2010–2019
Mai te peu e amo oe i te hopoi‘a
Eperera 2015


Mai te peu e amo oe i te hopoi‘a

Faaitoito ana‘e tatou i te haapiiraa i ta tatou ohipa, i te raveraa i te mau faaotiraa tano, i te raveraa mai te au i te reira e i te auraroraa i te hinaaro o to tatou Metua.

12 noa matahiti to’u a tae matamua mai ai te mau misionare e poro i to’u oire fanauraa i te pae apato‘erau no Tireni. I te hoê sabati, i te haereraa’tu vau i teie amaa iti no te hoê tau ono ava‘e, ua opere mai te hoê misionare i te pane i te taime no te oro‘a. Ua hi‘o atu vau ia’na ma te parau marû atu, « Eita e nehenehe ».

« E aha ho‘i ? », ua pahono mai oia.

Ua parau atura vau, « no te mea e ere au i te melo no te Ekalesia ».1

Ua hitimahuta roa teie misionare. Mai te huru ra to’na mata i te pura mahana. I to’u mana‘o, ua parau oia i roto ia’na, « Te tae mai nei teie taure‘are‘a i te mau pureraa atoa ! E e ere oia i te melo no te Ekalesia ? »

I te mahana no muri iho, tei to’u fare te mau misionare, e ua rave raua tei noaa ia raua no te haapii i to’u utuafare taatoa. Aita râ to’u utuafare i anaanatae mai, e maoti to’u haere-noa-raa i te pureraa i te mau hepetoma atoa no na ava‘e e ono i muri iho, to teie mau misionare anaanatae-noa-raa i te haapii mai. E i te hopea, ua tae tera mahana ta’u i tia‘i noa na, oia ho‘i, ua ani mai raua ia’u ia riro ei melo no te Ekalesia a Iesu Mesia. E ua faataa mai te mau misionare ia’u e, no te mea e tamarii noa â vau, titauhia te parau faati‘a a to’u na metua. Ua haere au na muri i te mau misionare no te farerei i to’u metua tane ma te feruri e, e riro ta’na pahonoraa iti i te na ô mai, « E ta’u tamaiti, ia ra‘e oe i te matahiti ti‘a i mua i te ture oe e faaoti ai i ta oe iho mau faaotiraa ».

A paraparau noa ai te mau misionare ia’na, ua pure tuutuu ore vau i roto i to’u aau ia putapu oia no te horo‘a mai i te parau faati‘a o ta’u i hinaaro. Teie ta’na pahonoraa i te mau misionare : « E Elder ma, i roto i na ava‘e e ono i ma‘iri, ua ite noa vau i ta’tu tamaiti i te ti‘araa i te po‘ipo‘i sabati, e ma te ahuhia i to’na ahu sabati, ua haere oia i te pureraa » E ohipa maitai noa ta’u i ite i roto i to’na oraraa no roto mai i te Ekalesia. Ei reira, ua fariu oia i ni‘a ia’u, e ua hitimahuta vau i te parauraa mai oia e, « Tamaiti, mai te peu e amo oe i te hopoi‘a no teie faaotiraa, e horo‘a vau i ta’u parau faati‘a no te bapetizoraa ». Ua tauahi au i to’u metua tane, ma te apa ia’na e ma te haamauruuru no te mea ta’na i rave. I te mahana no muri iho, ua bapetizohia vau. Te hepetoma i ma‘iri a‘enei te 47raa o te matahiti o teie taime faufaa rahi i roto i to’u oraraa.

