2010–2019
E Faatatau i le Faamaoni
Aperila 2015


E Faatatau i le Faamaoni

Ou te tatalo o le a tatou tetee atu i le faaosoosoga o le fiamata-muamua ae, ia tauivi mo se mamalu sili atu: ia avea ma ni soo lotomaualalo ma faamaoni o lo tatou Alii ma le Faaola, o Iesu Keriso.

I le faatausiusiuga o le seneturi 18, sa faasilasila mai ai e Katerina le Sili o Rusia o le a ia malaga taamilo i le itu i saute o lona malo, ma faafeao atu e ni amapasa o isi malo. O le kovana o lea eria, o Kelekolio Potemikini, na matuai manao lava ia faafiafiaina nei tagata asiasi. Ma o lea sa ia faia ai ni taumafaiga tulaga ese e faaali atu ai mea na ausia e le atunuu.

Mo se vaega o le malaga, sa faaopeopea atu ai Katerina i lalo i le Vaitafe o Dnieper, ma faasino atu ma le mitamita i amapasa ia tamai nuu lauusiusi i luga o auvai, na faatumulia i tagata galulue malolosi ma fiafia o le aai. Ae na o le tasi lava le faafitauli: sa na o se atavali o mea faafoliga. Fai mai sa tuufaatasia e Potemikini ni faleoloa ma ni fale pepelo sa faia mai ni pepa malō tetele. Sa ia tuu ai foi iina ni faifaatoaga sa pisi solo ma galulue ina ia faafoliga mai i se vaaiga o se tamaoaiga uluola. O le taimi lava e pasi ese atu ai le vaega lea i le pi’oga o le vaitafe, e teu uma e le vaega a Potemikini ata o nuu pepelo nei ma faananati atu i le isi ituvai e saunia ai le isi nuu mo le oo atu i ai o le isi maimoaga a Katerina.

E ui o loo fesiligia e tusitala faasolopito o aso nei le moni o lenei tala, ae o le faaupuga “nuu FaaPotemikini” ua i ai i le vaogagana a le lalolagi. Ua faasino atu nei i soo se taumafaiga ia faatalitonu isi ua sili atu lo tatou lelei nai lo le lelei moni o loo tatou i ai.

O Sa’o Ea Faamoemoega o o Tatou Loto?

O se vaega o le natura faaletagata le manao ina ia tatou foliga i se tagata sili ona lelei. O le mafuaaga lena e toatele ai i tatou e matua galulue malolosi i fafo o o tatou fale, ma o le mafuaaga lena e matua selu faamomoe ai ulu o le au Perisitua Arona talavou, ina ne’i fetaui faafuasei ma lena tamaitai lalelei. E leai ma se mea e leaga ai le faaiilaina o o tatou seevae, ma tatou manogi manaia, pe nana foi ipu palapala pe a taunuu atu faiaoga o aiga. Peitai, a soona fai, o lenei manao e faafiafia [le isi tagata] e mafai ona see mai se mea aogā i se mea taufaasese.

O loo alaga pea e perofeta a le Alii se leo o le lapataiga e faasaga ia i latou o e “ua faalatalata [atu i le Alii] i o latou gutu, ma latou vivii [atu ia te Ia] i o latou laugutu, a ua mamao lava o latou loto [mai ia te Ia].”1

Sa malamalama ma agaalofa le Faaola i tagata agasala o o latou loto sa faamaualalo ma faamaoni. Ae sa ia tali atu i le ita amiotonu e faasaga i tagata pepelo e pei o tusiupu, au Faresaio, ma le au Satukaio—O e sa taumafai e faafoliga amiotonu ina ia maua ai viiga, faatosinaga, ma le oa o le lalolagi, ae i le taimi lava e tasi, sa faasoesa ai i tagata e tatau ona latou mauaina faamanuiaga. Sa faatusatusa e le Faaola i latou i “tuugamau ua faasinasinaina, o loo matagofie i fafo, a o totonu ua tutumu i ivi o tagata oti, ma mea leaga uma.”2

I o tatou aso, ua fetalai foi le Alii i ni upu malolosi foi tai faapenei i e umia le perisitua o loo taumafai e “ufiufi a [latou] agasala, pe faamalie lo [latou] faamaualuga, [po o lo latou] fialauiloa lē aoga.” A latou faia lea mea, sa Ia fetalai, “e aveese e le lagi i latou lava; e faanoanoa le Agaga o le Alii; ma a aveesea, Amene i le perisitua po o le pule a lena tagata.”3

