Na iTuvatuva ni Bula Marau

Ena vuqa na yabaki sa oti, ni oti na iKarua ni Valu Levu, au a vuli tiko ena koliji. Eke au a sotavi Donna Smith kina. Ena gauna o ya au a wilika ni rua na gacagaca vinaka ni vakamau me gugumatua o ya na bisikete kamica kei na iregu. Au nanuma kina ni sa bau veiraurau toka o ya.

Au laki vuli ena mataka ka gole tale ena yakavi ki na siti o Brigham meu laki cakacaka ena qaraji ni motoka nei tamaqu. Na iotioti ni kalasi nei Donna ena mataka o ya na qaravi ni itikotiko. Au dau laki rai ena nona kalasi ni bera niu gole. E katuba iloilo buto, ia keu tu e yasani iloilo, ena raica mai na kequ iyaloyalo e tautuba. E dau vakalutu lo mai vata kei na dua na bisikete kamica ka reguci au. Na kena vo sa matata tu. Keirau a vakamau ena Valetabu e Logan Utah, ka tekivu ekeri na ilakolako cecere ni neirau bula.

Ena kena veiyabaki au sa dau vakavulica tiko e dua na ivakavuvuli bibi: na icavacava ni itaviqaravi taucoko ni Lotu o ya na nodrau bula marau e dua na tagane kei na dua na yalewa vata kei ira na luvedrau ena nodra itikotiko, vauci vata me baleta na gauna oqo kei na veigauna tawamudu.

Ena ivakatekivu:

“A ratou sa ia na Kalou ka bulia na tamata me itovo vata kei iratou, io sa bulia na tamata me itovo vata kei na Kalou; io na tagane kei na yalewa e ratou sa bulia.

“E ratou sa kaya na Kalou: Me datou vosa vakalougatataki rau mada. A ratou sa kaya na Kalou: Me datou qisi rau me rau vakaluveni ka tubu me lewe vuqa ka vakatawai vuravura, ka vakamalumalumutaka” (Eparaama 4:27–28).

Sa mai tekivu kina na cowiri ni bula vakatamata ena vuravura oqo ni “Rau sa veiyacovi ko Atama kei Ivi na watina, a sa sucu e vuqa na luvedrau, na tagane kei na yalewa, a ra sa tubu me lewevuqa ka vakatawai vuravura.

“Ia … era sa lako yarua na luvei Atama, … ka ra vakaluveni” (Mosese 5:2–3).

E se bera mada vakadua ni bokoci na ivakaro ni vakatubu kawa ka vakatawai vuravura. Sa ka yaga sara na ituvatuva ni veivakabulai ka sa ivurevure ni bula marau ni tamata. Mai na vakayagataki vakadodonu ni kaukauwa oqo, sa rawa meda toro voleka vua na Tamada Vakalomalagi ka vakila e dua na taucoko ni reki, vakakina na bula vakalou. Na kaukauwa ni vakatubu kawa e sega ni dua na tikina vakacala-ka ni ituvatuva; sai koya na ituvatuva ni bula marau; sai koya na idola ki na bula marau.

Na gagadre ni vakaitokani ena kawatamata sa ka tudei ka kaukauwa sara. Na noda bula marau ena bula oqo, na noda reki kei na bula vakacerecerei ena vakatau tiko ki na ivakarau ni noda raica na gagadre oqo e gugumatua, veivakayarayarataki, ka vakayago. Ni sa matua mai na kaukauwa ni vakatubukawa ni sa tekivu me cauravou se goneyalewa na tamata, ena yaco vua na gagano, ena kena sala dina, na veika sotavi vakayago e sega ni vakatauvatani rawa.

Kena ivakarau, na tikovata e tekivu ena gagano. E dina ga ni duidui ena veivanua, e vakabulabulataki mai ena yalo maqusa ni italanoa ni veidomoni kei na kakavaki, so na gauna ena tawa kauwaitaki. E yaco ena cila ni vula kei na veirosi, ivola ni veidomoni, sere ni dodomo, serekali, na veitauri liga, kei na ivakaraitaki eso ni nodrau veivinakati e dua na cauravou kei na dua na goneyalewa. E tabogo ko vuravura vei rau na veitau, ni rau kovuti tu ena yalo ni reki.

