2010–2019
Priesthood eo—Juon Menin Letok Ekwojarjar
Eprōļ 2015


Priesthood eo—Juon Menin Letok Ekwojarjar

Kōj kajjojo kar lōke er kōn juon iaam menin letok ko raorōk kar leļo̧k ioon armej.

Juon ian men ko ealikkar aō keememeji ej pād ilo kweilo̧k ko an priesthood eo āinwōt juon tikōn ej kab mōj kapiti im ej al al in koppelļok in,Come, all ye sons of God who have received the priesthood.” 1 Joteenin, n̄an aolep ro emōj aer kuktok ilo Conference Center in, im em̧ool, ijoko jabdewōt ipeļaakin lal in, ij kōban̄ijn̄inļo̧k jitōbōn al in ejenoļo̧k im ba n̄an kom, Itok, aolep emmaan ro nejin Anij im emōj aer bōk priesthood eo. Jen ja ļōmņak mōk kūr ko ad; jen kejakļo̧kijen jidik mōk kōn eddo ko ad; jen etale mōk ijo kwonaad; im jen ļoore Jisōs Kraist, ad Irooj. Men̄e jenaaj oktak jān doon ilo dedtad, ilo manit, ak ilo lal ko jekar jebar jān i, kōj jej juon wōt ilo kūr ko ad ilo priesthood eo.

N̄an kajojo iaad, jepļaaktok eo an Priesthood eo an Aron, n̄an Oliver Cowdery im Josep Smith jān Jon Peptaij, ekanuij aorōk. Ilo ejja āinwōt in, jepļaaktok eo an Melkisidek Priesthood eo, n̄an Josep im Oliver jān Piter, Jemes im Jon, ej juon men eļap.

Jen lukkun mool ilo ad bōk kūr kein, eddo kein, im jerbal kein me rej itok ippān priesthood eo jej kabjere.

Iaar en̄jaake juon eddo eļap ke kar kūr eō bwe in juon rijeje an doulul in tikōn ro aō. Iaar kanuij tiljek ilo ao kōpooji ļo̧o̧k ko iaar kōjparoki, bwe iaar kōnan kōm̧anm̧an ijo em̧m̧antata im iaar jeļā wāween kōm̧anm̧ane kūr jab in. Ekar kanuij utiej būruwō kōn jerbal eo aō. Kōm̧m̧ane aolep ijo imaron̄e, n̄an lukkuun jeļā eo aō, ekar juon aō kōttōpar ilo jabdewōt kūr ko ikar kabwijeri,

Ij kōjatdikdik kajjojo likao emōj kapiti n̄an Priesthood eo an Aron ej leļok n̄an e juon loļokijen ilo jetōb kōn ekwōjarjar eo an kūr eo kapiti n̄an e, bareinwōt iien ko remman bwe en kōļapļok kūr eo an. Iar bōk iien in em̧m̧an āinwōt juon tikōn ke doulul eo an bisop rekar kajjitōk bwe in bōkļok kwojkwoj eo n̄an juon eban dieojtok jān m̧weo imōn im ekar jokwe enan̄in juon maeļ jān imōnjar eo. Jibon̄in Jabōt em̧m̧anmōn eo, ke iaar kōļļaļļaļ ilo kōjem̧ eo an Brother Wright im ron̄ ainikien eo em̧ōjņo̧ ej ikkūr, “Delon̄tok,” iaar jab delon̄eļok wōt kapijuknen eo an ettā ak iaar barāinwōt delon̄eļo̧k juon ruum̧ ekar obrak kōn Jetōb eo an Irooj. Iaar jipadekļo̧k turin jikin babu eo an Brother Wright im kanuij kajimwe aō likit juon m̧ōttan pilawā ilo tien. Innām iaar kotak kap in dān eo, bwe en maron̄ idaak. Ke iaar etal jān ippān, iaar lo dān in komjalaal ilo mejān ke eaar ba, “Anij en kōjeramman eok, laddik en.” Im Anij ar kōjeramman eō—kōn juon bun̄bōro kōn kōkkaļļe ekwojarjar ko an kwojkwoj eo im kōn priesthood eo iaar kabwijere.

Ejjeļok tikōn, rūkaki, ak pris jān ward eo am enaaj meļokļoki iien loļok kein rem̧m̧an kōm̧ kar kōm̧m̧ani n̄an Clarkston, Utah, n̄an lōp eo lūbōn Martin Harris, juon iaan Rikam̧ool ro Jilu an Bok in Mormon. Ke kōm̧ jepoole jōbwe in lōb aetoktok eo eutiej me ekar kalikkar lōb eo lūbōn, im ke juon iaan ritōl ro an doulul eo eaar kōnono jān naan ko rekkan̄ jān “Naan in Kamool eo an Ri Kamool ro Jilu,” jej loi ilo jinoin tata Bok in Mormon, kōm̧ kar kaddōkļo̧k am iakwe kōn lo̧o̧k ekwōjarjar in im kōn m̧ool ko loi ilowaan.

