Na Bula Vakatama—Noda iCavacava Tawamudu

A vakavulica vei au e dua na lesoni bibi na tamaqu niu se gone. A vakila o koya ni sa rui galeleta vakalevu na yaloqu na veika vakayago. Ni tu vei au na ilavo, ena sega ni bera na noqu vakayagataka—e voleka ni veigauna kecega me baleti au ga.

iVakatakilakila

Painting of a father talking to son in front of window with a view of the city below

Ena dua na yakavi a kauti au ko koya me keirau laki volia eso na ivava vou. Ena ikarua ni itabavale ni sitoa levu oqo, a sureti au o koya me keirau rai yani ena katubaleka.

“Na cava o rawa ni raica?” a taroga o koya.

“Na veivale, na lomalagi, tamata” au sauma yani.

“E vica?”

“E levu!”

A dreta mai nona taga na ilavosiliva oqo. Ni solia mai vei au, a taroga, “Na cava oqo?”

Au kila rawa ena gauna vata ga: “E dua na dola siliva!”

Ena nona kilaka vakemisitiri, e kaya, “Kevaka o vakawaicalataka na dola siliva oqo ka wakia vata kei na veika dodonu, o na rawata na wainisiliva. Kevaka daru boroya na katubaleka oqo ena wainisiliva, na cava o na raica?”

Au sega ni kila, a qai kauti au ki na dua na iloilo levu ka taroga, “Na cava o sa raica rawa ena gauna oqo?”

iVakatakilakila

Father and son looking in a mirror at a clothing store.

“Au raici au.”

“Sega,” a tukuna mai o koya, “O raica tiko oqori na kemu iyaloyalo ena siliva. Kevaka o dau vagoleya vakalevu nomu vakasama ena siliva, o na dau raici iko tikoga, io me vaka na ilati, ena tarova na nomu raica vakamatata na icavacava tawamudu sa vakarautaka me baleti iko na Tamada Vakalomalagi.”

“Larry,” a tomana o koya, “‘kakua ni vakasaqara na veika ni vuravura oqo ia vakasaqara … taumada … na matanitu ni Kalou, ka tauyavutaka na [Nona] buladodonu, ena soli na veika kecega oqo me kena ikuri vei kemudou’” (iVakadewa nei Josefa Simici, Maciu 6:38 [ena Maciu 6:33, ivakamacala e ra a]).

A tukuna vei au o koya meu maroroya na dola ka kakua ni vakayalia. Ena veigauna kece au raica kina, meu na vakasamataka na icavacava vakayalo sa vakarautaka tu na Tamada Vakalomalagi me baleti au.

Au lomana na tamaqu kei na ivakarau ni nona veivakavulici. Au vinakata meu vakataki koya, ka noqu vakanuinui titobu duadua meu bula me vaka na nona ivakaraitaki.

Dau tukuna wasoma na noda parofita lomani o Peresitedi Thomas S. Monson, ni na vakatau ki na noda vakatulewa na keda icavacava ka tawamudu na kena revurevu (raica na “Decisions Determine Destiny” [yasanibuka ni Church Educational System, 6 ni Nove., 2005], 2; lds.org/broadcasts).

Me da kakua beka kina ni tara cake e dua na ivakarau ni rai matata me baleta na keda icavacava tawamudu, vakauasivi na kena e vinakata na Tamada Vakalomalagi me da rawata—na itutu vakatama e tawamudu? Me vakatau ki na keda icavacava tawamudu na noda dui vakatulewa kecega. Se vakacava sara na dredre ni veivakatulewa oqori, ena tokoni keda na Tamada.

Au a vulica me baleta na mana ni mataqali rai vakaoqori niu duavata kei rau na luvequ tagane yabaki 12 kei na 13 me baleta e dua na veisisivi 50/20. Na 50/20 sai koya me taubaletaki e 50 na maile (80 km) me lailai mai na 20 na auwa. Keitou tekivu ena 9:00 ena bogi ka taubale tiko ena bogi taucoko kei na loma ni siga ka tarava. E dua na 19 na auwa oca, ia keitou a rawata vinaka.

Ni keitou lesu mai ki vale, e voleka ni keitou qasi ga yani i loma, sa vakarautaka tu mai kina e dua na radinivale ka tina vakasakiti e dua na ivakayakavi totoka, ka voleka sara ni keitou sega ni tara. A davoraki koya ga yani na luvequ gone, ena oca levu, ena idavodavo balavu, e qasi sobu ki na nona rumu na luvequ tagane qase cake.

Ni oti na noqu vakacegu mosimosi, au lako vua na luvequ tagane gone meu raica se sa vakaivei tiko.

“Sa vakacava tiko?” Au taroga yani.