Ke o nanuma beka ni dodomo vou sa vakataucokotaki e yaco rawa ena vuku ni veika e rawati mai na wai tovure ni mataniwai ni bula, o se bera ni raica mada na dina kei na veivakacegui ni dodomo ni vakamau ni dua na gauna balavu. O ira na veiwatini era vakatovolei ena veitemaki, veiba, leqa vakailavo, leqa ni matavuvale, ena tauvimate, ia ni yaco tiko oqo e kaukauwa cake tikoga na veidomoni. Na veidomoni sa matua tiko na kena marau era sega ni bau vakasamataka rawa na veiwatini vou.

E gadrevi na dodomo dina na kena maroroi me oti mada na vakamau me qai wasei na veivinakati oqori me dolavi kina na kaukauwa tabu ni vakatubu kawa. Sa kena ibalebale na drotani mai na gagano vakayago ena rawa ni veirawai. Na dodomo savasava ena raica me caka mada na veiyalayalati dina tawamudu, na vakamau ena lawa kei na dodonu, ka tarava na cakacaka vakalotu ni veivauci e valetabu, sai koya na kaukauwa ni vakatubukawa, sa donu vua na Kalou ni sa vakaraitaka na dodomo sa taucoko. Oqo mena wasei duadua ga ka vakatabakidua vei koya na nomu itokani tawamudu.

Ni curumi oqo ena kilikili, ena vakilai sara ki na yago, vakasama, kei na yalo e totoka ka vakacecerei e dua na vosa o ya na loloma. Na tiki ni bula o ya e sega e rau tautauvata, sega me kena isa, ena bula taucoko ni ikawatamata. Ena yaco, ni sa vakayacori ka maroroi na veiyalayalati, ka cava tawamudu ena, “cakacaka tabu ni ilesilesi vakabete oqori, io dou na rawata kina na veivakalougatataki kei na lagilagi” (V&V 124:34), “io erau na rawata na lagilagi sa uasivi sara ka na tubu tikoga na nodrau kawa me tawamudu” (V&V 132:19).

Ia na veidomoni e sega ni taucoko; sa kena itekivu ga. Ena tubu na veidomoni ni ra sa tadu mai na gone, era tovure mai na mataniwai ni bula sa nuitaki tu vei ira na veiwatini vakamau. Ena yaco na kunekune ni rau sa veiyacovi o tagane vakawati kei yalewa vakawati. Sa na tekivu me buli e dua na yago lailai ena kena tuvai vakatotoka ka vereverea. Sa qai tadu mai na gone ena veivakurabuitaki ni sucu, sa buli me ucui tamana kei tinana ni vuravura oqo. Ena loma ni yagona vakavuravura e tiko kina e dua na yalo ena rawa me vakila ka ciqoma na veika vakayalo. Se somidi lailai sara e yagona na kaukauwa me vakatubukawa kina me ra ucui koya.

“Ia sa cokoti vata na yalo kei na yago me tamata” (V&V 88:15), ka sa na tiko na lawa vakayalo ka vakayago kevaka meda na bula marau. E tiko na lawa tawamudu, oka kina na veilawa e semati ki na kaukauwa oqo me rawa kina na bula, “sa virikotori tu mai lomalagi na ivakaro ni se bera ni buli na vuravura oqo, ia sa vakayavutaki kina na veivakalougatataki kecega” (V&V 130:20). Sai ira oqo na lawa vakayalo e vakamatatataka na ivakatagedegede savasava ni kawatamata (raica na Joseph Smith Translation, Roma 7:14–15 [ena vakamacala e ra ni iVola Tabu]; 2 Nifai 2:5; V&V 29:34; 134:6). Era tiko na veiyalayalati e veivauci, dregata, ka taqomaka ka solia na iyalayala ni veivakalougatataki tawamudu.

