Faatalitali mo le Atalii Faamaumau Oa

Sa faaaluina e le Faaola Lana galuega i le lalolagi e aoao atu ai Lona mana faamalolo ma le togiola. I se tasi taimi i le Luka mataupu e 15 i le Feagaiga Fou, na faitioina ai o Ia i le taumamafa ma faaalu ia taimi e faatasi ai ma tagata agasala (tagai Luka 15:2). Sa faaaoga e le Faaola lenei faitioga e fai ma avanoa e aoao ai i tatou uma i le auala e tali atu ai ia i latou o e ua leiloa lo latou ala.

Sa Ia tali atu i e na faitio ia te Ia e ala i le fai atu ia te i latou o ni fesili taua se lua:

“O ai ea so outou e ana mamoe e selau, afai e leiloa le tasi, e le tuua e ia le ivagafulu ma le iva i le vao, ae alu ma saili i le na leiloa, seia maua?” (Luka 15:4).

“O ai ea foi le fafine e ana tupe e fuagafulu, afai e le iloa ia te ia le tasi tupe, e le tutu ea se afi, ma tafitafi le fale, ma matua saili i ai, seia maua?” (Luka 15:8).

Ona aoao mai lea e le Faaola le faataoto o le atalii faamaumau oa. O lenei faataoto e le o faatatau i mamoe e 100 po o ni tupe siliva; o loo faatatau i se atalii e toatasi faapelepele ua leiloa. E ala i le faataoto, o le a le mea ua aoao mai e le Faaola ia i tatou e uiga i le auala e tali atu ai pe a se ese se tagata o le aiga mai le ala?

Na faailoa atu e le atalii faamaumau oa i lona tama ua manao o ia i lona tofi i le taimi nei. Ua manao o ia e tuua le saogalemu o lona fale ma le aiga, ma saili atu i mea o le lalolagi (tagai Luka 15:12–13). Faamolemole ia matau, i le faataoto a le Faaola o loo tali atu ma le alofa le tamā e ala i le tuuina atu i le atalii o lona tofi. E mautinoa lava atonu na faia e le tamā mea uma sa mafai ona ia faia e faatauanau ai le atalii ia nofo. Peitai, o le taimi lava na faia ai e le atalii ua matua lana lava filifiliga, na faamatuu atu ai e le tamā poto o ia e alu. Ona faaali atu lea e le tamā le alofa faamaoni, ma vaavaai (pe ua tai foi ane) ma faatalitali o ia (tagai Luka 15:20).

Sa i ai i lo‘u aiga se aafiaga faapena. Na tausia a’u ma o‘u uso faamaoni e toalua, ma se tuafafine lelei, e ni matua sili ona lelei. Sa aoaoina i matou i le talalelei i lo matou aiga, sa oo ina avea i matou ma tagata matutua, ma sa faamauina uma i matou e toafa i le malumalu i o matou taitoalua. Peitai, i le 1994 na faasolo ina le fiafia lo matou tuafafine, o Susana i le Ekalesia ma nisi o ona aoaoga. Sa faatosinaina o ia e i latou sa tauemuina ma faitioina ia uluai taitai o le Ekalesia. Sa ia faatagaina lona faatuatua i perofeta ma aposetolo soifua ia faaitiitia. I le aluga o taimi, na faatoilaloina e ona masalosaloga lona faatuatua, ma ia filifili ai e tuua le Ekalesia. Ua tuuina mai e Susana ia te au le faatagaga e faasoa atu ai lana tala ma le faamoemoe e mafai ona fesoasoani ai i isi.

Sa matua matou faanoanoa lava ma o‘u uso ma lo matou tina nofotoatasi. Sa le mafai ona matou mafaufauina po o le a se mea na ono taitai atu ai o ia e lafoai lona faatuatua.

Sa matou auauna atu ma o‘u uso o ni epikopo ma peresitene o korama, ma sa matou lagonaina le olioli o le manuia [i le laveaiina] o tagata o le uarota ma korama a o matou tuua le ivasefulu ma le iva ae o atu e saili mai le tasi. Peitai, o a matou taumafaiga faifai pea e laveai mai lo matou tuafafine, ma valaaulia o ia e toe foi mai, sa atili ai ona le fiafia pea o ia.

A o matou saili atu i le taitaiga faalelagi po o le a se auala e mafai ai ona matou tali atu ma le talafeagai ia te ia, sa oo ina manino mai ai e tatau ona matou mulimuli i le faataitaiga a le tamā i le faataoto o le atalii faamaumau oa. Na faia e Susana lana filifiliga, ma sa tatau ona matou faamatuu atu faafaataoto o ia e alu—ae ia le aunoa o ia ma lona iloaina ma lagonaina o lo matou alofa faamaoni ia te ia. Ma o lea, faatasi ai ma se alofa faafouina ma le agalelei, sa matou vaavaai ai ma matou faatalitali.