Aisea ua tupu ai lea mea? Aisea tatou te taumafai ai i nisi taimi e faafoliga mai e toaaga, uluola, ma tuuto atu i vaaiga i fafo ae o totonu lava ia—e pei ona fai mai le Talifaaaliga e uiga ia Efeso—ua tatou “tuua [lo tatou] uluai alofa”?4

I nisi tulaga, atonu ua faigofie lava ona le toe i ai so tatou taulaiga i le ute o le talalelei, ua avesese ai le “ituaiga o le amioatua: mo le “mana ua i ai i lea mea.”5 E faapitoa le lamatia o lea mea pe a tatou faataulai atu o tatou lagona o i fafo o le avea ma soo, e faafiafia ai isi ina ia maua mai ai ni mea pe tosina mai ai. O le taimi la lena e lamatia ai loa i tatou i le amio ai pei o ni Faresaio, ae o le taimi lava lenei e suesue ai o tatou loto ia faia loa ni suiga manaomia.

Polokalama FaaPotemikini

O lenei faaosoosoga ina ia foliga mai tatou te lelei atu i lo le mea o tatou i ai, ua le gata ina maua i o tatou lava olaga patino ae e mafai foi ona maua i tofiga a le Ekalesia.

Mo se faataitaiga, ou te iloa se siteki o loo faatutu ai e taitai ni sini naunautai mo le tausaga. E ui e foliga e taua uma sini, ae, a le o taulai atu i latou i tautinoga maualuluga ma faagaeetia, ia po o taulai atu i latou i fuainumera ma pasene.

Ina ua uma ona talanoaina nei sini ma malilie i ai, sa i ai se mea na amata ona popole i ai le peresitene o le siteki. Sa ia mafaufau i tagata o lana siteki—e pei o le tina talavou ma lana fanau laiti lea e lei leva ona maliu atu lana tane. Sa ia mafaufau i tagata o loo tauivi ma masalosaloga po o le tuuatoatasi po o ni tulaga ogaoga o le soifua maloloina ma le leai o se inisiua. Sa ia mafaufau i tagata o loo feagai ma faaipoipoga malepelepe, mea ua fai ma vaisu, leai ni galuega, ma ma’i o le mafaufau. Ma o le faatele lava ina mafaufau i nei tagata, o le faateleina foi lena o lona fesiligia o ia lava i se fesili faamaualalo: pe o le a faia ea e a matou sini fou se eseesega i olaga o nei tagata?

Sa amata ona ia tuufesili pe faamata e faape’i se eseesega i a latou sini a le siteki pe ana latou fesili muamua, “O le a la tatou galuega?”

O lea sa toe foi atu ai lenei peresitene o le siteki i lana aufono, ma latou fetuunaia faatasi ai la latou taulaiga. Sa latou naunau ia latou lē faatagaina lava “e ua fia aai, … e ua matitiva, … e ua le lavalavā, e ua mamai ma puapuagatia e ui ane i o [latou] tafatafa, ma [latou] le amanaiaina i latou.”6

Sa latou toe faatutuina ni sini fou, ma le iloaina o le tulaga manuia o nei sini fou e le mafai ona fuatiaina i taimi uma e tagata—aua e faapefea ona fuatiaina e se tasi se molimau patino, le alofa o le Atua, po o le agaalofa mo isi?

Ae sa latou iloaina foi o le “tele o mea e mafai ona e faitauina, e lē taua. O le tele o mea e le mafai ona e faitauina, e taua moni lava.”7

Ou te mafaufau pe o a tatou sini faalefaalapotopotoga ma faaletagata lava ia i nisi taimi o ni faataitaiga faaonapo nei ia o se nuu FaaPotemikini. Pe foliga matagofie mai i se mea mamao ae e le o mafai ona taulimaina ai manaoga moni o o tatou uso a tagata pele?

Au uo pele ma ou uso o loo umia le perisitua, afai e alala faatasi Iesu ma i tatou ma fesili mai mo se tala o mea o loo tatou tausia, ou te le mautinoa o le a taulai tele atu o Ia i polokalama ma fuainumera. O le mea e finagalo le Faaola ia silafia o le tulaga o o tatou loto. O le a finagalo o Ia ia silafia le auala tatou te alolofa atu ai ma auauna atu ia i latou o loo tatou tausia, le auala tatou te faaali atu ai lo tatou alolofa i o tatou taitoalua ma aiga, ma le auala tatou te faamāmāina ai a latou avega i aso uma. Ma e finagalo le Faaola ia silafia pe o faapefea ona tatou faalatalata atili atu ia te Ia ma lo tatou Tama Faalelagi.

