Kōttar Nejin eo Ejerwaan

Rilo̧mo̧o̧r Jisōs Kraist eaar joļo̧k iien kwaļo̧k eo An ilo laļ in n̄an katakin kōn kajoor in kemour im lo̧mo̧o̧r eo An. Ilo juon tōre ilo Luk Jepta 15 ilo Kalim̧m̧ur Ekāāl, raar lukkuun kōrraate kōn An m̧ōn̄ā im joļo̧k iien ko An ippān rijerawiwi ro (lale Luk 15:2). Rilo̧mo̧o̧r eo eaar likūt kōnana in āinwōt juon iien em̧m̧an n̄an katakin kōj aolep kōn ekōjkan uwaake ro me em̧ōj aer jebwābwe jān iaļ eo.

Ekar uwaake ro rej kōrraaet E ilo An kajjitōkin er ruo kajjitōk ko raorōk:

“Armej ot iaami jibukwi sip ippān, eļan̄n̄e juon iaer e jako, e jab likūt ruwatimjuonn̄oul im ruwatimjuon ilo āne jemaden, im ilo̧k ilo̧kōnļo̧k eo e jako, n̄an tōre eo enaaj lo e?” (Luk 15:4).

“Ak kōrā rot, jon̄oul m̧ōttan silver ippān, eļan̄n̄e e jako juon m̧ōttan, e jab tile lamp, im pooke m̧weo, im eļap an pukote n̄an iien eo ej lo e?” (Luk 15:8).

Innām Rilo̧mo̧o̧r eo eaar katakin kōn būrabōļ eo kōn nejin eo ejerwaan. Būrabōļ in ejjab kōn 100 sip ak 10 m̧ōttan jelba ko rejako; ej kōn juon nejin eo ejebwābwe. Kōn būrabōļ in, ta eo Rilo̧mo̧o̧r eaar katakin kōj kōn wāween uwaak n̄e juon uwaan baam̧le eo ejebwābwe ilo iaļ eo an?

Nejin eo ejerwaan eaar karon̄ jemān bwe ekōņaan bwe en leļo̧k menin jo̧let ko an kiiō. Eaar kōņaan bwe en etal jān jokone in m̧weo im̧ōn im baam̧le eo an im pukōt men ko an laļ in (lale Luk 15:12–13). Jouj im jeļā bwe ilo būrabōļ eo an Rilo̧mo̧o̧r eo, jemān eo ejouj eaar uwaake ilo an leļo̧k n̄an ļeo nejin menin jo̧let ko an. Lukkuun m̧ool, jemān eaar m̧aat an maron̄ n̄an ukōt ļōmņak eo an n̄an an pād wōt. Ijoke, iien eo wōt juon nejin m̧aan erūtto ej kōm̧m̧ane kālet eo an, jemān eo ekapāāl ej kōtļo̧ke. Innām eo jemān eaar kwaļo̧k iakwe eo an em̧ool, im ej lale im ej kōttar (lale Luk 15:20).

Eaar wōr ejja jekjekin wōt ilo baam̧le eo aō. Ruo iaan būratōr ro aō retijlek, im juon aō jejtōr eo em̧m̧an, im n̄a kōm̧ kar rūttoļo̧k ippān ro jinem im jemem rem̧m̧an. Raar katakin kōm̧ gospel eo ilo m̧weo im̧ōm̧, kōm̧ kar kate kōm̧ m̧ae kōm̧ kar rūtto, im kōmjāān̄ aolep emen kar liāp ippān ro pāleem ilo tampeļ. Ijoke, ilo 1994 jejtōr eo am, Susan, eaar jino an dike Kabun̄ in im jet iaan katak ko an. Raar kipel e jān ro rej kajirere im ņa ruon ritōl ro m̧okta an Kabun̄ in. Eaar kotļo̧k bwe tōmak eo an ilo rikanaan eo emour im rijilōk ro en jako. Elōn̄ iien ko, pere ko an raar anjo ioon tōmak eo an im eaar kālet bwe en etal jān Kabun̄ in. Susan eaar kōmālim eō bwe in kwaļo̧k bwebwenato in kōn juon kōjatdikdik bwe emaron̄ jipan̄ ro jet.

