Jabōt ej juōn men in Lan̄lōn̄

Ro jeiū im jatū jitenbōro, raan in kweiļo̧k kein ruo rekanooj aibojooj. Em̧ōj kōperan kōj kōn al ko rejetōbtōb im jar ko reaibojooj. Em̧ōj kōketak jetōb ko ad kōn ennaan ko kōn meram im m̧ool. Ilo Jabōt in Ijtō in, jej bar kuk ippān doon im kwaļo̧k kam̧m̧olool n̄an Anij kōn juon rikanaan!

Kajjitōk eo n̄an kōj kajjojo ej: kōn ta eo em̧ōj aō ron̄ im kar en̄jaake ilo kweiļo̧k in, ewi wāween aō naaj oktak? Jekdo̧o̧n uwaak ta eo am̧, ij barāinwōt kūr eok n̄an ettale en̄jaake ko am̧ kōn, im m̧wilūm kōn, raan in Jabōt.

Elukkuun itok limoiū kōn naan ko an Aiseia, eo eaar likūt raan in Jabōt “men in Lan̄lōn̄.”¹ Kiiō ij kajjitōkin iō make, raan in Jabōt ej ke lukkuun juon men in lan̄lōn̄ n̄an kwe im n̄a?

Iaar m̧oktaka en̄jaake lan̄lōn̄ in ilo Jabōt elōn̄ iiō ko rem̧ootļo̧k ke, āinwōt juon rim̧wijm̧wij eo epoub, raan in Jabōt eaar erom juon raan in kemour. Ilo jemļo̧k in juon wiik, pā ko peiū raar metak itok jān aō kwaļ kōn soap, dān, im juon būraj in karreo. Iaar aikuj juon iien kakkije jān eddo in jerbal eo aō epen. Raan in Jabōt eaar iien eo wōt imaron̄ kakkije.

Ta meļeļe in ke Rilo̧m̧o̧o̧r eo Eaar ba bwe“kar kōm̧m̧an Jabōt n̄an armej raņ, im jab armej n̄an Jabōt”?² Ij tōmak Eaar kōņaan bwe jen meļeļe bwe raan in Jabōt eaar menin jo̧let eo An n̄an kōj, ej letok iien kakkije jān men ko reppen ilo kajjojo raan im iien em̧m̧an n̄an kōkāāl mour in jetōb im kanniōk jim̧or. Anij eaar letok n̄an kōj raan in eaorōk, ejjab n̄an kamōņōņō bajjōk ak jerbal ko kajjojo raan ak n̄an kakkije jān jerbal, n̄an kōmeraikļo̧k mour in jetōb im kanniōk jim̧or.

Ilo kajjin Hibru, naan eo Jabōt meļeļein “kakkije.” Un eo an raan in Jabōt eaar kōm̧m̧an wōt ilo tōre in Kōm̧anm̧an Eo an laļ in, ālkin raan in jerbal ko jiljino, Irooj eaar kakkije jān jerbal in kōm̧anm̧an eo.³ Tokālik ke Eaar kwaļo̧k Kien ko Jon̄oul n̄an Moses, Anij eaar kakkien bwe jen “keememej raan in Jabōt, bwe kwōn kokwōjarjar e.”⁴ Tokālik, raan in Jabōt kar kōm̧m̧an āinwōt juon kakemeemej diwōjļo̧k eo an ro Nejin Israel jān kōm̧akoko ilo āneen Ijipt”⁵ Ilo mo̧o̧l aorōk eo eļap, kōn raan in Jabōt kar letok āinwōt juōn bujen n̄an indeeo, juon kein kakememej bwe Irooj enaaj kokwojarjar armej ro An.⁶

N̄an kakobaba, jej kiiō bōk kwojkwoj eo ilo raan in Jabōt ilo ememej Pinmuur eo an Jisōs Kraist.⁷ Bar juon alen, jej bujen bwe jenaaj bōk iood Etan ekwojarjar.⁸

Rilo̧mo̧o̧r eo eaar kwaļo̧k kadkad in Make āinwōt Irooj in Jabōt.⁹ Ej Raan eo an! Elōn̄ kōttan, Eaar kajjitōkin kōj bwe jen kōjparok raan in Jabōt¹⁰ak n̄an kokwōjarjar raan in Jabōt.¹¹ Jej pād ium̧win bujen n̄an kōm̧m̧ane āindein.

