Adom Akyɛdze no

Yɛtaa kasa fa Agyenkwa no N’adom ho—na oye so!

Jacob ne nsɛm mu no, “na ɔyɛ dɛn ntsi na hom nnkã Christ no werdambɔ ho nsɛm, ama hom eenya no ho nyimdzee a odzi mu?”⁴ Mbom dɛ “yɛkã Christ ho asɛm, ... yedzi dɛw wɔ Christ mu, ...  yɛbɔ Christ ho asɛmpa no dawur, [na] yɛhyɛ Christ ho nkɔm”⁵  wɔ akwanya biara yebenya mu no, onnyi dɛ hɛn werɛ fir Nyame ne Ba n’onnyiewiei afɔrbɔ ho nwanwa na enyisɔ kɛsɛ no.

Agyenkwa No Werdambɔ no onnkotu abɛyɛ adze bi ara wɔ hɛn nkyerɛkyerɛ, hɛn abrabɔ, anaa hɛn akoma mu. Ho tsew na ɔyɛ krɔnkrɔn, osiandɛ ɔnam “afɔrbɔ kɛse a odzi ewiei yi” do na Christ “ɔdze nkwagye [brɛɛ] hɔn a wɔbɛgye ne dzin edzi no nyina”⁶

Ɔyɛ me ahobow dɛ Nyame Ne Ba no besian famu dze abɛgye hɛn nkwa, hɛn a yenndzi mu, hɛnho nntsew, mfom mmpar hɛn, na yɛtaa yɛ bɔnyiayɛ no. Medze m’adwen a ɔtɔ sin no abɔ mbɔdzen dɛ mebɛtse Agyenkwa No Werdambɔ no ase, na nkyerɛkyerɛmu a mutum dze ma nye iyi: Nyankopɔn dɔ hɛn emudzi mu kɔ bun mu, nye daapem. Munnkotum mpo ahyɛ ase esusu “Christ [No] dɔ  … ne tɛtɛr no, nye ne tsentsen, nye no bun nye krɔn no.”⁷

Dɛm dɔ no da edzi pefee wɔ dza kyerɛwsɛm no taa frɛ no Nyame N’adom—mboa no a ofir sor na ahoɔdzen akyɛdze a ɔma yetum nyin fi abɔdze a sesei yɛwɔ esintɔ ba bɛyɛ abɔso abɔdze a wɔkrɔn a “[wo]nya kan na nokwar, kɛpem dɛ wɔbɛhyɛ [hɛn] enyimnyam wɔ nokwar no mu, na [ye]nyim ndzɛmba nyina.”⁸

Nyame n’adom yi, yɛ adze nwanwa dodow. Naaso yɛnntaa nntse ase.⁹ Dɛm mpo no, sɛ yɛpɛ dɛ yedzi adze wɔ N’onnyiewiei ahenman no a Woesiesie ama hɛn no mu a, ɔwɔ dɛ yehu nsɛm a ɔfa Nyame N’adom yi ho.

Ɔno ho ntsi mebɛpɛ dɛ mekasa fa adom ho. Odzi kan, nkanka, mbrɛ adom bue sor mbobow no  nye, otsĩa ebien, mbrɛ osi bue sor ntokura no.

Odzi Kan: Adom Bue Sor Mbobow

Osiandɛ hɛn nyina “ayɛ bɔn, na [yɛ]atɔ sin wɔ Nyankopɔn enyimnyam ho,”¹⁰na osiandɛ “adze biara a no ho nntsew no runntum nnhɛn Nyankopɔn n’ahenman no mu,”¹¹ ntsi hɛn mu biara nndzi mu dɛ ɔsan kɔ Nyame enyim.

Sɛ yɛdze hɛn kra nyina som Nyame mpo a, ɔnnkɔsõ, osiandɛ yɛbɛda ho ayɛ “nkowaa a mfaso nnyi [hɛn] ho.”¹² Yennkotum etua hɛn ho kaw akɔ sor; pɛrpɛrdzi ahwehwɛdze no gyina hɔ dɛ akwambew a, yennyi ho tum dɛ hɛnara yɛbɛtra.

Mbom ne nyina nnyɛɛ nkõgu.

Nyankopɔn N’adom no nye hɛn enyidado kɛse daapem.

Ɔnam Jesus Christ afɔrbɔ no do ɔama ehumbɔbɔr ho nhyehyɛɛ no aaba abɛpata pɛrpɛrdzi n’ahwehwɛdze no¹³ “na ɔdze biribi [brɛ] nyimpa a ɔnam do benya gyedzi a ɔbɛma woenya nnuho no.”¹⁴

Sɛ kaansa, hɛn bɔn ayɛ tse dɛ adaaben a, ɔbɔhoa dɛ esukwankyɛba.¹⁵Osiandɛ hɛn Agyenkwa dɔfo “no a ɔdze noho maa dɛ asatsir maa nyimpa nyina”¹⁶ wɔama hɛn kwan wɔ N’ahendzi a onnyi ewiei no mu.¹⁷

Woebue abow no!

