Menin Letok eo kōn Tiriam̧o̧

Jemaron̄ konono kōn Pinmuur eo an Rilo̧mo̧o̧r eo—ejim̧we bwe jen kōm̧m̧ane!

Ilo naan ko an Jekab, “Etke jab kōnono kōn pinmuur eo an Kraist, im jibadek juon jeļā eo eweppān kōn E?”⁴Ak jej “kōnono kōn Kraist, …  m̧ōņōņō ilo Kraist, …  kwaļo̧k kōn Kraist, [im] kanaan kōn Kraist”⁵  ilo iien otemjej rem̧m̧an,  jej aikuj jab luuji en̄jake in kautiej eo ad im kam̧m̧oolol eļap kōn katok eo ejjeļo̧k jem̧ļo̧kin an Nejin Anij.

Pinmuur eo an Rilo̧mo̧o̧r eo ejjab ejjeļo̧k aorōkin kōnke eļap kōjerbale ilo ad katakin, ad oktak, ak ilo būruwōd. Ej ittiņo̧ im kwojarjar, bwe ekar jān “katok eļap im āliktata” bwe Jisōs RiKraist eo ekar bōktok “lo̧mo̧r n̄an aolep ro renaaj tōmak ilo Etan.”⁶

Ikar bwilōn̄ im ļōmņak bwe Nejin Anij enaaj kōttāeik E n̄an lo̧mo̧o̧r kōj, āinwōt emakijkij in ad jab wāppen, jarreeo, niknik kōm̧m̧an bōd, im jab kam̧m̧ool. Ikar kajjieon̄ in meļeļe Pinmuur eo an Rilo̧mo̧o̧r eo kōn ļōm̧ņak eo aō elikjab, im kōmeļeļe in wōt imaron̄ in wanlōn̄tak kake ej; Anij ej iakwe kōj, wāppen, im n̄an indeeo. Ijjab maron̄ jino anto̧o̧ne “depakpakin, im aetokan, im m̧wilaļ in, im utiej in …  [yokwe] an Kraist.”⁷

Kōnono eo ekajoor kōn iakwe ej ta eo jeje ko rekwojarjar ekkā aer ņae etan tiriam̧o̧ an Anij—jipan̄ eo ekwojarjar im menin letok an kajoor eo jej eddōk jān ad kar armej ro remōjņo̧ im relikjab im kiiō rej wanlōn̄ļo̧k kōn m̧ool im meram, m̧ae iien jej aiboojoj ilo m̧ool im jeļā men otemjej.⁸

Ej juon men ekabwilōn̄lōn̄, tiriam̧o̧ in an Anij. Kiiō ekkā tarpok kake.⁹Aaet, jej aikuj jeļā kōn tiriam̧o̧ an Anij eļan̄n̄e jej kōņaan in deļo̧n̄e ta eo emōj kōpooje n̄an kōj ilo aelōn̄ eo An indeeo.

Kōn unin, ikōņaan kōnono kōn tiriam̧o̧. Eļaptata, juon, ewi wāween an tiriam̧o̧kōppeļo̧ki kōjem̧ ko ilan̄  im, ruo, ewi wāween an kōppeļļo̧ke wintō ko ilan̄.

Ilo Baibōļ jej riit kōn loļo̧k eo an Kraist n̄an m̧weo im̧ōn Saimon Riparisee eo.

Āinwōt, Saimōn juon emm̧aan em̧m̧an im em̧ool. Ej aolep iien etale laajrak in jerbal ko an im eddo an kabun̄: ekar kōjparok kien ko, kōļļā juon m̧ōttan jon̄oul, kōjparok raan in Jabōt, jar aolep raan, im etal n̄an jikin kweilo̧k.

Ak ke Jisōs ekar pād ippān Saimōn, juon kōrā ekar kepaak ļo̧k, kwaļ neen Rilo̧mo̧o̧r kōn dān in kōm̧jaļļaaļ in mejān im kapit Neen kōn oil.

Saimōņ ekar jab m̧ōņōņō kōn wāween kabun̄ jar in, kōnke ekar jeļā bwe kōrā eo ekar juon rijerawiwi. Saimōn ekar ļōmņak n̄e Jisōs ekar jab jeļā menin, E jab aikuj in juon rikanaan ak E ej jāmin kar kōtļo̧k an kōrā eo un̄ūri.

Kōļmenļo̧kjeņ kōn ļōmņak ko an, Jisōs ekar oktak n̄an Saimōn im kajjitōk juon kajjitōk. “Ruo ri m̧uri an juon ri kam̧uriri: … “Juon ej m̧uri kōn limabukwi sillin̄, … eo juon kōn lemn̄oul.