“Ta, oya na ka dredre duadua au se qai bau cakava, kau sega ni vinakata meu cakava tale vakadua.”

Au sega ni via tukuna vua niu na sega talega ni cakava tale vakadua. Ia au tukna ga vua na noqu cibitaka ni cakava rawa e dua na ka dredre vakaoya. Au kila ni na vakarautaki koya ki na veika dredre tale eso ena sotava ena nona bula. Ena vakasama oya au kaya kina, “Luvequ meu yalataka mada vei iko na ka oqo. Ni o sa lako ki kaulotu, ena sega vakadua ni vinakati mo lakova ena dua na siga e 50 na maile.”

“Vinaka, Ta! Kau na lako.”

Na veimalanivosa rawarawa oya e vakasinaita na yaloqu ena vakavinavinaka kei na reki.

Au sa qai lako sobu vua na luvequ tagane qase duadua. Au laki davo toka e yasana—ka tarai koya. “Luvequ, sa vakaivei toka?”

“Ta, oya na ka dredre duadua au se qai bau cakava ena noqu bula, kau na sega tale ni cakava vakadua.” A bobo na matana—ka rai tale—qai kaya, “Vakavo kevaka e vinakata na luvequ.”

E drodro na wainimataqu niu vakamacalataka na noqu vakavinavinaka ena vukuna. Au tukuna vua niu kila ni na tama vinaka cake sara mai vei au ko koya. E vakasinaiti na yaloqu baleta ena nona yabaki ni bula gone ka malumalumu sa kila rawa tu ni dua vei ira na nona itavi tabu duadua vakamatabete sai koya me tamanigone. E sega ni rerevaka o koya na itavi kei na itutu oya—na itutu sara ga e vinakata na Kalou Vakataki Koya me da vakayagataka ni da vosa Vua. Au kila ni tiko na noqu itavi meu utura tiko na vuruvuru ni buka ni itutu vakatama sa waqa tiko e lomai luvequ.

Sa qai titobu cake kina vei au me vaka e dua na tama na ibalebale ni nona malanivosa oqo na iVakabula:

“E sega ni rawata vakaikoya ga e dua na ka na Luvena, na ka ga sa raica ni kitaka ko Tamana, ia na veika sa kitaka ko koya, sa kitaka vakatalega kina na Luvena” (Joni 5:19).

“Niu sa sega talega ni kitaka e dua na ka vakaiau; ia na ka ga sa vakatavulici au kina ko Tamaqu” (Joni 8:28).

Au taleitaka niu tagane vakawati ka tama—ka vakawati kei na dua na luvedrau yalewa digitaki na itubutubu vakalomalagi. Au lomani koya. Oqo e dua na tiki ni noqu bula veivakasinaiti. Na noqu vakanuinui ena bogi oya me ratou dau raica tikoga vei au na luvequ tagane e lima kei ganedratou na reki e yaco mai ena bula vakawati tawamudu, tama, kei na matavuvale.

Kemuni na tama, au kila ni o ni sa rogoca na ivosavosa ka tukuna “Vunautaka na kosipeli e veigauna kecega, kei na veigauna e ganita kina vakayagataka na veimalanivosa” (vagolei vei Francis mai Assisi). Ena veisiga kece ni o vakavuvulitaka tiko vei ira na luvemu na kena ibalebale mo dua na tama. O sa tura tiko e dua na yavu ni itabatamata e tarava. Era na vulica na luvemu tagane na ivakarau ni tagane vakawati kei na tama ena nodra dikeva na ivakarau o qarava kina na veiitavi oqori. Me vakaoqo:

Era kila beka na kena levu ni nomu lomana ka dau vakamareqeta na tinadra kei na levu ni nomu taleitaka ni o tamadra?

Era na vulica na ivakarau me ra raica kina na watidra ni mataka kei na luvedra ena nodra saravi iko ena nomu ivakarau vei ira yadua me vaka ga ena vakayacora na Tamada Vakalomalagi.

Mai na nomu ivakaraitaki, e rawa ni ra vulica kina na ivakarau ni vakarokoroko, veidokai, ka taqomaki ira na yalewa.

Ena nomu vuvale, e rawa ni ra vulica me ra vakatulewa ena nodra dui matavuvale ena loloma kei na buladodonu. E rawa ni ra vulica me ra vakarautaka na veika e gadrevi ena bula kei na veitaqomaki ena nodra matavuvale—vakayago ka vakayalo (raica “Na Matavuvale: Ai Vakaro ki Vuravura Raraba,” Liaona, Nove. 2010, 129).