Būratōr ro aō im n̄a kab lillap eo jinem eo emej pāleen kōm kar lukkuun būrom̧ōj. Kōm̧ kar jab tōmak ta eo emaron̄ in kar tōl e n̄an kowaan tōmak eo an. Kālet eo an jejtōr eo aō āinwōt eiten kar rupe būruwōn jinem.

Būratōr ro aō kab n̄a kōm̧ kar jerbal āinwōt bisōp ro im būreejtōn ro an doulul ko, im emōj am kar en̄jaake eļap lan̄lōn̄ kōn tōprak ko an ward im membōr in doulul ko ilo am likūt ratimjuonn̄oul ruatimjuon im pukōt eo juon ejako. Ijoke, ilo jekjek eo an jejtōr eo am̧, kijejeto ko am̧ me raar jab jem̧ļo̧k n̄an lo̧mo̧o̧ren e im n̄an karuwaineneik tok ekōm̧m̧an bwe en ettoļo̧k ļo̧k wōt.

Ilo am̧ kar pukōt tōl jān lan̄ ikkijien wāween am̧ maron̄ jipan̄ e ilo jejjet, eaar erom juon kein kam̧ool bwe kōm̧ij aikuj in ļoor waanjon̄ak in an jemān laddik eo ilo būrabōļ eo kōn nejin eo ejerwaan. Susan eaar kōm̧m̧ane kālet eo an, im kōm̧ij aikuj in kar ilo m̧ool kōtlo̧ke—ak ilo an jab jeļā im en̄jaake iakwe eo am̧ emool n̄an e. Im kōn menin, kōn iakwe im jouj, kōm̧ eaar lale im kōttar.

Jinō eaar jab jem̧ļo̧k an iakwe im kea kōn Susan. Aolep iien n̄e jinō ej pād ilo tampeļ, ej likūt etan Susan ilo kein illik āt ko n̄an jar im eaar jab jako an kōjatdikdik. Leo jeiū im lieo pāleen, ro rej jokwe epaaktata n̄an Susan ilo California, rekajoor karuwaineneiki n̄an aolep m̧akūtkūt ko an baam̧le. Raar kōppopo kōjota ilo m̧weo m̧weer kajjojo iiō n̄an kōļak raan eo an Susan. Raar lale bwe ren kōnono ippān iien otemjej im bwe en jeļā iakwe eo aer em̧ool.

Ļeo jatū im lio pāleen raar pukōtļo̧k ajri ro nejin Susan ilo Utah im kea kōn er im iakwe er. Raar lale bwe ajri ro nejin ren ruwainene iien otemjej n̄an ippān doon ko an baam̧le, im ke eaar jejjet iien eo n̄an an leddik eo jibūn Susan peptaij, eo jatū eaar pād ijo n̄an kōm̧m̧ane kain̄i eo. Susan eaar wōr an rūkaki in katakin m̧ōko im rūkaki in loļo̧k ro an kōrā ro rem̧m̧an me raar jab pōjrak jān aer loļo̧k e.

Ke ajri ro nejūm raar etal n̄an mijen ko im kar m̧are, rekar karuwaineneik Susan bwe en pād ilo iien kam̧ōņōņō kein an baam̧le. Kōm̧ eaar kajieon̄ in kōm̧m̧ani ikkure ko bwe Susan im ajri ro nejin ren maron̄ pād ippāmim im bwe ren jeļā bwe, ilōn̄ in men otemjej, kōm̧ ej iakwe er im rej m̧ōttan baam̧le eo am̧. Ke Susan ej bōk degree eo an jān California university, kōm̧ kar aolep pād ijōņ n̄an rie ilo kadiwōjļo̧k eo an. Men̄e kōm̧ kar jab nōbar aolep kālet ko an, kōm̧ kar lukkuun m̧ōņōņō ippān. Kōm kar iakwe e, kōm kar lale, im kōm kar kōttar.

