Pe O Ofoofogia Pea Ea ia te Oe?

Sa ma maua ma lo’u toalua le olioli tele i le tausiga o le ma fanau e toalima e lata i le aai matagofie o Pale. I na tausaga sa ma mananao ai e avatu ia i latou ia avanoa lelei e tele e vaili ai mea ofoofogia o lenei lalolagi. O taumafanafana taitasi, matou te faia ai ni malaga uumi e asiasi ai i maafaamanatu sili ona taua, o nofoaga logologoa, ma le ofoofogia faanatura o Europa. Mulimuli ane, ina ua uma ona faaalu tausaga e 22 i le eria o Pale, sa matou saunia e tuua. Ou te manatua pea le aso na o mai ai la’u fanau ma fai mai, “Tama, o se matua tulaga maasiasi tele! Sa tatou nonofo iinei i o tatou olaga atoa, ae tatou te lei o lava i le Olo o Eiffel!”

E tele naua mea ofoofogia i lenei lalolagi. Peitai, o nisi taimi afai e tu mai pea i o tatou luma, ona tatou le ano lea i ai. Tatou te vaai, ae tatou te le iloa moni; tatou te faalogo, ae tatou te le lagonaina moni.

I le taimi o Lana galuega i le lalolagi, na fetalai atu ai Iesu i Ona soo:

“Amuia mata ua iloa mea tou te iloa:

“Aua ou te fai atu ia te outou, e toatele perofeta ma tupu na fia matamata i nei mea ua outou iloa, a ua latou le iloa lava; na latou fia faalogo foi i nei mea ua outou faalogo ai, ae lei faalogo ai lava.”¹

E tele taimi ou te manatunatu ai pe mata o a ni foliga o le ola ai i le taimi o lo tatou Faaola. Mata e mafai ona e mafaufau o e nofo i Ona aao? Lagoinaina Lona opo mai? molimau a o Ia auauna atu i isi? Ae e matua toatele i latou na feiloai ia te Ia ae le’i iloaina—e lei “iloa” lava—o le Alo lava lea o le Atua sa latou nonofo faatasi.

Ua faamanuiaina foi i tatou i le ola ai i se taimi tulagaese. Sa vaai perofeta anamua i le galuega o le Toefuataiga o “se galuega ofoofogia … , ioe, o se galuega ofoofogia ma le mea e ofo ai.”² E leai se tisipenisione ua toatele naua ni faifeautalai ua valaauina ai, ua tele naua malo ua tatala mo le savali o le talalelei, ma ua tele naua malumalu ua fausia i le lalolagi atoa.

Mo i tatou, i le avea ai o ni Au Paia o Aso e Gata Ai, ua tutupu foi mea ofoofogia i o tatou olaga taitasi. E aofia ai lo tatou lava liua patino, o tali tatou te maua i a tatou tatalo, ma faamanuiaga mutimutivale e liligi mai e le Atua i o tatou luga i aso taitasi.

O le maofa i mea ofoofogia o le talalelei o se faailoga o le faatuatua. O le iloa lea o le aao o le Alii i o tatou olaga ma i mea uma o loo siomia ai i tatou. O lo tatou maofa foi e maua ai le malosi faaleagaga. E aumai ai ia i tatou le malosiaga e tumau ai ona taula i lo tatou faatuatua ma punouai ai i tatou lava i le galuega o le faaolataga.

Ae ia tatou faaeteete. O lo tatou tomai e maofa ai e maaleale. Mo se taimi umi, o na mea e pei o le tausi faatemeteme o poloaiga, faatalale, po o le paie e ono mautu ia i tatou, ma tatou le nofouta ai i faailoga aupito ofoofogia ma vavega o le talalelei.

O loo faamatala mai i le Tusi a Mamona se vaitau, e tali foliga foi i o tatou taimi, lea na tomua i le afio mai o le Mesia i Amerika. Na faafuasei ona alia’e i le lagi faailoga o Lona soifua mai. Sa matua fememeai tagata i le maofa ma faamaualaloina ai i latou lava, ma na toetoe o i latou uma sa liua. Peitai, na o se fa tausaga mulimuli ane “na amata ona galo i tagata ia faailoga ma mea ofoofogia ia sa latou faalogo i ai, ma amata ona faaitiitia ifo lava i lalo lo latou ofo i se faailoga po o se mea ofoofogia mai le lagi, … ma amata ona le talitonu i mea uma sa latou faalogo ma vaai i ai.”³

Ou uso e ma tuafafine, pe o ofoofogia ea lava le talalelei ia te oe? Pe o mafai ea ona e vaai, faalogo, lagona, ma maofa? Pe ua e le toe lagonaina mea faaleagaga? Po o le a lava lou tulaga patino o i ai, ou te valaaulia outou ia faia ni mea se tolu.

Muamua, aua lava nei e fiu i le sailia ma toe sailia ia maua upumoni o le talalelei. Fai mai le tusitala o Masela Porusi, “O le folauga moni o le sailia o mea fou e le o i le sailia o vaaiga fou, ae o le vaai atu i mea i ni mata fou.”⁴ Pe o e manatua le taimi muamua na e faitau ai se fuaiupu o le tusi paia ma e lagonaina ai e faapei o loo fetalai patino atu le Alii ia te oe? Pe mafai ona e tomanatu i le taimi muamua na e lagonaina ai le faatosinaga mālū a le Agaga Paia ua oo atu ia te oe, atonu ae e te lei iloaina muamua o le Agaga Paia? Pe le o ni taimi paia, faapitoa ea na?

