Ej Ke Aiboojoj Wōt N̄an Kwe?

Kōrā eo pāleō im N̄a ewōr am lan̄lōn̄ kōn karūttoļo̧k ajri ro nejim lalem iturin jikin eo eaiboojoj Paris. Ilo iiō ko kōm kar kōņaan leļo̧k n̄an er ien ko rem̧m̧an n̄an ekkatak men ko rem̧m̧an ilo laļin. Kajojo jōm̧ar, baam̧le eo am ekar kōm̧m̧an tūreep ko raitok n̄an loļo̧k menin kaloojoj ko reļļap, jikin ko repād ilo bwebwenato, im menin kabūlōn̄lōn̄ ko ilo Europe. Āliktata, ālkin joļo̧k 22 iiō ko ilo jikin ko ilo Paris, kōm kar pojak in em̧akūt. Ij kememej wōt raan eo ke ajri ro nejū rekar itok n̄an ippa im ba, “Baba, elukkuun in kajookok! Jekar jokwe ijin aolepān mour eo ad, im jejjan̄in etal n̄an Eiffel Tower!”

Elōn̄ menin kaloojoj ko ilo laļin. Mekarta, jet ien n̄e rej pād im̧aan mejād, jej kōjatdikdik kaki. Jej reilo̧k, ak jejjab lukkun loi; jej ron̄, ak jejjab lukkun ron̄jake.

Ilo tōre in jerbal eo An ilo mour in IJisōs ekar ba n̄an rijilōk ro An:

“E m̧ōņōņō mej ko rej lo men ko komij loi:

“Bwe Ij ba n̄an kom̧, elōn̄ ri kanaan im kiin̄ raar kōņaan lo men ko kom̧ij loi; im raar jab loi; im ron̄jake men ko kom̧ij ron̄jake, im jab ron̄.”¹

Elōn̄ ien ikkōn lōmņak ta eo enaaj kar āinwōt n̄an mour ilo tōre eo an Rilo̧mo̧o̧r eo ad. Komaron̄ ke pijaik am jijet ioon Neen? en̄jake An atbakuj kōn iakwe? kam̧ool ilo An kwaļo̧k n̄an ro jet? Ak aaet ekanooj elōn̄ ro rekar ioon E kar likjab n̄an kile—n̄an “lo”—bwe eo lukkuun in Nejin Anij eaar mour ilubwilijier.

Kōj ebar wōr ad ien em̧m̧an n̄an mour ilo juon ien ejenolo̧k. Rikanaan ro etto rekar lo jerbal ko an jepļaaktok eo āinwōt “juon jerbal ekōpalpal. …, aet, juon jerbal ekōpalpal im kabwilōn̄lōn̄.”²Ejeļo̧k ilo kar epepen ko m̧oktaļo̧k ke elōn̄ mijinede ro em̧ōj kūr er, elōn̄ laļ ko em̧ōj aer peļļo̧k n̄an enaan eo an gospel eo, im ekanooj elōn̄ tempaļ ko em̧ōj kalōki ipeļaakin laļin.

N̄an kōj, āinwōt Armej ro Rekwojarjar ilo Raan ko Āļiktata, kabwilōn̄lōn̄ ko rej waļo̧k ilo mour kein ad kajojo. Men kein ekoba oktak eo ad make, uwaak ko jej bōki n̄an jar ko ad, im kōjeram̧m̧an ko rem̧m̧an Anij ej wūtdikdik iood raan otemjej.

N̄an būlōn̄ kōn kabwilōn̄lōn̄ ko an gospel eo ej juon kōkaļļe in tōmak. Ej n̄an kile pein Irooj ilo mour ko ad im ilo men otemjej ipeļaakid. Būlōn̄ eo ad ej bar kwaļo̧k kajoor ilo jetōb. Ej letok n̄an kōj kajoor eo n̄an jirok emjak eo ilo tōmak ko ad im kobaik kōj ilo jerbal eo an lo̧mo̧o̧r.

Bōtaab jen pojak. Maron̄ eo ad n̄an bwilōn̄ euub. Ium̧win juon iien aitok, kain men rōt kein rej kōjparok kein bajjōk, ak adim̧akoko, ak em̧ool m̧ōk maron̄ bōk jikin im kōm̧m̧an bwe jān jab jeļā n̄an kōkaļļe ko rekabwilōn̄lōn̄ im kabwilōn̄lōn̄ ko an gospel eo.

