2010–2019
O Le Faataoto o le Lūlū Saito
Aperila 2015


O Le Faataoto o le Lūlū Saito

E pule lava i tatou taitoatasi i le faatulagaina o mea faamuamua ma faia mea ia lelei ai lo tatou eleele ma fua tele ai la tatou seleselega.

O mataupu mo lauga o le konafesi aoao e atofa mai—e le [faia] i se pule faaletagata ae e ala mai i uunaiga a le Agaga. E tele mataupu o le a taulimaina ia popolega faaletagata e oo uma ia i tatou. Ae e pei lava ona sa lei aoao atua e Iesu le auala e faatoilalo ai luitau faaleolaga nei po o sauaga faaupufai o Ona aso, e masani lava ona Ia uunaia soo Ana auauna i aso nei ia saunoa atu e uiga i le mea e tatau ona tatou faia e suia ai o tatou olaga patino e saunia ai i tatou e toe foi atu i lo tatou aiga faalelagi. I lenei faaiuga o le vaiaso o le Eseta ua uunaia au ina ia ou talanoa atu e uiga i aoaoga taua ma tumau pea i se tasi o faataoto a Iesu.

O le faataoto o le lulu saito o se tasi lea o nai faataoto laiti o loo tusia i Talalelei uma e tolu. O se tasi foi lea o se vaega laiti lava o faataoto na faamalamalama atu e Iesu i Ona soo. O le fatu lea na lulu “o le upu o le malo” (Mataio 13:19), “o le upu” (Mareko 4:14), po o le “afioga lea a le Atua” (Luka 8:11)—o aoaoga a le Matai ma Ana auauna.

O eleele eseese ia na pauu i ai fatu ua faatusa lea i auala eseese o loo maua ai e tagata nei aoaoga ma mulimuli ai. O lea o fatu na “pa’ū … i le auala” (Mareko 4:4) sa lei mauaina le eleele moni lea sa ono mafai ona ola ai. Ua pei i latou o aoaoga e pa’ū i luga o se loto ua maaa pe le o saunia. Ou te le toe fai atua se isi tala e uiga i nei mea. O la’u savali e faatatau ia i tatou uma ua tuuto atu e avea ma soo o Keriso. O le a la le tatou mea e fai i aoaoga a le Faaola a o tatou ola ai i o tatou olaga?

Ua lapataia e le faataoto o le tagata lulu saito i tatou e uiga i tulaga ma uiga ia e mafai ona taofia ai soo se tasi ua mauaina le fatu o le savali o le talalelei mai le mauaina o se seleselega lelei.

I. Eleele Papa, Leai se A’a

O nisi fatu na “pa’ū foi … i le mea papa, e itiiti lava le eleele sa i ai; ona tupu lise lea ia, aua o le eleele ina itiiti: ua alu ae le la, ua velasia ai, ona magumagu ai lea, ona ua leai ni aa” (Mareko 4:5–6).

Sa faamalamalama mai e Iesu e faapea ua faamatalaina e lenei mea i latou o “e ua faalogo i le upu, ona talia loa lea ma le fiafia,” ae ona “ua leai ni o latou aa, … pe a tupu le puapuaga, po o le saua ona o le upu, ona latou tausuai loa lea” (Mareko 4:16–17).

O le a le mea e mafua ai ona “leai ni … aa” i ē faalogo? O le tulaga lea o loo tupu i tagata fou faatoa liliu mai i faifeautalai pe liliu mai i le tele o uiga lelei o le Ekalesia po o le tele o fua maoae o le auai i le Ekalesia. Ona o le le maua’a i le upu, e mafai ona faavaivaia i latou ma ō ese ai mai le upumoni pe a tulai mai ni feteenaiga. Ae e oo lava foi ia i latou e ola ae i le Ekalesia—tagata ua leva ona lolotu—e mafai lava ona see ese atu i se tulaga lea e leai ai ni o latou aa. Ou te iloaina nisi o nei—tagata o le ekalesia ua aunoa ma se liua mausali ma le tumau i le talalelei a Iesu Keriso. Afai tatou te le mauaa i aoaoga o le talalelei ma faatino soo e le aunoa, e mafai lava e soo se tasi o i tatou ona atiaeina se loto maaa, lea e avea ma eleele papa mo fatu faaleagaga.

E taua meaai faaleagaga mo le ola faaleagaga, aemaise lava i se lalolagi ua aluese mai le talitonu i le Atua ma mataupu o le sa’o ma le sese. I se vaitau ua puleaina e le Initoneti, ia ua faasalalau ai savali ia ua faatamaia ai le faatuatua, e tatau ai ona tatou faateleina lo tatou mauaina o upumoni faaleagaga ina ia mafai ai ona faamalosia lo tatou faatuatua ma mauaa ai i le talalelei.

