Erohwehwɛ Ewuradze

Mo nuanom na nkyerɛbaa adɔfo, enyigye kɛse na medzi gyina hom enyim ber a yɛbɔmu tsie wiadze mfɛndzanan ehyiadzi yi. Yeretsie enyansasɛm, afotu, awerɛkyekyer nsɛm, na kɔkɔbɔ a wɔdze ama wɔ wiadze mfɛndzanan ehyiadzi horow ase mfe pii a wɔabɛsen kɔ no ayɛ nhyira kɛse ama Akyerɛbaa Teixeira, hɛn ebusua, na mara.

Hyɛber soronko wɔ afe yi mu no, tsitsir ara Easter Ahomgyeda yi, ɔwɔ dɛ modwendwen Agyenkwa no Ne nkyerɛkyerɛ na N’ayamuyie na No dɔ fasusu wɔ m’abrabɔ mu no ho hia a ohia.

Yenndzi mu mpo no, Jesus Christ ho ntsease bun mu bɛma hɛn enyidado kɛse ama ndaamba na, awerɛhyɛmu mbordo wɔ yerenya hɛn tsenenee botae mu. Iyi so bɛma hɛn pɛ kɛse ma yɛasom hɛn mfɛfo.

Ewuradze kãa dɛ, “Hom [nhwehwɛ] me wɔ hom adwendwen biribiara mu; mma hom nngye kyim, mma hom nnsuro.”¹ Erohwehwɛ Ewuradze na eretse nkã dɛ Ɔwɔ wo nkyɛn yɛ daa daa ahwehwɛdze, mbɔdzembɔ a ɔyɛ mfaso.

Enuanom na nkyerɛbaa, ndɛ a ɔsen mber biara no, yɛwɔ akwanya na mboa soronko a ɔma hɛn ntseasee wɔ Jesus Christ ne nkyerɛkyerɛ na No Werdambɔ ho no mu bɔdɔ. Yɛdze ndzɛmba yinom a ɔboa no ridzi dwuma yie no, bɔboa hɛn ma yɛabɔ bra pa a enyigye ahyɛ mu mã.

Agyenkwa no Ne mfatoho wɔ wenyindua na abaw ho no, Ɔkãa dɛ: “Hom ntsena mo mu, na mo so mentsena hom mu. Dɛ mbrɛ abaw nntum mmfi noara no mu nnsow aba, gyedɛ ɔtsena wenyindua no mu no, dɛmara so na hom runntum, gyedɛ hom tsena mo mu.”²

Ber a yɛretse Christ Ne dzibew soronko ase wɔ hɛn abrabɔ mu yie no, nna yɛtse hɛn botae wɔ ɔnnkyebo abrabɔ yi mu yie, ɔno nye dɛ yebenya enyigye. Naaso, dɛm enyigye no nnyi hɛn mmfi mu dɛ yebenya nsɔhwɛ na nkodzen, mpo bi yɛ kɛse na ɔyɛ dzen ara ma wobegya hɛn ma yɛadwen dɛ yennkotum enya enyigye wɔ dɛm gyinabew no mu.

Medua mankasa mo sũahu do mehu dɛ erobɔ bra tseneneeyɛ mu na eretsena Christ mu no mu enyigye no botum akɔ do wɔ ɔnnkyebo abrabɔ mu abɛbrɛsɛ mpo mu. Ewiei no, abɛbrɛsɛ yinom taa hyɛ hɛn mã, ɔtsew hɛnho, na ɔma hɛn kwankyerɛ ma yenya hɛn ɔnnkyebo asetsena yi ho botae na Jesus Christ No Werdambɔ no ho ntseasee a no mu dɔ ara yie. Nokwar, ɔnam Jesus Christ do nko na yebotum enya dɛw ne mãhyɛ.³

Ɔsee dɛ, “Emi nye wenyindua no, hom nye abaw no: Nyia ɔtse mo mu, na metse no mu no, ɔnoara na ɔsow aba pii; na hom kwetsi me a, hom nntum nnyɛ hwee.”⁴

Megye dzi dɛ ber a hɛn ntseasee wɔ Agyenkwa no ho dɔɔsõ no, yebenya pɛ mbordo dɛ yɛbɛtsena enyigye mu ara na awerɛhyɛmu dɛ enyigye botum aba. No nsunsuando no, yebenya ahom kɛsenara dze abɔ bra dabiara a yɛdze abrabɔ ho ahokekã na yesie Nyankopɔn ne mbrasɛm, wɔ gyinabew a ɔyɛ haw mpo mu.

