2010–2019
O Le Musika o le Talalelei
Aperila 2015


O Le Musika o le Talalelei

O le musika o le talalelei o le lagona fiafia faaleagaga lea e sau mai le Agaga Paia. E aumaia se liuga o le loto.

I tausaga ua mavae sa ou faalogologo ai i se faatalanoaga i le leitio o se fomai talavou sa faigaluega i se falemai i le Itumalo a Initia Navajo. Sa ia faamatalaina se aafiaga sa na maua i se tasi po lea na alu atu ai se toeaina Amerika Mao’i e fili uumi lona lauulu i le potu o faalavelave faafuasei. Na ave e le fomai talavou lana laupapa kilipa, ma alu atu i le toeaina, ma fai atu, “E faapefea ona ou fesoasoani ia te oe?” Na tilotilo sao le toeaina ma na leai se tala na fai ifo. Na toe taumafai atu le fomai, lea na tau lagona le le onosai. “E le mafai ona ou fesoasoani atu ia te oe pe a e le talanoa mai ia te au,” o lana tala lea. “Tau mai pe aisea ua e sau ai i le falemai.”

Ona tilotilo atu lea o le toeaina ia te ia ma fai atu, “E te siva?” A o mafaufau le fomai talavou i lea fesili ese, na oo ia te ia se manatu masalo ona o lana ma’i o se tagata e talitonu i mana faamalolo faapitoa, e tusa ai ma aga faaleaganuu, na taumafai e faamalolo le ma’i e ala i pesega ma siva nai lo vailaau faafomai.

“Leai,” o le tala lea a le fomai, “Ou te le siva. E te siva?” Na lue le ulu o le toeaina ioe. Ona fesili lea o le fomai, “E mafai la ona e aoao au e siva?”

O le tali a le toeaina ou te mafaufau pea lava i ai mo le tele o tausaga. “E mafai ona ou ā’oa lau siva,” na ia fai mai ai, “ae e tatau ona e lagonaina le musika.”

O nisi taimi i o tatou aiga, tatou te aoaoina lelei ai taga o le siva ae le lelei i le fesoasoani atu i tagata o o tatou aiga ia lagonaina le musika. Ma e pei ona silafia lelei e le toeaina, e faigata ona e siva e aunoa ma se musika. O le siva e aunoa ma se musika e faalemanaia ma e le faamalieina—e oo lava i le maasiasi. Na e faataitaia muamua?

I le vaega e 8 o le Mataupu Faavae ma Feagaiga, na aoao atu ai e le Alii ia Iosefa Samita ma Oliva Kaotui, “Ioe, faauta, o le a Ou tau atu ia te oe i lou mafaufau ma lou loto, e ala i le Agaga Paia, lea o le a oo atu i ou luga ma lea o le a mau i lou loto” (fuaiupu e 2). Tatou te aoaoina ia taga o le siva i o tatou mafaufau, ae tatou te faalogo ma o tatou loto i le musika. O taga o siva o le talalelei o mea ia ua tatou faia; o le musika o le talalelei o le lagona fiafia faaleagaga lea e sau mai le Agaga Paia. E aumaia se liuga o le loto ma o le puna o manaoga uma amiotonu. O taga o le siva e manaomia ai le amio pulea, ae o le olioli o le siva ua na o lo tatou faalogoina o le musika o le a lagonaina ai.

O loo i ai tagata e faatauemu i tagata o le Ekalesia mo mea tatou te faia. E malamalama lena mea. O i latou o e sisiva e masani ona foliga e ese lava pe faalemasani po o le, faaaoga o se faaupuga faatusipaia, “tulaga ese” (1 Peteru 2:9) mo i latou o e e le lagonaina le musika. Na e i ai se taimi na e tu ai i se moli taofi i talaane o se taavale o loo siva ma pese ai le avetaavale i le mea e gata mai ai lona leo—ae e le mafai ona e lagonaina se leo aua sa i luga uma au faamalama? Pe e lei tulaga ese ea ona foliga? Afai e aoaoina e a tatou fanau ia taga o le siva e aunoa ma le aoaoina e faalogo ma ia lagona le musika matagofie o le talalelei, o le a faasolo ina latou le maua le toafimalie e sisiva ai ma, a le o le mumusu e sisiva pe, e tutusa lava le leaga, na o le faaauau lava ona sisiva ona o uunaiga ua latou lagonaina mai isi o loo sisiva i o latou autafa.