Ilo iiō jab kein jibadbad eo am ekar n̄an erom āinwōt ļōm̧aro nejin Mosaia. Kōn er kar ba menin:

“Raar kanooj kajoorļo̧k ilo jeļā m̧ool eo; bwe raar armej in jeļāļo̧kjeņ ejim̧we im raar lin̄ōri jeje ko rekwojarjar ilo niknik, bwe ren maron̄ jeļā naan an Anij.

“Ak ejjab aolepān in; raar leļo̧k er n̄an eļap jar, im jitļo̦k; kōn menin ippāer eaar wor jitibōn kanaan, im jitōbōn revelesōn, im ke raar katakin, raar katakin kōn kajoor im maron̄ an Anij.”2

Ijjab ļōmņak ewōr bar juon kōttōpar em̧m̧anļo̧k jān an juon likao āinwōt ļōm̧arein rekajoor im jim̧we nejin Mosaia.

Ke eaar epaakļok ao kemem eo kein kajonoulrualitok im iaar m̧aanjabpopo in delon̄e jerbal an ritarinae im kar kipel ioon aolep likao ro ilo Pata eo an Lal in Kein Karuo, kar jakemaanļok eta bwe in bōk Melkisidek Priesthood eo, a mokta iaar aikuij telephone e ļok stake būreejtōn eo ao, Paul C. Child, kōn juon emmao ippān. E ekar juon eo ar iakwe im melele jeje ko rekwōjarjar, im ekar jipadpad eo an in bwe aolep ro jet ren bareinwōt iakwe im melele jeje kein. Kōnke iaar ron jān jet ian ro motta kōn emmao ko an reaetok im malij, iaar kōnan bwe jeļā jidik eo ao kōn jeje ko rekwōjarjar en alikkar; kōn menin, ke iaar kirļok ilo telephone iaar jakemaanļok lomnak eo bwe kemro en ion doon ilo Jabot eo ej itok ilo awa eo iaar jeļā ke enaaj kar juon wōt awa mokta jān jar in kwōjkwōj.

Uwaak eo an: “O Brother Monson, ejamin bwe iien n̄an arro etali jeje ko rekwojarjar.” Innām eaar jaketok iien eo im ekar jilu awa mokta jān jar in kwojkwoj eo an, im eaar jiron̄ eō bwe in bōkitok ippa jeje ko rekwōjarjar aō im iaar kōkaļļeiki im kōlaajrake eoon in jipan̄ ko ie.

Ke iaar tōparļo̧k kapijuknen eo an ilo Jabōt eo, rekar kanuij karuweineneik eō, innām intōrpiu eo ekar kōm̧m̧an. Būreejtōn Child eaar ba, “Brother Monson, kwōj kabwijer Priesthood eo an Aron. Enan̄in ke wōr enjel rej jijipan̄ eok?” Iaar uwaak ke ejjan̄in. Ke eaar kajjitōk eļan̄n̄e iaar jeļā bwe ej aō jimwe n̄an bōk jipan̄ rot in, iaar bar uwaak ke iaar jab jeļā.

Eaar jiron̄ eō, “Brother Monson, bar āliji tok jān am kar kiili jekjon 13th in Doctrine and Covenants.”

Iaar jino kōn ba bwe John Babptist eaar ba bwe ioon ro rikarejeran, ilo etan Massiah eo eaar leļo̧k Pristhood eo an Aron, eo ej kabwijer kii ko an tello̧ke jipan̄ an enjeļ ro.

“Bōjrak,” Būreejtōn Child ear ba. Innam ilo juon toņ elur, im ejouj, eaar kapilōk eō, “Brother Monson, jab meļo̧kļo̧k n̄an jidik bwe āinwōt juon ej kabjer Priesthood eo an Aron ej am telļoke jipan̄ an enjel ran.”

Enanin āinwōt n̄e ekar wōr juon enjeļ ilo ruum eo raan eo. Ijjan̄in meļo̧kļo̧ke intōrpiu in amro. Ejjan̄in kar dedeļok aō en̄jaake jitōbōn ekwōjarjar eo an iien eo ke kemro kar kōnono jān jeje ko eddo ko, jerbal ko, im kōjeram̧m̧an ko an Priesthood eo an Aron im ko an Melkisidek Priesthood eo—kōjeram̧m̧an ko rej itok wōt n̄an kōj ak rej barāinwōt itok n̄an baam̧le ko ad im n̄an ro jet jenaaj jeram̧m̧an n̄an jerbal n̄an er.

Iaar ekkapit āinwōt juon elder, im ilo raan in emakit eo aō n̄an jerbal in tariņae ippān navy, juon iaan ro ilo bisporik eo jān ward eo aō rekar koba ippān nokon eo aō im ro m̧ōtta ilo train station eo im iakiakwe eō. Mokta wōt jān iien train, eaar likūt peiu ilo juon bok taitōļ eo an Missionary Handbook.. Iaar ettōn̄ im kwaļo̧k naan eo ke iaar jab itōn etal in mijen.