Ilo 2006 eo, ālkin 12 iiō ko raar eļļāļo̧k jān ke Susan eaar ilo̧k jān Kabun̄ in, leddik eo nejim Katy im ļeo pāleen raar em̧m̧akūtļo̧k n̄an California bwe en maron̄ etal n̄an juon jikuuļ in law. Raar pād ilo ejja bukōn eo wōt Susan eaar pād ie. Ripālele rein reddik raar pukōt kōrā eo nej jineer,Susan, n̄an jipan̄e im rejtake, im raar kwaļo̧k aer iakwe e. Susan eaar jipan̄ lale leddik eo jibūm̧ ruo iiō-dettan, Lucy, im Susan make ekkein jipan̄ Lucy kōn jar ko an ilo bon̄. Katy eaar kūr tok eō juon raan im kajjitōk eļan̄n̄e iaar ļōmņak Susan enaaj kar bar ro̧o̧l tok n̄an Kabun̄ in. Iaar kalikar n̄an e bwe iaar en̄jaake bwe enaaj im bwe jej aikuj wōnm̧aanļo̧k wōt im kijenmej. Ilo an bar jilu iiō ko eļļāļo̧k ālikin tōre eo, kōn iakwe eo am̧ eaar jab jem̧ļo̧k, kōm̧ kar lale im kōm̧ kar kōttar.

Jiljino iiō rem̧ootļo̧k jān wiikān in, lio pāleeō, Marcia im n̄a, komro kar jijjet ilo jea ko maan ilo Im̧ōn Kweilo̧k in. Iaar itok n̄an bōk kūr in āinwōt juon Ritōl eutiej an Kabun̄ in eo ekāāl ilo raan eo. Marcia, eo ekkā an bōk im̧we jān jetōb eaar je juon noot n̄an n̄a bwe in riiti, “Ij ļōmņak etōreen n̄an Susan bwe en jepļaak tok.” Leddik eo Nejū ekar letok an ļōmņak bwe in etal jān kweilo̧k eo im ko̧o̧l e Susan n̄an karuwaineneiki tok bwe en alooj e kweilo̧k eo eļap raan eo.

Iaar bōk im̧we jān kōrā rein rem̧m̧an, iaar etal n̄an etōņaak eo im ko̧o̧l e jejtōr eo aō. Ikar reko̧o̧t e ainikiō ilo taļboon eo an im karuwaineneik e n̄an alooj e m̧wen̄an eo an kweilo̧k eo eļap. Eaar ron̄ ainikiō ke ej ron̄jake taļboon eo an. Kōm̧ kar lukkuun m̧ōņōņō ke ekar en̄jaake im̧we in jetōb eo n̄an alooje aolepān m̧wen̄an eo an kweilo̧k eo eļap. Eaar ron̄ jān rikanaan ro im rijilōk ro ekōn iakwe er ilo iiō ko m̧okta. Eaar ron̄ āt ko rekāāl ejjan̄in kar ron̄ m̧oktaļo̧k, āinwōt Būreejtōn Uchtdorf im Eļtōr Bednar, Cook, Christofferson, im Andersen. Ilo tōre in im iien ko rejeno̧lo̧k kōn en̄jaake ko rej itok jān lan̄, jejtōr eo aō—āinwōt juon nejin eo ejerwaan—ekar itok n̄an e make (lale Luk 15:17). Naan ko an rikanaan ro im rijilōk ro im iakwe eo an baam̧le eo an rekar im̧we e n̄an bar ro̧o̧l im jino jepļaak n̄an kapijuknen. Ālkin 15 iiō ko leddik eo nejim im jejtōr eo am̧ eo eaar jebwābwe em̧ōj loe. Lale im kōttar rekar jem̧ļo̧k.

Susan eaar kōmeļeļeiki en̄jaake in āinwōt Liai eaar kōmeļeļeiki ilo Bok in Mormon. Eaar kōtļo̧k aen in dāpdep eo im lo bwe e make ekar pād ilo tab in marok (lale 1 Nipai 8:23). Eaar ba bwe eaar jab jeļā ke ejebwābwe m̧ae iien tōmak eo an eaar bar ro̧o̧ltok kōn meram eo an Kraist. Eo eaar kalikkar e kōn oktak ko ikōtaan ta eo eaar en̄jaake ilo mour in im ta eo Irooj im baam̧le eo an rekar maron̄ kōjeram̧m̧ane kake.