E aha ta tatou hopoi‘a ei melo no te Ekalesia a Iesu Mesia ? Ua faa‘ite mai te peresideni Joseph Fielding Smith i te reira : « Tera ta tatou na hopoi‘a rahi e piti… A tahi, ia imi i to tatou iho faaoraraa ; e a piti, ta tatou ohipa no to tatou mau taata tupu ».2

O te reira ïa te mau hopoi‘a matamua roa ta te Metua i horo‘a ia tatou : te imiraa i to tatou iho faaoraraa e to vetahi ê atoa, ma te maramarama maitai e, i roto i teie faahitiraa, te faaoraraa, o te tapaeraa i te faito hanahana teitei roa a‘e ta te Metua e horo‘a mai i Ta’na mau tamarii haapa‘o.3 Teie na hopoi‘a tei tuuhia i ni‘a ia tatou—e o ta tatou iho i farii mai te au i to tatou ti‘amâraa—e ti‘a ïa i te reira ia faataa mai i ta tatou mau ohipa matamua, mau hiaai, mau faaotiraa e to tatou avei‘a i te mahana tata‘itahi.

No te taata e maramarama mai i te reira, oia ho‘i ïa, maoti te Taraehara a Iesu Mesia e nehenehe e roaa te faateiteiraa, ua riro ïa te oreraa e roaa te reira ei pohe no te varua. E no reira, te huri tua o te faaoraraa, o te pohe varua ïa, mai te huri tua o te manuiaraa te manuia-ore-raa. Ua haapii te peresideni Thomas S. Monson ia tatou e, « ia maramarama te taata i te mau mea faahiahia e roaa ia ratou, eita atura ratou e hinaaro i te mea huru maitai rii noa ».4 Nahea’toa’tu pai tatou e faahiahia ai i te hoê mea iti a‘e i te faateiteiraa mai te peu ua ite tatou e roaa te faateiteiraa ?

E faa‘ite atu vau e maha parau tumu rahi e riro i te tauturu ia tatou ia rave faaoti i to tatou hiaai ia amo i ta tatou hopoi‘a i mua i te Metua i te Raʻi, mai te pahonoraa atoa i Ta’na titauraa ia riro tatou mai Ia’na ra te huru.

1. Te haapiiraa i ta tatou ohipa

Mai te peu e rave tatou i te hinaaro o te Atua, mai te peu e amo tatou i ta tatou hopoi‘a i mua Ia’na, e ti‘a ia tatou ia haamata i te haapii, i te maramarama, i te farii e i te ora ia au i To’na hinaaro no tatou. Ua parau te Fatu : « No reira, i teie nei a tuu atu i te mau taata atoa ia haapii mai i ta’na iho ohipa, e ia rave ho‘i i te ohipa i roto i te toro‘a tei faataahia no’na ra, ma te itoito atoa ».5 Eita e nava‘i te hinaaro ia rave i te mea maitai mai te peu eita tatou e haapapû e, ua maramarama tatou i ta te Metua e tia‘i ra ia tatou e e hinaaro ra ia tatou ia rave.

I roto i te aamu no Alice i tera fenua maere, aita Alice i ite tei hea puromu e rave, e no reira ua ani oia i tera mimi Cheschire, « E parau mai na oe, tei hea puromu te haere ? »

Pahono mai nei te mimi, « Tei te huru noa te vahi ua hinaaro oe ia haere ».

Parau atura Alice e, « Aita vau e tau‘a te vahi ».

« Na reira ïa, eiaha atoa ïa e tau‘a tei hea puromu e haere atu », ta te mimi ïa i pahono mai.6

Teie râ, ua ite tatou e, te e‘a e arata‘i i te « raau… e mea hinaarohia ho‘i te hotu no’na ia faaoaoa i te taata »7—« te e‘a e tae atu ai i te ora »—e mea piriha‘o ïa. E e titauhia te tautooraa i te roaraa o te e‘a, e e « iti ho‘i o te feia i ite atu »8

Te haapii nei Nephi ia tatou e « e faa‘ite te parau a te Mesia ia outou i te mau mea ta outou e haapa‘o »9 E ua parau faahou oia, « e… na te [Varua Maitai] e faa‘ite ia outou i te mau mea atoa ta outou e rave »10 E no reira, te puna i reira tatou e haapii ai i ta tatou ohipa, o te mau parau ïa a te Mesia o ta tatou e farii nei na roto i te mau peropheta tahito e i to tatou nei anotau, e na roto i te heheuraa iho e farii tatou na roto i te Varua Maitai.