Autalavou, afai o lena aoaoga e foliga mai e fai si faalauaitele, o se faataitaiga patino la lenei. Afai o loo tufaina atu faatusa o le faamanatuga ae o loo e tesi i isi pe manamananū solo pe taaalo i taaloga vitio pe o faia foi soo se mea e faafitia ai oe lava mai meaai taua faaleagaga, o loo e lamatiaina ou aa faaleagaga ma avatu oe lava i eleele papa. Ua e tuua oe lava i se tulaga lamatia o le se ese pe a e fetaiai ma faafitauli e pei o le fiatagata, taufaamatau, po o le faitio. Ma e faatatau foi lena mea i tagata matutua.

O le isi mea e mafai ona faaleagaina ai aa faaleagaga—ua faatelevaveina e tekinolosi o nei aso ae le tulagaese ai—o le papa’u o le iloa e uiga i le talalelei po o le Ekalesia. O lenei iloa faatapulaa e taulai atu i se aoaoga faavae patino pe matau se vaivaiga o se taitai ma lē amanaia ai le vaaiga silisili o le fuafuaga o le talalelei ma faamanuiaga o se vaega atoa ma tagata taitoatasi mai le talalelei lava ia. Sa tuuina mai e Peresitene Gordon B. Hinckley se faamatalaga manino e uiga i se tasi o vaaiga o lenei iloa papa’u. Sa ia faamatala atu i se aofia i le BYU e uiga i le au faasalalau o faiga faaupufai “o e sa matuai feitai lava” i se faatasiga a le au failipoti i lena taimi. Sa latou faia ma le atamai le tele o ni faamatalaga faatiga ma faaosoita. … E mautinoa lava,” sa ia faaiu ai, ‘“e foliga mai o le vaitami lenei ma le nofoaga ua mafai ai lava ona tautala faapea i upu faatiga.”1 I se faatusatusaga, ina ia matuai mauaa ma le mausali i le talalelei, e le tatau lava ona tatou soona lafo ni faamatalaga ma soona faitio i isi ae saili i taimi uma mo se malamalama lautele atu o le galuega mamalu a le Atua.

II. Vao Tuitui: O Le Popole i Mea a Lenei Lalolagi, ma le Pepelo o le Oa

Sa aoao mai Iesu e faapea na “pa’ū foi isi i le vao tuitui, ua tutupu ae le vao tuitui, ona fetinaiina ai lea, e lei fua mai lava” (Mareko 4:7). Sa Ia faamalamalama mai o tagata nei “na faalogo i le upu, a o le popole i mea a lenei lalolagi, ma le pepelo o le oa, ma le tuinanau i nisi mea, ua oo atu i totonu o le loto, ua fetinaiina ai le upu, ona le fua mai lava lea” (Mareko 4:18–19). O se lapataiga mautinoa lava lenei ia tatou faalogo uma i ai.

O le a ou tautala muamua atu lava i le pepelo o le oa. Po o fea lava o tatou i ai i lenei malaga—po o le a lava lo tatou tulaga o le liua—e faaosoosoina lava i tatou uma e lenei mea. A taulai atu uiga po o mea faamuamua i le mauaina, faaaogaina, po o le umiaina o meatotino, tatou te taua lena mea o le manao i mea faalelalolagi. Ua tele faamatalaga ua faia ma tusia e uiga i mea faalelalolagi lea e itiiti ai sina mea e faaopoopo atu ai i i.2 O i latou o e talitonu ma fai le oa ma o latou atua ua pagatia i le taufaasese o le oa. O le umiaina o le tamaoaiga po o le tele o tupemaua e le o se faailoga o le manuia faalelagi, ma o le leai o na mea e le o se faamaoniga o le leai o se manuia faalelagi. Ina ua tau atu e Iesu i se soo faamaoni e mafai ona ia maua le ola e faavavau pe afai na te foai atu ana mea uma i e matitiva (tagai Mareko 10:17–24), Na te lei faailoaina se leaga o le umiaina o le oa ae o le leaga i uiga o lena soo e faatatau i na oa. E pei ona tatou iloaina uma, sa viia e Iesu le Samaria agalelei na faaaogaina tupe lava ia e tasi e auauna atu ai i lona uso a tagata lea foi na faaaogaina e Iuta e faalata ai lona Faaola. O le pogai o mea leaga uma e le o le tupe ae o le manao i tupe (tagai 1 Timoteo 6:10).

