2010–2019
O Le Fuafuaga o le Fiafia
Aperila 2015


O Le Fuafuaga o le Fiafia

O le taunuuga o gaoioiga uma i le Ekalesia, o le vaai lea o fiafia se alii ma se tamaitai faatasi ma a la’ua fanau i le aiga ma ua faamauina faatasi mo le olaga nei ma le faavavau atoa.

E tele tausaga ua mavae, ina ua maea le Taua Lona Lua a le Lalolagi, sa ou aoga i le iunivesite ina ua ma feiloai ma Donna Smith. Pe tusa o lena taimi sa ou faitau ai faapea e lua mea e manaomia mo se faaipoipoga manuia o se kuki ma se kisi. Sa ou mafaufau faapea e fai si paleni lelei.

Ou te aoga i le iunivesite i le taeao, ona ou alu ai lea i le Aai o Polika Iaga e faigaluega i le fale lipea o lo’u tama. O le vasega mulimuli a Donna i le taeao o le faafatuaiga. Ou te afe lava i lona potu aoga mo sina taimi ae ou te le i alu. O le faitotoa e i ai le tioata sulu, ae a ou tu lata i le tioata, e mafai ona ia iloa mai lo’u atalafoia i fafo. Ona ia la’a mai lea i fafo ma se kuki ma se kisi. O le taunuuga, o le talafaasolopito lea. Sa ma faaipoipo i le Malumalu o Logan, ma o iina na amata ai le malaga tele o o ma’ua olaga.

I le tele o tausaga sa masani ona ou aoao atu ai se mataupu faavae taua: o le faamoemoega o gaoioiga uma i le Ekalesia, o le vaai lea o fiafia se alii ma se tamaitai faatasi ma a la’ua fanau i le aiga ma ua faamauina faatasi mo le olaga nei ma le faavavau atoa.

I le amataga:

“Na afifio ifo Atua i lalo e faatulaga le tagata i lo latou lava faatusa, e fai e i latou o ia i le faatusa o Atua, e fai e i latou i laua o le tane ma le fafine.

“Ma sa fetalai ane Atua: O le a tatou faamanuia i laua. Ma sa fetalai ane Atua: O le a tatou faia i laua ia fanafanau ma uluola, ma faatumuina le lalolagi, ma faato’a i ai” (Aperaamo 4:27–28).

Ma o lea sa amata ai le taamilosaga o le tagata soifua i lenei lalolagi ina “ua iloa e Atamu lana ava, ma sa fanauina e ia ia te ia o atalii ma afafine, ma sa amata ona latou fanafanau ma uluola i le lalolagi.

“Ma … sa amata ona vaevae taitoalua o atalii ma afafine o Atamu i le laueleele, … ma sa latou fanauina foi atalii ma afafine” (Mose 5:2–3).

O le poloaiga e fanafanau ma uluola ma faatumuina le lalolagi, e lei aveesea lava. E manaomia i le fuafuaga o le togiolaina ma o le punavai o le fiafia o le tagata. E ala i le faaaogaina ma le amiotonu o lenei mana, e mafai ai ona tatou latalata i lo tatou Tama i le Lagi ma iloa ai le atoaga o le olioli, le tulaga faaleatua. O le mana o le foafoaina o le ola, e le o se vaega faaopoopo o le fuafuaga o le fiafia; o le ki lea i le fiafia.

O le manao o le tagata soifua e faaulugalii e faifai pea ma e malosi tele. O lo tatou fiafia i le olaga faitino, o lo tatou olioli ma le faaeaga e faalagolago i le ala tatou te tali atu ai i nei manaoga malolosi faaletino faifai pea. A oo ina matua le mana e foafoa ai le ola i le popofou faatamatane ma faaletamaitai, ona tulai mai lea o lagona patino, i se ala faalenatura, e le pei o se isi lava aafiaga faaletino.