“Im ke ejjeļo̧k ippāerro bwe ren kōļļā, ear jeorļo̧k airro m̧uri. Kōn men in, kwōn ba n̄an Eō, wōn iaerro eļap an yokwe e?”

Saimōn e uwaak im ba eo eļap an jeorļo̧k an m̧uri.

Innām Jisōs ekar katakin juon katak em̧m̧an: “Kwōj lo kōrā in ke? … jerawiwi ko an, relōn̄, em̧ōj julo̧k; bwe eļap an yokwe: a n̄an eo e dik an jako, e dik an yokwe.”²⁴

Wōn iaan armej rein ruo jej lukkuun āinwōt?

Jej ke āinwōt Saimōn? Jej ke lōke kōj make im aenōm̧m̧an ilo kōm̧anm̧an ko ad, lōke ilo ad make wāppen? Jej ke jaje kōmaanwa ippān ro rej jab mour kōn jon̄ak ko ad? Jej ke kōtļo̧k an m̧wil ko m̧wilid tōl m̧akūtkūt ko ad, kōm̧m̧ane juon men ilo ad jab ļōmņak, etal n̄an kweilo̧k ko ad, pād ilo kūlaaj ko men̄e rejelmo, im etale cell phone eo ad ilo iien kwojkwoj?

Ak jej ke āinwōt kōrā in, eo ekar ļōmņak ejjeļo̧k an kōjatdikdik kōnke jerawiwi ko an?

Eļap ke ad iakwe?

Jej ke meļeļe m̧uri eo ad n̄an Jemedwōj Ilan̄ im akweļap kōn aolepān ad kōn tiriam̧o̧ an Anij?

N̄e jej bukwelōlō n̄an jar, ej ke n̄an keememej men eo em̧m̧antata jekar kōm̧m̧ane, ak ej ke n̄an kwaļo̧k kōn bōro bōd ko ad, akweļap kōn tiriam̧o̧ an Anij, im kōtōro̧o̧lļo̧k dān in kōmjaļaaļ kōn kam̧m̧oolol kōn karōk in em̧m̧an kōn pinmuur?²⁵

Lo̧mo̧o̧r ej jab maron̄ wiaiki kōn mani in pokake; ej pojak n̄an kōj kōnke bōtōktōk in Nejin Anij.²⁶ Ļōmņak bwe jemaron̄ in jāniji jerbal ko ad rem̧m̧an n̄an bōk lo̧mo̧o̧r ej āinwōt wiaki juon tiket in baļuun innām ļōmņak bwe waad baļuun eo. Ak ļōmņak bwe ālkin ad reen e m̧weo im̧ōd, kiiō ej ad aolepān laļ in.

Eļan̄n̄e tiriam̧o̧ ej menin letok an Anij, innām etke pokake kien ko an Anij relukkuun aorōk? Etke jej elļo̧k n̄an kien ko an Anij—ak ukweļo̧k, kōn unin? Etke jejjab kwaļo̧k ke jejerawiwi im kōtļo̧k bwe Anij en lo̧mo̧o̧ren kōj?

Ak, n̄an likūt kajjitōk eo ilo naan ko an Paul, “Jen pād ilo jero̧wiwi ke, bwe jouj en orļo̧k?” Uwaak eo an Paul ej pidodo: “Anij ej kōtļo̧k.”²⁷

Ro jeiū im jatū, jej pokake kien ko an Anij—kōnke ad iakwe n̄an E!

Kajjieon̄ meļeļe menin letok an Anij ej tiriam̧o̧ kōn aolepān būruwōd im ļōmņak ej letok n̄an kōj aolep elōn̄ ļo̧k un ko n̄an iakwe im pokake Jemedwōj Ilan̄ kōn meanwōr im kam̧m̧oolol. Ilo ad etetal ilo iaļ in rikaļoor, ej kōkōm̧anm̧anļo̧k kōj, ej ejaake kōj, ej jipan̄ kōj erom āinwōt E, im ej tōlļo̧k n̄an im̧aan Mejān. “Jetōb eo an Irooj Ekajoor Pōtata” ej bōktok “juon oktak ekajoor ilo kōj, … bwe jej jab bar itok wōt in kōm̧m̧an nana, ak n̄an kōm̧m̧an em̧m̧an wōt.”²⁸

Kōn menin, ad pokake kien ko an Anij ej itok āinwōt waļo̧k in ad iakwe im kam̧m̧ool ejjeļo̧k jem̧ļo̧kier kōn em̧m̧an eo an Anij. Wāween iakwe in em̧m̧an im kam̧m̧ool in enaaj tuwe ta eo jej kōm̧m̧ane kōn tiriam̧o̧ an Anij. Wānōk enaaj aolep iien pād ilo ļōmņak ko ad, im ad lōke enaaj kajoorļo̧k im̧aan mejān Anij.²⁹