Juon menin kabwilōn̄lōn̄ ekar waļo̧k jiljino iiō remootļo̧k. Susan ekar bar kōkāāl naan in kam̧ool eo an kōn Bok in Mormon. Em̧ōj an bōk peba in mālim n̄an deļan̄e tampeļ. Ej jerbal āinwōt juon rijerbal in kain̄i ilo tampeļ, im ej kiiō katakin Gospel Doctrine kūlaj eo ilo ward eo an. Wintō ko ilan̄ em̧ōj aer peļļo̧k n̄an ajri ro nejin im jibūn, im men̄e eaar wōr kaje ko reppen, ej en̄jaake āinwōt n̄e eaar jab iļo̧k jān kabun̄ in.

Elōn̄ iaad, āinwōt baam̧le eo an Nielson, elōn̄ ro uwaan baam̧le ko em̧ōj aer jebwābwe jān iaļ ko aer. Katak ko an Rilo̧mo̧o̧r n̄an aolep ro ewōr ippāer 100 sip bwe ren likūt ratimjuonn̄oul ruwatimjuon im etal im pukōt eo juon ejako n̄an lo̧mo̧o̧ren e. Katak ko an n̄an ro ewōr ippāer 10 m̧ōttan silver im ejako juon bwe ren pukōte n̄an n̄e epo. N̄e eo ejako ej juon eo nejim ļaddik ak leddik, būratōr ak jejtōr eo am̧ im rej kālet n̄an iļo̧k jān iaļ in, kōm̧ kar katak ilo baam̧le eo am̧, bwe ālkin aolepān men ko jemaron̄ kōm̧m̧ani, jej iakwe armej eo kōn aolepān ad kijejeto im jej lale, jej jar kake, im jej kōttar pein Irooj n̄an an kwaļo̧k e.

Ilo m̧ool katak eo eaorōk tata im Irooj eaar katakin eō ilo jekjek in em̧ōj an bōk jikin ilo iien eo baam̧le eo ej katak jān jeje ko rekwojarjar ālkin an jejtōr eo aō kar etal jān Kabun̄ in. Ļaddik eo nejim̧ David ekar riit jān katak in jej katak jāne Luk 15. Ke ekar riiti waanjon̄ak in kōn nejin eo ejerwaan, ikar ron̄ an ba eoktakļo̧k jān aō kar ron̄ m̧oktaļo̧k. Kōn jet un ko, ikar en̄jaake āinwōt juon ļaddik eo ej pād wōt ilo m̧weo. Ke David ej riit jibbon̄ eo, ikar loe bwe ilo jet wāween I ikar bar juon nejin eo ejerwaan. Kōj aolep jej likjab jān aiboojoj an Anij (lale Rom 3:23). Kōj aolep jej aikuji Pinmuur eo an Rilo̧mo̧o̧r n̄an kōmour kōj. Kōj aolep jej jebwābwe im jej aikuj bar jepļaaktok. Revelesōn eo raan eo ekar jipan̄ eō jeļā bwe jejtōr eo aō im n̄a kōm̧ro kar aikuj iakwe eo an Rilo̧mo̧o̧r im Pinmuur eo an. Susan im n̄a kōm̧ro kar jim̧or pād ilo iaļ in ej tōļļo̧k n̄an kapijuknen.

Naan ko an Rilo̧mo̧o̧r eo ilo būrabōļ eo raar kanooj kajoor ke Ej kōmeļeļe kōn an eo jemān wōnmaeiki nejin eo ejerwaan, im ij tōmak remaron̄ in jet kōmeļeļe ko kōn en̄jaake ko ad me jenaaj būki ippād n̄e jenaaj ro̧o̧lļo̧k n̄an ippān Jemād Ilan̄. Rej katakin kōj kōn juon baba eo eļap iakwe ippān, ej kōttar, im ej lale wōt kōj. En̄in ej naan ko an Rilo̧mo̧o̧r eo. “A ke ej ettoļo̧k wōt, jemān ej kile e, im tūriam̧o̧kake, im ettōr, im bun̄ ioon kōnwaan, im mejānmaik e” (Luk 15:20).

Kōm̧m̧an bwe kwe im n̄a jen bōk revelesōn n̄an jeļā wāween eo em̧m̧antata n̄an tōpar ro rejebwābwe ilo mour ko ad im, n̄e ekkar, n̄an bōk kijenmej im iakwe eo an Jemād Ilan̄ im Nejin, Jisōs Kraist, ilo ad iakwe, lale, im kōttar nejin eo ejerwaan. Ilo etan Jisōs Kraist, amen.