A tusa ai, o le faaulugalii e amata i le alofa faamama’i. E ui atonu e eseese agaifanua, ae o loo lauusiusi i lagona o le sagisagi ma faanaunauga e maua i tusitala, o nisi foi taimi e teena. E i ai le masina susulu ma fuarosa, o tusi alofa, o pese alofa, o solo, o le uulima, ma isi faailoaga o le faananau i le va o se alii talavou ma se tamaitai talavou. E oo ina le toe manatu i laua i nisi lava mea o le lalolagi ae ua na o laua lava, ma la faalogoina ai lagona o le olioli.

Ma afai e te manatu o le atoaga o le faaosofia o le alofa faamama’i talavou, o le taunuuga lea o avanoa e puna ae mai mana e foafoa ai, e te lei ola la e vaai i le tuuto ma le mafanafana o le alofa ua faaipoipoina mo se taimi umi. E tofotofoina ulugalii faaipoipo i faaosoosoga, o le le femalamalamaa’i, o faafitauli tautupe, o mafatiaga faaleaiga, o ma’i, ma i taimi o nei aafiaga uma, e tuputupu malosi ai lava le alofa. O le alofa ua matua e i ai le fiafia e lei mafaufauina e i latou faatoa faaipoipo.

O le alofa moni e manaomia ai le faasaosao seia maea ona faaipoipo, ona fefaasoaa’i lea o lena alofa faamama’i lea e tatalaina ai na mana paia e foafoa ai le ola. O lona uiga o le aloese mai tulaga ia e ono pulea ai e manaoga faaletino. O le alofa mama e faapea e seiloga ua uma se tautoga o le faamaoni e faavavau, se sauniga faaletulafono aloaia, ma e sili lava pe a maea le sauniga faamau i le malumalu, e faamatuu mai ai na mana foafoa e tusa ai ma le Atua mo le faailoaga atoa o le alofa. E ao ona faaaoga faatasi ma na o lē lava ua avea ma au soa e faavavau.

A ulu atu i ai ma le agavaa, o lenei faagasologa ua tuufaatasia ma lagona aupito matagofie ma faaeaina faaletino, faalelagona, ma faaleagaga e soofaatasi ma le upu alofa. O lena vaega o le olaga e leai se mea e faatusalia i ai, i aafiaga uma o le tagata soifua. A osia feagaiga ma tausia, o le a tumau e faavavau, “o totonu iina e faauu atu ai ki o le perisitua paia, ina ia outou maua le viiga ma le mamalu” (MF&F 124:34), “o le mamalu lea o le atoatoaga ma le faaauauina o fanau e faavavau ma faavavau lava” (MF&F 132:19).

Ae o le alofa faamama’i e le atoatoa; ua na o se faatomuaga. O le alofa e faafailele i le oo mai o fanau, o e foafoa mai i lena punavai o le ola ua faatuatuaina ai ulugalii i le faaipoipoga. O le a fuafuaina e faatino i se faatasiga ua faaipoipoina i le va o se tane ma le ava. E amata ona tupu si tino itiiti mai se mamanu lavelave ofoofogia. E oo mai se tamaitiiti i le vavega o le fanau mai, na foafoaina i le faatusa o lona tama ma le tina faalelalolagi. I totonu o lona tino faitino ua i ai se agaga ua mafai ona lagonaina ma iloa mea faaleagaga. Ua i ai i le tino faitino o le tamaitiiti le mana e fanauina ai fanau i lona lava faatusa.

“O le agaga ma le tino o le tagata lea” (MF&F 88:15), ma e i ai tulafono faaleagaga ma faaletino e usitaia pe a tatou mananao ia fiafia. E i ai tulafono e faavavau, e aofia ai tulafono e faatatau i lenei mana e avatu ai le ola, “na folafola lē maaveesea i le lagi i luma atu o le faavaega o le lalolagi lenei ua faavae ai i luga faamanuiaga uma” (MF&F 130:20). O tulafono faaleagaga nei ia e faamaioio ai le tulaga faatonuina mama mo le tagata (tagai Faaliliuga a Iosefa Samita, Roma 7:14–15 [i le faaopopooga i le Tusi Paia]; 2 Nifae 2:5; MF&F 29:34; 134:6). E i ai feagaiga e noatia ai, faamau ai, ma malupuipuia ai ma tuuina mai le folafolaga o faamanuiaga e faavavau.

