2010–2019
Afai O Le A E Tali Atu
Aperila 2015


Afai O Le A E Tali Atu

Ia tatou fetaomi atu i luma e ala i le aoaoina o o tatou tiute, faia o faaiuga sao, faatino e tusa ai ma na faaiuga, ma taliaina le finagalo o lo tatou Tama.

Sa na o le 12 ou tausaga ina ua taunuu faifeautalai mo le taimi muamua e talai atu i le aai lea sa ou fanau ai i matu o Chile. I se tasi o Aso Sa, i le mavae ai o lou auai i le paranesi laitiiti mo le ono masina, sa ofo mai e se faifeautalai ia te au le falaoa a o ia tufaina le faamanatuga. Sa ou vaai atu ia te ia ma fai atu lemu, “Ou te le mafai.”

“Aisea e le mafai ai?” o lana tali lea.

Sa ou tau atu ia te ia, “Auā e le o a’u o se tagata o le Ekalesia.”1

Sa lē talitonu le faifeautalai. Sa faate’ia o ia. Ou te manatu na ia mafaufau, “Ae o lenei alii talavou e auai i sauniga uma! E mafai faapefea ona lē avea o ia ma se tagata o le Ekalesia?”

O le aso na sosoo ai, na i ai faifeautalai i lou aiga, ma sa laua faia mea uma e mafaia ina ia aoao ai lou aiga atoa. Ae talu ai sa le’i fia [mananao ai] lou aiga, sa lagona e faifeautalai le faamautinoaga e faaauau pea ona o lou auai pea i vaiaso taitasi i le Ekalesia mo le silia i le ono masina. Mulimuli ane, na oo mai le taimi sili na ou faatalitali ai ina ua laua valaaulia au e avea ma se tagata o le Ekalesia a Iesu Keriso. Sa faamatala mai e faifeautalai ia te au e faapea talu ai ona o au e laitiiti, ou te manaomia le faatagaga a o’u matua. Sa matou o atu ma faifeautalai e vaai lou tama, ma mafaufau o lana tali agaalofa e faapea “Atalii, a oo ina e matua, o le a mafai ona e faia au lava faaiuga.”

A o talanoa atu faifeautalai ia te ia, sa ou tatalo ma le faatauanau ina ia musuia lona loto e tuu mai ia te au le faatagaga na ou manao i ai. O lana tali lenei i faifeautalai: “Uso e, i le aluga o le ono masina ua tuanai, sa ou vaaia le vave ala i luga o lou atalii o Jorge i taeao o Aso Sa taitasi, fai ona ofu sili ona lelei, ma savali i le lotu. Ua na o se uunaiga lelei mai le Ekalesia ua ou vaaia i lona olaga.” Ona talanoa mai lea ia te au, sa ia faateia au i le faapea mai, “Atalii, afai o le a e tali atu mo lena faaiuga, ua e maua la’u faatagaga e papatiso.” Sa ou fusiina lou tama, sogi atu ia te ia, ma faafetai i ai mo le faatagaga e papatiso ai. Na ou papatiso i le aso na sosoo ai. O le vaiaso ua tuanai sa faamanatu ai le 47 tausaga o lena taimi taua i lou olaga.

O le a le tiutetauave o ia te i tatou i le avea ai ma ni tagata o le Ekalesia a Iesu Keriso? Sa saunoa mai Peresitene Iosefa Filitia Samita e faapea: “Ua ia i tatou nei tiutetauave tetele e lua. … Muamua, ia saili lo tatou lava faaolataga; ma le, lona lua, o lo tatou tiute mo tatou uso a tagata.”2

O tiutetauave taua la nei na atofaina mai e lo tatou Tama ia i tatou: o le sailia o o tatou lava faaolataga faapena ma isi, ma le malamalamaaga e faapea i lenei faamatalaga, o le faaolataga o lona uiga o le ausia o le tikeri sili ona maualuga i le mamalu ua saunia e lo tatou Tama mo Lana fanau usiusitai.3 O tiutetauave nei ua atofaina mai ia i tatou—ma ua tatou taliaina ma le agalelei—e tatau ona faamatala ai mea tatou te faamuamua, o tatou faanaunauga, o tatou faaiuga, ma o tatou amioga i aso taitasi.

Mo se tasi ua malamalama e faapea, ona o le Togiola a Iesu Keriso, e mafai moni ai lava ona maua le faaeaga, o le lē mauaina e tutusa lelei ma le faasalaga. O lea la, o le faafeagai o le faaolataga o le faasalaga, e pei lava o le faafeagai o le faamanuiaina o le toilalo popo. Na aoaoina i tatou e Peresitene Thomas S. Monson e faapea “e le mafai ona faamalieina tagata i le na ona amio a’i i ni tulaga e le lelei pe a latou vaaia se tulaga lelei e mafai ona latou oo atu i ai.”4 E mafai faapefea la ona faamalieina i tatou i soo se mea e itiiti ifo i lo le faaeaga pe afai ua tatou iloa e mafai ona maua le faaeaga?