Ewi wāween ad kokwōjarjar raan in Jabōt? Ke iaar lukkuun dik, iaar katak laajrak ko me armej ekkā aer kōm̧m̧ane ikkijien men ko rej aikuj kōm̧m̧ani im ko rejjabkōm̧m̧ani ilo raan in Jabōt. Eaar jab to jān iien eo ke iaar ekkatak jān jeje ko rekwojarjar bwe makūtkūt im m̧wil ko m̧wilū ilo raan in Jabōt en kwaļo̧k juon kōkaļļe ikōtaaō im Jemedwōj Ilan̄.¹² Kōn aō meļeļe, iaar jab bar aikuj laajrak in ta ko ij aikuj kōm̧m̧ani im ta ko ijjab aikuj kōm̧m̧ani. N̄e ij tin kōm̧m̧ane kālet eo aō n̄an kōm̧m̧ane juon makūtkūt ilo raan in Jabōt, ij kajjitōkin iō make, “Ta kōkaļļe eo ikōņaan bwe in leļo̧k n̄an Anij?” Kajjitōk in ekar kōm̧m̧an bwe kālōt ko aō kōn raan in Jabōt ren alikkar.

Men̄e katak ko me rej iookļo̧k raan in Jabōt ej juon men in jem̧aan, eaar kōkaal ilo raan kein āliktata āinwōt juon m̧ōttan bujen eo ekāāl ippān juon kallim̧ur. Irooj eaar letok juon kien.

Bwe jen maron̄ lukkuun kōjparok kōj jān nana ko an laļ, jej aikuj ilo̧k n̄an mōn jar ko im bōk kwojkwoj eo ilo raan eo An ekwojarjar;

Raan in Jabōt ej juon raan em̧ōj kōjeno̧lo̧k n̄an kōj bwe jān kakkije jān jerbal ko ad, im wūjlepļo̧k ad n̄an eo Eutiej Bōtata. …

Im ilo raan in, jej aikuj kōpooj m̧ōn̄ā ko kijed kōn juon būro emo̧o̧l bwe jitļo̧k ko ad ren maron̄ em̧m̧an im jen obrak kōn lan̄lōn̄. …

Im jon̄an wōt ami naaj kōm̧m̧ane men kein kōn men in kam̧m̧oolol, kōn juon būro em̧ōņōņō im paaktokūm, … jenaaj bōk tarlep in kōjeram̧m̧an ko an laļ.¹³

Kōļmenļo̧kjen kōn em̧m̧an in jentōj in! Tarlep in kōjeram̧m̧an ko an laļ in em̧ōj kar kallim̧ur n̄an ro rej kōjparok raan in Jabōt.¹⁴ Ejejjet an Aiseia ba bwe raan in Jabōt “men in Lan̄ļōn̄.”

Ewi wāween am̧ kam̧ool bwe m̧wilūm ilo raan in Jabōt en tōl eok n̄an lan̄lōn̄ im lemōņōņō? N̄an kakobaba ilo am̧ etaļ n̄an mōn jar, bōk kwojwoj eo, im ilo am̧ tiljek ilo kūr eo am̧, ta makūtkūt ko jet remaron̄ jipan̄ eok n̄an kōm̧m̧an bwe raan in Jabōt en menin lan̄lōn̄ n̄an kwe? Ta kōkaļļe eo konaaaj leļo̧k n̄an Irooj n̄an kwaļo̧k am iakwe E?

Raan in Jabōt ej bōktok juon iien eaibojooj n̄an kakajoorļo̧k jemjerā ko an baam̧le. Ālkin men in, Anij ekōņaan bwe kōj kajjojo, āinwōt ro nejin, bwe jen jepļaak n̄an E āinwōt membōr ro emōj aer bōk menin letok kwojarjar ko an tampeļ, liāp ilo tampeļ āinwōt baam̧le ko, n̄an ro jibwid im jim̧aad, im n̄an ro ineed.¹⁵

Jej kōm̧m̧an bwe raan in Jabōt en menin lan̄lōn̄ n̄e jej katakin gospel eo n̄an ro nejid. Eddo ko ad āinwot juon m̧am̧a ak baba ej lukkuun alikkar. Irooj eaar ba kōn jinen im jemen ro ewōr nejier ilo Zaion, bwe jewawiwi naaj ioon bōran ro jinen im jemen eļan̄n̄e rejjab katakin ro nejier n̄an meļeļe katak eo an ukwelo̧k, tōmak ilo Kraist Nejin Anij emour, peptaij, im bōk menin letok eo an Jetōb Kwojarjar kōn likūt pā ko pein ioon bōrad ilo tōre eo ajri eo ej ralitōk an iiō.¹⁶