O loo faamatala mai e le Tusi a Mamona se taimi i le Ekalesia a le Atua na “amata [ai] ona vaivai o le ekalesia i lona alualu i luma” (Alema 4:10) ona sa “amata [e] tagata o le ekalesia … [ona] tuu atu o latou loto i luga o oa ma luga o mea lē aoga o le lalolagi” (Alema 4:8). Po o ai lava e mauoa i mea faalelalolagi ua lamatia i le “faatamaiaina” faaleagaga e oa ma isi mea o le lalolagi.3 O se folasaga talafeagai lena i isi aoaoga a le Faaola e sosoo ai.

O vao tuitui sili ona leaga na te fetinaia le aafiaga o le upu o le talalelei i o tatou olaga o malosiaga faalelalolagi ia e ta’ua e Iesu o “mea e popole ai ma oloa ma mea faafiafia o le olaga nei” (Luka 8:14). Ua anoanoai nei mea e tau tolaulau atu. Ua lava na o ni nai faataitaiga.

I se tasi taimi sa aoai ai e Iesu Lana Aposetolo sinia, ma fetalai atu ia Peteru, “Ua fai oe ma mea ou te tausuai ai; aua e le o mea a le Atua ua e loto i ai, a o mea a tagata” (Mataio 16:23; tagai foi MF&F 3:6–7; 58:39). O le faamuamua o mea a tagata o lona uiga o le tuu lea o le faamuamua i popolega o lenei lalolagi i lo mea a le Atua i a tatou amioga, a tatou mea e faamuamua, ma o tatou manatu.

Tatou te lolo atu i “mea faafiafia o le olaga nei” (1) pe a fai ma a tatou vaisu, lea e faaleagaina ai le meaalofa taua a le Atua o le faitalia; (2) pe a faaseseina i tatou e mea faatosina lē aoga, ia e tosoeseina i tatou mai mea e i ai le taua e faavavau; ma le (3) pe a tatou mafaufau e i ai lo tatou aia i ni taunuuga lelei, lea e faaleagaina ai le tuputupu ae o le tagata lava ia e agavaa ai mo lo tatou taunuuga e faavavau.

E faatoilaloina i tatou e “popolega … o lenei olaga” pe a faapipiliina i tatou e le fefe i le lumanai, lea e faatuai ai lo tatou agai i luma i le faatuatua, ma faalagolago i le Atua ma Ana folafolaga. I le luasefulu-lima tausaga talu ai sa saunoa ai la’u faiaoga faaaloalogia i le BYU, o Hugh W. Nibley e uiga i le matautia o le lolo atu i popolega o le lalolagi. Sa fesiligia o ia i se faatalanoaga pe faamata o tulaga o le lalolagi ma lo tatou tiute e faasalalau atu le talalelei, ua manaomia ai ona sailia nisi auala ina “ia fetuunai ai mea tatou te faia i le Ekalesia ia talafeagai ai ma mea o le lalolagi.”4

O lana tali: “O le tala atoa lena o le Ekalesia, a ea? E ao ona outou loto ina ia tiga i i, e ao ona outou loto ina ia oo i tulaga lamatia. O i na e oo mai ai le faatuatua. … O lo tatou tuuto e ao lava ona tofotofoina, e ao lava ona faigata, e ao lava ona le talafeagai ma tulaga o lenei lalolagi.”5

O le faamuamua o le talalelei sa faamautuina i le lotoa o le BYU i ni nai masina na sei mavae atu nei e se taitai iloga o le Katoliko, o Charles J. Chaput, o le akiepikopō o Filatelefia. A o saunoa ai e uiga i “popolega o loo i ai uma i nuu o le tatou Ekalesia ma Katoliko,” e pei o le “faaipoipoga ma le aiga, le natura o lo tatou tulaga feusuai, le paia o le ola o le tagata, ma le faanaunautaiga o le saolotoga o tapuaiga,” sa ia saunoa ai:

“Ou te toe fia faamamafa atu le taua o le ola moni lava i mea ua tatou ioeina ma talitonu i ai. O lena mea e manaomia ona avea ma faamuamua—e le na o o tatou olaga patino ma aiga ae e faapena foi i a tatou lotu, a tatou filifiliga faaupufai, a tatou fegalegaleaiga faapisinisi, lo tatou taulimaina o e matitiva; ma i se isi faaupuga, i mea uma tatou te faia.”

