Royb’eninkil aj eelel

Li Kolonel Jesukristo kixnumsi lix k’anjel sa’ ruchich’och’ xk’utb’esinkil lix wankil re k’irtesink ut tojok ix. Jun sut, wan resil sa’ li o’laju ch’ol re Lukas, sa’ li Ak’ Chaq’rab’, kiwech’e’ rix li Jesus yal xb’aan naq kitzekan ut kiwan sa’ xyanqeb’ laj maak (chi’ilmanq sa’ Lukas 15:2). Li Kolonel kiroksi li wech’e’k ix a’an re xk’utb’al chiqu chanru toosumenq chiruheb’ li ani xe’el sa’ li b’e.

Kixsumeheb’ li ke’xwech’ rix rik’in wiib’ li patz’om aajel ru:

“Ani eere laa’ex, wanq ta o’k’aalaq xkarneer ut taasachq junaq chiru, ma ink’a’ raj tixkanab’ li b’elelaju ro’k’aal sa’ li chaqi ch’och’ ut taaxik chixsik’b’al li sachenaq toj reetal toxtaw chaq?” (Lukas 15:4).

“Ut wi junaq ixq wanq ta lajeeb’aq xtumin ut taasachq junaq chiru, ma ink’a’ tab’i’ tixloch junaq xsaqenk ut tixmesu sa’ li kab’l re xsik’inkil toj reetal tixtaw?” (Lukas 15:8).

Chirix a’an, li Kolonel kixk’ut li jaljookil ru aatin chirix li alalb’ej aj eelel. Li jaljookil ru aatin a’in moko chirix ta li karneer chi moko chirix ta li tumin; a’an chirix jun li alalb’ej sachso. Rik’in li jaljookil ru aatin, k’a’ru li qatanqlankil jo’ naxk’ut li Kolonel naq jun li komon sa’ li qajunkab’al na’el sa’ li b’e?

Li alalb’ej aj eelel naxye re lix yuwa’ naq taaraj li jo’ nimal reechanihom. Naraj xkanab’inkil li rochoch ut xik re xsik’b’al xyeechi’ihom li ruchich’och’(chi’ilmanq sa’ Lukas 15:12–13). Chek’e reetal naq sa’ lix jaaljookil ru aatin li Kolonel, li yuwa’b’ej kisumen rik’in rahok, kixk’e li reechanihom. Chi yaal naq li yuwa’b’ej anchal naq kixyal xq’e xyeeb’al re li ralal naq taakanaaq. A’b’anan, naq li alalb’ej ak naxk’uub’ naq taaxik, li yuwa’b’ej chaab’il xna’leb’ naxkanab’ chi xik. Chirix a’an, li yuwa’b’ej naxk’ut lix rahom, ut na’ilok ut na’oyb’enin (chi’ilmanq Lukas 15:20).

Lin junkab’al kixnumsi jun li na’leb’ chanchan a’in. Wiib’eb li was jwal tiikeb’, li wanab’ ut laa’in xook’iresiik xb’aaneb’ li qana’ qayuwa’ jwal chaab’ileb’ xb’aanuhom. Ke’xk’ut li evangelio chiqu sa’ li qochoch, xooninqan chi maak’a’ li ch’a’ajkilal ut sa’ kaahib’al xoosumla sa’ li santil ochoch. A’b’anan, sa’ 1994, li qanab’, xSusan, ki’ab’lo’ xch’ool chirix li Iglees ut chirix junjunq lix k’utum. Ki’aaleek xb’aaneb’ li ani neke’eetz’unk ut neke’ tz’ilok rixeb’ laj jolominel sa’ li Iglees. A’am kixkanab’ naq taalajq lix paab’aal chirixeb’ li profeet ut li yo’yookil apostol. Naq kinume’ li kutan li xkab’ rix xch’ool kixq’ax ru lix paab’aal ut a’an kixkanab’ li Iglees. Li xSusan nikinxkanab’ chixwotzb’al lix seraq’, ninyo’ooni naq rik’in aa’an tinruuq chi tenq’ank jalaneb’.