Jet iiō ko remo̧o̧tļo̧k Būreejtōnji eo Kein Kajuon eaar kwaļo̧k aōrok in iien an baam̧le. Raar je:

“Kōm̧ij kūr n̄an aolep m̧am̧a im baba ro n̄an wūjlepļo̧k aolep aer kijejeto n̄an katak im kōkajriri ajri ro nejier ilo katak ko an gospel eo me enaaj kepaak er n̄an mōn Jar ko. M̧ōko mōd en juon pedped n̄an mour jimwe, im ejjeļo̧k bar jabdewōt men emaron̄ bōk jikin ak kōm̧m̧ane jerbal eo aorōk em̧ōj an Anij letok n̄an katakin im kōkajjiririk ajri ro nejid.

“Kōm̧ij rōjan̄ m̧am̧a im baba ro im ajri ro n̄an kaorōk m̧oktata jar an baam̧le, nokon in jota an baam̧le, katak kōn gospel eo im kōmeļeļe ko, im aolepān m̧akūtkūt ko an baam̧le. Jekdo̧o̧n ewi jon̄an aorōk in im jejjet in jerbal ko ak m̧akūtkūt ko jet, rejjab aikuj kōjekdo̧o̧n eddo ko rekwojarjar im em̧ōj kapit bwe m̧am̧a im baba ro wōt remaron̄ kōm̧m̧ane.”¹⁷

N̄e ij kejōkļo̧kjeņ kōn naan in kapilōk in, ikōņaan bwe in kar bar ro̧o̧lim erom juon baba eo edik. Kiiō m̧am̧a im baba ro ewōr aer kein jipan̄ ko repād n̄an jipan̄ er kōm̧m̧an iien ko ewōr tokjier ippān baamle ko, ilo raan in Jabōt im raan ko jet. Ewōr LDS.org, Mormon.org ,, pija in Baibōl, channel eo an Mormon, Gospel Art Library, the Friend,, the New Era, the Ensign, Liaona eo, im ko jet. Kein jerbal kein relukkuun ļap tokjier n̄an m̧am̧a im baba ro n̄an kōļapļo̧k eddo ko aer rekwojarjar n̄an katakin ro nejier. Ejjeļo̧k bar jerbal eaorōk ļo̧k jān in ekwojarjar, eddo eo an m̧am̧a im baba!

Ilo am̧ kwaļo̧k gospel eo, kwonaaj katak eļapļo̧k. En̄in ej iaļ eo an Irooj n̄an jipan̄ eok n̄an lūn̄ūr gospel eo An.

Eaar letok n̄an kōj juon kien bwe jen katakin doon katak ko an aelōn̄ in kiin̄ eo an Anij.

Katakin ilo tiljek … , bwe en em̧m̧an ļo̧k am̧ meļeļe kōn katak ko, ilo kien ko an gospel eo, im ilo aolep men otemjeļo̧k ekkar n̄an aelōn̄ in kiin̄ eo an Anij.¹⁸

Kōn katak ko an gospel eo ekōm̧m̧an bwe raan in Jabōt en juon menin lan̄lōn̄. En̄in ej kallim̧ur eo ej iiookļo̧k ejjab kōn jon̄an oran baam̧le eo, wōn ro repād ie, ak ia eo rej pād ie.

Ilo kakobaba n̄an iien ippān baam̧le, komaron̄ en̄jaake mo̧o̧l in lan̄lōn̄ ilo raan in Jabōt itok jān jerbal in menmenbwij an baam̧le. Pukōt im lo etan ro uwaan baam̧le eo me raar mour moktaļo̧k—ro raar jab wōr aer iien n̄an bōk gospel eo ke raar pād ioon laļ in―emaron̄ bōktok lan̄lōn̄ eo eļap.