Eaar uwaak, “Jekdoon ak bōk e. Emaron̄ kar menin jipan̄.”

E kar jipan̄. Iaar aikuiji juon men eoon wōt juon im eaetok nan likiti ikabin sea bag bwe nuknuk ko ao ren jebdak im ren jab elloktōktōk. Missionary Handbook eo ekar men eo iaar aikuji, im kanuij em̧m̧an an jerbal iumwin 12 wiik ko.

Bon̄ōn eo mokta jān iien kakkūje ilo Kūrijm̧ōj eo am, ļōmņak ko am rekar kōn kapijuknen ko am. Mōko imon ritarinae rekar lur, innām lur eo ekar jako jan leo motta ilo bunk eo epaake eō—juon laddik Mormon, Leland Merrill—eo ekar jino in̄n̄ūr kōn metak. Iaar kajjitōk unin, im e kar ba ekanuij naninmej. E kar jab kōņaan etal nan dispensary eo, bwe ekar jeļā ke men in enaaj kar bōbrae an rool nan kapijuknen eo an raan eo tok juon.

Ekar ļapļok an ļein naninmej ke ekar ella awa ko tokalik. Aliktata, kōnke e kar jeļā ke n̄a kar juon elder, eaar kajjitōk ippa bwe in leļok n̄an e juon kōjeram̧m̧an an priesthood.

Ijjan̄in kar kōm̧m̧ane juon kōjeramman moktaļok, ij jan̄in kar bōk juon kōjeram̧m̧an, im ij jan̄in kar kam̧oole leļo̧k in juon kōjeram̧m̧an. Ke iaar jar ilo ikkōn̄ kōn jipan̄, iaar keememeje Missionary Handbook eo ikabin sea bag eo aō. Iaar kaiūr im bōk kwobban bag eo im bōkļok bōk eo n̄an meram eo. Ijin iaar kōnono wāween an juon kōjeram̧m̧an rinan̄inmej. Ilo an lōn̄ jeeļa ro rej reitok, iaar wōnm̧aanļo̧k wōt kōn kōjeram̧m̧an eo. Mokta jān ao maron̄ kar kōro̧o̧l men otemjej ilowaan bag eo, Leland Merrill ekar kiki āinwōt juon nin̄nin̄. Kam̧m̧oolol eo am kajjojo kōm̧ ar en̄jaake kōn priesthood eo ekar kanuij ļap.

Iiō kein rekar bōktok elōn̄ļo̧k iien em̧m̧an n̄an aō kōm̧m̧ani kōjeram̧m̧an ko n̄an ro rej aikuiji im iban maron̄ bwini. Kajojo iien em̧m̧an ej letok kam̧m̧oolol emwilal ke Anij eaar kōjatdikdik im letok n̄an eō mennin letok ekwojarjar in. Ij kautiej priesthood in. Emōj aō kamool kajoor eo an Ejjan̄in jemļok an ļokjānaō kōn mennin bwilōn̄ ko ej kōm̧m̧ani.

M̧aan ro jeiu im jatu, kajojo iaad emōj leke koj kōn juon ian mennin letok ko reaorōk im kar likiti ion armej ilal in. Ilo an kautiej e priesthood eo ad im mour ilo jekjek eo ekkar bwe jen jet ro reteļoke, kōjeram̧m̧an ko an priesthood eo renaaj toorļok kōn koj. Ij iakwi naan lo loi ilo Doctrine and Covenant, jekjon 121, eoon 45, ko me rej jiron̄ kōj ta eo jej aikuiji kōm̧m̧ane bwe jen ro tōrllo̧ke jān ad obrak kōn iakwe em̧ool n̄an armej otemjej, im jan mweo imōn tōmak, im erreo en kainoknok lomnak ko ad. Innām ad lōke enaaj kanuij kajoor ilo im̧aan mejān Anij, im katak ko an priesthood eo renaaj to̧o̧rtok wōt ioon jetōb ko ad im āinwōt molawi ko jān lan.”

Āinwōt rikabwijer ro an priesthood eo an Anij, jej pād ilo jerbal eo an Irooj Jisōs Kraist. Emōj ad uwaake kūr eo An; jej pād ilo ijjilōk eo An. Jen jeļā kōn E. Jen lore bunten ne ko neen. Jen mour ekkar n̄an unleplep in katak ko an. Jan ad kōm̧m̧ane, jenaaj pojak n̄an jabdewōt jerbal ej kūr kōj n̄an kōm̧m̧ani e. Enin ej jerbal eo An. Em̧ool enin ej Kabun̄ eo An. Emool, e ej ad kapen, Kiin in Aiboojwoj, em̧ool e Nejin Anij. Ij kamool bwe E mour im ii kwaļok naan in kamool in ilo Etan ekwojarjar, amen.

Kakeememej ko

  1. “Come, All Ye Sons of God,” Hymns, no. 322.

  2. Alma 17:2–3.