Mma yenngyaa dza yebotum ayɛ no ndɛ no nnhyɛ ɔkyena. Sesei na otwar dɛ yɛba Christ hɔ osiandɛ “sɛ [yɛ]gye [No] dzi a, [yɛ]bɛyɛ edwuma wɔ ber a wɔfrɛ no ndɛ da yi.”⁵

Da biara no, ɔwɔ dɛ yesusu dɛ yebenya Christ ne nkyerɛkyerɛ ho nkitahodzi. Ndzeyɛɛ nketsenketse a ɔnnyɛ kyinkyinɛnn daa daa no bɛma:

1. Hɛn ntseasee wɔ Ewuradze no ho hia a ohia wɔ hɛn abrabɔ mu, no adɔɔsõ, na

2. Ɔbɔboa ma yɛnya ebusuasantsen a wɔreba no akyɛ ntseasee yi, hɔn na wɔbɛtse Ɔsor Egya Ne Ba, Jesus Christ hɔn nokwar dɔ no, ber a wohu hɛn fasusu dɛ yɛdze asɛmpa no robɔ bra nokwar mu no.

Ntsi ebɛn suban bi a ɔnnyɛ kyinkyinɛnn mber yi mu a ɔbɛyɛ edur ama hɛn akra ber a yɛrehyɛ hɛn dasegye wɔ Christ na No ndwuma mu dzen no?

Mfonyin

Woman on a train with a cell phone illuminating her face.

Afe 2014 mu no, National Geographic mfonyin akansi nyaa mfonyin bɔbor 9,200 fii mfonyintwa edwumayɛfo na hɔn a ɔyɛ hɔn enyikaze hɔ fi anamaman bɔbor 150 mu. Mfonyin a odzi konyim no kyerɛ ɔbaa bi a ɔtsena keteke ne finimfin a ahɛntsiafo ahyɛ mu mã. Kan a ofi ne mobile phone do reba no hyerɛn n’enyim. Ɔda asɛm edzi pefee kyerɛ ahɛntsiafo nkaafo no: ɔtsena hɔn mu dze, naaso nokwar mu ara onnyi hɔ.⁶

Mobile do nsɛm, abaefo phones, na internet do nkitahodzi asesã hɛn kwan a yɛdze tse wiadze na mbrɛ yesi nye hɛnho dzi nkitaho korakora.

Internet mber yi, yebotum ekowura mbea mbea na dwumadzi horow mu ɔhar do a, obotum eyi hɛn ntsɛm ara efi dza ohia tsitsir ma abrabɔ a onnyiewiei enyigye ahyɛ mu mã no.

Network abrabɔ yi, sɛ yegyaa no dɛmara a, obotum ama yɛnye nkorɔfo a yennyim hɔn anaa yennhyia hɔn da enya nkitahodzi, akyɛn nkorɔfo a yɛnye hɔn tse, hɛn ankasa hɛn ebusua mpo!

Afã kor no so, hɛn nyina nyim dɛ wɔdze internet mboa a oye papapaa, dza Asɔr no ayɛ, tse dɛ kyerɛwsɛm krɔnkrɔn nye wiadze mfɛndzanan ehyiadzi ne nkyerɛwee nwoma na n’etsiedze, Jesus Christ n’abrabɔ na ne nkyerɛkyerɛ ho video mfonyin, na abaefodze a yɛdze kyerɛw hɛn ebusua abakɔsɛm, na akwanya horow a yɛdze tsie nkenyan ndwom, ehyira hɛn.

Hɛn nsan mu yi na ehiadze a yɛdze hɛn mber yɛ no wɔ internet do no nya nsunsuando. Wobotum akyerɛ hɛn sunsum mu mpontu na asɛmpa no ho ntseasee na hɛn pɛ dɛ yɛbɛyɛ hɛn kyɛfa enya wiadze papa na yɛabɔ bra a mfaso wɔ mu yie.

Siantsir yinom ntsi, ndɛ mebɛpɛ dɛ mobobɔ suban ebiasa a ɔnnyɛ kyinkyinɛnn a ɔbɛma yenya internet do dwumadzi a ɔyɛ mfaso. Suban yinom bɛyɛ hɛn daa daa nhwehwɛmu a ohia ma hɛn ma ɔbɛn Ɔsor Egya na Ne Ba, Jesus Christ hɔn nkyerɛkyerɛ no yie.