Faataga au e faasoa atu ni mataupu faavae autu se fa o le a fesoasoani ia i tatou e faataunuu ai o tatou manao ia tali atu i lo tatou Tama i le Lagi, faapea ai foi ma lo tatou tali atu i Ona faamoemoega ina ia tatou avea e pei o Ia.

1. Aoaoina o O Tatou Tiute

Afai e ao ona tatou faia le finagalo o le Atua, afai e ao ona tatou tali atu ia te Ia, e tatau la ona tatou amata e ala i le aoaoina, malamalama, taliaina, ma ola e tusa ai ma Lona finagalo mo i tatou. Ua fetalai mai le Alii, “O le mea lea, ia tuu atu nei i tagata taitoatasi e aoao lona tiute, ma galue i le tofi ua tofi i ai o ia, i le filiga atoa.”5 O le mauaina o le manao e faia le mea e sa’o e le lava pe afai tatou te le mautinoa ua malamalama i mea ua faamoemoeina e lo tatou Tama mai ia i tatou ma finagalo ia tatou faia.

I le tala ia Alice in Wonderland, e le’i iloa e Alice le itu e alu i ai, o lea na ia fesili ai i le Pusi o Cheshire, “E mafai ona e tau mai ia te au, faamolemole, po o le fea itu e tatau ona ou alu i ai mai i i?”

Na tali atu le pusi, “E faalagolago tele lena mea po o fea e te manao e alu i ai.”

Na faapea atu Alice, “Ou te le popole tele po o fea.”

“E le afaina la po o le fea o itu e te alu i ai,” o le tala lea a le pusi.6

Peitai, ua tatou iloa le ala e tau atu i le “laau, o ona fua [e] manaomia lava e faafiafia ai le tagata”7—“le ala, e tau atu i le ola”—e va apiapi. E manaomia le taumafaiga e faimalaga ai i le ala, ma e “toaitiiti foi i latou o e maua.”8

Ua aoao i tatou e Nifae e faapea “o afioga a Keriso o le a ta’u mai ai ia te outou mea uma e tatau ona outou faia.”9 Ona ia faaopoopo mai lea o “le Agaga Paia … o le a faaali mai e ia ia te outou mea uma e tatau ona outou faia.”10 O lea, o punaoa e mafai ai e i tatou ona aoao o tatou tiute, o afioga ia a Keriso ua tatou maua e ala mai i perofeta anamua ma ona po nei ma faaaliga patino tatou te maua e ala mai i le Agaga Paia.

2. Faia o le Faaiuga

Pe ua tatou aoao e uiga i le Toefuataiga o le talalelei, o se poloaiga patino, o tiute e faatatau i auaunaga i se valaauga, po o feagaiga tatou te osia i le malumalu, o le filifiliga e a tatou lea pe tatou te faatino pe leai e tusa ai ma lena iloa fou. E saoloto tagata taitoatasi e filifili mo ia lava e ulu atu i se feagaiga paia e pei o le papatisoga po o sauniga o le malumalu. Talu ai o le faia o tautoga sa avea ma vaega masani o olaga tapuai o tagata i aso ua leva, sa ta’ua ai e le tulafono tuai e faapea “aua tou te tauto pepelo i lo’u igoa.”11 Peitai, i le vaeluaga o taimi, sa aoao ai e le Faaola se tulaga maualuga o le tausia o a tatou tautinoga ina ua Ia fetalai mai o le ioe o lona uiga o le ioe ma o le leai o lona uiga o le leai.12 E tatau ona lava upu a se tagata e atiae ai lona moni a’ia’i ma le tautinoga agai i se isi tagata—ma e oo lava pe afai o lena tagata o lo tatou Tama o i le Lagi. O le faamamaluina o se tautinoga e avea ma se faailoga o le moni a’ia’i ma faamaoni o a tatou upu.

3. Faatino e Tusa Ai

A maea le aoaoina o lo tatou tiute ma le faia o faaiuga e fesootai ma lena aoaoga ma le malamalama, e tatau ona tatou faatino e tusa ai.