Eb’ li was, lin na’ xmalka’an ut laa’in jwal ra kookana. Ink’a’ kiqataw ru k’a’ru kik’amok re xkana’b’ankil lix paab’aal. Lix b’aanuhom li wanab’ kixkob’ li raam li qana’.

Eb’ li was ut laa’in ak xook’anjelak chaq jo’ obiisp ut awa’b’ej re li molam, ut jwal us kook’anjelak chaq rik’ineb’ xkomon li qateep ut li qamolam naq kiqakanab’eb’ li b’elelaju ro’k’aal ut xkoho chixsik’b’al li jun sachso. A’b’anan, rik’in li qanab’, li xyalb’al qaq’e re xb’oqb’al chi sutq’iik wi’ chaq chik moko us ta ki’el.

Naq kiqasik’ li choxahil tenq’ re xnawb’al chanru taqatenq’a, kiqak’e reetal naq tento taqataaqe lix k’utum li yuwa’b’ej sa’ li jaljookil ru aatin chirix li alalb’ej aj eelel. Li xSusan kiraj xik ut tento naq taqakanab’ chi xik—a’b’an tento naq kixnaw ut kireek’a’ li qarahom maak’a’ xb’alaq’ choq’ re. Jo’kan ut, rik’in rahok ut chaab’ilal ak’ob’resinb’il, kookana chi ilok ut chi oyb’enink.

Lin na’ maajun wa kixkanab’ xraab’al ut xk’oxlankil li xSusan. Rajlal naq xwulak chaq sa’ li santil ochoch, kixk’e chaq lix k’ab’a’ xSusan sa’ li hu re tijok. Li was ut li rixaqil, li wankeb’ jwal nach’ rik’in li xSusan aran California, ke’xb’oq chi wa’ak sa’ li rochocheb’. Ke’xyal xq’e chiraatinankil junelik re naq tixnaw naq tz’aqal yaal naq raab’il a’an xb’aaneb’.

Li wiitz’in ut li rixaqil junelik ke’raatinaheb’ lix kok’al li xSusan aran Utah, ke’rileb’ ut ke’xraheb’. Ke’xyal xq’e re naq eb’ li ralal junelik b’oqb’ilaqeb’ sa’ li ch’utam re li qajunkab’al ut, naq xwulak xhoonalil naq taakub’eeq xha’ li ri li xSusan, li wiitz’in kiwan aran re xb’aanunkil li k’ojob’anb’il k’anjel. Choq’ re li xSusan ke’wan ajwi’ laj tzolol ochochnal ut aj ula’ ixq aj rahoneleb’ li maajun wa’ ke’xkanab’.

Naq eb’ li qalal xkoheb’ sa’ lix mision ut ke’sumla, kiqab’oq li xSusan sa’ li ninq’e re junkab’al a’an ut a’an kik’ulunk. Kiqak’e qach’ool xb’aanunkil li kok’ k’anjel sa’ li qajunkab’al b’ar wi’ li xSusan ut eb’ lix kok’al te’ruuq raj chi wank qik’in ut te’xnaw raj naq neke’qara ut naq a’aneb’ li xkomon li qajunkab’al. Naq li xSusan kixk’ul x’huhil lix tzolb’al sa’ jun li nimla tzoleb’aal re California, chiqajunilo koowan aran re xtenq’ankil sa’ xk’ulb’al rib’ lix tzolb’al. Us ta ink’a’ kooru chixk’ulub’ankil chixjunjunqaleb’ lix b’aanuhom, kooru chixk’ulub’ankil a’an. Kiqara, koo’ilok, ut koo’oyb’eni.