Mbom Nyame N’adom no nnsan nye hɛn mmba gyinabew no a nna yennyim hwee no mu ara. Sɛ nkwagye asekyerɛ ara nye ɔrepepa hɛn mfom na bɔn a, nna nkwagye— nwanwa a ɔyɛ no—ɔnnhyɛ Egya no Ne tsirmpɔw a Ɔwɔ ma hɛn no mã. No botae no krɔn koraa: Ɔpɛ dɛ Ne mbabanyin na mbabaa ba bɛyɛ tse dɛ Ɔno.

Yɛdze Nyame N’adom ho akyɛdze no, osũanyiyɛ anamɔn kwan no nnsan ekyir; ɔkɔ sor.

Ogya kɔ bea a ɔkrɔn a yennkotum atse ase da! Ogya kɔ nkwagye ntowdo wɔ Ɔsor Egya Ne celestial ahenman no mu, bea a, hɛn adɔfo etwa hɛnho ehyia no, [yɛ]agye “ne mãhyɛ, na n’enyimnyam no.”¹⁸ Ndzɛmba nyina yɛ [hɛn] dze, na [yɛ]yɛ Christ dze.¹⁹ Nokwar, na dza Egya No wɔ nyina wɔdze bɛma hɛn.²⁰

Ama yeenya enyimnyam yi edzi no, ohia dɛ yɛyɛ ma ɔtra abobow a woebue ara; otwar dɛ yɛdze akoma mu apɛdze dɛ yɛbɛsesã dze dua abobow yi mu—nsesã nwanwa a kyerɛwsɛm no kã fa ho dɛ “wɔwo hɔn fofor; nyew, Nyame awo hɔn, wɔasakyer hɔn efi [hɛn honam su] nye asehwe tsebew mu, dze hɔn akɔ tsenenee mu ama Nyame aapon hɔn ma wɔaabɛyɛ ne mbabanyin na ne mbabaa.”²¹

Otsĩa Ebien: Adom Bue Sor Ntokura no

Nyame N’adom no su kor so nye obue sor ntokura no, bea a Nyame hue ahoɔdzen na tum nhyira dua, na ɔma yetum yɛ ndzɛmba a nkyɛ ɔbor hɛn ahoɔdzen do koraa. Ɔnam Nyame N’adom nwanwa no do na Ne mba tum dzi osisifo no no nsɔhwɛ a ɔhyɛ nsumaa mu no do, na yefi bɔn mu ma “ye[be]dzi mu wɔ Christ mu”²²

Kaansa hɛn nyina yɛwɔ mberɛwyɛ a, yebotum edzi do konyim. Nokwar ɔyɛ Nyame N’adom dɛ sɛ yɛbrɛ hɛnho adze na yenya gyedzi a, ndzɛmba a ɔyɛ mberɛw no bɛhyɛ dzen.²³

Hɛn abrabɔ mu nyina no, Nyame N’adom kyɛ hɛn honam mu nhyira nye sunsum mu akyɛdze a ɔma hɛn mbɔdzembɔ kɔ kan na hɛn abrabɔ hyɛ mã. N’adom no tsew hɛnho. N’adom no boa hɛn ma yɛfa hɛn su a ɔkrɔn.

Bible mu no yɛkenkan fa nsera a Christ kɛseraa Simon Phariseenyi ne fie no.

Guado no, nna ɔyɛ dɛ mbrɛ Simon yɛ nyimpa pa na tseneneenyi. Ne nyamesom ho ahyehyɛdze no nna ɔtaa yɛ ne nyina: osie mbra no, otua n’ebupɛn du, osie Ahomgyeda no, ɔbɔ mpaa daa daa, na ɔkɔ asɔrfi mu.

Na ber a Jesus wɔ Simon nkyɛn no, ɔbaa bi bɛɛn no, ɔdze ne nyisuwa foow n’anan ho, na ɔdze ngohuam seraa n’anan.

Som yi a ɔbaa yi somee no annyɛ Simon fɛw, osiandɛ onyim dɛ ɔyɛ ɔdzebɔnyɛnyi. Na Simon dween ho dɛ sɛ Jesus nnyim onyi kor no a, nna ɔnnyɛ Nkɔnhyɛnyi anaa nkyɛ ɔnnkɛma ɔbaa no dze ne nsa akã no.

Ohun n’adwendwen mu no, Jesus danee kɔr Simon do bisaa no asɛmbisa. “Bosabɔnyi bi wɔ akafo beenu: baako dze denare ahenum, baako so dze eduonum.