O se faataitaiga mamana o le faanaunautaiga mausali ia ausia Lana tautinoga i Lona Tama e sau mai le aafiaga a le Faaola o le aumaia o se tagata mai supa ia te Ia ina ia faamaloloina. “Ua silafia e Iesu lo latou faatuatua, ona fetalai atu lea o ia i le supa, Lo’u atalii e, ua faamagaloina au agasala.”13 Ua tatou iloa o le Togiola a Iesu Keriso e taua i le mauaina o le faamagaloga mo a tatou agasala, ae i le taimi na faamalolo ai le tagata mai supa, e lei tupu lena mea maoae; e lei tupu mafatiaga i Ketesemane ma luga o le satauro. Peitai, sa lei gata na faamanuiaina e Iesu le tagata mai supa i le tomai e tu ai i luga ma savali, ae na Ia tuuina atu foi ia te Ia le faamagaloga mo ana agasala, lea na tuu atu ai se faailoga manino o le a Ia le toilalo lava, o le a Ia faataunuu le tautinoga na Ia faia i Lona Tama, e faapea i Ketesemane ma luga o le satauro, o le a Ia faia mea na Ia folafola atu e faia.

O le ala ua tatou filifilia e savavali ai e lauitiiti. I luga o le ala o loo i ai luitau o le a manaomia ai lo tatou faatuatua ia Iesu Keriso ma a tatou taumafaiga silisili e tumau ai i luga o le ala ma fetaomi atu i luma. E manaomia ona tatou salamo ma usiusitai ma onosai, e tusa lava pe tatou te le malamalama i tulaga uma o loo siomia ai i tatou. E tatau ona tatou faamagalo atu i isi ma ola e tusa ai ma mea ua tatou aoaoina ma filifiliga ua tatou faia.

4. Taliaina ma le Naunautai le Finagalo o le Tama

O le avea ma soo e le gata ina manaomia ai ona tatou aoao i lo tatou tiute, faia faaiuga sao, ma faatino e tusa ai ma na mea, ae e taua foi lo tatou atiaeina o le naunautai ma le tomai e talia ai le finagalo o le Atua, e tusa lava pe le fetaui ma o tatou manaoga amiotonu po o mea e fiafia i ai.

E faagaeetia au ma faamemelo i le uiga na faaalia e le lepela lea sa sau i le Alii, “ua aioi ia te ia, ma tootuli ia te ia, ua faapea mai, Afai ua e finagalo i ai, e te mafaia ona faamama ia te au.”14 Sa le’i tuu faapoloaiina e le lepela se mea, e ui atonu o lona manao na amiotonu; sa na ona ia naunau e talia le finagalo o le Alii.

I le tele o tausaga ua mavae, na faamanuiaina se ulugalii faamaoni o ni a’u uo i le taunuu mai o se atalii na faananau i ai mo se taimi umi, o lē sa la tatalo ai mo se taimi umi. Sa faatumulia lena aiga i le olioli a o fiafia a maua uo ma le la afafine, lea sa na o ia le tamaitiiti sa i ai i lena taimi, i le faatasi ai o se tama meamea faatoa fanau mai. Peitai, i se tasi aso, na tupu ai se mea sa le’i mafaufauina: sa na o le tolu tausaga le tamaitiiti, ae faafuasei ona koma. I le taimi lava na ou iloa ai le tulaga [o le tamaitiiti], sa ou valaau atu i lau uo e faailoa i ai lo ma lagolago i lena taimi faigata. Ae o lana tali sa avea o se lesona ia te au. Na ia faapea mai, “Afai o le finagalo o le Tama e avatu o ia ia te Ia, ona lē afaina lea ia i matou.” Sa le’i i ai i upu a lau uo sina faitioga, fouvale, po o le le fiafia. O se faafeagai o ia mea, na o le pau le mea na ou lagonaina i ana upu o le loto faafetai i le Atua mo le faatagaina o i latou e fiafia ma lo latou atalii laitiiti mo lena taimi puupuu, faapea ai ma lona naunau atoa e talia le finagalo o le Tama mo i latou. I ni nai aso mulimuli ane, sa toe foi atu ai lena alualutoto i lona maota selesitila.

Ia tatou fetaomi atu i luma e ala i le aoaoina o o tatou tiute, faia o faaiuga sao, faatino e tusa ai ma na faaiuga, ma taliaina le finagalo o lo tatou Tama.

Ou te matua faafetai ma fiafia mo le faaiuga na tuu mai e lou tama ou te faia i le 47 tausaga ua mavae. A o alua’i pea aso, ua ou malamalama i le tulaga na ia tuuina mai ia te au—ia tali atu mo lena faaiuga—o lona uiga o le tali atu i lou Tama Faalelagi ma le sailia o lou lava faaolataga ma le [faaolataga] o ou uso a tagata, ina ia avea atili ai e pei ona faamoemoeina ma finagalo i ai lou Tama ou te avea ai. I lenei aso faapitoa tele, ou te molimau atu o loo soifua le Atua lo tatou Tama, ma Lona Alo Pele. I le suafa o Iesu Keriso, amene.