Sa’ 2006, chirix kab’laju chihab’ naq li xSusan ki’el sa’ li Iglees, li qako’ xKaty xko’o rik’in lix b’eelom aran California re naq a’an taaruuq chi xik sa’ li tzolob’al chirix li chaq’rab’. Ke’wan sa’ li tenamit wan wi’ li xSusan. Li saaj sumal a’an ke’xsik’ xtenq’ li xSusan, ut ke’xra. Li xSusan kitenq’ank re rilb’al li qi xLucy, wiib’ chihab’ chaq xyu’am, ut kixtikib’ xtenq’ankil li xLucy xk’eeb’al lix tij sa’ li q’ojyin. Li xKaty kinxb’oq chaq ut kixpatz’ we ma nink’oxla naq li xSusan taaq’ajq sa’ li Iglees. Ut kinch’olob’ chiru naq kiweek’a naq taaq’ajq ut naq aajel ru xkuyb’al royb’eninkil. Chirix chik a’an kinume’ oxib’ chihab’ chik, rik’in junelik rahom, koo’ilok ut koo’oy’b’eni.

Waqib’ chihab’ chaq sa’ li xamaan a’in, li wixaqil, xMarcia, ut laa’in chunchuuko sa’ xb’eeneb’ li chunleb’aal sa’ li na’jej a’in. Ok re inb’oqb’al jo’ Jolomil aj B’eresinel sa’ li kutan a’an. Li xMarcia, li junelik q’es lix xik rab’inkil xhasb’ li Musiq’ej, kixtz’iib’a jun li ch’ina hu b’ar wi’ naxye: “Nink’oxla naq xwulak xhoonalil naq li xSusan taaq’ajq chaq”. Lin ko’ xKaty kixye we naq tin’elq ut tinb’oq li xSusan re xyeeb’al re naq taaril li jolomil ch’utub’aj-ib’ re li kutan a’an.

Musiq’anb’il xb’aaneb’ li wiib’chi xnimal ru ixq a’in, xkohin chirix li ch’uutamil kab’l ut xinb’oq li wanab’. Ink’a’ xsume lix b’oqleb’ ch’iich’ ut ka’ajwi’ kinkanab’ jun li ch’ina esil b’ar wi’ kinb’oq chirilb’al li jolomil ch’utub’aj-ib’. Kixk’ul li ch’ina esil, ut choq’ re xsahil qach’ool, kireek’a naq taaril chixjunil li k’anjel re li ch’utub’aj-ib’. Kirab’iheb’ li profeet ut apostol li kixraheb’ junxil chihab’ chaq ut kixk’e reetal naq wankeb’ li ak’ k’ab’a’ej li ink’a’ naxnaweb’ ru, jo’ li Awa’b’ej Uchtdorf ut eb’ laj Elder Bednar, Cook, Christofferson ut Andersen. Chiru li hoonal a’an ut wankeb’ chik xkomon li kik’ulman li ki’el chaq sa’ li choxa, li wanab’—jo’ chanchan li alalb’ej aj eelel—kiq’aj chaq (chi’ilmanq saLukas 15:17). Li raatineb’ li profeet ut li apostol, ut lix rahom lix junkab’al kitenq’an re naq tixtikib’ wi’chik lix b’e re q’ajk sa’ lix na’aj. Chirix o’laju chihab’, li qako’ ut qanab’, li sachenaq chaq, kitawman wi’chik. Kiraqe’ chik li ilok ut li oyb’enink.

Li xSusan naxseraq’i li k’aru kixyu’ami jo’ chanru naq laj Lehi kixseraq’i sa’ lix Hu laj Mormon. A’an kixkoq’ li b’arb’ookil ch’iich’ ut kikana sa’ li q’ojyinal choql (chi’ilmanq 1 Nefi 8:23). A’an naxye naq ink’a’ kixnaw naq sachenaq toj reetal naq lix saqen li Kristo kixloch wi’chik lix paab’aal, saqen li kixsaqob’resi ru li q’ojyin natawman wi’ sa’ li ruchich’och’ rik’in li k’a’ru nayeechi’iik re xb’aan li Qaawa’ ut lix junkab’al.

Nak’ulman jun li sachb’a-ch’oolej sa’ li waqib’ chihab’ a’in xnume’. Li xSusan wan jun xnawom xch’ool toj ak’ re lix Hu laj Mormon, wan lix k’ulub’ re ok sa’ li santil ochoch, kik’anjelak sa’ li santil ochoch ut anajwan a’an aj tzolonel re li Dominkil Tzoleb’aal sa’ lix teep. Li rilob’aal li choxa kitehe’ choq’ reheb’ lix kok’al ut eb’ li ri, us ta kaw ru li kixnumsi, chanchan tawi’ naq maajun wa sachenaq.