“Na wonnya bi nntua [beenu] no, ɔdze kyɛɛ hɔn beenu no nyina kwa. Dɛm ntsi kã kyerɛ me, hɔn mu woana na ɔbɔdɔ no dodow?”

Simon buaa dɛ nyia ɔdze dodow kyɛɛ no no a.

Na Jesus kyerɛɛ adzesũadze soronko yi: “Ehu ɔbaa yi? … No bɔn a ɔdɔɔ sõ no, wɔdze akyɛ no; osiandɛ no dɔ dɔɔ sõ: na nyia wɔdze kumaabi akyɛ no, ɔdɔ kumaabi.”²⁴

Nkorɔfo beenu yi mu woana na hɛn mu dodowara tse?

Yɛtse dɛ Simon a? Ana yɛwɔ awerɛhyɛmu wɔ hɛn ndwuma pa ho ma ɔma hɛn ahotɔ a, yɛtwer hɛnankasa hɛn tseneeneyɛ? Ana bia na yennyi abotar mma nkorɔfo a hɔn abrabɔ gyinapɛn nndu hɛndze a? Ana yɛreyɛ ndzɛmba ara kɛkɛ a, yɛkɔ nhyiamu, yɛheram heram ber a Kwesida adzesũa rokɔ do, na bia yɛhwɛ hɛn cell phone do sacrament som ber no?

Anaa yɛtse dɛ ɔbaa yi a, ɔdween dɛ ɔnam no bɔn ntsi ɔayew korakora a onnyi enyidado?

Ana hɛn dɔ dɔɔ sõ?

Ana yɛtse hɛn kaw a yɛdze Ɔsor Egya no ase na yɛdze hɛn kra nyina totɔserɛ Nyame N’adom?

Ber a yebu nkotodwe bɔ mpaa no, anaa yɛkenkan hɛnankasa hɛn tseneneeyɛ no dodow, anaa yɛkã hɛn mfom, yɛtotɔserɛ Nyame N’ehumbɔbɔr, ma yekyi ɔpon ho nhyehyɛɛ nwanwa no ho enyisɔ ho enyinsuwa a?²⁵

Yennkotum yɛdze setsie ho sika atɔ nkwagye; wɔdze Nyame Ne Ba no bɔgyaa tua ho kaw.²⁶Yerodwen dɛ yebotum dze hɛn ndwuma pa enya nkwagye tse dɛ akɔtɔ wimuhɛn tsikitsi na nkyii yɛadwen dɛ wimuhɛn edwuma no yɛ hendze. Anaa yɛbɔdwen dɛ yetua hɛn fie ho asaase tow ewie no, wiadze asaase nyina ho nkraata kitsa hɛn.

Sɛ adom yɛ Nyame akyɛdze a, dɛn ntsi na nkyii setsie ma Nyankopɔn mbrasɛm ho hia tsitsir yi? Dɛn ntsi na Nyankopɔn mbrasɛm—anaa nnuhu, wɔ dɛ ɔfa hɛn ho? Dɛn ntsi na yɛngye nto mu dɛ yɛyɛ ndzebɔnyɛfo na yɛma Nyame ngye hɛn?

Anaa, yɛdze Paul ne nsɛm bisa asɛmbisa a, “Ana yɛnda ho ntsena bɔn mu, ma adom no ndɔɔ sõ?” Paul ne nyiano yɛ tsiabaa na pefee: “Dabida”²⁷

Enuanom na nkyerɛbaa, yɛyɛ setsie ma Nyankopɔn mbrasɛm—fi ɔdɔ a yɛwɔ Ma no!

Yɛrobɔ mbɔdzen dze hɛn akoma na hɛn adwen nyina atse Nyame N’adom akyɛdze ase no na ɔma hɛn siantsir kɛse dɛ yɛdze botooyɛ nye enyisɔ dze dɔ hɛn Ɔsor Egya na yɛyɛ setsie ma no. Ber a yɛnatsew osũanyiyɛ anamɔn mu no, ɔtsew hɛnho, otu hɛn mpon, na ɔboa hɛn ma yɛbɛyɛ tse dɛ Ɔno yie, na ogya hɛn nye hɛn san kɔ N’enyim. “Ewuradze [hɛn Nyame] no Sunsum no” dze “nsakyer kɛse aba hɛn mu, … ma yennyi pɛ biara bio dɛ yɛbɛyɛ bɔn, na mbom dɛ yɛbɛyɛ papa aber nyina.”²⁸