Kemuni na taciqu, ena igu taucoko ni yaloqu, au kerei kemuni mo ni vakasamataka na taro eso oqo: Era dau raici iko beka na luvemu tagane ni o segata tiko mo cakava na veika e vinakata na Tamada Vakalomalagi me ra cakava?

Au masuta me kena isau na io. Kevaka e kena isau na sega, e sega ni sa bera me ia na veisau, ia mo tekivu sara ga nikua. Kau vakadinadinataka ni na vukei iko na Tamada Vakalomalagi.

Ia oqo, kemuni na cauravou, au dau lomana vakalevu, o ni kila ni ko ni sa vakarau tu mo ni ciqoma na Matabete i Melikiseteki, ciqoma na cakacaka vakalotu tabu ni valetabu, vakayacora na nomu itavi kei na icolacola mo laki kaulotu tudei, ni oti oya, kua ni wawa tale vakabalavu, vakamau ena valetabu vua e dua na luvena yalewa na Kalou ka dua na nomu matavuvale. Mo qai liutaka na nomu matavuvale ena veika vakayalo me vaka ena tuberi iko kina na Yalo Tabu (raica na V&V 20:44; 46:2; 107:12).

Au sa taroga oti e vuqa na cauravou e veiyasai vuravura, “Na cava o tiko kina eke?”

Me yacova mai oqo, se bera mada ni dua me tukuna, “Meu mai vulica me dua na tama, me rawa kina niu vakarau meu ciqoma na veika kece e tu vei Tamada Vakalomalagi.”

Me da vakadikeva mada na nomuni itavi ena Matabete i Eroni me vaka e vakamacalataki ena wase 20 ni Vunau kei na Veiyalayalati. Kidava na veika o na vakila niu vakayagataka na veiitavi oqo ki na nomu veiqaravi ena nomu matavuvale.

“Sureti ira na tamata kecega (ena nomu matavuvale) me lako mai vei Karisito” (tikina 59).

“Dau vakaraici [ira tikoga], dausikovi ira ka vakauqeti ira tikoga” (tikina 53).

“Vunau, veivakavulici, veituberi, veivakaroti ka veipapitaisotaki” vei ira nomu lewe ni matavuvale (tikina e 46).

“Vakaroti ira me ra vakayacora vakavinaka na nodra itavi ka dau masu tikoga, ena masu votu kei na masu vuni” (tikina 47).

“Vunauci ira, me ra kakua ni ivalavala ca, me ra kakua ni veicudruvi, me ra kakua ni lasu, veikaseti vuni se vosa vakacacataki ira na tani” (tikina 54).

“Raica me ra dausoqoni wasoma [na nomu matavuvale]” (tikina 55).

Vukea na tamamu ena nona itavi vakapeteriaki. Tokona na tinamu ena igu vakamatabete ni sega ni tiko na tama (raica na tikina 52, 56).

Ni o kerei, “lesi ira na bete, ivakavuvuli, kei na dikoni” ena nomu matavuvale (tikina 48).

Sega beka ni rogorogo vakaitavi kei na cakacaka ni tama oqo?

iVakatakilakila

A young man reading a a Church publication.

Na vakataucokotaki ni itavi ni Matabete i Eroni o ni sa vakarautaki kina na cauravou ki na itutu vakatama. Na ivurevure ena iTavi Vua na Kalou e rawa ni vukei iko mo vulica ka tuvalaka na ituvatuva bibi eso mo qarava kina vakavinaka na nomu itavi. E rawa ni idusidusi ka veivuke ena nomu vakasaqara na lomai Tamada Vakalomalagi ka davo na takete me rawati.

Sa kauti iko mai ke ena gauna oqo na Tamada mai Lomalagi me baleta e dua na cakacaka bibi kei na inaki tawamudu. E vinakati iko o koya mo raica vakamatata ka kila na inaki oya. O Koya na Tamamu, ka na rawa mo dau gole Vua ena veigauna kecega mo tuberi.

Au kila ni dau kauwaitaki keda yadua na Tamada Vakalomalagi ka tu e dua na Nona ituvatuva me da rawata na keda icavacava tawamudu. A tala mai na Luvena e Duabau Ga, o Jisu Karisito, me vukei keda me da ra-wa na noda malumalumu mai na Veisorovaki. Sa vakalougatataki keda o Koya ena Yalo Tabu me ivakadinadina, itokani, ka idusidusi ki na noda icavacava tawamudu kevaka eda na vakararavi Vua. Me da rekitaka yadua na taucoko ni veivakalougatataki nei Tamada ena bula oqo kei na vakataucokotaki ni Nona cakacaka kei na Nona lagilagi ena noda yaco me tama ki na noda matavuvale me tawamudu (raica na Mosese 1:39). Ena yaca i Jisu Karisito, emeni.