Bok in Mormon eo ej kōmleleik juon tōre, lukkuun āinwōt in ad, eo m̧oktaļok jen itok eo an Messaia n̄an Amedka. Āliktata kōkaļļe in lotak eo An ekar waļo̧k ilan̄ ko. Armej ro rekar lukkuun obrak kōn bwilōn̄ bwe rekar kōttāik er make, im enan̄in aolep rekar oktak. Mekarta, kōn wōt emān iiō ko rōkadu tok ālik, “armej ro raar jino meļo̧kļo̧k kakōļļe ko im kabwilōn̄lōn̄ ko raar ron̄, im kar jino dikļo̧k im dikļo̧k aer bwilōn̄ kōn kakōļļe eo ak kabwilōn̄lōn̄ eo jān lan̄, … im kar jino in jab tōmak aolep men ko raar ron̄ im loi.”³

Ro jeiū im jatū, gospel in ej ke aiboojoj wōt n̄an kwe? Kwoj ke maron̄ lo wōt, ron̄, en̄jake, im bwilōn̄? Ak en̄jake in jetōb eo am̧ enan̄in ke dikļo̧k? Jekdoon ta jōkjōk eo jej jelm̧ae, ij kūr kom̧ n̄an kōm̧m̧ane jilu men ko.

Kein kajuon, jab m̧ōk in pukpukōt ak bar pukōt m̧ool ko an gospel eo. Rijeje eo Marcel Proust ekar ba, “Lukkuun iaļ eo n̄an elolo ekoba ejjab ilo pukōt jikin ko rekāāl, ak n̄an wōr mej ko rekāāl.”⁴ Kom̧ij kememej wōt ke iien m̧oktata kom̧ kar jeļā ke jar eo ami eaar uwaak ak iien eo m̧oktata kom̧ kar riiti juon eoon in jeje ko rekwojarjar im en̄jake āinwōt eļan̄n̄e Irooj eaar kōnono n̄an eok make? Kom̧ maron̄ ke kememej iien eo m̧oktata kom̧ kar en̄jake kareel eo em̧m̧an an Jetōb Kwojarjar itok ioomi, bōlen m̧okta jān ami kar kūle eaar Jetōb Kwojarjar? Men kein rej kwojarjar ke, tōre ko rein juon?

Jej aikuj in kwōle im maro̧ aolep raan kōn jeļāļo̧kjeņ eo ilo jetōb. Kaminene in an juon make ej lo ilo ekkatak, kejakļo̧kijeņ, im jar. Jet iien jemaron̄ in melijjon̄ n̄an lōmņak, “Ijjab aikuj in katak jeje ko rekwojarjar rainin; em̧ōj aō riiti aoleper m̧oktaļo̧k” ak “Ijjab aikuj in etal n̄an jar rainin; ejeļo̧k men kāāl ie.”

Bōtaab jemaron̄ ien otemjej ekatak men ko rekāāl kōn gospel eo. Aolep ien elōn̄ men kāāl n̄an ekatak im en̄jake kajojo Jabōt, ilo aolep kweilo̧k, im ilo aolep eoon in jeje ko rekwojarjar. Ilo tōmak jej dāpdep n̄an kallim̧ur bwe elan̄e jenaaj “kappukot … [jej] naaj lo.”⁵

Kein karuo, katōt tōmak eo am̧ ilo m̧ool ko ralikkar im pidodo an gospel ad bwilōn̄ ej aikuj in tōt o̧kran ilo pedped ko m̧okta an tōmak in ad, ilo kwojarjar in bujen ko ad im kain̄i ko, im ilo wewen ko repidodo tata ilo ad kabun̄-jar.

Juon sister mijinede ekar kwaļo̧k bwebwenato in jilu em̧m̧aan ro ekar ioon er ilo juon ien kweiļok an juon districk ilo Africa. Rekar itok jen juon jikin ejenolo̧k im ettoļo̧k ibuļōn mar ijo Kabun̄ in ejjan̄in jutak ie ak ijo ekar wōr 15 membōr ro retōmak im enan̄in 20 rikatak ro. Ilo enan̄an ium̧win 2 wiik lōm̧arein rekar etal laļļo̧k ioon neer, etetal eļapļo̧k jen 300 m̧ail ko (480 km) ilo iaļ ko rōpedkatkat jen wōt an lap wōt, bwe ren maron̄ pād ilo ien kweilo̧k eo im boktok m̧ōttan jon̄oul ko jen membōr ro ilo doulul eo aer. Rekar karōk n̄an pād aolepen wiik eo bwe ren maron̄ m̧ōņōņō kōn ien eo em̧m̧an n̄an bōk m̧ōttan kwojkwoj eo Jabōt eo tok juon innem kōjatdikdik n̄an rool ilo iaļ eo aer im ebbōk bo̧o̧k ko kanne kōn Bok in Mormon ineki ibōraer n̄an leļo̧k n̄an armej ro ijo jikier.