“O le mafuaaga lenei e taua ai,” sa ia faaauau ai. “I le aoao ai mai aafiaga FaaKatoliko. O i matou o Katoliko ua talitonu o la matou galuega ia avea matou ma mea faafefete i le malo. Ae o loo i ai se laina matagofie i le va o le avea ma mea faafefete i le malo, ma le avea ai ma se vaega o le malo.”6

O le lapataiga a le Faaola e faasaga i popolega o lenei lalolagi ia e fetinaiina le afioga a le Atua i o tatou olaga e mautinoa lava ua luitauina ai i tatou ia faatumauina le mausali o a tatou mea e faamuamua—tuu atu o tatou loto—i poloaiga a le Atua ma le taitaiga o Lana Ekalesia.

O faataitaiga a le Faaola e mafai ona faaosofia ai i tatou e manatu i lenei faataoto o le faataoto o le eleele. O le tulaga talafeagai o le eleele e faalagolago lea i le loto o i tatou taitoatasi ua malamalama i le fatu o le talalelei. A iloiloina le saunia o se tasi e talia aoaoga faaleagaga, o nisi o loto ua faamaaaina ma lē saunia, o nisi o loto ua liu papa mai le faatalalē, ma o nisi o loto ua pupū i mea o le lalolagi.

III. Ua Pa’ū i le Eleele Lelei, Ona Fua Mai Lea

Na faaiuina le faataoto o le lulu saito i le faamatalaina e le Faaola o le fatu na “pa’u i le eleele lelei, ona fua mai lea” i fuataga eseese (Mataio 13:8). E mafai faapefea ona tatou sauniaina i tatou lava ia avea ma lena eleele lelei ma maua ai lena seleselega lelei?

Sa faamalamalama e Iesu “o le mea na i le eleele lelei, o i latou ia e ua faalogo i le upu, ma tausi i ai i le loto ua faamaoni ma le lelei, ona fua mai ai lea ma le onosai” (Luka 8:15). Ua ia i tatou le fatu o le upu o le talalelei. Ae e pule lava i tatou taitoatasi i le faatulagaina o mea faamuamua ma ia faia mea ia lelei ai lo tatou eleele ma fua tele ai la tatou seleselega. E tatau ona tatou saili atu ia mauaa mausali atili ma liua i le talalelei a Iesu Keriso (tagai Kolose 2:6–7). Tatou te ausia lenei liua e ala i le tatalo, e ala i le faitauina o tusitusiga paia, e ala i le auauna atu, ma e ala i le taumafa ma inu e le aunoa i le faamanatuga ina ia maua pea Lona Agaga e faatasi ma i tatou. E tatau foi ona tatou saili atu i le suiga tele o le loto (tagai Alema 5:12–14) lea e suitulaga ai e le alofa i le Atua ma le manao e auauna atu ia te Ia ma Ana fanau ia manaoga leaga ma popolega faaloloto.

Ou te molimau atu i le moni o nei mea, ma ou te molimau atu i lo tatou Faaola, o Iesu Keriso, o Ana aoaoga o loo faasino mai ai le ala ma Lana Togiola ua mafai ai mea uma, i le suafa o Iesu Keriso, amene.

Faamatalaga

  1. Gordon B. Hinckley, “Let Not Your Heart Be Troubled” (Brigham Young University devotional, Oct. 29, 1974), 1; speeches.byu.edu.

  2. Tagai, mo se faataitaiga, Dallin H. Oaks, “Materialism,” mataupu 5 i le Pure in Heart (1988), 73–87.

  3. Ou te faafetai ia Elder Neal A. Maxwell mo lenei ata taua (tagai “These Are Your Days,” Ensign, Oct. 2004, 26).

  4. James P. Bell, in “Hugh Nibley, in Black and White,” BYU Today, May 1990, 37.

  5. Hugh Nibley, in “Hugh Nibley, in Black and White,” 37–38.

  6. Charles J. Chaput, “The Great Charter at 800: Why It Still Matters,” First Things, Jan. 23, 2015, firstthings.com/web-exclusives/2015/01/the-great-charter-at-800; see also Tad Walch, “At BYU, Catholic Archbishop Seeks Friends, Says U.S. Liberty Depends on Moral People,” Deseret News, Jan. 23, 2015, deseretnews.com/article/865620233/At-BYU-Catholic-archbishop-seeks-friends-says-US-liberty-depends-on-moral-people.html. Archbishop Chaput also said that “some of our best Catholic institutions have either lost or greatly softened their religious identity. … Brigham Young is an extraordinary university … because it’s a center of learning enriched by its religious identity. Never lose that” (“The Great Charter at 800”).