E vakasala vakaoqo o Alama vei luvena o Sipiloni, “Mo kakua ni cudrucudru; ia mo sinai sara ena loloma” (Alama 38:12). Na itatarovi e vakayagataki ena veidusimaki, veivakasalataki, ka veitaqomaki. Me na qarauni na noda gagadre. Ni vakayagataki vakadodonu, ena vakalougatataki keda na kaukauwa ni vakatubukawa ka veivakasavasavataki (raica na Nodra iVakavuvuli na Peresitedi ni Lotu: Joseph F. Smith [1998], 158).

Era tu wavoki na veitemaki. Ena vuku ga ni sega ni vakatubu kawa rawa o meca, sa lomacataki ira kece e tiko vei ira na kaukauwa vakalou oqo. A vakatalai tani o koya kei ira era a muri koya ka kau tani kina na dodonu me tiko na yagona. “Raica sa segata ko koya me ra rarawa na tamata kecega me vakataki koya” (2 Nifai 2:27). Ena veitemaki, ke rawa, ena vakatanitaka, vakacacana, vakakina, ke rawa ena vakarusa na isolisoli oqo, ni sa rawa kevaka eda sa kilikili, meda tubu tawamudu kina (raica na V&V 132:28–31).

Kevaka meda benuca na noda mataniwai ni bula se muataki ira vakatani na tamata, ena tiko na kena totogi e “levu cake” ka “sega ni vosoti rawa” (V&V 19:15) ni vakatauvatani ki na marau vakayago kecega era na rairai yaga kina.

E kaya o Alama vei luvena o Korianitoni, “Ko sa sega beka ni kila na luvequ, ni ko sai valavala ca ena mata ni Turaga; io, sai valavala ca levu sara, ka sa tautauvata ni ko sa vakadavea na dra tawa cala, se cakitaka na Yalo Tabu? (Alama 39:5). Eda na sega ni drobula rawa mai na revurevu ni da caka cala.

Na ivakaraitaki duaduaga e dodonu, ka vakadonui ni kaukauwa ni vakatubukawa sai koya vei tagane kei yalewa vakawati, e dua na tagane kei na dua na yalewa, rau sa vakamau vakalawa ka vakadodonu. Ke dua tale e duidui mai na kena oqo sa vorata tiko na ivakaro ni Kalou. Kakua ni soli iko ki na veitemaki ca nei vunimeca, ni dinau yadua ni ivalavala ca me na saumi “ko na sauma kece mada na ilavo” (Maciu 5:26).

E sega tale ni dua na vanua vakavo ga ena veivutuni mena laurai vakalevu kina na yalololoma kei na loloma veivueti ni Kalou.

Ni mavoa na yagoda, era sa rawa ni vakamavotaki ira ga, eso na gauna ena veivuke nei vuniwai. Ke kalevu na mavoa, e dau tiko na mawe ni mavoa me ivakananumi ni mavoa.

Ena yagoda vakayalo e duatani ga o koya. Ena vakacacani na yaloda ni cakava e dua na cala ka ivalavala ca. Ia e sega ni tautauvata ki na yagoda, ni sa oti vinaka na veivutuni, ena sega na kena mawe ena vuku ni Veisorovaki i Jisu Karisito. Sa yalataki kina: “Raica ko koya sa veivutunitaka na nona ivalavala ca, ena vosoti; ia koi au na Turaga, au na sega ni nanuma tale na nona ivalavala ca” (V&V 58:42).

Ni da veivosakitaka tiko na vakamau kei na bula ni matavuvale, eda vakasamataka sara vakatotolo, “Vakacava beka na kena e sega ni yaco?” Eso era sucu vakaiyalayala ga ka sega ni vakaluveni rawa. Eso na tamata dodonu e vakacacani na nodra vakamau baleta ni lawaki na watidra. Eso era sega ni vakamau ka ra bula voli duadua ena dodonu.