Dɛm ntsi, hɛn setsie ma Nyankopɔn mbrasɛm no ne fibea nye hɛn dɔ a ɔmmbɔadze na hɛn enyisɔ ma Nyame Ne papayɛ no. Nokwar ɔdɔ na enyisɔ a ɔtse dɛm yi bɛma anwanwadze mu ara, hɛn ndwuma na Nyame N’adom abɔ mu. Ɔbrapa besiesie hɛn adwen mu a onngyaa da, nkyii hɛn awerɛhyɛmu wɔ Nyame enyim bɛhyɛ dzen.²⁹

Enuanom na nkyerɛbaa, yɛdze asɛmpa no robɔ bra nokwar mu no nnyɛ adzesoa. Ɔyɛ enyigyedze ahosiesie—ahoboaboa a yɛdze benya onnyiewiei enyimnyam no a ɔkrɔn no edzi. Yɛper dɛ yɛbɛyɛ setsie ama hɛn Ɔsor Egya osiandɛ hɛn esunsum tum tse sunsum ndzɛmba ase yie. Yehu ndzɛmba ahorow a yennyim dɛ wɔwɔ hɔ pɛn. Yenya enyidotsewee na ntseasee ber a yɛyɛ Egya no Ne pɛ.³⁰

Adom yɛ Nyame akyɛdze, na hɛn pɛ dɛ yɛbɛyɛ setsie ama Nyame mbrasɛm kor biara no nye yɛretsen hɛn honam nsa agye akyɛdze krɔnkrɔn yi efi hɛn Ɔsor Egya hɔ.

Nkɔnhyɛnyi Nephi boaa hɛn kɛse wɔ hɛn ntseasee wɔ Nyankopɔn adom ho ber a ɔkãa dɛ, “Yesi nketse … dze adandan hɛn mba, na hɛn enuanom so, ma wɔaagye Christ edzi, na wɔaakã hɔn nye Nyame abɔmu; osiandɛ yenyim dɛ dza yebotum ayɛ nyinara ekyir no wɔnam adom do na wɔbɛgye hɛn nkwa.””³¹

Naaso, ɔyɛ me dɛ ɔtɔfabi a asɛmfua “dza yebotum ayɛ nyina ekyir no” yɛnnkyerɛ ase yie. Otwar dɛ yɛtse ase dɛ “ekyir no” nye “osian” nnsɛ.

Wɔnngye hɛn nkwa “osian” dza yebotum ayɛ nyina ekyir no. Ana hɛn mu bi ayɛ dza yebotum ayɛ nyina ? Ana Nyame tweɔn ma yɛhwer hɛn mbɔdzembɔ nyina ansaana Ɔdze No ɔgye adom no aba hɛn abrabɔ mu?

Nkorɔfo dodowara nya abagura osiandɛ wɔtɔ sin aber biara. Wonyim no yie dɛ “sunsum pɛ dze, na honam yɛ mberɛw.”³² Wɔnye Nephi ma hɔn ndze do paa mu kã dɛ, “Me kra dzi yaw osian m’emumuyɛ ntsi”³³

Minyim pefee dɛ nna Nephi nyim dɛ Agyenkwa N’adom no ma kwan na ɔma yetum dzi bɔn do konyim.³⁴ Dɛm ntsi na Nephi sii nketse yɛɛ edwuma ama ɔdze adandan ne mba na n’enuanom so “ma wɔaagye Christ edzi, na wɔaakã hɔn na Nyame abɔ mu.”³⁵

Ne nyina ekyir no, iyiara nye dza yebotum ayɛ! Na iyiara nye hɛn ndwuma wɔ ɔnnkyebo abrabɔ yi mu!

Sɛ modwen dza Agyenkwa no yɛe maa hɛn a ogya kɔ Easter Kwesida a odzi kan no, Mepɛ dɛ mema me ndze do tsẽa tonton Ɔsorsor Abɔso Nyankopɔn na Ne Ba Jesus Christ!

Woebue ɔsor abobow no!

Woebue ɔsor ntokura no!

Nyame N’adom wɔ hɔ ma hɔn a hɔn akoma abobɔ na hɔn esunsum abotow ndɛ na daapem.³⁶ Jesus Christ esiesie kwan no ato hɔ ama hɛn ama yɛaafow aakɔ mbea a ɔkrɔn a nyimpa adwen nnkotum ehu.³⁷

Mobɔ mpaa dɛ yɛdze enyiwa fofor na akoma fofor bohu Agyenkwa no ɔpon afɔrbɔ no n’onnyiewiei ho hia a ohia. Mobɔ mpaa dɛ yɛbɛkyerɛ hɛn dɔ ama Nyankopɔn na hɛn enyisɔ ama Nyame N’adom akyɛdze a ɔmmbɔadze no ber a yesie Ne mbrasɛm na enyigye mu ara yɛanatsew abrabɔ fofor mu.”³⁸ Wɔ hɛn Wura na Ɔpomfo, Jesus Christ dzin krɔnkrɔn no mu, amen.