O le lui mo i tatou uma o e saili e aoao atu le talalelei o le faalautele lea o le mataupu aoaoina i tua atu o taga o le siva. Ua faamoemoe le fiafia o a tatou fanau i lo latou mafaia ona faalogo ma fiafia i le musika matagofie o le talalelei. O faapefea ona tatou faia?

Muamua, e tatau ona tatou faaogatusaina o tatou lava olaga ma tulaga faaleagaga sa’o. I aso ua leva, a o lei i ai ni komepiuta, na tatou mauaina ni alaleo e sili ona tatou fiafia i ai i le mimiloina lea faaeteete o le ki o le leitio seia laina lelei lava le gila ma le alaleo. A o latalata atu i le fuainumera, e na o le gogolo lava tatou te faalogoina. Ae a sa’o loa le gila o le laau, ona mafai lea ona tatou faalogologo ma le manino atu i pese e sili ona tatou fiafia i ai. I o tatou olaga, e tatau ona tatou faasa’oina le tatou gila ina ia faalogo ai i musika a le Agaga.

Ina ua tatou maua le meaalofa o le Agaga Paia ina ua uma ona papatiso, na faatumulia i tatou ma le musika faalelagi lea e o faatasi ma le liua. Ua i ai se liuga o o tatou loto, ma ua “le toe i ai so matou manao e fai mea leaga, ae ia faia mea lelei e le aunoa” (Mosaea 5:2). Peitai o le a le onosaia e le Agaga le le alofa po o le faamaualuga po o le lotoleaga. Afai o le a aveesea mai i o tatou olaga lena aafiaga maaleale, o le a vave ona lavelave ia vaega ogatusa o le talalelei ma iu lava ina faamutaina. Na fesili Alema i le fesili faamomoiloto: “Afai ua outou lagona le fia pepese i le pese o le alofa togiola, ou te fia fesili atu, e mafai ea ona outou lagonaina nei?” (Alema 5:26).

Matua, afai e le o ogatusa o tatou olaga ma le musika o le talalelei, e tatau ona tatou faaogatusaina. E pei ona aoao mai e Peresitene Thomas S. Monson ia Oketopa ua mavae, e tatau ona tatou mafaufau loloto i ala o o tatou vae (tagai “Ia Mafaufau i le Ala o Ou Vae,” Liahona, Nov. 2014, 86–88). Tatou te iloa le auala e faia ai. E tatau ona tatou savalia le ala lava e tasi lea sa tatou savalia i le taimi muamua sa tatou faalogo ai i atugaluga faalelagi o musika o le talalelei. Tatou te faatinoina le faatuatua ia Keriso, salamo, ma ‘ai ma inu i le faamanatuga; tatou te lagonaina le malosi o le uunaiga a le Agaga Paia, ma o le a toe taina le musika o le talalelei i o tatou olaga.

Lona lua, pe a faalogoina e i tatou lava le musika, e tatau ona tatou taumafai e faia le mea sili tatou te mafaia e faatino ai i o tatou aiga. E le o se mea e mafai ona tatou fosia pe fai faamalosi. “E leai se mana po o se aafiaga e mafai pe tatau ona faatumauina ona o le perisitua”—pe i le avea ai ma se tama po o se tina po o le tagata sili ona lapoa pe sili ona leotele—“nao i le faatauanau, i le tali-tiga, i le agamaualalo ma le agamalu, … ma le alofa faamaoni; [ma le] agalelei” (MF&F 121:41–42).