Ia oqo na veivakacegui: E Tamada na Kalou! Na loloma kei na lomasoli taucoko sa tu vua na tama e vuravura oqo sa vakalevutaki Vua na Tamada ka noda Kalou sa sega ni vakasamataka rawa na vakanananu ni tamata. Sa dodonu sara na Nona lewa; ka sega ni yalani na Nona loloma veivueti; na Nona kaukauwa me veisosomitaki e sega ni vakatauvatana rawa ko vuravura. “Kevaka eda sa vakanuinui me yaga vei keda na Karisito ena bula ga oqo, eda sa qai vakaloloma vakalevu cake vei ira kecega na tamata” (1 Korinica 15:19).

Au rokova niu mai cavuta na valetabu. Au raitayalotaka e dua na loqi ni veivauci kei na icabocabo ni soro ka rau tekiduru kina e dua na veiwatini gone. Na cakacaka vakalotu oqo ni valetabu e uasivita cake na vakamau, ni na vauci na vakamau oqo mai vua na Yalo Tabu ni Veiyalayalati, ka kaya kina na ivolanikalou ni da na “rawata na itikotiko vakaturaga, na matanitu yalataki, na kaukauwa kei na lewa ni veika kecega” (V&V 132:19). Au raica rawa na reki sa waraki ira tu na ciqoma na isolisoli vakalou oqo ka vakayagataka ena kilikili.

Sa 70 mai oqo na yabaki ni neirau bula vakawati kei Sister Donna Smith Packer. Ni dau vakamacalataki watiqu, na tinadratou na gone, au sa dau galu ga. E luluvu na lomaqu ka qaqaco noqu vakavinavinaka kau sega ni vakamacala rawa kina. Na isolisoli cecere duadua keirau ciqoma ena bula oqo, kei na bula sa roro tiko mai, sai ira na luvei keirau kei na makubui keirau. Me yacova mai na icavacava ni neirau bula vata eke, au vakavinavinakataka na veigauna yadua ni toka tikivi au kei na yalayala ni Turaga ni na sega na kena iyalayala.

Au vakadinadinataka ni o Jisu na Karisito, na Luve ni Kalou bula. O koya sa iliuliu ni Lotu oqo. Mai na Nona Veisorovaki kei na kaukauwa ni matabete, na matavuvale era tekivu ena vuravura oqo era na rawa ni duavata tale ki na veigauna tawamudu. Na Veisorovaki, ka sa rawa meda taukena yadua, e sega kina na mawe ni mavoa. Sa kena ibalebale se cava sara na veika eda sa cakava se eda a tu mai vei se a yaco vakacava, kevaka eda na veivutuni dina, sa yalataka tu o Koya ni na soravaki keda. Ni sa sorovaki keda, sa yaco sara ga e kea. E vuqa vei keda era sa veilecayaki voli, me vaka, era kila ni ra sa cala, ka sega ni kila na sala mera dro bula kina. O na dro bula ga ni ko ciqoma na Veisorovaki i Karisito, kei na yalo rarawa kece ena rawa ni vuki me ka totoka ka lomani ka tawamudu.

Au vakavinavinakataka na veivakalougatataki ni Turaga o Jisu Karisito, ena vuku ni kaukauwa ni vakatubu kawa, ena vuku ni kaukauwa ni veivueti, ena vuku ni Veisorovaki—na Veisorovaki ena rawa me vakasavasavataka vakadua na duka yadua se cava sara na kena dredre se kena balavu se levu ni gauna a vakayacori tikoga kina. Na Veisorovaki ena rawa me sereki iko vou mo toso ki liu, ena savasava kei na kilikili, me rawati na salatu o ya o sa digitaka ena bula oqo.

Au vakadinadinataka ni bula tiko na Kalou, ni ko Jisu na Karisito, ni Veisorovaki e sega ni dua na ka raraba me nona taucoko na Lotu. Na Veisorovaki sa baleta na tamata yadua, ke tiko e dua na ka o lomaleqataka tiko—mai na dua na gauna balavu sara ko sa sega tu ni nanuma—mo biuta me cakacaka kina na Veisorovaki. Ena vakasavasavataka, ka yaco vei iko, me vakataki Koya, ena sega ni nanuma tale na nomu ivalavala ca. Ena yaca i Jisu Karisito, emeni.