2. Te raveraa i te faaotiraa

Ia haapii ana‘e tatou no ni‘a i te Faaho‘i-faahou-raa mai o te evanelia, no ni‘a i te hoê faaueraa taa ê, no ni‘a i te ohipa e au i te hoê piiraa e aore râ no ni‘a i te mau fafauraa e rave i roto i te hiero, tei ia tatou nei te ma‘itiraa ia rave e aore râ ia ore e rave ia au i teie ite apî no tatou. Na te taata iho e ma‘iti no’na, ma te ti‘amâ, ia tomo i roto i te hoê fafauraa mo‘a mai te bapetizoraa e aore râ mai te mau oro‘a no te hiero. No te mea i riro na te tapuraa ei peu au no te oraraa faaroo i mutaa ra, te parau nei te ture tahito e, « Eiaha outou e tapu haavare i to’u nei i‘oa »11 Are‘a râ i te afa ti‘a o te mau tau ra, ua haapii mai te Faaora i te hoê rave‘a teitei a‘e no te haapa‘o i ta tatou mau fafauraa a parau ai Oia e, ia riro te oia ei oia e te aita ei aita.12 Ia nava‘i noa te parau a te hoê taata no te faati‘a i to’na parau mau e to’na fafauraa i te tahi atu taata—e hau atu ho‘i mai te peu o te Metua i te Ao ra tera taata. Ua riro atura ïa te haapa‘oraa i te faafauraa i mua i te hoê taata ei faa‘iteraa no te parau mau e te haavare ore o ta tatou parau.

3. Te raveraa mai te au i te reira

I muri mai i te haapiiraa i ta tatou ohipa e te raveraa i te mau faaotiraa e au i te reira mea i haapiihia e i maramaramahia, e ti‘a ia tatou ia rave mai te au i te reira.

Te hoê hi‘oraa rahi no te faaotiraa aueue ore ia rave mai te au i Ta’na i fafau i mua i To’na Metua, tei roto ïa i te ohipa i tupu a afa‘ihia mai ai te hoê hapepa i te Faaora ia faaorahia to’na ma‘i. « E ite atura Iesu i to ratou faaroo, ua parau atura i taua hapepa ra, E ta’u tamaiti, ua faaorehia ta oe hara ».13 Ua ite tatou e, e mea titauhia te Taraehara a Iesu Mesia no te farii i te faaoreraa o ta tatou mau hara, tera râ, i te taime a faaorahia ai teie hapepa, aita â teie ohipa rahi i tupu ; aita â te mamae o te Faaora i Getesemane e i ni‘a i te satauro i tupu. Tera râ, aita Iesu i haamaitai noa i teie hapepa i te aravihi ia ti‘a i ni‘a e ia haere, ua tuu atoa râ Oia i te faaoreraa o ta’na mau hara, e na roto i te reira, ua horo‘a atoa mai i te hoê tapa‘o faa‘iteraa ‘aifaito ore e, eita Oia e otohe, e e rave faaoti Oia i te fafauraa Ta’na i rave i mua i To’na Metua, e e rave Oia i Getesemane e i ni‘a i te satauro i te mea Ta’na i parau fafau mai.

Te e‘a ta tatou i ma‘iti ia haere, e e‘a piriha‘o ïa. I ni‘a i to tatou puromu e ite mai tatou i te mau tamatamataraa e titau mai, to tatou faaroo ia Iesu Mesia na reira atoa ta tatou mau tautooraa rahi roa‘e no te faaea noa i ni‘a i te e‘a e no te haere noa i mua. Titauhia ia tatou ia tatarahapa e ia haapa‘o e ia faaoromai noa, noa’tu eita tatou e taa pauroa mai te ohipa e tupu ra ati a‘e ia tatou. E ti‘a ia tatou ia faaore i to vetahi ê hapa e ia ora mai te au i te mea ta tatou i haapii e te mau ma‘itiraa ta tatou i rave.

