Saili Atu i le Alii

Ou uso e ma tuafafine, o se fiafiaga tele lo’u tu ai i o outou luma a o tatou auai faatasi ai i lenei konafesi aoao. I le faalogologo ai i timaiga atamai, fautuaga, faamafanafanaga, ma lapataiga e tuuina atu i konafesi aoao i le tele o tausaga, ua avea pea ma se faamanuiaga lē mafuatiaina ia Sister Teixeira, i lo matou aiga, faapea ma au.

I lenei vaitau faapitoa o le tausaga, aemaise lava i lenei Sapati o le Eseta, ua ou mafaufau ai lava i le taua o aoaoga a le Faaola ma Lana faataitaiga agalelei ma le agaalofa i lo’u olaga.

O se malamalama loloto atu ia Iesu Keriso o le a tatou maua ai se faamoemoe sili atu mo le lumanai ma se talitonuga sili atu i le ausiaina o a tatou sini amiotonu, e tusa lava po o a ni o tatou lē atoatoa. O le a tatou maua ai foi se manaoga sili atu ia auauna atu i o tatou uso a tagata.

Na fetalai le Alii, “[Saili] mai ia te a’u i mafaufauga uma; aua le masalosalo, aua le fefefe.”¹ O le sailia o le Alii ma lagonaina Lona mamalu o se sailiga o aso uma, o se taumafaiga taua.

Uso e ma tuafafine, o le taimi nei ua sili atu i lo se isi lava taimi, ua tatou maua ai ni avanoa tulaga ese ma ni punaoa e faalolotoina ai lo tatou malamalama i aoaoga a Iesu Keriso ma Lana Togiola. O le faaaogaina o nei punaoa ma le talafeagai o le a fesoasoani ai ia i tatou ia ola i se olaga uluola i le olioli.

I le faataoto a le Faaola i le Vine ma lala, sa Ia fetalai ai: “Ina tumau ia o outou ia te au, o a’u foi ia te outou. Faapei o le la e le mafai ona fua pe a na o ia, pe afai e le mau i le vine; e faapea foi outou, pe afai tou te le tumau ia te au.”²

O le faateleina o lo tatou malamalama i le matafaioi tulaga ese a Keriso i o tatou olaga, o le faateleina foi lena o lo tatou iloaina o lo tatou faamoemoega iinei i le olaga faaletino, o lona uiga ia maua le olioli. Peitai, o lena olioli e le taofia ai i tatou mai le oo i tofotofoga ma faigata, e oo lava i mea e sili ona faigata ia e ono taitai atu ai i tatou e manatu e le mafai ona maua le fiafia i ni tulaga faapena.

Ua ou iloa e ala i ni aafiaga faaletagata lava ia o le olioli i le ola ai i le amiotonu ma le tumau ia Keriso e mafai lava ona aveavea’i e ui i ni fesoua’iga ia ua masani ai i le olaga faaletino. I le iuga, o nei fesoua’iga e tele lava ina faaoaina ai, faaleleia ai, ma taiala ai i tatou i se malamalama loloto atu e uiga i le faamoemoega o lo tatou i ai i lenei olaga ma le Togiola a Iesu Keriso. O le mea moni, ua na o Iesu Keriso lava e mafai ona maua ai le atoatoaga o le olioli.³

Ua Ia fetalai mai, “O a’u nei o le vine, o la outou. O lē tumau ia te au, ma a’u ia te ia, o ia lava e fua tele mai; aua e le mafaia e outou ona fai o se mea e tasi pe a a’u le i ai.”⁴

Ou te talitonu pe a tatou faalolotoina lo tatou malamalama i le Faaola, o le a tatou mauaina se manaoga faateleina e ola fiafia ai ma se talitonuga maumaututu e mafai ona maua le olioli. O lea la, o le a tatou maua ai se tomai sili atu e ola ai i aso taitasi ma se naunautaiga sili atu mo le olaga ma le tausiga o poloaiga a le Atua, e oo lava i tulaga luitauina.