Aisea Ua Tatou i ai Iinei?

Atonu e sili atu pe a sailiili o tatou lava loto. Mo se faataitaiga, e mafai ona tatou fesiligia i tatou lava, pe aisea tatou te auauna atu ai i le Ekalesia a Iesu Keriso?

E mafai foi ona tatou fesili pe aisea ua tatou i ai iinei i lenei sauniga i le asō?

Ou te manatu afai ou te taliina lena fesili i se tulaga papa’u, e mafai ona ou faapea atu ua ou i ai iinei ona na tofia au e Peresitene Monson e lauga.

O lea e leai ai sa’u filifiliga e faia.

Ma le isi, ua faamoemoeina au e lo’u toalua, o lē ou te alofa tele i ai, ia ou auai. E faapefea la ona ou fai atu ia te ia e leai?

Ae ua tatou iloa uma o loo i ai ni mafuaaga sili atu mo le auai ai i a tatou sauniga ma tatou ola i ni olaga o ni soo tuuto o Iesu Keriso.

Ua ou i ai iinei ona ou te manao ia mulimuli atu ma lo’u loto atoa i lo’u Matai, o Iesu Keriso. Ua ou gauai atu ia faia mea uma Na te faatonu ai au i lenei galuega tele. Ua ou galala ma fiaai ina ia faagaeetiaina e le Agaga Paia ma faalogo i le siufofoga o le Atua a o Ia fetalai mai e ala mai i Ana auauna faauuina. Ua ou i ai iinei ina ia avea ma se alii lelei atu, ina ia siitiaina e faataitaiga musuia a ou uso ma tuafafine ia Keriso, ma ia aoao i le auala ia auauna atu ai ma le mataalia atili ia i latou o e le tagolima.

I se aotelega, ua ou i ai iinei ona ou te alofa i lou Tama Faalelagi ma Lona Alo, o Iesu Keriso.

Ou te mautinoa o le tou mafuaaga foi lea. O le mafuaaga lea ua tatou naunau ai ia faia ni osigataulaga ae le na o ni tautinoga ia mulimuli i le Faaola. O le mafuaaga lenei tatou te tauaveina ai ma le mamalu Lana perisitua paia.

Mai se Aloiafi i se Afi Tele

Pe o uluola ma maloloina lau molimau pe o au gaoioiga i le Ekalesia ua foliga atili mai i se nuu FaaPotemikini, o le tala fiafia, e mafai lava ona e fausia i luga o soo se malosi o e mauaina. O i i le Ekalesia a Iesu Keriso e mafai ona e matua ai faaleagaga ma latalata atili atu ai i le Faaola e ala i le faaaogaina o mataupu faavae o le talalelei i aso uma.

Faatasi ai ma le onosai ma le faapalepale, e oo lava i ni nai faatinoga iti o le avea ma soo po o sina vaega itiiti lava o le talitonu e mafai lava ona avea ma se afi tele e musaesae o se olaga faapaiaina. O le mea moni, o le auala lena e amata ai le tele o afi tetele—na o sina aloiafi lava.

O lea afai e te lagonaina le faatauvaa ma le vaivai, faamolemole tau lava o lou sau ia Keriso, le na te faia mea vaivai e avea ma mea malolosi.8 O lē sili ona vaivai o i tatou, e ala i le alofatunoa o le Atua, e mafai ai ona e malosi faaleagaga, ona “e le faailogaina tagata”9 e le Atua. O Ia o lo tatou “Atua faamaoni, o le na te tausi i le feagaiga atoa ma le alofa i e alolofa atu ia te ia ma tausiusi i ana poloaiga.”10

O lo’u talitonuga maumaututu, afai e mafai ona aapa atu le Atua ma tausi se tagata sulufa’i Siamani mativa mai se aiga faatauvaa i se atunuu na masofa i le taua e mamao lava mai le laumua o le Ekalesia, e mafai foi ona aapa atu o Ia ia te oe.

Ou uso pele ia Keriso, o le Atua o le Foafoaga, le na manavaina le ola i le lalolagi, e mautinoa lava o loo i ai le mana e manava atu ai le ola ia te outou. E mautinoa lava e mafai ona Ia faia oe e avea ma se tagata faaleagaga faamaoni o le malamalama ma le upumoni o loo e manao ia avea ai oe.