Na apoaoai atu Alema i lona atalii o Sepulona, “Ia pulea ou tuinanau uma, ina ia mafai ona faatumuina oe i le alofa” (Alema 38:12). O se faagutu e faaaoga e taiala ai, e faatonutonu ai, e taofi ai. E tatau ona taofiofia o tatou lagona malolosi. A oo ina faaaogaina faaletulafono, o le a faamanuiaina e le mana e foafoa ai le ola ma faapaiaina ai (tagai Aoaoga a Peresitene o le Ekalesia: Iosefa F. Samita [1998], 162–3).

E i ai pea lava faaosoosoga. Talu ai e le mafai e le tiapolo ona fanauina le ola, ua lotoleaga o ia i e uma ua i ai lena mana faalelagi. O ia ma i latou sa mulimuli ia te ia na tuliesea ma latou le maua ai le aia tatau mo se tino faitino. “Ua saili o ia ia pagatia tagata uma e pei o ia lava” (2 Nifae 2:27). O le a ia faaosooso, pe afai na te mafaia, e faaleaga, e faapiopio, ma afai e mafai, e faaumatiaina le meaalofa lea e mafai ai ona maua aiga e faavavau pe afai tatou te agavaa (tagai MF&F 132:28–31).

Afai tatou te faapalapalaina o tatou punavai o le ola pe taitai atu isi ia solitulafono, o le a i ai faasalaga e sili atu ona “tetele” ma “faigata ona onosaia” (MF&F 19:15) nai lo fiafiaga faaletino uma e mafai ona faatauaina.

Sa ta’u atu e Alema i lona atalii o Korianetona, “Ua e le iloa ea, lo’u atalii e, o nei mea o ni mea inosia i le silafaga a le Alii; ioe, ua silisili ona inosia i lo o agasala uma vagana ai le faamasaaina o le toto le sala po o le faafitia o le Agaga Paia?” (Alema 39:5). E le mafai ona tatou sosola ese mai le taunuuga o le solitulafono.

Na pau le faaaogaaga faaletulafono, faatagaina o mana o le foafoaina o le ola e i le va lea o le tane ma le ava, o e ua faaipoipoina aloaia ma faaletulafono. O se isi mea e ese mai ai, ua solia ai poloaiga a le Atua. Aua ne’i gauai atu i faaosoosoga mataga a le tiapolo, aua o aitalafu uma o le solitulafono e tatau ona totogi “seia e avatu tupe uma lava” (Mataio 5:26).

E leai se isi mea o sili ona faaalia mai ai le agalelei ma le alofa mutimutivale o le Atua nai lo le salamo.

O o tatou tino faaletino, a oo ina faamanualia, e mafai ona toe faaleleia i latou lava, ae o nisi taimi e ala i le fesoasoani a se fomai. Peitai, afai e ogaoga le afaina, e tele lava ina tumau se ma’ila e avea o se faamanatu o le manu’a.

O o tatou tino faaletino o se isi lea mataupu. E faatamaia o tatou agaga pe a tatou faia ni mea sese ma faia ni agasala. Ae e le faapei o le tulaga o o tatou tino faaletino, a oo ina maea le faagasologa o le salamo, e le toe i ai ni ma’ila e totoe ona o le Togiola a Iesu Keiso. O le folafolaga o le: “Faauta, o ia o le ua salamo i ana agasala, o ia lava lea ua faamagaloina, ma o A’u, o le Alii, e le toe manatuaina lava i latou” (MF&F 58:42).

A tatou talanoa e uiga i le faaipoipoga ma le olaga faaleaiga, e le maalofia le oo mai i le mafaufau, “Ae faapefea tuusaunoaga? O nisi e fananau mai ma ni tapulaa ma lē mafai ai ona fanauina ni fanau. O nisi e ta’umamaina ua faaleagaina a latou faaipoipoga ona o le faiamio o o latou taitoalua. O isi e le faaipoipo ae ola i ni olaga nofotoatasi ma le agavaa.

