katahimikan sa kabila ng paghihirap. Makasusumpong tayo ng kapanatagan sa buhay na ito kahit napapalibutan tayo ng malaking kaguluhan.
Gayon ang kapangyarihan ng patotoo at patunay na si Jesus ang Cristo, ang Manunubos, ang ating Tagapamagitan sa Ama, ang Bugtong na Anak ng Ama sa laman, ang tanging Tagapagligtas ng sanlibutan.
Nagpapatotoo ako tungkol sa Kanya. Nagpapatotoo ako na Siya ay nabuhay, Siya ay namatay, Siya ay bumangon mula sa libingan na isang nabuhay na mag-uling nilalang; pinagkalooban Niya tayo ng pagkabuhay na mag-uli at isang pangako ng kagalakan sa buhay na walang hanggan at katuparan sa pamamagitan ng pagsunod sa mga batas at ordenansa ng ebanghelyo na muling inihayag sa ating panahon sa pamamagitan ng mga buhay na propeta.
Sa pangalan ni Jesucristo, amen.
Previous