Sa le‘i taofia lava le alofa ma le popole o lo’u tina mo Susana. O taimi uma lava e auai ai lo‘u tina i le malumalu, sa ia tuuina ai lava le igoa o Susana i le lisi o talosaga ma e lei mate ai le faamoemoe. Sa valaaulia e lo‘u uso matua ma lona faletua, sa nonofo latalata ia Susana i Kalefonia o ia i polokalama uma faaleaiga. Sa la saunia ‘aiga o le afiafi i lo la fale i tausaga taitasi i aso fanau o Susana. Na la faamautinoa la te faatumau pea i taimi uma fesootaiga ma ia, ma ia ona iloaina lo la alolofa faamaoni mo ia.

Sa aapa atu lo‘u uso laitiiti ma lona faletua i le fanau a Susana i Iuta ma popole mo i latou ma alolofa ia i latou. Sa la faamautinoa e valaaulia i taimi uma lana fanau i faatasiga faaleaiga, ma ina ua oo i le taimi mo le tama a le tama a Susana e papatiso ai, sa i ai iina lo‘u uso laitiiti e faatino le sauniga. Sa i ai foi faiaoga o aiga ma faiaoga asiasi alolofa a Susana o e sa lei faavaivai lava.

A ō ā matou fanau i misiona ma faaipoipo, sa valaaulia lava Susana ma auai i nei aso faamanatu faaleaiga. Sa matou taumafai ma le filiga e fatufatu ni gaoioiga faaleaiga ina ia mafai ai e Susana ma lana fanau ona faatasi ma i tatou ma ia latou iloa ai matou te alolofa ia i latou ma o i latou o se vaega o lo matou aiga. Ina ua maua e Susana se faailoga maualuga i se iunivesite i Kalefonia, sa matou i ai uma iina e lagolagoina o ia i lona faauuga. E ui lava sa le mafai ona matou taliaina ana filifiliga uma, ae o le mea mautinoa sa mafai ona matou taliaina o ia. Sa matou alolofa i ai, sa matou vaavaai, ma sa matou faatalitali.

I le 2006, i le mavae ai o le 12 tausaga talu ona tuua e Susana le Ekalesia, sa masii atu ai le ma afafine o Keiti ma lona toalua i Kalefonia ina ia mafai ona auai [lona toalua] i le aoga faaloia. Sa latou i ai i le aai lava e tasi ma Susana. Sa tepa taulai atu lenei ulugalii talavou i le tuafafine o lo la tamā o Susana mo fesoasoaniga ma le lagolago, ma sa la alolofa ia te ia. Sa fesoasoani Susana e tausi le la tama e lua tausaga le matua, o Lusi, ma tei ai lava ua ia fesoasoani atu ia Lusi i ana tatalo i le po. Sa valaau mai Keiti ia te au i se tasi aso ma fesili mai pe ou te manatu e le toe foi mai lava Susana i le Ekalesia. Sa ou faamautinoa atu ia te ia sa ou lagonaina o le a ia foi mai, ma e manaomia pea ona matou faaauau pea ona onosai. A o mavae atu le isi tolu tausaga, faatasi ai ma le alofa faifai pea, sa matou vaavaai ma matou faatalitali.

E atoa i le faaiuga o le vaiaso nei le ono tausaga talu ai, sa ma nonofo ai ma lo’u toalua o Marcia, i le laina pito i luma o lenei Maota Autu mo Konafesi. Sa loma le lagolagoina ai o au e avea ma se Pulega Aoao fou i lena aso. Sa tusi mai e Marcia, lea na te maua lava i taimi uma musumusuga a le Agaga, se tamai tusi ia te au e faitauina faapea, “Ou te manatu ua oo i le taimi mo Susana e toe foi mai ai.” Na fautua mai lo‘u afafine o Keiti ina ia ou alu atu e valaau Susana ma valaaulia o ia e matamata i le konafesi aoao i lena aso.

A o uunaia ai e nei tamaitai maoae e toalua, sa ou savali atu i le potu malolo ma valaau atu i lo‘u tuafafine. Sa na o lana masini na tali mai ma ou valaaulia ai o ia e matamata i lena sauniga o le konafesi aoao. Sa ia maua le feau. Sa matou fiafia ina ua uunaia o ia e matamata i sauniga uma o le konafesi. Sa ia faalogo atu i perofeta ma aposetolo na ia alofa i ai i tausaga ua mavae. Sa ia maua ni igoa fou sa ia lei faalogo muamua ai lava, e pei o Peresitene Uchtdorf ma Elder Cook, Christofferson, ma Andersen. I le taimi o lenei aafiaga ma isi aafiaga tulaga ese e uunaia mai le lagi, o lo‘u tuafafine—e pei foi o le atalii faamaumau oa—ua atamai o ia (tagai Luka 15:17). O upu a perofeta ma aposetolo ma le alofa o lona aiga na musuia ai o ia e salamo ma toe foi mai i le aiga. I le mavae ai o le 15 tausaga sa toe maua ai lo matou tuafafine sa leiloa. Ua uma le vaavaai ma le faatalitali.