Junjunq eere laa’ex, jo’ li junkab’al Nielson, wankeb’ eejunkab’al li xe’el sa’ li b’e chiru naab’al li hoonal. Lix k’utum li Kolonel choq’ reheb’ li ani wankeb’ jun cient xkarneer a’an xkanab’ankil li b’elelaju ro’k’aal ut xik re xsik’b’al li jun. Lix k’utum choq’ reheb’ li ani wankwb’ laajeb’ xtumin ut neke’xtz’eq jun a’an xsik’b’al toj reetal naq te’xtaw. Naq li ani sachenaq a’an jun li alalb’ej, lee ras malaj lee riitz’in li kixsik’ li elk, sa’ li qajunkab’al xqatzol naq, chirix naq naqab’aanu chixjunil li nokoru, taqara li komon a’an rik’in chixjunil li qaam ut noko’ilok, noko’tijok ut naqoyb;eni naq taak’utunq li ruq’ li Qaawa’.

Maare li k’utum jwal aajel ru li kixk’ut chiwu li Qaawa’, kik’ulman naq yooko chixtzolb’aleb’ li loq’jal hu sa’ li qajunkab’al, chirix naq li wanab’ ak ki’el sa’ li Iglees. Li qalal aj David yoo chirilb’al xsa’ li hu naq yooko chi tzolok chi ch’utch’u Lukas  15. Sa’ li kutan a’an, naq kiril li jaljookil ru aatin chirix li alalb’el aj eelel, jalan chik naq kiwab’i jo’ chanru wab’ihom junelik. Ink’a’ ninnaw k’a’ut, a’b’an junelik xweek’a naq chanchanin li alalb’ej kikana sa’ li ochoch. Naq laj David kiril sa’ li q’ela a’an, xink’e reetal naq, sa’ junjunq na’leb’ laa’in chanchanin ajwi’ li alalb’ej aj eelel. Chiqajunilo najtob’resinb’ilo ri’kin xloq’al li qaYuwa’(chi’ilmanq Romanos 3:23). Chiqajunilo naqaj ru lix tojb’al rix li maak xb’aan li Kolonel re naq took’iraaq. Chiqajunilo sachenaqo ut aajel ru naq tootawe’q. Li k’utb’esinb’il na’leb’ a’in kinxtenq’a naq li wanab’ ut laa’in sa’ xkab’ichal naqaj ru lix rahom li Kolonel ut lix tojxb’al rix li maak kixb’aanu. Jo’kan ut, li xSusan ut laa’in sa’ xkab’ichal wanko sa’ li b’e re q’ajk sa’ li qana’aj.

Li raatin li Kolonel sa’ jaljookil ru aatin naq na’aatinak chirix li yuwa’b’ej xk’ulb’al li ralal aj eelel, jwal ninqeb’ xwankil, ut ninpaab’ naq a’anaq raj li naxye a’an li taqayu’ami arin naq tooq’ajq rik’in li qaYuwa’ sa’ li qachoxahil ochoch. A’aneb’ neke’ xk’ut chiqu naq wan jun li yuwa’b’ej nokoxra, nokoroyb’eni ut nokoril. A’in li raatin li Kolonel; “Toj najt ajwi’ wan chaq, naq li xyuwa’ kiril ut kireek’a xnimal xrahom: koho sa’ aanil, koxq’alu chixkux ut kixtz’uub’ ru” (Lukas 15:20).

Chek’ul ut chink’ul taxaq li k’utb’esinb’il na’leb’ re xnawb’al chanru xtenq’ankileb’ li wankeb’ sa’ qayu’am ut xe’el sa’ li b’e, ut naq aajb’il ru, chiwanq li qakuyum ut lix rahom li qaChoxahil Yuwa’ ut li Ralal Jesukristo, naq naqara, naqil ut ut naqoyb’eni laj eelel. Sa’ xk’ab’a li Jesukristo. Amen.