Ro jeiū im jatu, mour tiljek kōn gospel eo ej jab juon eddo. Ej juon kaminene elem̧ōņōņō—juon kōbpopo n̄an deļo̧n̄e aiboojoj eo eļap an indeeo im indeeo. Jej pukōt n̄an pokake Jemedwōj Ilan̄ kōnke jetōb ko ad renaaj ļapļo̧k reel n̄an men ko an jetōb. Jenaaj meļeļe men otemjej jekar jab ļōmņaki m̧okta. Meramļo̧k im meļeļe rej itok n̄an kōj n̄e jej kōm̧anm̧an ankilaan Jemād.³⁰

Tiriam̧o̧ ej menin letok an Anij, im ad kōņaan in pokake n̄an kajjojo kien ko an Anij ej ilo ad leļo̧k pā kein peid rewabanban bwe jen maron̄ bōk menin letok kein rekwojarjar jān Jemedwōj Ilan̄.

Rikanaan Nipai ekar kōm̧m̧ane juon jipan̄ eaorōk n̄an meļeļe eo ad kōn tiriam̧o̧ an Anij ke ekar kwaļo̧k, “Kimij niknik jerbal …  n̄an kareel buruōn ro nejim, im barāinwōt ro jeim̧ im jatūm̧, n̄an tōmak ilo Kraist, im jepļaaktok n̄an Anij; bwe kōm jeļā bwe ej jān jouj jej mour, ālkin aolep ijo jemaron̄ kōm̧m̧an make.”³¹

Kōn menin, ij ļōmņak n̄e jet iien ej ebōd ad ukōt naan eo “ālkin jon̄an wōt ad maron̄e.” Jej aikuj meļeļe bwe “ālkin” ejjab juon wōt aero meļeļe “kōnke.”

Kōnke jejjab lo̧mo̧o̧r “kōnke” jon̄an eo wōt jemaron̄ kōm̧m̧ane. Kōj aolep jekar ke kōm̧m̧ane aolepān jon̄an wōt ad maron̄? Anij ekar ke kōttar m̧ae iien jekar kōļapļo̧k kijejeto ko ad m̧okta jān An naaj bōk kōņaan eo ilo mour ko ad kōn tiriam̧o̧ in lo̧mo̧o̧r eo An?

Elōn̄ armej rej ebbweer kōnke er rej likjab. Er rejeļā jān imminene bwe “An e kōņaan, a kanniōk e m̧ōjņo̧.’”³² Rej lelōn̄ļo̧k ainikier ippān Nipai ilo kwaļo̧k, “Aō ej liejļoļ kōn nana ko aō.”³³

Ijeļā Nipai ekar jeļā tiriam̧o̧ eo an Rilo̧mo̧o̧r eo ej kōtļo̧k im kōmaron̄ n̄an anjo̧ jān jerawiwi.³⁴En̄in ej etke Nipai ekar lukkuun tiljek jerbal n̄an kareel ajri ro nejin ro jein im jatin “n̄an tōmak ilo Kraist, im n̄an jepļaaktok n̄an Anij.”³⁵

Āliktata, en̄in ej ta eo jemaron̄ kōm̧m̧ane! Im en̄in ej jerbal eo ad ilo mour in!

N̄e ij ļōmņak kōn ta eo Rilo̧mo̧o̧r eo ekar kōm̧m̧ane n̄an kōj n̄an tōlļo̧k n̄an Ijtō eo jinointata, ikōņaan in kotak ainikiō im lamōj nōbar n̄an Anij Eutiej Pōtata im Nejin, Jisōs Kraist!

Kōjem̧ ko ilan̄ reppeļļo̧k!

Wintō ko ilan̄ reppeļļo̧k!

Rainin im n̄an indeeo tiriam̧o̧ an Anij ej pojak n̄an aolep bōro ko rej rub im jetōb ko aer rej ettā.³⁶Jisōs Kraist ekar kalikkar iaļ eo n̄an kōj n̄an wanlōn̄ļo̧k n̄an ijoko routiej jōko ļōmņak ko ad reban meļeļe kaki.³⁷

Ij jar bwe jenaaj loe kōn māj ko rekāāl im juon bōro ekāāl em̧m̧an ko an katok in pinmuur eo an Rilo̧mo̧o̧r eo. Ij jar bwe jenaaj kwaļo̧k ad iakwe n̄an Anij im ad kam̧m̧oolol kōn menin letok in an Anij tiriam̧o̧ eļap jān kōjparok kien ko An im lan̄lōn̄ “etetal ilo juon mour ekāāl.”³⁸ ilo etan ad M̧aajta im Ripinmuur, Jisōs Kraist, amen.