Ua faamatalaina e Susana lenei aafiaga e pei ona faamatalaina e Liae i le Tusi a Mamona. Sa ia faamaamulu le āi uamea, ma maua ai o ia i se puao o le pogisa (tagai 1 Nifae 8:23). Sa ia ta‘ua na te le’i iloaina na leiloa o ia seia oo ina toe fāgua lona faatuatua e le Malamalama o Keriso, lea sa manino ai ia te ia le eseesega i le va o le mea sa ia oo i ai i le lalolagi ma le mea sa ofo atu e le Alii ma lona aiga ia te ia.

Sa tupu se vavega i le gasologa o le silia ma le ono tausaga talu ai. Ua i ai se molimau faafouina a Susana e uiga i le Tusi a Mamona. Ua ia toe maua lona pepa faataga o le malumalu. Ua galue o ia o se fai sauniga i le malumalu, o loo faiaoga o ia i le taimi nei i le vasega o Aoaoga Faavae o le Talalelei i lana uarota. Ua matala ifo faamalama o le lagi i lana fanau ma fanau a lana fanau, ma e ui na i ai ni taunuuga faigata, ae o loo lagonaina e peiseai sa ia lei tuua [lava le Ekalesia].

O nisi o outou, e pei o le aiga o Nielson, o loo i ai tagata o le aiga o e ua leiloa lo latou ala mo se taimi le tumau. O le faatonuga a le Faaola i tagata uma e ana mamoe e 100, ia tuua le ivagafulu ma le iva ma ō e laveai mai le tasi. O lana faatonuga ia i latou o loo i ai tupe siliva e 10 ae ua leiloa le tasi ia saili seia oo ina maua. Pe a leiloa se tasi o ou atalii po o ou afafine, lou uso po o lou tuafafine ma ua filifili e ō ese, ua matou aoaoina i lo matou aiga e faapea, a uma ona faia o mea uma tatou te mafaia, tatou te alolofa i lena tagata ma o tatou loto atoa ma tatou te vaavaai, tatou te tatalo, ma tatou faatalitali mo le aao o le Alii e faaali mai.

Atonu o le lesona aupito sili ona taua na aoao mai e le Alii ia te au e ala mai i lenei faagasologa sa tupu i le taimi o la matou suesuega faaleaiga o tusitusiga paia ina ua tuua e lo‘u tuafafine le Ekalesia. Sa faitau lo’u atalii o Tavita a o matou suesue faatasi le Luka 15. A o ia faitau le faataoto o le atalii faamaumau oa, na ese la’u faalogo i lena aso nai lo le mea sa ou faalogo muamua i ai. Mo nisi mafuaaga, ou te malamalama ai lava i taimi uma i le atalii sa nofo i le fale. A o faitau Tavita i lena taeao, sa ou iloaina i nisi o auala I o a’u lava o le atalii faamaumau oa. E le oo uma i tatou i le mamalu o le Tama (tagai Roma 3:23). E manaomia e i tatou uma le Togiola a le Faaola e faamalolo ai i tatou. O i tatou uma ua leiloloa ma e manaomia ai ona maua. O lenei faaaliga i lena aso, na fesoasoani ai ia te au e iloa ai sa ma manaomia uma ma lo‘u tuafafine le alofa o le Faaola ma Lana Togiola. Sa ma i ai moni lava ma Susana i luga o le ala lava lea e tasi e toe foi atu ai i le aiga.

O le fetalaiga a le Faaola i le faataoto a o Ia faamatalaina le faafeiloaiga e le tama o lona atalii faamaumau oa e mamana, ma ou te talitonu atonu o le faamatalaina lea o le aafiaga o le a tatou mauaina faatasi ma le Tamā pe a tatou toe foi atu i lo tatou aiga faalelagi. Ua aoaoina ai i tatou e uiga i se tama e alofa, o loo faatalitali mai, ma silasila mai. O le fetalaiga lenei a le Faaola: “Ua iloa mamao atu foi o ia e lona tama, ona mutimuti vale lea o lona alofa, ua momoe atu o ia, ua fusi ia te ia, ma sogi atu ia te ia” (Luka 15:20).

Tau ina ia tatou mauaina le faaaliga ia iloa ai le auala silisili e talanoa atu ai ia i latou i o tatou olaga o e ua leiloloa ma, pe a talafeagai ai, ia maua le onosai ma le alofa o lo tatou Tama i le Lagi ma Lona Alo, o Iesu Keriso, a o tatou alolofa atu, vaavaai, ma faatalitali mo le atalii faamaumau oa. I le suafa o Iesu Keriso, amene.