E ao lava ona tatou fiaaai ma fiafeinu i aso uma i le malamalama faaleagaga. O lea faiga patino e faavae i luga o le suesue, mafaufau loloto, ma le tatalo. O nisi taimi atonu e tofotofoina i tatou e mafaufau faapea, “Ou te le tau suesue i tusitusiga paia i le asō: Ua uma ona ou faitauina uma muamua” pe “Ou te le tau alu i le lotu i le asō e leai a ni mea fou o i ai.”

Ae o le talalelei o se punavai o le malamalama e le mafai lava ona mātūtū. E i ai pea lava se mea fou e aoao ma lagonaina i Aso Sa taitasi, i fuaiupu taitasi o tusitusiga paia. I le faatuatua tatou te taofimau i le folafolaga afai tatou te “saili, … [tatou] te maua.”⁵

Lua, taula lou faatuatua i upumoni manino faigofie o le talalelei. O lo tatou maofa e tatau ona mauaa i mataupu faavae autu o lo tatou faatuatua, i le mama a’ia’i o a tatou feagaiga ma sauniga, ma i a tatou faatinoga sili ona faigofie o le tapuai.

Sa faamatala e se tuafafine faifeautalai le tala o ni alii se toatolu sa ia feiloai i ai i se konafesi faaleitu i Aferika. Sa o mai i latou mai se nuu tuufua e mamao ese i le togavao lea e lei faavae ai le Ekalesia ae toa 15 tagata faamaoni o le Ekalesia ma toeitiiti atoa le 20 o tagata sailiili. E silia ma le lua vaiaso sa savavali atu ai nei alii i le silia ma le 300 maila (480 km) i luga o ala palapala ona o le vaitau o timuga, ina ia mafai ona latou auai i le konafesi ma avatu sefuluai mai tagata o la latou vaega. Sa latou fuafua e nonofo mo se vaiaso atoa ina ia latou fiafia i le avanoa e aai ai ma feinu i le faamanatuga i le Aso Sa na sosoo ai, ona faamoemoe lea e toe alu le latou malaga toefo’i ma ave i luga o o latou ulu ni pusa e tutumu i kopi o le Tusi a Mamona e avatu i tagata o lo latou nuu.

Sa molimau mai le faifeautalai e maeu le ootia o lona loto i le lagonaina o le ofoofogia na faaalia e nei uso, ma a latou osigataulaga ma le loto atoa ina ia maua mea sa manatu o ia, ua uma ona i ai.

Sa ia tomanatu: “Sa ou taumanatunatu ifo ia te au lava; afai ou te ala a’e i se taeao o se Aso Sa i Arisona ma iloa e le o ola la’u taavale, mata ou te savali i la’u lotu lea e le mamao mai le fale? Pe o le a na ona ou nofo i le fale ona e mamao tele pe ona o loo timu?”⁶ O ni fesili lelei nei tatou te mafaufau uma i ai.

O le mea mulimuli, ou te valaaulia outou e saili ma faapelepele i le mafutaga ma le Agaga Paia. O le tele o mea ofoofogia o le talalelei, e le mafai ona vaaia e o tatou mata faanatura. O mea ia e “lei vaaia e mata, e lei lagona foi e taliga, … o mea ia ua saunia e le Atua mo i latou o e alofa ia te ia.”⁷

A i ai le Agaga ma i tatou, o le a faigofie ona tatou lagonaina mea faaleagaga ma mumu lo tatou manatua ina ia le mafai ai ona galo ia i tatou o vavega ma faailoga ua tatou molimauina. Atonu o le mafuaaga lena, i le iloa ai o le a tuua i latou e Iesu, sa tatalo faatauanau ai Ona soo sa Nifae “mo lena mea na sili ona latou mananao i ai; ma sa latou manaomia ona tuuina mai le Agaga Paia ia te i latou.”⁸

E ui ina sa latou vaai i le Faaola i o latou lava mata ma sa pa’i atu foi i Ona manua i o latou lava lima, sa latou iloa e ono maluelue a latou molimau e aunoa ma le faafouina pea lava pea e le mana o le Agaga o le Atua. O’u uso e ma tuafafine, aua lava nei faia se mea e ono leiloa ai lenei meaalofa taua ma le ofoofogia—le mafutaga a le Agaga Paia. Saili atu i ai e ala i le tatalo faatauanau ma le ola amiotonu.

Ou te molimau atu o le galuega o loo tatou punouai ai o “se galuega ofoofogia ma o se mea e ofo ai.” A o tatou mulimuli ia Iesu Keriso, e molimau mai le Atua ia te i tatou, “i faailoga ma vavega, i mea mamana eseese foi, ma mea alofa mai le Agaga Paia, e tusa ma lona lava finagalo.”⁹ I lenei aso faapitoa, ou te tuuina atu la’u molimau o mea ofoofogia ma mea e maofa ai o le talalelei o loo taula i le meaalofa aupito silisili o meaalofa uma a le Atua—o le Togiola a le Faaola. O le meaalofa atoatoa lenei o le alofa lea e autasi ai le Tama ma le Alo i le faamoemoega, ua ofoina mai ia i tatou taitoatasi. Faatasi ai ma outou “Ou te tu [ai] ma ofo i le alofa o Iesu mo au. … E maeu lava, maeu naua!”¹⁰

Ia i ai pea ni o tatou mata e vaai ai, o taliga foi e faalogo ai, ma loto e iloa ai mea ofoofogia o lenei talalelei maoae o la’u tatalo lea i le suafa o Iesu Keriso, amene.