Mo le taimi nei, ou te tuuina atu lenei faamafanafanaga: O le Atua o lo tatou Tama! O le alofa uma ma le agalelei e faaalia i le faataitaiga sili o se tama faaleolaga nei, e faateleina ia te Ia o le o lo tatou Tama ma lo tatou Atua i talaatu o le malosi o le mafaufau o le tagata e malamalama ai. E tonu Ana faamasinoga: e leai se tuaoi o Lona alofa mutimutivale; o Lona mana e le mafaatusalia faalelalolagi. “Afai ua gata i lenei olaga mea tatou te faamoemoe i ai ia Keriso, ua sili lo tatou malaia i tagata uma lava” (1 Korinito 15:19).

Ou te faaaogaina nei ma le migao le upu malumalu. Ou te vaai faalemafaufau i se potu mo faamauga ma se fata faitaulaga o i ai se ulugalii talavou o tootutuli ai iina. O lenei sauniga paia o le malumalu e matuai sili naua nai lo se faaipoipoga, aua o lenei faaipoipoga e mafai ona faamauina e le Agaga Paia o Folafolaga, ma ua tautino mai e le mau faapea o le a tatou “mautofi i nofoalii, malo, itumalo, ma mana, ma puleaga” (MF&F 132:19). Ua ou vaai i le olioli o loo faatalitali mai mo i latou o e taliaina lenei meaalofa faalelagi ma faaaogaina ma le tatau.

Toeitiiti atoa le 70 tausaga o ma vaavaalua i le faaipoipoga ma Sister Donna Smith Packer. A oo mai i lo’u toalua, le tina o le ma fanau, e leai ni au upu e faamatala ai. E matua loloto tele le lagona ma e mamana naua le mana e toetoe ai ina a ou le magagana. O le taui aupito sili ua ma maua i lenei olaga, ma le olaga a sau, o a ma fanau ma fanau a le fanau. I le agai atu i le faaiuga faatasi o o ma taimi i le olaga nei, ou te faafetai mo minute taitasi faatasi ma ia i o’u autafa, ma mo le folafolaga na tuuina mai e le Alii o le a leai se iuga.

Ou te molimau atu o Iesu o le Keriso, o le Alo o le Atua soifua. O loo tu o Ia i le ao o lenei Ekalesia. O Lana Togiola ma le mana o le perisitua, e mafai ai e aiga na amata i le olaga nei ona faatasi e oo i le faavavau. O le Togiola, lea e mafai ona laveai i tatou taitoatasi, o le a leai ai ni ma’ila po o faamanatu o ni manu’a. O lona uiga po o a mea ua tatou faia po o fea na tatou i ai pe na faapefea ona tupu se mea, afai tatou salamo faamaoni, ua Ia folafola mai o le a Ia togiolaina. Ma pe a Ia togiolaina, ua totogiina lena mea. O le matua toatele lava o i tatou o e o lalafi solo, e pei na i ai, ma ni lagona o le tausalaina, ma le leiloa lelei pe faapefea ona sosola ese mai ai. E mafai ona e solaese i le taliaina o le Togiola a Keriso, ma o le a mafai ona liua ia faanoanoaga uma i le matagofie ma le alofa ma le faavavau.

Ou te matua faafetai mo faamanuiaga a le Alii o Iesu Keriso, mo le mana e foafoaina le ola, mo le mana o le togiola, mo le Togiola—o le Togiola lea e mafai ona fufulu mamaina soo se pisia e tusa lava po o le a le faigata po o le a le umi po o le a foi le tele o taimi na toe faia ai. O le Togiola e mafai ona toe faasaolotoina oe ia agai i luma, i le mama ma le agavaa, ia taulai atu i le ala ua e filifilia i le olaga.

Ou te molimau atu o loo soifua le Atua, o Iesu o le Keriso, o le Togiola e le o se mea lautele e mo le Ekalesia atoa. O le Togiola e mo tagata taitoatasi, ma afai o i ai se mea o e popole ai—o nisi taimi ua matua leva lava ua e tau le manatuaina—tuu i le Togiola e galue. O le a faamamaina, ma o le a e le, e pei o Ia, toe manatuaina au agasala. I le suafa o Iesu Keriso, amene.