Mijenede eo ear kam̧ool ewi jon̄an an kar im̧we im bwilōn̄ kōn em̧m̧aan rein aer kar kwaļo̧k im kōn karmejet ko rōkije n̄an bōk men ko me n̄an liin kar pojak iien otemjej.

Liin eaar bwilōn̄: “Ij lōmņak ippa make: Eļan̄n̄e iaar jerkak juon Jabōt jibbon̄ ilo Arizona im lo bwe wa eo waaō ejjab jerbal, ij ke etetal ļo̧k n̄an m̧ōn jar eo jejjo em̧ jān m̧weo im̧ō? Ak inaaj ke kar pād wōt m̧weo kōnke elukkuun in ettoļo̧k ak kōnke ekar wōt?”⁶ Kajjitōk kein rem̧m̧an n̄an aoleped wōj n̄an lōmņak kaki.

Āliktata, ij kūr kom̧ n̄an pukōt im kautiej jemjerā eo an Jetōb Kwojarjar. Elōn̄ iaan kabwilōn̄lōn̄ ko an gospel eo jab maron̄ in būk jān en̄jake ko ad. Rej men ko me “mej ear jab loi, im lo̧jiln̄in ear jab ron̄jake. … men ko jabdewōt Anij e ar kōppojak n̄an ro rej yokwe E”⁷

Eļan̄n̄e epād jetōb eo ippād, en̄jake in jetōb eo ad ekkan̄ļo̧k im ememļo̧kijeņ ko ad rem̧m̧anļo̧k bwe jejjab maron̄ meļo̧kļo̧k kabwilōn̄lōn̄ im kōkaļļe ko jaar loi. Bōlōn un eo in, jeļā ke Jisōs ekar iten ilo̧k jen er, rijilōk ro rej Rinipai rekar lukkuun jar “kōn men eo raar kanooj kōņaan; im raar kōņaan bwe Jetōb Kwojarjar en ped ippeer.”⁸

Men̄e raar lo Rilo̧mo̧o̧r eo kōn mejāer make im kar un̄ur kinej ko An kōn peier make, raar jeļā bwe naan in kam̧ool ko aer remaron̄ in kar makunļo̧k ilo jokod bar kōkāāl jān kajoor eo an Jetōb Anij. Ro jeiū im jatū, jab kōm̧m̧an jabdewōt n̄an jerwane menin letok in eaorōk im kabwilōn̄lōn̄—jemjerā eo an Jetōb Kwojarjar. Kijejeto im pukōt ilo jar im mour jim̧we.

Ij kam̧ool bwe jerbal in im jej pād ie ej “juon jerbal ekōpalpal im kabwilōn̄lōn̄.” Ilo ad ļoor Jisōs Kraist, Anji ej kwaļo̧k kam̧ool n̄an kōj“kōn kakōļļe ko im men in bwilōn̄ ko, im kōn maron̄ ko rej kajjo wāweer, im kōn letok Jetōb Kwojarjar, ekkar n̄an Ankilaan.”⁹ Ilo rainin eaorōk, Ij kwaļo̧k aō kam̧ool bwe menin in bwilōn̄ ko im kabwilōn̄lōn̄ ko an gospel in rej emjak ilo menin letok eo em̧m̧antata iaan aolep ko an Anij—Pinmuur eo an Rilo̧mo̧o̧r eo. Men in ej menin letok eo em̧m̧an tata an iakwe eo im Jemen im Nejin, rej juon wōt ilo kōtōpar, kar letok n̄an kajojo iaad. Ippami, “Ij lokjen ao kin elap an Kraist yokwe n̄a. … O ej aibujuij, aibujuij n̄ōn iō!”¹⁰

Bwe iien otemjej en wōr ad māj ko me rej lo, lo̧jiln̄i ko n̄an ron̄jake, im bōro ko n̄an kūli kabwilōn̄lōn̄ ko an ko̧jpeļ in ekabwilōn̄lōn̄ ej jar eo ao ilo etan Jisōs Kraist, amen.