4. Te hinaaro ia auraro i te hinaaro o te Metua

Eita to tatou ti‘araa pipi e titau noa i te haapiiraa i ta tatou ohipa, te raveraa i te mau faaotiraa tano e te raveraa mai te au i te reira, e mea faufaa atoa râ te faatupuraa i te hinaaro e te aravihi ia auraro i te hinaaro o te Atua, noa’tu e aita te reira e tu‘ati nei i to tatou mau hinaaro parau ti‘a e aore râ i te mea ta tatou i au a‘e.

Ua maere au e te faahiahia nei ho‘i au i te huru o te lepera tei haere mai i te Fatu ra, « tuu maira i te turi i raro i mua ia’na, ma te parau mai ia’na, na ô maira, Ia ti‘a ia oe ra, e mâ vau ia oe ».14 Aita te lepera i ani i te hoê a‘e mea, noa’tu â te parau ti‘a o to’na mau hiaai ; to’na noa hinaaro, oia ho‘i, ia auraro i te hinaaro o te Fatu.

Maa matahiti i ma‘iri a‘enei, e taata faaipoipo, e mau hoa rahi no’u, e mau hoa haapaʻo maitai, tei haamaitaihia i te taeraa mai ta raua tamaiti tei tia‘i-maoro-hia, e o ta raua i pure maoro noa na. Ua î noa te fare i te popou inaha ua oaoa roa to matou na hoa e ta raua tamahine, ta raua noa tamarii i tera ra taime, i te taeraa mai teie tamaroa fanau apî. I te hoê râ mahana, ua tupu te tahi ohipa tia‘i-ore-hia : ua topa ta‘ue noa teie tamaroa iti, toru matahiti, i roto i te coma. I te faarooraa’tu vau i te parau apî, ua taniuniu vau i to’u hoa no te faatae i ta’u parau faaitoito i roto i tera taime ati. Ua haapii râ vau i te hoê mea i ta’na pahonoraa. Ua parau mai oia, « Mai te peu o te reira te hinaaro o te Metua, ia rave ia’na i piha‘i iho Ia’na, e farii ïa matou ». Aita hoê rii a‘e faito amuamuraa, orureraa e riri i roto i te mau parau a to’u hoa. Aita roa’tu, te mea noa ta’u i apo mai i roto i ta’na mau parau, o te aau mehara ïa i mua i te Atua no te faati‘araa mai ia popou ratou e ta ratou tamaiti iti no te tahi rii taime e to’na atoa hinaaro ia auraro i te hinaaro o te Metua no ratou. Te tahi noa mahana i muri mai, ua ravehia teie tamaiti iti i to’na fare i te ra‘i.

Faaitoito ana‘e tatou i te haapiiraa i ta tatou ohipa, i te raveraa i te mau faaotiraa tano, i te raveraa mai te au i te reira e i te auraroraa i te hinaaro o to tatou Metua.

Auê to’u mauruuru e to’u oaoa i teie faaotiraa ta to’u metua tane i tuu i roto i to’u rima a 47 matahiti i teie nei. Ua ma‘iri te mau matahiti e rave rahi e ua tae mai te haroʻaroʻa e, te titauraa ta’na i tuu mai i ni‘a ia’u—ia amo i te hopoi‘a no teie faaotiraa—o te amoraa atoa ïa i ta’u hopoi‘a i mua i te Metua i te Ao ra e te imiraa i to’u iho faaoraraa e te faaorara o to’u taata tupu, e ia riro rahi mai mai te au i ta to’u Metua e tia‘i ra e e hinaaro ra. I teie mahana taa ê mau, te faa‘ite papû nei au e, te ora nei te Atua to tatou Metua e Ta’na Tamaiti Here. Na roto i te i‘oa o Iesu Mesia ra, amene.