E mautinoa ma mausali lava folafolaga a le Atua. E mafai ona faamagaloina i tatou i a tatou agasala ma faamamaina mai le amioletonu uma.11 Afai e faaauau pea ona tatou taliaina ma ola i mataupu faavae moni i o tatou tulaga faaletagata lava ia ma i totonu o o tatou aiga, o le a iu lava ina tatou taunuu atu i se vaega tatou te “le toe fia aai, e le toe fia inu foi. … Aua o le Tamai mamoe o loo i luma o le nofoalii na te fafaga ia i [tatou] ma taitai ia te i [tatou] i puna o vai ola; e soloieseina foi e le Atua o loimata uma nai o [tatou] mata.”12

O Le Ekalesia o Se Nofoaga o le Faamalologa, Ae Le o Se Lafitaga

Ae e le mafai ona tupu lenei mea pe afai tatou te lalafi i tua o foliga taufaasese faaletagata, faalelotu, po o faalapotopotoga. O soo faafoliga faapena e le gata e taofia i tatou mai le iloaina o i tatou lava ia i tagata moni o loo avea ai i tatou, ae e taofia ai foi i tatou mai le suia moni e ala i le vavega o le Togiola a le Faaola.

O le Ekalesia e le o se potu o faaaliga taavale—se nofoaga e faaaliali atu ai i tatou lava ina ia mafai ona faamemelo mai i ai isi i lo tatou faaleagaga, gafatia, po o le uluola. Ae e tai pei lava o se faleenisinia, lea e aumai i ai taavale ua manaomia ona faaleleia ina ia faaleleia ma toe faafou.

Ma pe le o i tatou uma ea, e manaomia ona faaleleia, tausia, ma faafouina?

Tatou te le o mai i le lotu e nanā ai o tatou faafitauli ae ia faamaloloina.

Ma i le avea ai ma e umiaina le perisitua, ua tatou maua ai se isi tiutetauave faaopoopo—ia “leoleo i le lafu a le Atua … , ma le loto, a e le o le faatauanauina; aua foi ne’i faia [mo ou lava viiga], a o le loto fiafia; Aua foi ne’i faapei o e faamalo i le tofi o le Atua, a ia fai outou ma faaaoao i le lafu mamoe.”13

Manatua, uso e, “E tetee atu le Atua i e faamaualuga, a e foai mai le alofa tunoa i e faamaulalo.”14

O le tamalii silisili, sili ona malosi, sili ona atamai na savalia lenei lalolagi, o le tamalii sili foi lea ona lotomaualalo. Sa Ia faatinoina nisi o Ana auaunaga sili onafaagaeetiaina i taimi patino, faatasi ai ma ni nai tagata sa iloaina, ia sa Ia faatonuina ia “aua nei tala atu i se tasi” mea sa Ia faia.15 Pe a ta’ua o Ia e se tagata e “lelei,” e vave lava ona Ia toe faasino sao atu lea upu lelei, ma tautino atu ua na o le Atua lava e lelei moni.16 Ua manino lava e leai se taua o viiga o le lalolagi ia te Ia; e na o le tasi lava Lona faamoemoega ia auauna atu i Lona Tama ma “faia pea lava o mea e lelei ia te ia.”17 O le a lelei ona tatou mulimuli atu i le faataitaiga a lo tatou Matai.

Tau Ina Ia Tatou Alolofa Atu E Pei Ona Ia Alofa Mai

Uso e, o lo tatou valaauga maualuga ma le paia lenei—ia avea ma sui o Iesu Keriso, ia alolofa atu e pei ona Ia alofa mai, ia auauna atu e pei ona Ia auauna mai, ia “sii i luga lima ua tautau i lalo, ma faamalosi tulivae ua vaivai,”18 ia “vaaia e ua matitiva ma e ua le tagolima,”19 ma ia tausia fafine ua oti tane ma fanau matua-oti.20

Ou te tatalo uso e, a o tatou auauna ai i o tatou aiga, korama, uarota, siteki, nuu, ma malo o le a tatou tetee atu i le faaosoosoga o le fiamata-muamua ae, ia tauivi mo se mamalu sili atu: ia avea ma ni soo lotomaualalo ma faamaoni o lo tatou Alii ma le Faaola, o Iesu Keriso. A tatou faia lea mea, o le a tatou iloaina o loo savavali i tatou lava i le ala lea e tau atu i le avea ai ma tagata silisili, sili ona faamaoni, ma sili ona malualii. I nei mea ou te molimau atu ai i le suafa o lo tatou Matai, o Iesu Keriso, amene.