Aisea o le a taitaiina ai e nei uiga paia le faateleina o le mana ma le faatosinaga i se aiga? Aua o uiga paia ia e valaauliaina le Agaga o le Agaga Paia. O uiga paia ia e faaogatusaina o tatou loto ma musika o le talalelei. Afai e i ai, o le a sili ona lelei le faatinoga o taga o le siva ma o le a faafiafiaina tagata uma o le ausiva i totonu o le aiga, e aunoa ma le manaomia o le taufaafefe pe taufaamatau pe faamalosia.

A o laiti a tatou fanau, e mafai ona tatou usuina ia i latou se pese faamoepepe o le alofa faamaoni, ma pe a latou faalogogata ma mumusu e o e momoe i le po, atonu e manaomia ona tatou usuina le pese faamoe pepe o le tali tiga. E mafai e matua ona faatinoina ma le lotogatasi atoatoa ia uiga paia soosootauau o le agalelei ma le agamalu. E mafai ona tatou valaauliaina a tatou fanau e usu faatasi ma i tatou i le leo e tasi a o tatou faataitaia le agalelei atu i se tuaoi e le tagolima.

O le a le oo uma mai i le taimi e tasi. E pei ona silafia e tagata musika faamanuiaina uma, e alu ai ni faataitaiga filiga e faatino ai ni musika matagofie. Afai o uluai taumafaiga i le faiga o musika ua foliga mai ua i ai ni feteenaiga, ia manatua o feteenaiga e le mafai ona faasa’oina e ala i faitioga. O feteenaiga i totonu o le aiga e pei lava o le pogisa i totonu o se potu. E leai se aoga o le otegia o le pogisa. E tatau ona tatou suia le pogisa e ala i le faasusulu atu o le malamalama.

O lea la afai ua matua leotele pe malosi ia leo malū i i le aufaipese a lo outou aiga, pe ua maualuga tele le ii pe ua sese le fati o le vaega o uaua o le faaili a lo outou aiga, pe ua sese le fati pe ua le mafai ona taofiofi ia vaega itiiti o pu, ia onosai. Afai e te le o faalogoina le musika o le talalelei i lou aiga, faamolemole ia manatua upu nei e lua: faataitai pea. Faatasi ai ma le fesoasoani a le Atua, o le a i ai se aso o le a faatumulia ai e le musika o le talalelei oe ma lou aiga i le olioli e le mafaamatalaina.

E tusa lava pe lelei ona faatinoina, e le foiaina lava e le musika ou faafitauli uma. O le a i ai pea ni tulaga maualuluga ma tulaga maualalalo i o tatou olaga, i taimi o le ogatasi ma taimi o feteenaiga. O le natura lava lea o le olaga i le paneta o le lalolagi.

Ae a tatou faaopoopoa le musika i taga o le siva, o nisi pā’ō faigata o faaipoipoga ma le olaga faaleaiga e matele ina agai atu i se tulaga paleni ma ogatasi. E oo lava i o tatou luitau sili ona faigata o le a maua ai ni matāleo manino lelei ma ni fati musuia. O le a amata ona to ifo i luga o o tatou agaga ia aoaoga faavae o le perisitua e pei o le sau mai le lagi. O le a avea le Agaga Paia ma o tatou soa tumau, ma o tatou tootoo—o se faasinoga manino i le mana ma uunaiga—o le a avea ma tootoo le feliuliuai o le amiotonu ma le upumoni. Ma o a tatou puleaga o le a avea ma se puleaga tumau faavavau. Ma e aunoa ma ni ala faamalosia o lona uiga, o le a tafe mai ia te i tatou e faavavau ma faavavau lava (tagai MF&F 121:45–46).

Ia faapena foi i o tatou olaga taitoatasi ma i o tatou aiga taitasi, o la’u tatalo lea i le suafa o Iesu Keriso, amene.