Em̧ōj aō kam̧ool menin. Elōn̄ iiō ko remo̧o̧tļo̧k, kōrā eo ippa ejitenbōro, Wendy, eaar kōņaan katak ewi wāween ad pukōt menmenbwij ko an baam̧le. Eddōkļo̧k eo an jinoin eaar rūmuj, ak jidik kōn jidik, eaar katak jon̄an an pidodo kōm̧m̧ane jerbal in ekwojarjar. Im iaar jan̄in kar lo an m̧ōņōņō eļapļo̧k jān iien eo. Kom̧ barāinwōt aikuj in ito itak n̄an laļ ko jet ak n̄an jentōr in jikin kōm̧m̧an menmenbwij ko an baam̧le. Ilo m̧ōko, kōn jipan̄ in kamputōr ak taļboon, komaron̄ en̄jaake armej ro ewōr aer itok limo n̄an kōm̧m̧ani kain̄i ko aer. Kōm̧m̧an bwe raan in Jabōt en menin Lan̄lōn̄ ilo am̧ pukōt rūtto ro jibum̧ im jim̧aam̧ im kadiwojļo̧k er jān kalbuuj ilo laļ eo an Jetōb!¹⁹

Kōm̧m̧an bwe raan in Jabōt en menin lan̄lōn̄ ilo am̧ kōm̧m̧ane jerbal ko am̧ n̄an ro jet, eļaptata ro ejjab em̧m̧an aer mour ak ro rej make iaer ak ro reaikuj.²⁰ Ilo am̧ kainem̧m̧an er enaaj ļapļo̧k am̧ mōņōņō.

Ke Aiseia eaar kōmeļeļeiki raan in Jabōt āinwōt “juon menin lan̄lōn̄,” eaar barāinwot katakin kōj wāween ad kōmmane bwe en laudin̄din̄. Eaar ba:

“Eļan̄n̄e kwōj kajeor neem̧ jān raan in Jabōt, jān kōm̧m̧an am̧ kōņaan ilo raan eo Aō e kwōjarjar, im ņa etan Jabōt men in lan̄lōn̄, men e kwōjarjar an Jeova e utiej; im naaj koutiej e, im jab kōm̧m̧an iaļ ko am̧, ak lo am̧ men in m̧ōņōņō ak kōnono kake naan ko am̧;

“Innām kwōnaaj kalan̄lōn̄ eok ilo Jeova.”²¹

Ejjab n̄an kōm̧m̧ani “kōņaan ko ad make” ilo raan in Jabōt emenin aikuj m̧wil ko ad make. Komaron̄ karemejet kwe make jān kōņaan ko am̧. Eļan̄n̄e kwoj kālet n̄an kalan̄lōn̄ eok make ilo Irooj,komaron̄ jab kōtļo̧k eok make n̄an kōjparoke e āinwōt raan ko jet. Iaļ in im m̧akūtkūt kein remaron̄ kōm̧m̧an ilo iien ko jet.

Ļōmņak kōn men in: ilo kōļļā juon m̧ōttan jon̄oul, jej bar kōro̧o̧ļok juon m̧ōttan jon̄oul in ļapļo̧k eo ad n̄an Irooj. Ilo kōjparok raan in Jabōt im kokwojarjar e, jej kōjeno̧lo̧k juon raan ilo raan ko jiljilimjuon āinwōt raan eo An. Kōn men in ej ad eddo n̄an wūjļep jāān ko im iien ko n̄an eo ej letok mour n̄an kōj kajjojo raan.²²

Tōmak ilo Anij ej waļo̧k jān iakwe ko ad kōn raan in Jabōt; tōmak ilo raan in Jabōt ej waļo̧k jān iakwe eo an Anij. Raan in Jabōt ekwojarjar ej juon lan̄lōn̄ eo em̧ool.

Kiiō, jemļo̧kin ļo̧k kweilo̧k in, jejeļā bwe jekdo̧o̧n ia eo jej jokwe ie jej aikuj jet waanjon̄ak ko n̄an ro ri tōmak ilubwiljin baam̧le ko ad, ro rituriid, im ro m̧ōttad.²³ Ritōmak ro rem̧ool rej kōjparok kwojarjar eo an raan in Jabōt.

Ij kōjem̧ļoke kōn naan kein aō kōn kajjitok eo āliktata an Moronai ke ej kōjem̧ļo̧k Bok in Mormon. Eaar je. “Itok n̄an Kraist, im weppān ilo E, im karmejete kom̧ make jān aolep men ko rejjab em̧m̧an, im iakwe Anij kōn aolep am̧ maron̄, lōmņak im kajoor, innām … kom̧ij weppān ilo Kraist.”²⁴

Kōn iakwe eo ilo būruwō, ij likūt menin ippāmi āinwōt aō jar, naan in kam̧ool, im kōjeram̧m̧an ilo āt kwojarjar eo etan Jisōs Kraist, amen.