Aua nei o tatou tuua ni mea mo taeao o mea e mafai ona tatou faia i le asō. O le taimi nei lava e tatau ai ona tatou o mai ia Keriso ona “afai [tatou] te talitonu …ia te [Ia], o le a [tatou] galulue manū o ta’ua o le asō.”⁵

O aso uma lava e tatau ai ona tatou mafaufau e faaaofia aoaoga a Keriso i a tatou fegalegaleaiga faisoo. O gaoioiga ma faatinoga iti ma faatauvaa e faia i aso taitasi o le a:

1. Faalolotoina ai lo tatou malamalama i le taua o le Alii i o tatou olaga, ma

2. Fesoasoani ia i matou e faasoa atu lenei malamalama i le tupulaga faiae, o ē o le a mautinoa lava e lagonaina le alofa o le Tama Faalelagi ma Lona Alo, o Iesu Keriso, pe a latou vaaia a tatou faataitaiga o le ola faamaoni i le talalelei.

O a la nisi o amioga faigofie i lenei vaitaimi o le a avea ma se pulupāsama mo o tatou agaga i le faamalosia o a tatou molimau ia Keriso ma Lana misiona?

Ata

Woman on a train with a cell phone illuminating her face.

I le 2014, sa maua ai e le tauvaga a le National Geographic ni ata tauva e 9,200 mai pueata faapolofesa ma ē na lagolagoina, mai le silia ma le 150 atunuu. O le ata na manumalo o loo faaalia ai se tamaitai i le ogatotonu o le nofoaafi na faatumulia i ni pasese. O le malamalama mai lana telefoni feaveai na suluia ai ona foliga. Sa ia avatua se savali manino i isi pasese: e ui lava i lona i ai moni iina, ae e ese le mea o loo ia gauai atu i ai.⁶

O faamatalaga feaveai, telefonipoto, ma upega o fesootaiga ua matuai suia ai lava le auala o lo tatou i ai i le lalolagi ma le auala tatou te fesootai atu ai i isi.

I lenei vaitau faatekinolosi, ua mafai ai ona matuai faatelevaveina lo tatou feoai i nofoaga ma gaoioiga ia e mafai ona aveesea vave ai i tatou lava mai le mea e taua mo se olaga e faatumulia i le olioli tumau.

I lenei olaga o Initoneti, afai e le puleaina, o le a mafai ona tatou ave i ai le faataua i ni sootaga ma ni tagata tatou te le iloaina pe le i feiloai foi lava i ai, nai lo tagata tatou te nonofo faatasi—o o tatou lava aiga!

I le isi itu, ua tatou iloa uma lava ua faamanuiaina i tatou i punaoa sili ona lelei faainitoneti, e aofia ai punaoa ua atiaeina e le Ekalesia e pei o lomiga tusitusia ma leo o tusitusiga paia ma konafesi aoao, gaosiga o ata o le soifuaga ma aoaoga a Iesu Keriso, polokalama komepiuta e faamaumau ai o tatou talafaasolopito o aiga, ma avanoa e faalogologo ai i musika musuia.

O filifiliga ma mea e faamuamua tatou te faia i o tatou taimi i luga o le initoneti e matua faatosina lava. E mafai ona latou puleaina le taunuuga o lo tatou alualu i luma faaleagaga ma le lava o le silafia i le talalelei, ma lo tatou manao ia saofagā i se lalolagi sili atu ma ola i se olaga sili atu ona uluola.

Mo nei mafuaaga, ou te fia ta’ua i le aso ni mausa faigofie se tolu o le a atiaeina ai gaoioiga maloloina i le initoneti. O nei mausa o le a faagaoioia ai iloiloga faaletagata lava ia i aso uma ia e taua mo i tatou ia latalata atili ai i aoaoga a lo tatou Tama Faalelagi ma Lona Alo, o Iesu Keriso.